1 Kọlintinu lẹ

12 Todin, mẹmẹsunnu lẹ emi, yẹn ma jlo dọ mì ni tin to wunvi mẹ gando nunina gbigbọ tọn lẹ+ go. 2 Mìwlẹ yọnẹn dọ whenuena mì gbẹ́ yin omẹ akọta lẹ tọn,* mì nọ yin nuyiwadeji bo nọ yin hinhẹn buali nado hodo boṣiọ he ma nọ dọho+ enẹlẹ yì fidepope he yé deanana mì yì. 3 Todin, yẹn jlo na hẹn mì yọnẹn dọ mẹdepope he to hodọ gbọn gbigbọ Jiwheyẹwhe tọn dali ma nọ dọmọ: “Mẹhodẹ̀do wẹ Jesu!” podọ mẹdepope ma sọgan dọmọ: “Jesu wẹ Oklunọ!” eyin e ma yin gbọn gbigbọ wiwe dali.+

4 Todin, nunina voovo lẹ wẹ tin, ṣigba gbigbọ dopolọ wẹ tin;+ 5 podọ lizọnyizọn voovo lẹ wẹ tin,+ ṣogan Oklunọ dopolọ wẹ; 6 podọ aliho nuyiwa tọn voovo lẹ wẹ tin, ṣogan Jiwheyẹwhe dopolọ wẹ nọ yí yemẹpo zan to gbẹtọ lẹpo mẹ.+ 7 Ṣigba, awusọhia gbigbọ lọ tọn yin nina mẹdopodopo na lẹndai he nọ hẹn ale wá.+ 8 Na nuyọnẹn yí do dọho* yin nina mẹde gbọn gbigbọ dali, oyọnẹn yí do dọho yin nina mẹdevo sọgbe hẹ gbigbọ dopolọ, 9 yise yin nina mẹdevo+ gbọn gbigbọ dopolọ dali, nunina azọ̀nhẹngbọ tọn yin nina mẹdevo+ gbọn gbigbọ enẹ dopolọ dali, 10 ṣogan azọ́n huhlọnnọ lẹ wiwà yin nina mẹdevo,+ dọdai didọ yin nina mẹdevo, ohó gbọdo lẹ yinyọnẹn yin nina mẹdevo,+ ogbè voovo lẹ yin nina mẹdevo,+ podọ tadena ogbè lẹ tọn yin nina mẹdevo.+ 11 Ṣigba, gbigbọ ehe dopolọ wẹ nọ yí aliho nuyiwa tọn ehe lẹpo zan bo nọ má na mẹdopodopo kẹdẹdile e jlo e do.

12 Na kẹdẹdile agbasa yin dopo ṣigba bo tindo awutugonu susu do, podọ awutugonu agbasa enẹ tọn lẹpo, dile yé tlẹ sù sọ, agbasa dopo wẹ yé,+ mọ wẹ Klisti lọsu te ga. 13 Na gbọn gbigbọ dopo dali wẹ mímẹpo yin bibaptizi te do agbasa dopo mẹ, vlavo Ju lẹ kavi Glẹkinu lẹ, vlavo afanumẹ lẹ kavi mẹhe to yedekannu lẹ, podọ mímẹpo wẹ yin hinhẹn nado nù gbigbọ dopo.

14 Na nugbo tọn, agbasa lọ ma yin awutugonu dopo gba, ṣigba susu wẹ.+ 15 Eyin afọ na dọ dọ, “Na yẹn ma yin alọ wutu, yẹn ma yin apadewhe agbasa lọ tọn,” ehe ma zọ́n bọ e ma yin apadewhe agbasa lọ tọn gba. 16 Podọ eyin otó na dọ dọ, “Na yẹn ma yin nukun wutu, yẹn ma yin apadewhe agbasa lọ tọn,” ehe ma zọ́n bọ e ma yin apadewhe agbasa lọ tọn gba. 17 Eyin agbasa lọ pete wẹ na yin nukun, fie wẹ nugopipe nusise tọn na te? Eyin agbasa lọ pete wẹ nọ sènu, fie wẹ nugopipe owán sisè tọn na te? 18 Ṣigba todin, Jiwheyẹwhe ko ze awutugonu agbasa lọ tọn lẹ dopodopo do otẹn yetọn mẹ kẹdẹdile e jlo e do.

19 Eyin yemẹpo wẹ yin awutugonu dopolọ, fie wẹ agbasa lọ na te? 20 Ṣigba todin, yé yin awutugonu susu, ṣogan yin agbasa dopo. 21 Nukun ma sọgan dọna alọ dọ, “Yẹn ma tindo nuhudo towe”; kavi humọ, ota ma sọgan dọna afọ lẹ dọ, “Yẹn ma tindo nuhudo mìtọn.” 22 Kakatimọ, awutugonu agbasa tọn he tlẹ taidi nuhe yin madogánnọ lẹ yin dandannu, 23 podọ nugonu agbasa lọ tọn he mí lẹndọ yé ma tindo yẹyi sọmọ lẹ wẹ mí nọ na yẹyi hugan,+ bọ gbọnmọ dali nugonu mítọn he ma yọnwhanpẹ lẹ wẹ nọ yin bowlena hugan, 24 to whenuena e yindọ nugonu mítọn he yọnwhanpẹ lẹ ma nọ tindo nuhudo nudepope tọn. Etomọṣo, Jiwheyẹwhe ko wleawuna agbasa lọ to aliho ehe mẹ, bo nọ na yẹyi nugonu he tindo nuhudo lẹ hugan, 25 sọmọ bọ kinklan de ma na tin to agbasa lọ mẹ, ṣigba awutugonu etọn lẹ na nọ tindo mẹtọnhopọn dopolọ na ode awetọ.+ 26 Eyin awutugonu dopo to yaji, awutugonu he pò lẹpo nọ jiya hẹ ẹ;+ kavi eyin awutugonu dopo yin gigopana, awutugonu he pò lẹpo nọ jaya hẹ ẹ.+

27 Todin, agbasa Klisti tọn wẹ mìwlẹ yin,+ podọ dopodopo mìtọn yin awutugonu de.+ 28 Podọ Jiwheyẹwhe ko deazọ́nna mẹdopodopo to agun lọ mẹ: tintan, apọsteli lẹ;+ awetọ, yẹwhegán lẹ;+ atọ̀ntọ, mẹplọntọ lẹ;+ enẹgodo, azọ́n huhlọnnọ lẹ;+ enẹgodo, nunina azọ̀nhẹngbọ tọn lẹ;+ sinsẹ̀nzọn alọgọnamẹ tọn lẹ; nugopipe lẹ nado deanana onú;+ ogbè voovo lẹ.+ 29 E ma yin yemẹpo wẹ yin apọsteli lẹ, kavi e ma yin mọ wẹ? E ma yin yemẹpo wẹ yin yẹwhegán lẹ, kavi e ma yin mọ wẹ? E ma yin yemẹpo wẹ yin mẹplọntọ lẹ, kavi e ma yinmọ wẹ? E ma yin yemẹpo wẹ nọ wà azọ́n huhlọnnọ lẹ, kavi e ma yinmọ wẹ? 30 E ma yin yemẹpo wẹ tindo nunina azọ̀nhẹngbọ tọn lẹ, kavi e ma yin mọ wẹ? E ma yin yemẹpo wẹ nọ yí ogbè devo lẹ do dọho, kavi e ma yinmọ wẹ?+ E ma yin yemẹpo wẹ yin gbesetọ* lẹ, kavi e ma yinmọ wẹ?+ 31 Ṣigba, mì to vivẹnudo zọnmii na* nunina daho hugan lẹ.+ Ṣogan, yẹn na do aliho he yiaga hugan lọ hia mì.+