Luku

11 Todin, ewọ to dẹ̀ho to fide, bọ to whenue e doalọte, dopo to devi etọn lẹ mẹ dọna ẹn dọmọ: “Oklunọ, plọn mí lehe mí na nọ hodẹ̀ do, kẹdẹdile Johanu lọsu plọn devi etọn lẹ do.”

2 Enẹwutu, e dọna yé dọmọ: “Whedepopenu he mì to dẹ̀ho, mì nọ dọ: ‘Otọ́, na oyín towe ni yin kinklandowiwe.*+ Na Ahọluduta towe ni wá.+ 3 Na núdùdù* azán dopodopo tọn mí sọgbe hẹ nuhudo azán lọ tọn lẹ.+ 4 Podọ jo ylando mítọn lẹ na mí,+ na mílọsu nọ jona mẹhe duahọ do mí lẹpo;+ a sọ hẹn mí biọ whlepọn mẹ blo.’”+

5 Whenẹnu, e dọna yé dọmọ: “Mí ni dọ dọ mẹde to mì mẹ tindo họntọn de bo yì e dè to zánhomẹ bosọ dọna ẹn dọ, ‘Họntọn, yàn akla atọ̀n na mi, 6 na họntọn ṣie de ṣẹṣẹ zingbejizọnlin wá dè e bọ yẹn ma tindo nudepope nado zedonukọnna ẹn.’ 7 Ṣigba, ewọ gblọn sọn họmẹ dọ: ‘A sọ dotukla mi ba blo. Ohọ̀n ko yin súsú, bọ yọpọ ṣie lẹ ko to adọzan ji hẹ mi. Yẹn ma sọgan fọ́n bo na we nudepope.’ 8 Yẹn dọna mì dọ, eyin ewọ ma na tlẹ fọ́n bo na ẹn nudepope na họntọn etọn wẹ e yin wutu, na nugbo tọn, na linsinsinyẹn majomajo etọn wutu,+ e na fọ́n bo na ẹn nudepope he e tindo nuhudo etọn lẹ. 9 Enẹwutu, yẹn dọna mì dọ, mì to bibiọ zọnmii,+ e nasọ yin nina mì; mì to dindin zọnmii, mì nasọ mọ; mì to họ̀nhúhú zọnmii, e nasọ yin hùnhùn na mì.+ 10 Na mẹdepope he to bibiọ nọ mọyi,+ mẹdepope he to dindin nọ mọ, podọ mẹdepope he to họ̀nhúhú, e na yin hùnhùn na ẹn. 11 Na nugbo tọn, otọ́ tẹwẹ to mì mẹ bọ eyin visunnu etọn biọ whèvi, e na ze odàn na ẹn do whèvi tẹnmẹ?+ 12 Kavi eyin e biọ azìn, bọ e na ze aklekle na ẹn? 13 Enẹwutu, eyin mìwlẹ, he tlẹ yin mẹylankan, yọ́n lehe yè nọ na nunina dagbe ovi mìtọn lẹ do, nẹmunẹmu wẹ Otọ́ he to olọn mẹ ma nado na gbigbọ wiwe mẹhe to bibiọ ẹ lẹ!”+

14 To godo mẹ, ewọ yàn aovi he nọ hẹnmẹ zun unbọpẹnnọ de jẹgbonu.+ To whenue aovi lọ ko tọ́njẹgbonu godo, dawe unbọpẹnnọ lọ dọho, bọ awuji gbẹtọgun lọ lẹ.+ 15 Ṣigba, mẹdelẹ to yé mẹ dọmọ: “Beẹlzebuli,* ogán aovi lẹ tọn wẹ e nọ yí do yàn aovi lẹ jẹgbonu.”+ 16 Podọ nado whlé e pọ́n, mẹdevo lẹ jẹ ohia de biọ ji+ to e si sọn olọn. 17 Na e yọ́n nuhe lẹn yé te wutu,+ e dọna yé dọmọ: “Ahọluduta depope he klan sọta ede nọ jẹvọ́, podọ owhé de he klan sọta ede nọ họliai. 18 Mọdopolọ, eyin Satani lọsu klan sọta ede, nawẹ ahọluduta etọn na nọte do? Na mìwlẹ dọ dọ yẹn nọ yàn aovi lẹ jẹgbonu gbọn Beẹlzebuli gblamẹ. 19 Eyin gbọn Beẹlzebuli gblamẹ wẹ yẹn nọ yàn aovi lẹ jẹgbonu, gbọn mẹnu gblamẹ wẹ visunnu mìtọn lẹ nọ yàn yé jẹgbonu lo? Na ehe wutu, yewlẹ wẹ na dawhẹna mì. 20 Ṣigba, eyin gbọn alọvi Jiwheyẹwhe tọn+ gblamẹ wẹ yẹn to aovi lẹ yàn jẹgbonu, be Ahọluduta Jiwheyẹwhe tọn ko gbọ mì go.+ 21 To whenuena dawe huhlọnnọ de, he blagbajana ede ganji, to hihọ́-basina họ̀nmẹ etọn, nude ma na wà nutindo etọn lẹ. 22 Ṣigba, to whenue mẹde he dohuhlọn hugan ewọ fọ́n do e ji bo gbawhàn etọn, omẹ enẹ nọ yí awhànfunnu etọn he go e dejido lẹpo, bo nọ má nuhe e bẹ sọn e si lẹ hẹ mẹdevo lẹ. 23 Mẹdepope he ma tin to adà ṣie mẹ jẹagọdo mi, podọ mẹdepope he ma to gbẹtọ lẹ bẹpli hẹ mi to yé vúnvún pé.+

24 “Eyin gbigbọ mawé de tọ́n sọn gbẹtọ de mẹ, e nọ gbọn ofi húhú klókló lẹ bo nọ dín gbọjẹtẹn de, podọ eyin e ma mọ depope, e nọ dọmọ, ‘Yẹn na lẹkọyi owhé ṣie gbè fie yẹn tọ́n sọn.’+ 25 Podọ to whenue e jẹ finẹ, e nọ mọdọ owhé lọ ko yin ziza wé bosọ yin aṣọ́dona. 26 Enẹgodo, e nọ yì bo nọ hẹn gbigbọ ṣinawe devo lẹ he ylanhu ewọ lọsu wá, podọ to whenue yé ko biọ e mẹ godo, yé nọ nọ̀ finẹ. Enẹwutu, ninọmẹ mẹlọ tọn to godo mẹ nọ wá ylanhu tintan tọn.”

27 Todin, dile e to onú ehelẹ dọ, nawe de sọn gbẹtọgun lọ mẹ dọ po ogbè lélé po na ẹn dọmọ: “Ayajẹnọ wẹ adọ̀ he mẹ hiẹ whẹ́n te po anọ́ he hiẹ nọ́ lẹ po!”+ 28 Ṣigba, e dọmọ: “Lala, kakatimọ, ayajẹnọ wẹ mẹhe to ohó Jiwheyẹwhe tọn sè bo to yíyí i hẹn lẹ!”+

29 To whenue gbẹtọgun lẹ to pipli dopọ, e jẹ didọ ji dọmọ: “Whẹndo ylankan de wẹ whẹndo ehe; e to ohia de dín, ṣigba ohia de ma na yin nina ẹn adavo ohia Jona tọn.+ 30 Na kẹdẹdile Jona+ lẹzun ohia de na Ninevenu lẹ do, mọ wẹ Visunnu gbẹtọ tọn na yin na whẹndo ehe do. 31 Ahọsi hùwaji tọn+ na yin finfọn to whẹdida whenu po omẹ whẹndo ehe tọn lẹ po bo na gblewhẹdo yé, na ewọ wá sọn opodo aigba tọn lẹ nado sè nuyọnẹn Sọlomọni tọn. Ṣigba pọ́n! mẹde he hugan Sọlomọni tin tofi.+ 32 Omẹ Nineve tọn lẹ na fọ́n to whẹdida whenu po whẹndo ehe po bo na gblewhẹdo e, na yewlẹ lẹnvọjọ na yẹwhehodidọ Jona tọn wutu.+ Ṣigba pọ́n! mẹde he hugan Jona tin tofi. 33 Mẹde ma nọ tá miyọ́ngbán, bọ to enẹgodo nọ ze e do nuglọ kavi do ohà* glọ, ṣigba do miyọ́ngbán-tin ji,+ na mẹhe to whégbè biọ lẹ nido sọgan mọ hinhọ́n. 34 Nukun towe wẹ miyọ́ngbán agbasa tọn. Eyin nukun towe tin to fidopo,* agbasa towe pete na gọ́ na hinhọ́n ga, ṣigba eyin nukun towe gọ́ na nukunkẹn,* agbasa towe na gọ́ na zinvlu ga.+ 35 Enẹwutu, nọ aṣeji, na hinhọ́n he tin to hiẹ mẹ nikaa lẹzun zinvlu. 36 Enẹwutu, eyin agbasa towe pete gọ́ na hinhọ́n, bọ apadewhe etọn ma dozinvlu to aliho depope mẹ, popolẹpo na họ́n taidile miyọ́ngbán de nọ na we hinhọ́n gbọn hinhọ́n etọn dali do.”

37 To whenue e ko dọ ehe godo, Falesi de biọ to e si nado wá dùnú hẹ ẹ. Enẹwutu, e biọ whégbè bo jagla to tafo kọ̀n. 38 Ṣigba, e paṣa Falesi lọ nado mọdọ e ma klọ́ alọ* jẹnukọnna núdùdù.+ 39 Ṣigba, Oklunọ dọna ẹn dọmọ: “Todin, mì Falesi lẹ, mì nọ klọ́ gbonu kọfo po agbánvla po tọn wé, ṣigba to homẹ, mì gọ́ na nukunkẹn po kanyinylan po.+ 40 Mì nulunọ lẹ! Mẹhe basi gbonu wẹ basi homẹ ga, kavi e ma yin mọ wẹ? 41 Ṣigba, mì na nuhe tin to homẹ lẹ taidi nunina lẹblanu tọn,* podọ pọ́n! nuhe pò to mì go lẹpo wẹ na lẹzun wiwe. 42 Ṣigba, dindọn hlan mì Falesi lẹ, na mì nọ na mado-ao mẹnti po nuwhẹ́nkun lue tọn po gọna omá jipa mẹ tọn devo lẹpo,*+ ṣigba mì nọ yí nukunpẹvi do pọ́n whẹdida dodo po owanyi Jiwheyẹwhe tọn po! Onú ehelẹ wiwà wẹ yin dandan, ṣigba yè ma dona yí nukunpẹvi do pọ́n nuhe pò enẹlẹ.+ 43 Dindọn hlan mì Falesi lẹ, na mì nọ yiwanna aisintẹn nukọn tọn* lẹ to sinagọgu lẹ mẹ podọ nado nọ yin nudọdo po sisi po to ahi lẹ mẹ!+ 44 Dindọn hlan mì, na mì taidi yọdò* enẹlẹ he ma nọ yin mimọ ganji,*+ bọ gbẹtọ lẹ nọ zinzọnlin gbọn yé ji bo ma nọ yọ́n ẹn!”

45 Dopo to mẹhe yọ́n Osẹ́n lọ ganji lẹ mẹ gblọnna ẹn dọmọ: “Mẹplọntọ, to onú ehelẹ didọ mẹ, hiẹ zun mílọsu lẹ ga.” 46 To whenẹnu, e dọmọ: “Dindọn hlan mìlọsu lẹ he yọ́n Osẹ́n lọ ganji, na mì nọ doagban pinpẹn na gbẹtọ lẹ nado hẹn, ṣigba mìlọsu lẹ ma nọ yí dopo to alọvi mìtọn lẹ mẹ do doalọ agbàn lọ lẹ go!+

47 “Dindọn hlan mì, na mì nọ do yọdò* yẹwhegán lẹ tọn, ṣigba tọgbo mìtọn lẹ wẹ hù yé!+ 48 Na nugbo tọn, mìwlẹ yin kunnudetọ nuyiwa tọgbo mìtọn lẹ tọn, ṣogan mì kọngbedopọ hẹ yé, na yewlẹ wẹ hù yẹwhegán lẹ,+ ṣigba mìwlẹ nọ to yọdò yetọn lẹ do. 49 Na ehe tọn wutu wẹ Jiwheyẹwhe do gbọn nuyọnẹn etọn gblamẹ dọmọ: ‘Yẹn na do yẹwhegán lẹ po apọsteli lẹ po hlan yé, bọ yé na hù bo dohomẹkẹn delẹ to yé mẹ, 50 na ohùn yẹwhegán lẹpo tọn he ko yin sinsọndai sọn didá aihọn tọn nido sọgan yin hihia dokọna* whẹndo ehe,+ 51 sọn ohùn Abẹli tọn ji+ kakajẹ ohùn Zekalia tọn ji, mẹhe yè hù to agbà lọ po ohọ̀* lọ po ṣẹnṣẹn.’+ Mọwẹ, yẹn dọna mì dọ, e na yin hihia dokọna* whẹndo ehe.

52 “Dindọn hlan mì mẹhe yọ́n Osẹ́n lọ ganji lẹ, na mìwlẹ ze họnhungan oyọnẹn tọn yì. Mìlọsu lẹ ma biọ e mẹ, podọ mì nọ glọnalina mẹhe jlo na biọ e mẹ lẹ!”+

53 Enẹwutu, to whenue e tọ́nyi sọn finẹ, wekantọ lẹ po Falesi lẹ po jẹ didesọ́ ẹ ji sinsinyẹn bo do magbọjẹ na ẹn po kanbiọ susu dogọ po, 54 bosọ tọ̀wu dai na ẹn nado sọgan wle e to hodidọ etọn mẹ.+