Ẹsteli

9 To azán 13tọ osun 12tọ tọn gbè, enẹ wẹ osun Adali* tọn,+ gbeegbe ohó ahọlu tọn po osẹ́n etọn po dona yin hinhẹndi,+ to azán he gbè kẹntọ Ju lẹ tọn lẹ donukun nado gbawhàn yetọn te, adà awetọ etọn wẹ jọ bọ Ju lẹ gbawhàn mẹhe gbẹwanna yé lẹ tọn.+ 2 Ju lẹ bẹ yede pli dopọ do tòdaho yetọn lẹ mẹ to agbegbe* Ahọlu Ahasuelusi+ tọn lẹpo ji nado tọ́nawhàn mẹhe to dindin nado wà danú do yé go lẹ, podọ sunnu dopo tata ma penugo nado nọte to nukọnna yé, na mẹlọ lẹpo ko jẹ budina yé ji wutu.+ 3 Podọ ahọvi agbegbe* lọ lẹ tọn lẹpo, agbegbe-gán lẹ,+ ayimatẹn-gán lẹ po mẹhe nọ penukundo whẹho ahọlu tọn lẹ go lẹ po to godonọna Ju lẹ, na yé to budina Mọldekai wutu. 4 Mọldekai ko lẹzun huhlọnnọ+ to owhé* ahọlu tọn gbè, yindidi etọn ko sọ to gbigbayipe gbọn agbegbe* lọ lẹpo ji, na huhlọn Mọldekai tọn to jijideji mapote wutu.

5 Ju lẹ yí ohí do hù kẹntọ yetọn lẹpo, bo hù yé sudo bosọ và yé sudo; nuhe jlo yé wẹ yé wà hẹ mẹhe gbẹwanna yé lẹ.+ 6 To Ṣuṣani*+ figángán* lọ, sunnu 500 wẹ Ju lẹ hù bo vasudo. 7 Yé sọ hù Palṣandata, Dalfọni, Aspata, 8 Polata, Adalia, Alidata, 9 Palmaṣta, Alisai, Alidai po Vaizata po, 10 enẹ wẹ visunnu ao Hamani he yin visunnu Hamedata tọn lẹ he yin kẹntọ Ju lẹ tọn.+ Ṣigba, to whenue yé ko hù yé godo, yé ma hò nudepope yí taidi ogblànnu.+

11 To gbenẹgbe, sọha mẹhe yin hùhù to Ṣuṣani* figángán* lọ tọn lẹ yin didọna ahọlu.

12 Ahọlu dọna Ahọsi Ẹsteli dọmọ: “To Ṣuṣani* figángán* lọ, Ju lẹ ko hù sunnu 500 gọna visunnu ao Hamani tọn lẹ bosọ và yé sudo. Etẹwẹ yé ko sọ wà to agbegbe* ahọlu tọn he pò lẹ ji?+ Etẹwẹ yin ovẹ̀ towe todin? E na yin nina we. Podọ etẹwẹ yin obiọ towe he bọdego? E na yin bibasi na we.” 13 Ẹsteli gblọn dọmọ: “Eyin e yọ́n to nukun ahọlu tọn mẹ,+ gbọ yè ni nagbè Ju he to Ṣuṣani* lẹ nado vọ́ yinuwa to osọ sọgbe hẹ osẹ́n egbé tọn;+ podọ gbọ visunnu ao Hamani tọn lẹ ni yin zizepla do pòtin go.”+ 14 Enẹwutu, ahọlu degbe dọ e ni yin wiwà domọ. Osẹ́n de yin didetọn to Ṣuṣani,* bọ visunnu ao Hamani tọn lẹ yin zizepla do núgo.

15 Ju he to Ṣuṣani* lẹ bẹ yede pli dopọ whladopo dogọ to azán 14tọ osun Adali tọn gbè+ bo hù sunnu 300 to Ṣuṣani,* ṣigba yé ma hò nudepope yí taidi ogblànnu.

16 Ju he pò to agbegbe* ahọlu tọn lẹ ji lẹ lọsu bẹ yede pli dopọ bo yiavùnlọna ogbẹ̀* yetọn.+ Yé de kẹntọ yetọn lẹ sẹ̀ sọn aimẹ+ bo hù gbẹtọ 75 000 sọn mẹhe gbẹwanna yé lẹ mẹ; ṣigba yé ma hò nudepope yí taidi ogblànnu. 17 Enẹ jọ to azán 13tọ osun Adali tọn gbè, yé sọ gbọjẹ to azán 14tọ gbè bo yí i do basi azán hùnwhẹ po ayajijẹ po tọn.

18 Ju he to Ṣuṣani* lẹ bẹ yede pli dopọ to azán 13tọ+ po 14tọ+ po gbè bo gbọjẹ to azán 15tọ gbè bosọ yí i do basi azán hùnwhẹ po ayajijẹ po tọn. 19 Enẹ wẹ zọ́n bọ Ju he nọ nọ̀ tòpẹvi he to gbonu agbegbe tatọ́-tònọ lọ tọn lẹ mẹ yí azán 14tọ osun Adali tọn do basi azán ayajijẹ po hùnwhẹ po tọn, yèdọ azán hùnwhẹ ayajẹ tọn de,+ podọ ojlẹ de nado nọ do mimá núdùdù tọn lẹ hlan ode awetọ.+

20 Mọldekai+ kàn nujijọ ehelẹ dai bo do wekanhlanmẹ ahọlu tọn lẹ hlan Ju lẹpo he nọ nọ̀ agbegbe* Ahọlu Ahasuelusi tọn lẹpo ji, yèdọ mẹhe to yakẹ po fidindẹn po. 21 E na yé anademẹ nado nọ payi azán 14tọ po 15tọ osun Adali tọn po go, to owhe lẹpo mẹ, 22 na to azán enẹlẹ gbè wẹ Ju lẹ mọ gbọjẹ sọn kẹntọ yetọn lẹ si podọ to osun enẹ mẹ wẹ awubla yetọn yin didiọ zun ayajijẹ bọ aluẹmẹninọ yetọn+ zun azán hùnwhẹ tọn de. Yé dona nọ payi azán lọ lẹ go taidi azán hùnwhẹ po ayajijẹ po tọn lẹ podọ taidi ojlẹ de nado nọ do mimá núdùdù tọn lẹ hlan ode awetọ bosọ nọ do nunina lẹ hlan wamọnọ lẹ.

23 Ju lẹ sọ kọngbedopọ nado zindonukọn to hùnwhẹ he yé ko bẹjẹeji lọ bibasi mẹ podọ nado wà nuhe Mọldekai kàn hlan yé lẹ. 24 Na Hamani+ visunnu Hamedata Agaginu+ lọ tọn he yin kẹntọ Ju lẹpo tọn, ko blasé sọta Ju lẹ nado và yé sudo,+ e ko sọ de Puli,+ enẹ wẹ Ovò nado dobuna yé bo và yé sudo. 25 Ṣigba, whenue Ẹsteli wá ahọlu nukọn, ahọlu biọ dọ gbedide lẹ ni yin kinkandai dọmọ:+ “Mì gbọ sébibla ylankan etọn sọta Ju lẹ+ ni gọwá ota etọn titi ji”; yé sọ ze ewọ po visunnu etọn lẹ po plá do pòtin go.+ 26 Enẹ wẹ zọ́n bọ yé ylọ azán ehelẹ dọ Pulimi, sọgbe hẹ yinkọ lọ Puli.*+ Enẹwutu, na nuhe yin kinkan do wekanhlanmẹ ehe mẹ lẹpo gọna nuhe yé mọ gando whẹho ehe go po nuhe ko wá yé ji lẹ po wutu, 27 Ju lẹ hẹn ẹn zun dandannu na yede, kúnkan yetọn lẹ po mẹhe kọnawudopọ hẹ yé lẹpo+ po nado nọ basi hùnwhẹ lọ ma súnadu to azán awe ehelẹ ji bo nọ yinuwa sọgbe hẹ nuhe yin kinkandai gando yé go to ojlẹ he yin dide lọ lẹ mẹ to whemẹwhemẹ. 28 Azán ehelẹ dona nọ yin finflin bo nọ yin pipayi e go sọn whẹndo de ji jẹ devo ji, gbọn whédo dopodopo, agbegbe* dopodopo po tòdaho dopodopo po dali; azán Pulimi tọn ehelẹ masọ dona doalọte to Ju lẹ ṣẹnṣẹn, podọ kúnkan yetọn lẹ ma dona doalọtena hùnwhẹ azán enẹlẹ tọn bibasi.

29 Whenẹnu, Ahọsi Ẹsteli, yèdọ viyọnnu Abihaili tọn po Mọldekai Ju lọ po yí aṣẹpipa yetọn pete do kanwe nado hẹn wekanhlanmẹ awetọ de he gando Pulimi go lodo. 30 E yí hogbe jijọho po nugbo po tọn lẹ do kàn wekanhlanmẹ ahọlu tọn lẹ hlan Ju lẹpo to agbegbe* 127 lọ lẹ ji,+ yèdọ fidugando Ahasuelusi tọn+ 31 nado hẹn hùnwhẹ azán Pulimi tọn lẹ bibasi to ojlẹ dide yetọn lẹ mẹ lodo, kẹdẹdile Mọldekai Ju lọ po Ahọsi Ẹsteli po ko na yé anademẹ nado nọ wà do+ podọ kẹdẹdile yelọsu ko hẹn ẹn zun dandannu na yede* po kúnkan yetọn lẹ po nado nọ yinuwa sọgbe hẹ anademẹ lọ lẹ do,+ gọna nùbibla+ po ovẹvivẹ po.+ 32 Podọ gbedide Ẹsteli tọn hẹn whẹho ehelẹ lodo gando Pulimi go,+ e sọ yin kinkandai do owe de mẹ.