2 Tẹsalonikanu lẹ

3 To popolẹpo mẹ, mẹmẹsunnu lẹ emi, mì nọ gbọṣi odẹ̀ mẹ na mí,+ na ohó Jehovah* tọn nido sọgan to gbigbayipe po awuyiya po+ bo to yinyin gigopana, kẹdẹdile e yin na mìwlẹ do, 2 podọ na mí nido sọgan yin whinwhlẹn sọn danuwatọ po mẹylankan lẹ po si,+ na yise ma yin nutindo mẹlẹpo tọn.+ 3 Ṣigba, nugbonọ wẹ Oklunọ, podọ e na hẹn mì lodo bo nasọ basi hihọ́na mì sọn mẹylankan lọ si. 4 Humọ, mí tindo jidide to Oklunọ mẹ gando mì go, dọ mì to anademẹ mítọn lẹ hodo bo nasọ to mọwà zọnmii. 5 Na Oklunọ ni zindonukọn nado to anadena ahun mìtọn to aliho dagbe mẹ, na mìwlẹ nido tindo owanyi na Jiwheyẹwhe+ podọ akọndonanu+ na Klisti tọn wutu.

6 Todin, mẹmẹsunnu lẹ emi, mí to anademẹ lẹ na mì to oyín Oklunọ mítọn Jesu Klisti tọn mẹ, nado nọ nọla na mẹmẹsunnu depope he to nuyiwa to aliho bẹwlu tọn+ mẹ bọ e ma yin sọgbe hẹ aṣa* he mì* mọyi sọn mí dè.+ 7 Na mìlọsu lẹ yọ́n aliho he mẹ mì dona hodo apajlẹ mítọn te,+ na mí ma yinuwa to aliho bẹwlu tọn mẹ to ṣẹnṣẹn mìtọn, 8 mọdopolọ mí ma dùnú mẹdepope tọn vọnu.*+ Kakatimọ, gbọn tuklajijẹ po magbọjẹ po dali wẹ míwlẹ nọ wazọ́n to ozán po okle po ma nado doagban pinpẹn na depope to mì mẹ to akuẹzinzan-liho.+ 9 E ma yindọ mí ma tindo jlọjẹ wẹ gba,+ ṣigba na mí jlo na do mídelẹ hia di apajlẹ de, na mìwlẹ nido nọ hodo wutu wẹ.+ 10 Na nugbo tọn, to whenuena mí tin to mì dè, mí nọ saba na mì gbedide ehe dọmọ: “Eyin mẹdepope ma jlo na wazọ́n, mọdopolọ mì dike ewọ dùnú blo.”+ 11 Na mí sè dọ mẹdelẹ to nuyiwa to aliho bẹwlu tọn mẹ to ṣẹnṣẹn mìtọn+ bo ma nọ jlo nado wazọ́n paali, ṣigba nọ to didá do nuhe ma dù yé mẹ.+ 12 Omẹ mọnkọtọn lẹ wẹ mí to gbedena bo to tudohomẹna to Oklunọ Jesu Klisti mẹ dọ, yé ni nọ yí abọẹninọ do wazọ́n bo nọ dù núdùdù he yelọsu lẹ wleawuna.+

13 Mẹmẹsunnu lẹ emi, na mìwlẹ tọn, mì gbọjọ to dagbewiwa mẹ blo. 14 Ṣigba, eyin mẹdepope ma setonuna ohó mítọn he tin to wekanhlanmẹ ehe mẹ, mì payi omẹ ehe go bo masọ dogbẹ́ hẹ ẹ ba blo,+ na winyan nido hù i. 15 Etomọṣo, mì pọ́n ẹn taidi kẹntọ de blo, ṣigba mì zindonukọn nado nọ to tudohomẹna ẹn+ taidi mẹmẹsunnu.

16 Todin, na Oklunọ jijọho tọn lọsu ni na mì jijọho to whepoponu to aliho lẹpo mẹ.+ Oklunọ ni tin hẹ mìmẹpo.

17 Nudọdomẹ ṣie die, he yẹn Paulu yí alọ ṣie titi do kàn,+ ehe yin ohia de to wekanhlanmẹ lẹpo mẹ; lehe yẹn nọ kanwe do die.

18 Nukundagbe majẹhẹ Oklunọ mítọn Jesu Klisti tọn ni tin hẹ mìmẹpo.