Johanu

12 Azán ṣidopo jẹnukọnna hùnwhẹ Juwayi tọn, Jesu wá Bẹtani, fie Lazalọsi,+ mẹhe Jesu fọ́n sọn oṣiọ lẹ mẹ nọ nọ̀. 2 Enẹwutu, yé wleawu núdùdù whèjai tọn na ẹn to finẹ, Malta sọ to lizọnyina yé,+ ṣigba Lazalọsi yin dopo to mẹhe to núdù* hẹ ẹ lẹ mẹ. 3 To whenẹnu, Malia yí nudi litli daa* amisisa owán gblingblinnọ, nadi akú akuẹgegenu tọn bo sá ẹ do afọ Jesu tọn lẹ go bosọ yí oda etọn do súnsún afọ etọn lẹ. Ohọ̀ lọ mẹ sọ gọ́ na owán gblingblin amisisa lọ tọn.+ 4 Ṣigba, Juda Iskaliọti,+ he yin dopo to devi etọn lẹ mẹ, mẹhe na de e hia to madẹnmẹ lọ dọmọ: 5 “Naegbọn amisisa owán gblingblinnọ ehe ma yin sisà yin denali* 300 bo yin nina wamọnọ lẹ?” 6 Nalete, e dọ ehe, e ma yin na e to wamọnọ lẹ tọn hòpọn wutu wẹ gba, ṣigba na ajotọ de wẹ ewọ bọ apotin akuẹ tọn lọ to e si bọ e ko nọ saba fìn sọn akuẹ he yin bibẹdo e mẹ lẹ mẹ wutu. 7 Whenẹnu, Jesu dọmọ: “Jo e do, na e nido sọgan payi aṣa ṣiọdidi tọn ehe go nado wleawudaina azán ṣiọdidi ṣie tọn.+ 8 Na wamọnọ lẹ tin to mì dè to whepoponu,+ ṣigba yẹn ma na tin to mì dè to whepoponu.”+

9 To whenẹnu, gbẹtọgun daho Ju lẹ tọn de yọnẹn dọ ewọ to finẹ, yé sọ wá, e ma yin na Jesu kẹdẹ tọn wutu gba, ṣigba nado mọ Lazalọsi ga, mẹhe e ko fọ́n sọn oṣiọ lẹ mẹ.+ 10 Todin, yẹwhenọgán lẹ blasé nado hù Lazalọsi ga, 11 na ewọ tọn wutu wẹ susu Ju lẹ tọn do to finẹ yì bo to yise tindo to Jesu mẹ.+

12 To aihọngbè, gbẹtọgun daho he wá hùnwhẹ lọ sè dọ Jesu ja Jelusalẹm. 13 Enẹwutu, yé yí odéma lẹ bo tọ́nyi nado pé e, bosọ jẹ awhádo ji dọmọ: “Mí vẹ̀ we, whlẹn ẹn! Donanọ wẹ mẹlọ he ja to oyín Jehovah* tọn mẹ.+ Donanọ wẹ Ahọlu Islaeli tọn lọ!”+ 14 Whenue Jesu mọ kẹtẹkẹtẹvu de, e sinai do e ji,+ kẹdẹdile e yin kinkandai do dọmọ: 15 “A dibu blo, viyọnnu Ziọni tọn. Pọ́n! Ahọlu towe ja, bo sinai to ovi kẹtẹkẹtẹ de tọn ji.”+ 16 Devi etọn lẹ ma mọnukunnujẹ onú ehelẹ mẹ to tintan whenu gba, ṣigba to whenue Jesu ko yin gigopana godo+ wẹ yé flindọ onú ehelẹ ko yin kinkandai gando e go dọ yé na yin wiwà na ẹn.+

17 Todin, gbẹtọgun he tin to finẹ po e po to whenue e ylọ Lazalọsi jẹgbonu sọn yọdò* mẹ+ bo fọ́n ẹn sọn oṣiọ lẹ mẹ to kunnude gando e go mapote.+ 18 Na ehe tọn wutu wẹ gbẹtọgun lọ wá pé e ga, na yé sè dọ e ko basi ohia ehe wutu. 19 Enẹwutu, Falesi lẹ dọ to yedelẹ ṣẹnṣẹn dọmọ: “Mì mọdọ mì ma to kọdetọn dagbe depope tindo. Mì pọ́n! Aihọn lọ pete ko hodo e.”+

20 Todin, Glẹkinu delẹ tin to mẹhe wá nado basi sinsẹ̀n to hùnwhẹ lọ tẹnmẹ lẹ mẹ. 21 Enẹwutu, yé dọnsẹpọ Filipi+ mẹhe wá sọn Bẹtsaida Galili tọn, yé sọ jẹ bibiọ to e si ji dọmọ: “Mẹdaho, mí jlo na mọ Jesu.” 22 Filipi wá bo dọna Andle. Enẹgodo, Andle po Filipi po wá bo dọna Jesu.

23 Ṣigba, Jesu gblọnna yé dọmọ: “Ojlẹ lọ ko wá na Visunnu gbẹtọ tọn nado yin gigopana.+ 24 Nugbonugbo wẹ yẹn dọna mì dọ, eyin okún likun tọn de ma flẹ do kọmẹ bo kú, okún dopo poun wẹ e nọ yin; ṣigba eyin e kú,+ whenẹnu e nọ de sinsẹ́n susu tọ́n. 25 Mẹdepope he yiwanna ogbẹ̀* etọn na hù i sudo, ṣigba mẹdepope he gbẹwanna ogbẹ̀* etọn+ to aihọn ehe mẹ na basi hihọ́na ẹn na ogbẹ̀ madopodo.+ 26 Eyin mẹdepope na yilizọn na mi, gbọ e ni hodo mi, podọ fihe yẹn tin te finẹ wẹ lizọnyitọ ṣie na te ga.+ Eyin mẹdepope na yilizọn na mi, Otọ́ lọ na gbògbéna ẹn. 27 Todin, n’yin* tuklado,+ podọ etẹwẹ n’na dọ? Otọ́, whlẹn mi sọn gànhiho ehe si.+ Ṣogan, nuhewutu yẹn biọ gànhiho ehe mẹ lọ niyẹn. 28 Otọ́, pagigona oyín towe.” To whenẹnu, ogbè de+ wá sọn olọn dọmọ: “Yẹn ko pagigona ẹn bo nasọ vọ́ pagigona ẹn.”+

29 Gbẹtọgun he to ote to finẹ lọ sè ogbè ehe bo jẹ didọ ji dọ hẹviosò yẹnwan. Mẹdevo lẹ dọmọ: “Angẹli de wẹ ko dọhona ẹn.” 30 Jesu gblọn dọmọ: “Ogbè ehe yin sisè, e ma yin na yẹn tọn wutu gba, ṣigba na mìwlẹ tọn wutu wẹ. 31 Todin, aihọn ehe to yinyin whẹdana; todin, ogán aihọn ehe tọn+ na yin yinyan jẹgbonu.+ 32 Ṣogan, whenue yẹn na yin zize yiaga sọn aigba ji,+ yẹn na dọ̀n gbẹtọ wunmẹ lẹpo do dee dè.” 33 Na taun tọn, e to ehe dọ nado do okú wunmẹ he e na kú to madẹnmẹ hia.+ 34 Whenẹnu, gbẹtọgun lọ gblọnna ẹn dọmọ: “Mí sè sọn Osẹ́n lọ mẹ dọ Klisti lọ na gbọṣi aimẹ kakadoi.+ Naegbọn hiẹ nado dọ dọ Visunnu gbẹtọ tọn dona yin zize yiaga?+ Mẹnu wẹ yin Visunnu gbẹtọ tọn he hodọ a te?” 35 Enẹwutu, Jesu dọna yé dọmọ: “Hinhọ́n lọ na gbẹ́ nọ mì ṣẹnṣẹn na ojlẹ vude dogọ. Mì zinzọnlin to whenue mì gbẹ́ tindo hinhọ́n, na zinvlu ni ma duto mì ji blo; mẹdepope he to zọnlinzin to zinvlu mẹ ma nọ yọ́n fihe e jei.+ 36 Mì do yise hia to whenue mì tindo hinhọ́n lọ, na mì nido sọgan lẹzun ovi hinhọ́n tọn lẹ.”+

Jesu dọ onú ehelẹ bo tọ́nyi bosọ yí ede whlá sọn yé dè. 37 Dile etlẹ yindọ e ko basi ohia susu to nukọn yetọn, yé ma to yise tindo to ewọ mẹ, 38 na ohó yẹwhegán Isaia tọn lẹ nido sọgan yin hinhẹndi, mẹhe dọmọ: “Jehovah,* mẹnu wẹ tindo yise to nuhe yin sisè sọn mí dè* mẹ?+ Podọ na nuhe dù awà Jehovah* tọn, mẹnu wẹ e ko yin didehia?”+ 39 Isaia sọ dọ whẹwhinwhẹ́n he wutu yé ma penugo nado yise dọmọ: 40 “Ewọ ko tọ́nnukunna yé bo ko hẹn ahun yetọn sinyẹn, na yé nikaa yí nukun yetọn lẹ do mọnú bo yí ahun yetọn do mọnukunnujẹemẹ bosọ lẹkọ bọ yẹn nado hẹnazọ̀ngbọna yé.”+ 41 Isaia dọ onú ehelẹ gando Klisti go, na e mọ gigo etọn wutu.+ 42 Etomọṣo, na taun tọn, mẹsusu sọn ogán lẹ mẹ tlẹ tindo yise to ewọ mẹ,+ ṣigba na Falesi lẹ tọn wutu, yé ma nọ yigbe etọn, na yé nikaa yin yinyan sọn sinagọgu mẹ;+ 43 na yé yiwanna gigo gbẹtọ lẹ tọn, yèdọ hú gigo Jiwheyẹwhe tọn.+

44 Ṣigba, Jesu yí ogbè lélé do dọmọ: “Mẹdepope he tindo yise to yẹn mẹ, e ma yin yẹn kẹdẹ mẹ wẹ e tindo yise te gba, ṣigba to mẹhe do mi hlan lọ mẹ ga;+ 45 podọ mẹdepope he mọ mi, mọ Mẹhe do mi hlan ga.+ 46 Yẹn wá taidi hinhọ́n de to aihọn mẹ,+ na mẹdepope he tindo yise to yẹn mẹ ma nado gbọṣi zinvlu mẹ.+ 47 Ṣigba, eyin mẹdepope nọ sè ohó ṣie lẹ bo ma nọ yìn yé, yẹn ma nọ dawhẹna ẹn gba; na yẹn wá, e ma yin nado dawhẹna aihọn gba, ṣigba nado whlẹn aihọn gán.+ 48 Mẹdepope he gbẹ́ mi dai bo ma yí ohó ṣie lẹ tindo mẹde he na dawhẹna ẹn. Ohó he yẹn ko dọ lẹ wẹ na dawhẹna ẹn to azán godo tọn gbè. 49 Na yẹn ma dọho sọn ojlo ṣie titi mẹ gba, ṣigba Otọ́ he do mi hlan lọsu wẹ ko degbena mi gando nuhe yẹn dona dọ taun lọ go.+ 50 Podọ yẹn yọnẹn dọ gbedide etọn zẹẹmẹdo ogbẹ̀ madopodo.+ Enẹwutu, nudepope he yẹn to didọ, kẹdẹdile Otọ́ ko dọ ẹ na mi do, mọ wẹ yẹn to didọ do.”+