Matiu

8 To whenue e ko jẹte sọn osó lọ ji godo, gbẹtọgun daho lẹ hodo e. 2 Podọ pọ́n! pòtọnọ de wá bo litaina* ẹn, bosọ dọmọ: “Oklunọ, eyin hiẹ jlo domọ, hiẹ sọgan hẹn mi zun wiwe.”+ 3 Enẹwutu, e dlẹnalọ etọn bo doalọ dawe lọ go bosọ dọmọ: “Yẹn jlo! Yin hinhẹn zun wiwe.”+ To afọdopolọji, pòzọ̀n etọn yin kiklọ́ sọn e go.+ 4 Enẹgodo, Jesu dọna ẹn dọmọ: “A dike bo dọna mẹde blo,+ ṣigba yì bo do dewe hia yẹwhenọ,+ bosọ na nunina he Mose ko degbe etọn,+ taidi kunnudide de hlan yé.”

5 To whenue e biọ Kapẹlnaumi, mẹkanwekowhàngán de wá e dè, bo to vivẹ̀ ẹ+ 6 bosọ dọmọ: “Oklunọ, awukuzọ̀n to yasana devisunnu ṣie sinsinyẹn bọ e to aimimlọn to whégbè.” 7 E sọ dọna ẹn dọmọ: “Eyin yẹn jẹ finẹ, yẹn na hẹnazọ̀ngbọna ẹn.” 8 Mẹkanwekowhàngán lọ gblọnna ẹn dọmọ: “Oklunọ, yẹn ma jẹ na hiẹ nido biọ owhé ṣie gbè, ṣigba saa dọho poun podọ devizọnwatọ ṣie na yin azọ̀nhẹngbọna. 9 Na yẹnlọsu yin mẹde he tin to aṣẹpipa glọ, bo tindo awhànfuntọ lẹ to oglọ ṣie, bọ yẹn nọ dọna ode dọ, ‘Yì!’ ewọ sọ nọ yì, podọ na devo dọ, ‘Wá!’ ewọ sọ nọ wá, podọ na afanumẹ ṣie dọ, ‘Wà ehe!’ ewọ sọ nọ wà ẹ.” 10 Whenue Jesu sè ehe, awuji i bọ e dọna mẹhe to hihodo e lẹ dọmọ: “Nugbo wẹ yẹn dọna mì dọ, yẹn ma ko mọ yise he klo sọmọ de to mẹdepope mẹ to Islaeli gba.+ 11 Ṣigba, yẹn dọna mì dọ mẹsusu na wá sọn whèzẹtẹn-waji po whèyihọ-waji po bo na jagla to tafo kọ̀n hẹ Ablaham, Isaki po Jakọbu po to Ahọluduta olọn tọn mẹ;+ 12 to whenuena e yindọ visunnu Ahọluduta lọ tọn lẹ na yin dindlan do zinvlu mẹ to gbonu. Finẹ wẹ yé na viavi bo dù adúkúnkún te.”+ 13 To whenẹnu, Jesu dọna mẹkanwekowhàngán lọ dọmọ: “Yì. Gbọ e ni yì na we kẹdẹdile hiẹ ko do yise hia do.”+ Podọ devisunnu lọ yin azọ̀nhẹngbọna to gànhiho enẹ mẹ.+

14 Podọ to whenue Jesu wá owhé Pita tọn gbè, e mọ onọ̀ asi etọn tọn+ to aimimlọn bo to azọ̀n agbasa-hùnmiyọ́n tọn jẹ.+ 15 Enẹwutu, e doalọ alọ etọn go,+ bọ agbasa-hùnmiyọ́n lọ yì sọn e ji, bọ e fọ́n bo jẹ lizọnyina ẹn ji. 16 Ṣigba, to whenue owhè ko jai, gbẹtọ lẹ hẹn susu mẹhe tindo gbigbọ aovi tọn lẹ wá e dè; podọ e yí ohó do yàn gbigbọ lọ lẹ jẹgbonu, bo hẹnazọ̀ngbọna mẹhe ma to gángán lẹpo, 17 na nuhe yin didọ gbọn yẹwhegán Isaia gblamẹ nido sọgan yin hinhẹndi, dọmọ: “Ewọ lọsu yí awutu mítọn lẹ bo bẹ azọ̀n mítọn lẹ hẹn.”+

18 To whenue Jesu mọ gbẹtọgun de lẹdo e, e degbe nado yì awà awetọ ji.+ 19 Podọ wekantọ de wá bo dọna ẹn dọmọ: “Mẹplọntọ, yẹn na hodo we yì fidepope he hiẹ na yì.”+ 20 Ṣigba, Jesu dọna ẹn dọmọ: “Owọ̀ lẹ tindo odò lẹ podọ ohẹ̀ agahomẹ tọn lẹ tindo adọ́ lẹ, ṣigba Visunnu gbẹtọ tọn ma tindo fidepope he e na ze ota etọn bọdai do.”+ 21 Enẹgodo, devi devo dọna ẹn dọmọ: “Oklunọ, nagbè mi nado yì bo dì otọ́ ṣie whẹ́.”+ 22 Jesu dọna ẹn dọmọ: “To hihodo mi zọnmii, bo gbọ oṣiọ lẹ ni dì oṣiọ yetọn lẹ.”+

23 Podọ to whenue e biọ tọjihun de mẹ, devi etọn lẹ hodo e.+ 24 Todin, pọ́n! yujẹhọn sinsinyẹn de fọ́n to ohù lọ ji, sọmọ bọ agbówhẹn lẹ to gbigbaṣinyọ́n tọjihun lọ; ṣigba ewọ to amlọndọ.+ 25 Podọ yé wá bo fọ́n ẹn, bo dọmọ: “Oklunọ, whlẹn mí, mí to na dọ̀n!” 26 Ṣigba, e dọna yé dọmọ: “Naegbọn mì do to budi* sọmọ, mì yise pẹvinọ?”+ Enẹgodo, e fọ́n bo gbẹnuna jẹhọn lọ po ohù lọ po, bọ abọẹninọ daho de wá aimẹ.+ 27 Enẹwutu, awuji gbẹtọ lọ lẹ bọ yé dọmọ: “Omẹ nankọ wẹ ehe? Jẹhọn po ohù po tlẹ nọ setonuna ẹn.”

28 To whenue e jẹ awà awetọ ji to lẹdo Gadaleninu lẹ tọn mẹ, dawe awe delẹ he tindo gbigbọ aovi tọn wá sọn yọdò* lẹ ṣẹnṣẹn bo wá pé e.+ Yé ylanhùn tlala, sọmọ bọ mẹdepope ma tindo adọgbigbo nado nọ gbọn aliho enẹ ji. 29 Podọ pọ́n! yé dawhá bo dọmọ: “Etẹwẹ míwlẹ tindo nado wà hẹ we, hiẹ Visunnu Jiwheyẹwhe tọn?+ Be hiẹ wáfi nado sayana mí+ jẹnukọnna ojlẹ dide lọ wẹ ya?”+ 30 Pipli ohàn susu tọn de sọ to núdù dẹn do yé.+ 31 Enẹwutu, aovi lọ lẹ jẹ vivẹ̀ ẹ ji dọmọ: “Eyin hiẹ yàn mí jẹgbonu, do mí hlan pipli ohàn tọn lọ mẹ.”+ 32 E sọ dọna yé dọmọ: “Mì yì!” Enẹwutu, yé tọ́njẹgbonu bo yì biọ ohàn lọ lẹ mẹ, podọ pọ́n! pipli lọ pete hozín yì pópló lọ tónu* bo flẹ jẹ hùmẹ bosọ kú do osin mẹ. 33 Ṣigba, kanlinyìntọ lọ lẹ họnyi, bo biọ tòdaho lọ mẹ, bosọ na linlin nulẹpo tọn, kakajẹ otàn dawe he tindo gbigbọ aovi tọn lọ lẹ tọn ji. 34 Podọ pọ́n! mẹhe nọ nọ̀ tòdaho lọ mẹ lẹpo tọ́n wá pé Jesu, podọ to whenue yé mọ ẹn, yé vẹ̀ ẹ nado tọ́n sọn lẹdo yetọn mẹ.+