Luku

20 To gbèdopo, dile e to gbẹtọ lẹ plọn to tẹmpli mẹ bo to wẹndagbe lọ lá, yẹwhenọgán lẹ po wekantọ lẹ po gọna mẹho lẹ wá 2 bo dọna ẹn dọmọ: “Dọna mí, aṣẹ tẹwẹ hiẹ yí do to onú ehelẹ wà? Kavi mẹnu wẹ na we aṣẹ ehe?”+ 3 E gblọnna yé dọmọ: “Yẹnlọsu na kàn onú dopo biọ mì, bọ mì na dọna mi: 4 Baptẹm Johanu tọn, sọn olọn wẹ kavi sọn gbẹtọ lẹ dè?”* 5 Whenẹnu, yé wá tadona kọ̀n to yedelẹ ṣẹnṣẹn dọmọ: “Eyin mí dọ, ‘Sọn olọn,’ ewọ na dọ, ‘Naegbọn mì ma do yí i sè?’ 6 Ṣigba, eyin mí dọ, ‘Sọn gbẹtọ lẹ dè,’ gbẹtọ lọ lẹpo na dlan zannu do mí, na yé kudeji dọ yẹwhegán de wẹ Johanu.”+ 7 Enẹwutu, yé gblọn dọ yé ma yọ́n fihe Johanu mọ aṣẹ enẹ sọn. 8 Jesu sọ dọna yé dọmọ: “Yẹnlọsu ma to na dọ aṣẹ he yẹn yí do to onú ehelẹ wà na mì.”

9 Enẹgodo, e jẹ apajlẹ ehe na gbẹtọ lẹ ji dọmọ: “Dawe de do vẹngle de+ bo haya ogle lọ na glesi lẹ bosọ tọ́nwhẹ̀n yì tògodo na ojlẹ de.+ 10 To osaa sisọ mẹ, e do afanumẹ de hlan glesi lọ lẹ dè, na yé nido sọgan na ẹn delẹ to sinsẹ́n vẹngle lọ tọn lẹ mẹ. Ṣigba, glesi lọ lẹ do e hlan asigbá-alọgbá to whenue yé ko hò e godo.+ 11 Etomọṣo, e vọ́ afanumẹ devo dohlan. Yé hò enẹlọ lọsu, bo dowinyan ẹn* bosọ do e hlan asigbá-alọgbá. 12 Ṣogan, e sọ vọ́ do atọ̀ntọ hlan; yé gbleawu ehe lọsu bo dlan ẹn do gbonu. 13 Enẹwutu, klunọ vẹngle lọ tọn dọ, ‘Etẹwẹ yẹn na wà? Yẹn na do visunnu yiwanna ṣie hlan.+ Vlavo yé na na sisi ewọ.’ 14 To whenue glesi lọ lẹ mọ ẹn, yé dọna ode awetọ dọmọ, ‘Gudutọ lọ die. Mì gbọ mí ni hù i, na ogú lọ nido lẹzun mítọn.’ 15 Enẹwutu, yé dọ̀n ẹn jẹgbonu sọn vẹngle lọ mẹ bo hù i.+ To whelọnu lo, etẹwẹ klunọ vẹngle lọ tọn na wà na yé? 16 E na wá bo hù glesi ehelẹ bo na yí vẹngle lọ na mẹdevo lẹ.”

Whenue yé sè ehe, yé dọmọ: “Enẹ ni ma jọ gbede blo!” 17 Ṣigba, e pọ́n yé hlan tlintlin bo dọmọ: “To whelọnu lo, etẹwẹ nuhe yin kinkandai ehe zẹẹmẹdo dọ: ‘Zannu he họ̀dotọ lẹ gbẹ́ dai, ehe lọ wẹ ko lẹzun zannu gángánsu họ̀gosu tọn’?+ 18 Mẹdepope he jai jẹ zannu enẹ ji na gbà hányán.+ Ṣigba, mẹdepope he ji e flẹ jẹ, e na gídí i.”

19 To whenẹnu, wekantọ lẹ po yẹwhenọgán lẹ po dín dọ alọ yetọn ni jẹ e go to gànhiho enẹ mẹ, ṣigba yé dibusi gbẹtọ lẹ, na yé yọnẹn dọ emilẹ hodọ wẹ e te to apajlẹ ehe mẹ.+ 20 Podọ to whenue yé ko ṣọ́ ẹ godo, yé do mẹhe yé ko haya to nuglọ lẹ hlan nado doyẹklọmẹ dọ dodonọ wẹ yé, na yé nido sọgan domọwle e to hodidọ etọn mẹ,+ nado sọgan ze e do alọmẹ na tohọluduta po aṣẹpipa ayimatẹn-gán tọn po. 21 Yewlẹ sọ kanbiọ ẹ dọmọ: “Mẹplọntọ, mí yọnẹn dọ hiẹ nọ dọho bo nọ plọnmẹ ganji bo masọ nọ homẹnukuntapọn, ṣigba hiẹ nọ plọnmẹ aliho Jiwheyẹwhe tọn to nugbo mẹ: 22 Be e sọgbe hẹ osẹ́n* dọ mí ni sú takuẹ hlan Sesali ya kavi lala?” 23 Ṣigba, ewọ doayi ayiha gigẹdẹ yetọn go bo dọna yé dọmọ: 24 “Mì do denali* de hia mi. Yẹdide po nukinkan mẹnu tọn po wẹ to e ji?” Yé dọmọ: “Sesali tọn.” 25 E dọna yé dọmọ: “To whelọnu lo, mì hẹn ẹn diun dọ mì yí nuhe yin Sesali tọn lẹ na Sesali,+ ṣigba nuhe yin Jiwheyẹwhe tọn lẹ na Jiwheyẹwhe.”+ 26 Nalete, yé ma penugo nado domọwle e to hodidọ etọn mẹ to gbẹtọ lẹ nukọn, ṣigba na awuji yé na gblọndo etọn wutu, yé gbọ bo nabọẹ.

27 Etomọṣo, delẹ to Sadusi lẹ mẹ, mẹhe nọ dọ dọ fọnsọnku ma tin,+ wá e dè bo kanse e dọmọ:+ 28 “Mẹplọntọ, nuhe Mose kàn dai na mí wẹ yindọ, ‘Eyin nọvisunnu mẹde tọn tindo asi bo kú jodo, ṣigba bo ma tindo ovi, nọvisunnu etọn dona sọ́n asi lọ bo jivi do nọvisunnu etọn he ko kú lọ tẹnmẹ.’+ 29 Todin, nọvisunnu ṣinawe delẹ tin. Tintan dà asi, ṣigba e kú ma jivi. 30 Mọdopolọ awetọ 31 podọ atọ̀ntọ sọ́n yọnnu lọ. Nudopolọ sọ jọ do yé omẹ ṣinawe lọ lẹpo go; yé kú ma jivi. 32 To godo mẹ, yọnnu lọ lọsu kú. 33 Enẹwutu, asi mẹnu tọn wẹ e na yin to fọnsọnku whenu? Na yé omẹ ṣinawe lẹ wẹ ko dà ẹ pọ́n di asi.”

34 Jesu dọna yé dọmọ: “Ovi titonu* ehe tọn lẹ wẹ nọ wlealọ bo nọ yin nina to alọwle mẹ, 35 ṣigba mẹhe ko yin mimọ nado jẹna titonu he ja podọ na fọnsọnku oṣiọ lẹ tọn ma na wlealọ kavi yin nina to alọwle mẹ.+ 36 Na nugbo tọn, mọjanwẹ yé masọ sọgan kú ba do niyẹn, na yé na taidi angẹli lẹ, podọ na yé na yin finfọnsọnku wutu, yé na yin ovi Jiwheyẹwhe tọn lẹ. 37 Ṣigba, dọ oṣiọ lẹ na yin finfọn, Mose lọsu hẹn ẹn zun yinyọnẹn to kandai he gando wùnkan he to miyọ́n ji go lọ mẹ, to whenue e ylọ Jehovah* dọ ‘Jiwheyẹwhe Ablaham tọn, Jiwheyẹwhe Isaki tọn podọ Jiwheyẹwhe Jakọbu tọn.’+ 38 Jiwheyẹwhe mẹhe to ogbẹ̀ lẹ tọn wẹ ewọ, e ma yin oṣiọ lẹ tọn gba, na yemẹpo wẹ to ogbẹ̀ na ẹn.”*+ 39 Delẹ to wekantọ lẹ mẹ gblọn dọmọ: “Mẹplọntọ, hiẹ dọ ganji.” 40 Na yé masọ tindo adọgbigbo lọ nado kàn onú dopo tata biọ ẹ ba.

41 E sọ kanse yé dọmọ: “Naegbọn yé do dọ dọ Klisti yin visunnu Davidi tọn?+ 42 Na Davidi lọsu dọ to owe Salmu lẹ tọn mẹ dọ, ‘Jehovah* dọna Oklunọ ṣie dọmọ: “Sinai to adusilọ ṣie mẹ 43 kaka yẹn nado yí kẹntọ towe lẹ do basi tokloafọligbe afọ towe lẹ tọn.”’+ 44 Enẹwutu, Davidi ylọ ẹ dọ Oklunọ; to whelọnu lo, nawẹ ewọ yin visunnu etọn gbọn lo?”

45 Enẹgodo, dile gbẹtọ lẹpo to todoai, e dọna devi etọn lẹ dọmọ: 46 “Mì payi wekantọ lẹ go, he nọ jlo nado nọ to yìyì pé to tewu lẹ mẹ podọ he nọ yiwanna nado yin nudọdo po sisi po to ahi lẹ mẹ podọ aisintẹn nukọn tọn* lẹ to sinagọgu lẹ mẹ bo nọ yiwanna otẹn nukundeji lẹ to hùnwhẹ lẹ tẹnmẹ,+ 47 yewlẹ wẹ nọ dù owhé* asuṣiọsi lẹ tọn lẹ sudo bo nọ gbọn nsọle-yinyin* dali hodẹ̀ gaa lẹ. Omẹ ehelẹ na mọ whẹdida he sinyẹn hugan de yí.”