Eksọdusi

28 “Basi oylọna Aalọn+ nọvisunnu towe po visunnu etọn lẹ+ po, yèdọ Nadabi, Abihu,+ Eleazali po Itamali po+ sọn Islaelivi lẹ mẹ, na yé nido nọ wadevizọn hlan mi taidi yẹwhenọ lẹ.+ 2 Hiẹ na basi awù wiwe lẹ na Aalọn nọvisunnu towe, na gigo po whanpẹ etọn po.+ 3 Hiẹ na dọhona mẹhe yin azọ́nyọnẹntọ* lẹpo, yèdọ mẹhe yẹn ko na gbigbọ nuyọnẹn tọn+ lẹpo bọ yé na basi awù Aalọn tọn lẹ nado dohia dọ ewọ ko yin kinklandowiwe, na e nido sọgan sẹ̀n taidi yẹwhenọ hlan mi.

4 “Nuhe yé na wleawu etọn lẹ die: apò akọ́nnu tọn,*+ efọdi,*+ awù he ma tindo awà,+ tewu whẹkànnọ, tabla vonọtaun+ po homẹblanu+ de po; yé na basi onú wiwe ehelẹ na Aalọn nọvisunnu towe po visunnu etọn lẹ po, na ewọ nido nọ sẹ̀n taidi yẹwhenọ hlan mi. 5 Sika, sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ dagbedagbe po wẹ azọ́nyọnẹntọ lọ lẹ na yizan.

6 “Sika, sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ linlọ̀n dagbedagbe po wẹ yé na yí do basi efọdi lọ, podọ e dona yin kikó.+ 7 E dona tindo avọ̀ yinyẹ́n pẹvi awe, he na yin ṣiṣá do efọdi lọ go to abọ́ etọn awe lẹ ji. 8 Homẹblanu linlọ̀n*+ he yin sìnsìn do efọdi lọ go nado hẹn ẹn dote gbanun-gbanun dona yin bibasi po nuyizan dopolọ lẹ po: yèdọ sika, sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ linlọ̀n dagbedagbe po.

9 “Hiẹ na yí zannu onizi tọn+ awe bo na kàn yinkọ visunnu Islaeli tọn lẹ tọn do yé go,+ 10 yinkọ ṣidopo na yin kinkan do zannu dopo go podọ yinkọ ṣidopo he pò lẹ do zannu awetọ go, sọgbe hẹ mẹhowhe yetọn. 11 Mẹhe nọ kannu do zannu ji wẹ na kàn yinkọ visunnu Islaeli tọn lẹ tọn do zannu awe lọ lẹ go dile ewọ nọ dohiagona nude do.+ Enẹgodo, hiẹ na to yé do oslò sika tọn lẹ mẹ. 12 Hiẹ na ze zannu awe lọ lẹ do avọ̀ yinyẹ́n pẹvi abọ́ ji tọn efọdi lọ tọn lẹ go bọ yé na yin zannu oflin tọn lẹ na visunnu Islaeli tọn lẹ,+ podọ Aalọn dona nọ hẹn yinkọ yetọn lẹ do avọ̀ yinyẹ́n pẹvi awe abọ́ ji tọn etọn lẹ go to Jehovah nukọn taidi oflin de. 13 Hiẹ na basi oslò sika tọn lẹ 14 gọna gẹdẹ sika akú tọn awe he na yin linlọ̀n taidi okàn de,+ hiẹ nasọ sìn gẹdẹ he taidi okàn lọ lẹ do oslò lọ lẹ go.+

15 “Avọ̀-kótọ de wẹ hiẹ na yizan nado basi apò akọ́nnu tọn whẹdida tọn lọ.+ E na yin bibasi taidi efọdi lọ, podọ sika, sekan juju, sekan sopẹ́-sinmẹnọ, sekan vẹẹ ṣẹ́ṣẹ́ po alavọ linlọ̀n dagbedagbe po wẹ na yin yiyizan nado basi i.+ 16 Adà ẹnẹ lẹ dona sọzẹn eyin yè yẹ̀n ẹn do awe, podọ tedidi etọn na yin alọpapa dopo* bọ gbigblo etọn na yin alọpapa dopo. 17 Hiẹ dona to zannu he yin tito debọdo-dego lọ lẹ do e go, yèdọ zannu tito ẹnẹ lẹ. Tito tintan na tindo zannu lubi, topazi po emẹlaldi po tọn. 18 Tito awetọ na tindo zannu tulkuasi, safili po jaspali po tọn. 19 Tito atọ̀ntọ na tindo zannu lẹṣẹmi,* agati po amẹtisti po tọn. 20 Tito ẹnẹtọ na tindo zannu klisọlite, onizi po jadi po tọn. Yé dona yin tito do oslò sika tọn lọ lẹ mẹ. 21 Zannu lọ lẹ na nọtena yinkọ visunnu 12 Islaeli tọn lẹ tọn. Yinkọ lọ lẹ dona yin kinkan dile yè nọ yí hiadonu do kannu do núgo do, bọ yinkọ dopodopo na nọtena hẹnnu 12 lẹ dopodopo.

22 “Hiẹ na lọ̀n gẹdẹ lẹ do apò akọ́nnu tọn lọ go, taidi okàn sika akú tọn lẹ.+ 23 Hiẹ na basi alọkẹ sika tọn awe do apò akọ́nnu tọn lọ go bo na sìn alọkẹ awe lọ lẹ do apò akọ́nnu tọn lọ sin tónu awe lẹ go. 24 Hiẹ na hẹn okàn sika tọn awe lọ lẹ gbọn alọkẹ awe he to apò akọ́nnu tọn lọ sin tónu lẹ mẹ. 25 Hiẹ na hẹn tónu okàn awe lọ lẹ tọn gbọn oslò awe lọ lẹ mẹ bo nasọ sìn yé do avọ̀ yinyẹ́n pẹvi abọ́ ji tọn efọdi lọ tọn lẹ go to nukọn. 26 Hiẹ na basi alọkẹ sika tọn awe bo na ze yé do tónu awe he tin to apò akọ́nnu tọn lọ glọ lẹ go to odò pannukọn efọdi lọ.+ 27 Hiẹ dona sọ basi alọkẹ sika tọn awe dogọ do efọdi lọ go, to nukọn to odò na avọ̀ yinyẹ́n pẹvi abọ́ ji tọn awe lọ lẹ, yèdọ sẹpọ fie e yin ṣiṣá te to aga na homẹblanu linlọ̀n* efọdi lọ tọn.+ 28 Okàn juju de wẹ na hẹn apò akọ́nnu tọn lọ dote bo na sìn alọkẹ etọn lẹ do alọkẹ efọdi lọ tọn lẹ go. Ehe na hẹn apò akọ́nnu tọn lọ do otẹn etọn mẹ to efọdi lọ go, yèdọ to aga na homẹblanu linlọ̀n* lọ.

29 “Aalọn dona nọ hẹn yinkọ visunnu Islaeli tọn lẹ tọn to apò akọ́nnu tọn whẹdida tọn he tin to ahun etọn ji lọ to whepoponu eyin e biọ họmẹ yì Fiwiwe lọ taidi oflin tẹgbẹ tọn de to Jehovah nukọn. 30 Hiẹ na ze Ulimi po Tumimi* lọ po+ do apò akọ́nnu tọn whẹdida tọn lọ mẹ, bọ yé dona nọ tin to ahun Aalọn tọn ji to whepoponu eyin e wá Jehovah nukọn, podọ Aalọn dona nọ hẹn nuyizan whẹdidana Islaelivi lẹ tọn do ahun etọn ji to Jehovah nukọn to whepoponu.

31 “Sekan juju kẹdẹ wẹ hiẹ na yí do basi awù he ma tindo awà he na yin dido do odò na efọdi lọ.+ 32 Awù lọ na tindo nùvo de to ṣẹnṣẹn mẹ to aga.* Tónu nùvo lọ tọn dona yin kikó lẹdo pé gbọn avọ̀-kótọ de dali. Nùvo lọ na taidi nùvo gbaja de tọn, na e nikaa tlẹ́n. 33 Hiẹ dona yí sekan juju, sekan sopẹ́-sinmẹnọ po sekan vẹẹ ṣẹṣẹ po do basi pomeglanate* lẹ, bo nasọ basi ogàn-kéké sika tọn lẹ do ṣẹnṣẹn na pomeglanate* lọ lẹ gbọn tónu odò tọn etọn lẹdo pé. 34 Hiẹ dona to ogàn-kéké sika tọn dopodopo bọdo pomeglanate* dopodopo go, gbọn tónu odò tọn awù he ma tindo awà lọ tọn. 35 Aalọn nasọ nọ do e na sinsẹ̀nzọnwiwa, bọ nudidọ ogàn-kéké lọ tọn na nọ yin sisè eyin e jei fiwiwe lọ to Jehovah nukọn podọ eyin e lẹkọ, na e nikaa kú.+

36 “Hiẹ na basi ogàn sisẹ́ plẹ́bẹ́ sika akú tọn de bo na kannu do e go dile yè nọ yí hiadonu do kannu do nude go do dọmọ: ‘Jehovah wẹ wiwe.’+ 37 Hiẹ na yí okàn juju do sìn in do tabla vonọtaun lọ go;+ e na tin to tabla vonọtaun lọ go to nukọn. 38 E na tin to nukọn Aalọn tọn, podọ Aalọn wẹ na hẹn agbàn lọ eyin mẹde hùwhẹ gando onú wiwe+ he Islaelivi lẹ nọ klandowiwe lẹ go to whenue yé to nulọ lẹ na taidi nunina wiwe lẹ. E dona nọ tin to nukọn etọn to whepoponu, na yé nido sọgan yin alọkẹyi to Jehovah nukọn.

39 “Hiẹ na yí alavọ dagbedagbe do lọ̀n tewu whẹkànnọ, bo nasọ basi tabla vonọtaun alavọ dagbedagbe tọn po homẹblanu linlọ̀n lọ po.+

40 “Hiẹ nasọ basi tewu lẹ, homẹblanu lẹ, po tabla lẹ po na visunnu Aalọn tọn lẹ,+ na gigo po whanpẹ yetọn po.+ 41 Hiẹ nasọ yí onú ehelẹ do doaṣọ́na Aalọn nọvisunnu towe po visunnu etọn lẹ po, hiẹ na yiamisisadode yé+ bo na aṣẹ yé*+ bosọ klan yé do wiwe, yé nasọ nọ wadevizọn hlan mi taidi yẹwhenọ lẹ. 42 Humọ, hiẹ nasọ yí alavọ do basi ṣokoto gli* lẹ na yé, na yé nido nọ sú omẹ́ yetọn.+ Ṣokoto lọ lẹ na dite sọn alinkàn jẹ asapada. 43 Aalọn po visunnu etọn lẹ po dona nọ do yé eyin yé ja gòhọ opli tọn mẹ kavi eyin yé wá agbà lọ kọ̀n nado wadevizọn to ofi wiwe lọ, na yé nikaa hùwhẹ bo kú. Osẹ́ndoai kakadoi de wẹ ehe yin na ewọ po kúnkan* etọn lẹ po to godo etọn.