Johanu

7 To onú ehelẹ godo, Jesu to gbejizọnlinzin* pé sọn fide jẹ fide to Galili, na e ma jlo na wàmọ to Jude, na Ju lẹ to dindin nado hù i wutu.+ 2 Ṣigba, Hùnwhẹ Gòhọtúntún+ Ju lẹ tọn lọ ko sẹpọ. 3 Enẹwutu, nọvisunnu etọn lẹ+ dọna ẹn dọmọ: “Tọ́n sọn fi bo yì Jude, na devi towe lẹ lọsu nido sọgan mọ azọ́n he wà a te lẹ. 4 Na mẹde ma nọ wà nudepope to nuglọ to whenue e to jijlo nado yin yinyọnẹn to gbangba. To whenuena e yindọ hiẹ wẹ to onú ehelẹ wà, do dewe hia aihọn lọ.” 5 Na nugbo tọn, nọvisunnu etọn lẹ ma to yise dohia to ewọ mẹ.+ 6 Enẹwutu, Jesu dọna yé dọmọ: “Ojlẹ ṣie ma ko wá gba,+ ṣigba ojlẹ lẹpo wẹ yọ́n na mìwlẹ. 7 Aihọn lọ ma tindo whẹwhinwhẹ́n de nado gbẹwanna mìwlẹ gba, ṣigba yẹn wẹ e gbẹwanna, na yẹn dekunnu gando e go dọ azọ́n etọn lẹ yin ylankan wutu.+ 8 Mìwlẹ ni hẹji yì hùnwhẹ lọ; yẹn ma jei hùnwhẹ ehe todin, na ojlẹ ṣie ma ko wá to gigọ́ mẹ gba.”+ 9 Enẹwutu, to whenue e ko dọ onú ehelẹ na yé, e gbọṣi Galili.

10 Ṣigba, to whenue nọvisunnu etọn lẹ ko hẹji yì hùnwhẹ lọ, enẹgodo ewọ lọsu hẹji yì ga, e ma yin to gbangba ṣigba to nuglọ. 11 Enẹwutu, Ju lẹ jẹ dindin in ji to hùnwhẹ lọ tẹnmẹ bo to didọmọ: “Fie wẹ dawe enẹ te?” 12 Mẹsusu sọ to páde to gbẹtọgun lọ lẹ ṣẹnṣẹn gando ewọ go. Mẹdelẹ nọ dọmọ: “Mẹdagbe de wẹ.” Mẹdevo lẹ nọ dọmọ: “Lala, gbẹtọgun lọ hẹn buali wẹ e te.”+ 13 Ṣigba, mẹdepope ma nọ dọho gando e go to gbangba, na yé to budina Ju lẹ wutu.+

14 To whenue hùnwhẹ lọ ko jẹ odaa, Jesu hẹji yì tẹmpli lọ mẹ bo jẹ mẹplọn ji. 15 E sọ paṣa Ju lẹ bọ yé to didọmọ: “Nawẹ dawe ehe wagbọn do tindo oyọnẹn Owe-wiwe* lẹ tọn sọmọ,+ to whenuena e yindọ ewọ ma yin pinplọn to wehọ sinsẹ̀n tọn* lẹ mẹ?”+ 16 Jesu sọ gblọnna yé bo dọmọ: “Nuhe yẹn to pinplọnmẹ ma yin ṣie gba, ṣigba mẹhe do mi hlan tọn wẹ.+ 17 Eyin mẹdepope jlo nado wà ojlo Ewọ tọn, mẹlọ na yọnẹn vlavo eyin nuplọnmẹ lọ wá sọn Jiwheyẹwhe dè+ kavi eyin ohó dee titi tọn dọ wẹ n’te. 18 Mẹdepope he nọ dọho edetiti tọn to gigo ede tọn dín; ṣigba mẹdepope he nọ dín gigo mẹhe do e hlan tọn,+ nugbo wẹ omẹ ehe, podọ mawadodo de ma tin to omẹ ehe mẹ. 19 Mose na mì Osẹ́n lọ,+ kavi e ma yin mọ wẹ? Ṣigba, depope to mì mẹ ma setonuna Osẹ́n lọ. Naegbọn mì to dindin nado hù mi?”+ 20 Gbẹtọgun lọ gblọn dọmọ: “Hiẹ tindo aovi de. Mẹnu wẹ to dindin nado hù we?” 21 Jesu gblọnna yé dọmọ: “Onú dopo poun wẹ yẹn ko basi, bọ e paṣa mìmẹpo. 22 Na ehe wutu wẹ Mose na mì osẹ́n adàgbigbo tọn+—e ma yin Mose dè wẹ e wá sọn gba, ṣigba tọgbo lẹ dè wẹ e wá sọn+—mìwlẹ sọ nọ gboadà namẹ to gbọjẹzangbe. 23 Eyin yè nọ gboadà namẹ to gbọjẹzangbe ṣogan bo ma nọ gbà Osẹ́n Mose tọn, naegbọn mìwlẹ do gblehomẹ do go e sinsinyẹn, na yẹn hẹnmẹ jẹgangan mlẹnmlẹn to gbọjẹzangbe wutu?+ 24 Mì sọ pọ́n awusọhia gbonu tọn do dawhẹ ba blo, ṣigba mì nọ yí dodo do dawhẹ.”+

25 To whenẹnu, delẹ to tòmẹnu Jelusalẹm tọn lẹ mẹ jẹ didọ ji dọmọ: “Dawe he yé to dindin nado hù lọ die, kavi e ma yin mọ wẹ?+ 26 Ṣogan, mì pọ́n! ewọ to hodọ to gbangba bọ yé ma dọ nudepope na ẹn. Be e ko wá họnwun na ogán lẹ dọ ewọ wẹ Klisti lọ wẹ ya? 27 Nalete, míwlẹ yọ́n fihe dawe ehe wá sọn;+ ṣogan to whenue Klisti lọ na wá, mẹdepope ma na yọ́n fihe e wá sọn.” 28 To whenẹnu, dile Jesu to mẹplọn to tẹmpli mẹ, e yí ogbè lélé do dọmọ: “Mìwlẹ yọ́n mi bosọ yọ́n fie yẹn wá sọn. Podọ yẹn ma wá to ojlo ṣie titi mẹ gba,+ ṣigba omẹ nujọnu tọn de wẹ Mẹhe do mi hlan, bọ mìwlẹ ma yọ́n ewọ.+ 29 Yẹn yọ́n ewọ,+ na yẹn yin afọzedaitọ de sọn ewọ dè wutu, podọ Ewọ wẹ do mi hlan.” 30 Enẹwutu, yé jẹ dindin ji nado wle e,+ ṣigba mẹdepope ma penugo nado doalọ e go, na ojlẹ etọn ma ko wá wutu.+ 31 Etomọṣo, mẹsusu to gbẹtọgun lọ mẹ tindo yise to ewọ mẹ,+ yé sọ to didọ dọmọ: “To whenue Klisti lọ na wá, ewọ ma na basi ohia he sù hú dehe dawe ehe basi lẹ gba, kavi e na wàmọ wẹ?”

32 Falesi lẹ sè bọ gbẹtọgun lọ to páde bo to onú ehelẹ dọ gando e go, yẹwhenọgán lẹ po Falesi lẹ po sọ do ponọ lẹ hlan nado wle e. 33 Enẹwutu, Jesu dọmọ: “Yẹn na gbẹ́ nọ mì dè na ojlẹ vude dogọ whẹpo yẹn nado yì Mẹhe do mi hlan lọ dè.+ 34 Mìwlẹ na dín mi, ṣigba mì ma na mọ mi, podọ fihe yẹn na te mìwlẹ ma sọgan wá.”+ 35 To whenẹnu, Ju lẹ dọ to yedelẹ ṣẹnṣẹn dọmọ: “Fie wẹ dawe ehe to linlẹn nado yì, bọ mí ma na mọ ẹn? Be linlẹn wẹ e te nado yì Ju he gbàpe to Glẹkinu lẹ ṣẹnṣẹn lẹ dè nado plọn Glẹkinu lẹ ya? 36 Etẹ dọ wẹ e te to whenue e dọ dọ, ‘Mìwlẹ na dín mi, ṣigba mì ma na mọ mi, podọ fihe yẹn na te mìwlẹ ma sọgan wá’?”

37 To azán godo tọn, yèdọ azán daho hùnwhẹ lọ tọn gbè,+ Jesu fọnṣite bo yí ogbè lélé do dawhá dọmọ: “Gbọ mẹdepope he nugbla to hùhù ni wá dè e nado nù.+ 38 Mẹdepope he tindo yise to yẹn mẹ, kẹdẹdile adà Owe-wiwe tọn lọ ko dọ do dọmọ: ‘Ohò etọn mẹ dọ́n wẹ asisa osin ogbẹ̀ tọn na nọ sà sọn.’”+ 39 Ṣigba, gbigbọ he mẹhe tindo yise to ewọ mẹ lẹ na mọyi to madẹnmẹ lọ hodọ wẹ e te; na yé ma ko mọ gbigbọ yí todin gba,+ na Jesu ma ko yin gigopana todin wutu.+ 40 Mẹdelẹ to gbẹtọgun lọ mẹ he sè ohó ehelẹ jẹ didọ ji dọmọ: “Na nugbo tọn, Yẹwhegán lọ die.”+ 41 Mẹdevo lẹ to didọmọ: “Klisti lọ die.”+ Ṣigba, mẹdelẹ sọ to didọmọ: “Klisti lọ ma na wá sọn Galili, kavi e ma yin mọ wẹ?+ 42 Be adà Owe-wiwe tọn lọ ma ko dọ dọ kúnkan Davidi tọn mẹ wẹ Klisti lọ na wá sọn,+ podọ Bẹtlẹhẹm+ he yin gbétatò he mẹ Davidi ko nọ dai lọ mẹ wẹ e na wá sọn ya?”+ 43 Enẹwutu, kinklan de fọ́n to gbẹtọgun lọ ṣẹnṣẹn gando ewọ go. 44 Nalete, mẹdelẹ to yé mẹ to jijlo nado wle e, ṣigba mẹdepope ma penugo nado doalọ e go.

45 Enẹwutu, ponọ lọ lẹ lẹkọyi yẹwhenọgán lẹ po Falesi lẹ po dè, yé sọ dọna ponọ lọ lẹ dọmọ: “Naegbọn mì ma hẹn ẹn wá?” 46 Ponọ lọ lẹ gblọn dọmọ: “Mẹdevo de ma ko dọho domọ pọ́n gbede.”+ 47 Falesi lẹ sọ gblọn dọmọ: “Be mìlọsu lẹ ko yin hinhẹn buali ga wẹ? 48 Depope to ogán lẹ mẹ kavi to Falesi lẹ mẹ ma ko tindo yise to ewọ mẹ, kavi mẹde ko wàmọ wẹ?+ 49 Ṣigba, gbẹtọgun ehe, he ma yọ́n Osẹ́n lọ wẹ mẹhodẹ̀do lẹ.” 50 Nikodẹmi, he ko yì e dè dai, podọ mẹhe yin dopo to Falesi lẹ mẹ, dọna yé dọmọ: 51 “Osẹ́n mítọn ma nọ dawhẹna mẹde adavo e sè ohó etọn bo yọ́n nuhe e to wiwà lọ whẹ́, kavi e ma yin mọ wẹ?”+ 52 Yé sọ gblọnna ẹn dọmọ: “Kavi Galili wẹ hiẹ lọsu wá sọn ya? Dindona, hiẹ nasọ mọdọ yẹwhegán de ma sọgan wá sọn Galili.”*