2 Ahọlu lẹ

4 Todin, dopo to asi visunnu yẹwhegán lẹ tọn+ lẹ mẹ dawhá hlan Eliṣa dọmọ: “Asu ṣie he yin devizọnwatọ towe ko kú, hiẹ sọ yọnẹn ganji dọ budisi Jehovah tọ́ de wẹ devizọnwatọ towe ko yin dai.+ Todin, mẹhe devizọnwatọ towe ko duahọ do de wá nado bẹ ovi ṣie awe lẹ yì di afanumẹ etọn.” 2 Eliṣa sọ dọna ẹn dọmọ: “Etẹwẹ yẹn sọgan wà na we? Dọna mi, etẹwẹ a tindo to họmẹ?” Ewọ sọ gblọn dọmọ: “Devizọnwatọ towe ma tindo nudepope to họmẹ adavo ozẹ́n amì tọn de.”+ 3 Whenẹnu wẹ e dọna ẹn dọmọ: “Tọ́njẹgbonu bo yì biọ nuhẹnnú lẹ to kọmẹnu towe lẹpo si, yèdọ nuhẹnnú vọ́tọ lẹ. A nọte do vude poun ji blo. 4 Enẹgodo, biọ họmẹ bo suhọ̀n do ota po visunnu towe lẹ po. Kọ̀n amì do nuhẹnnú lọ lẹpo mẹ bo bẹ dehe gọ́ lẹ do apadopo.” 5 Nawe lọ sọ yì sọn e dè.

Whenue e suhọ̀n do ota po visunnu etọn lẹ po, yé jẹ nuhẹnnú lọ lẹ ze na ẹn ji bọ ewọ nọ to amì kọ̀n do yé mẹ.+ 6 Whenue nuhẹnnú lọ lẹ gọ́, e dọna dopo to visunnu etọn lẹ mẹ dọmọ: “Ze nuhẹnnú devo wá na mi.”+ Ṣigba, visunnu lọ dọna ẹn dọmọ: “Nuhẹnnú devo de masọ pò.” Whenẹnu wẹ amì lọ doalọte.+ 7 Nawe lọ sọ wá bo dọna omẹ Jiwheyẹwhe nugbo lọ tọn, bọ ewọ dọna ẹn dọmọ: “Yì sà amì lọ bo sú ahọ́ he a dù lẹ, podọ hiẹ po visunnu towe lẹ po ni zan dehe pò.”

8 To gbèdopo, Eliṣa yì Ṣunẹmi,+ fie yọnnu nukundeji de nọ nọ̀, yọnnu lọ sọ vẹ̀ ẹ nado dùnú to finẹ.+ Whedepopenu he e juwajei, e nọ nọte to finẹ nado dùnú. 9 Enẹwutu, yọnnu lọ dọna asu etọn dọmọ: “N’yọnẹn dọ omẹ wiwe Jiwheyẹwhe tọn de wẹ nọ gbọn fi wayi whẹwhẹ. 10 Jaale, gbọ mí ni wleawu abò kleun de tọn do họta+ bo ze adọzan, tafo, oján po miyọ́ngbán-tin de po do e mẹ na ẹn. Gbọnmọ dali, whedepopenu he ewọ wá mí dè, e sọgan nọ nọ̀ finẹ.”+

11 To gbèdopo, ewọ wá finẹ bo yì abò aga tọn lọ mẹ nado mlọnai. 12 E sọ dọna Gehazi+ devizọnwatọ etọn dọmọ: “Ylọ yọnnu Ṣunẹminu+ lọ wá.” Ewọ sọ ylọ ẹ wá bọ nawe lọ ṣite to nukọn etọn. 13 E sọ dọna Gehazi dọmọ: “Jaale dọna ẹn dọ, ‘Hiẹ ko jẹtukla ehe lẹpo do ota mítọn mẹ.+ Etẹwẹ sọgan yin wiwà na we?+ Yẹn ni dọhona ahọlu+ kavi na ogán awhànpa lọ tọn do ota towe mẹ ya?’” Ṣigba, yọnnu lọ gblọn dọmọ: “Omẹ ṣie titi lẹ ṣẹnṣẹn wẹ n’te.” 14 Eliṣa sọ dọmọ: “Bọ etẹwẹ sọgan yin wiwà na ẹn lo?” Whenẹnu wẹ Gehazi dọmọ: “Pọ́n, e ma tindo visunnu de,+ podọ asu etọn ko poyọnho.” 15 To afọdopolọji, Eliṣa dọmọ: “Ylọ ẹ wá.” Ewọ sọ ylọ yọnnu lọ wá bọ e ṣite to họntonu. 16 E sọ dọna ẹn dọmọ: “To owhe he ja mẹ to ojlẹ ehe nkọ mẹ, hiẹ na tindo visunnu de he a na nọ gbò fán.”+ Amọ́, yọnnu lọ dọmọ: “Lala, klunọ ṣie, omẹ Jiwheyẹwhe nugbo lọ tọn E! A dolalo na devizọnwatọ towe blo.”

17 Ṣigba, yọnnu lọ mọhò bo ji visunnu de to owhe he bọdego mẹ to ojlẹ enẹ nkọ pẹẹ mẹ, kẹdẹdile Eliṣa ko dọna ẹn do. 18 Ovi lọ sọ whẹ́n, podọ to gbèdopo e tọ́nyi otọ́ etọn dè dile ewọ tin to jibẹwawhétọ lẹ dè. 19 E sọ to didọna otọ́ etọn gbọzangbọzan dọmọ: “Ota ṣie, ṣo ota ṣie!” Otọ́ etọn sọ dọna devizọnwatọ de dọmọ: “Ze e yì na onọ̀ etọn.” 20 Ewọ sọ ze e lẹkọyi onọ̀ etọn dè bọ e sinai do akọ̀n ji na ẹn kakajẹ whèmẹ bo wá kú.+ 21 Whenẹnu, yọnnu lọ hẹji yì bo tẹ́ ẹ do adọzan omẹ Jiwheyẹwhe nugbo lọ tọn+ ji, e sọ suhọ̀n do e bo tọ́nyi. 22 Todin, e ylọ asu etọn bo dọna ẹn dọmọ: “Jaale, do dopo to devizọnwatọ lẹ mẹ hlan mi po kẹtẹkẹtẹ dopo po, bo gbọ ma yì omẹ Jiwheyẹwhe nugbo lọ tọn dè bleun bo wá.” 23 Ṣigba, sunnu lọ dọmọ: “Naegbọn a jlo na yì pọ́n ẹn to egbé? E ma ka yin azán osun yọyọ tọn+ kavi gbọjẹzangbe nẹ.” Yọnnu lọ sọ dọmọ: “Nude ma jọ.” 24 E sọ wleawuna kẹtẹkẹtẹ lọ bo dọna devizọnwatọ etọn dọmọ: “Yawu dedo. A zọ̀n dẹẹdẹ na yẹn tọn wutu blo adavo yẹnlọsu dọ mọ na we.”

25 Mọ wẹ e yì omẹ Jiwheyẹwhe nugbo lọ tọn dè do to Osó Kalmẹli kọ̀n. Tlolo he omẹ Jiwheyẹwhe nugbo lọ tọn mọ ẹn hlan olá, e dọna Gehazi devizọnwatọ etọn dọmọ: “Pọ́n! Yọnnu Ṣunẹminu lọ niyẹn to dọ́n. 26 Jaale họ̀nwezun yì pé e bo kanse e dọ, ‘A to dagbe ya? Asu towe to dagbe ya? Ovi towe to dagbe ya?’” Yọnnu lọ sọ gblọn dọmọ: “Mẹlẹpo to dagbe.” 27 Whenue e jẹ omẹ Jiwheyẹwhe nugbo lọ tọn dè to osó lọ kọ̀n, e tẹdo afọ etọn lẹ go to afọdopolọji.+ Gehazi sọ sẹwá nado sisẹ́ ẹ sẹ̀, ṣigba omẹ Jiwheyẹwhe nugbo lọ tọn dọmọ: “Jo e do, na ayimajai sinsinyẹn mẹ wẹ e te* bọ Jehovah whlá do mi bo ma dọna mi.” 28 Yọnnu lọ sọ dọmọ: “Be n’ka biọ visunnu de sọn oklunọ ṣie si wẹ ya? Be n’ma dọ dọ, ‘A hẹn mi tindo todido ovọ́ blo’ ya?”+

29 To afọdopolọji, Eliṣa dọna Gehazi dọmọ: “Sìn awù towe lẹ do alinkàn+ bo hẹn opò ṣie do alọmẹ bosọ dedo. Eyin a pé mẹdepope, a dọnudo e blo; podọ eyin mẹdepope dọnudo we, a yigbena ẹn blo. Yì bo ze opò ṣie do nukunmẹ na visunnu lọ.” 30 Onọ̀ visunnu lọ tọn sọ dọmọ: “Dile Jehovah togbẹ̀ podọ dile hiẹ lọsu* togbẹ̀, yẹn ma na yì bo jo we do.”+ Ewọ sọ ṣite bo hodo yọnnu lọ yì. 31 Gehazi jẹnukọnna yé yì bo ze opò lọ do nukunmẹ na visunnu lọ, ṣigba e ma kẹnù kavi whàngo.+ Ewọ sọ lẹkọyi pé Eliṣa bo dọna ẹn dọmọ: “Visunnu lọ ma fọ́n.”

32 Whenue Eliṣa jẹ owhé lọ gbè, oṣiọ visunnu lọ tọn to titẹ́ to adọzan etọn ji.+ 33 E sọ biọ họmẹ bo suhọ̀n do ede po visunnu lọ po bosọ jẹ dẹ̀ho hlan Jehovah ji.+ 34 Enẹgodo, e hẹ adọzan lọ ji bo mlọn visunnu lọ ji bosọ ze onù etọn titi do onù visunnu lọ tọn go, nukun etọn titi lẹ do nukun etọn lẹ go podọ alọ etọn titi lẹ do alọ etọn lẹ ji bosọ dlẹn do e ji, agbasa visunnu lọ tọn sọ jẹ gbigblọ ji.+ 35 Ewọ sọ zinzọnlin yigodo yinukọn to ohọ̀ lọ mẹ, enẹgodo e hẹ adọzan lọ ji bosọ dlẹn do e ji whladopo dogọ. Visunnu lọ ṣìn whla ṣinawe bo hùn nukun.+ 36 Todin, Eliṣa ylọ Gehazi bo dọmọ: “Ylọ yọnnu Ṣunẹminu lọ wá.” Ewọ sọ ylọ ẹ bọ nawe lọ biọ họmẹ wá e dè. Whenẹnu wẹ e dọmọ: “Ze visunnu towe.”+ 37 Yọnnu lọ sọ wá bo jẹklo to afọ etọn lẹ kọ̀n bosọ dẹ́ do odò na ẹn, enẹgodo e ze visunnu etọn bo tọ́nyi.

38 Whenue Eliṣa lẹkọwa Gilgali, huvẹ ko tọ́n to aigba lọ ji.+ Visunnu yẹwhegán lẹ tọn lẹ+ sinai to nukọn etọn bọ e dọna devizọnwatọ etọn+ dọmọ: “Ze nudàzẹ́n daho lọ bo dà núdùdù na visunnu yẹwhegán lẹ tọn lẹ.” 39 Enẹwutu, dopo to yé mẹ tọ́nyi danji nado yì dín omá, e sọ mọ vẹntin gbémẹ tọn de bo gbẹ̀n sinsẹ́n etọn lẹ gọ́ awù mẹ. Enẹgodo, e lẹkọ bo já yé do nudàzẹ́n lọ mẹ, amọ́ e ma yọ́n nuhe wẹ. 40 To godo mẹ, yé ba ẹ na sunnu lọ lẹ nado dù, ṣigba tlolo he yé dù sọn núdùdù lọ mẹ, yé dawhá dọmọ: “Omẹ Jiwheyẹwhe nugbo lọ tọn E, okú to nudàzẹ́n lọ mẹ.” Yé masọ sọgan dù núdùdù lọ. 41 Ewọ sọ dọmọ: “Mì ba linfin vude wá.” To whenue e ko kọ̀n ẹn do nudàzẹ́n lọ mẹ godo, e dọmọ: “Ba ẹ na gbẹtọ lọ lẹ.” Nuylankan de masọ to nudàzẹ́n lọ mẹ ba.+

42 Dawe de wá sọn Baali-ṣaliṣa+ bo hẹn akla balekun tọn+ 20 he yè yí sinsẹ́n bibia tintan lẹ do basi wá na omẹ Jiwheyẹwhe nugbo lọ tọn, gọna aglò de he mẹ jinukun yọyọ lẹ te.+ Eliṣa sọ dọmọ: “Bẹ yé na gbẹtọ lọ lẹ nado dù.” 43 Ṣigba, devizọnwatọ etọn dọmọ: “Nawẹ n’sọgan ze ehe donukọnna sunnu 100 gbọn?”+ Whenẹnu wẹ e dọmọ: “Bẹ yé na gbẹtọ lọ lẹ nado dù, na nuhe Jehovah dọ die, ‘Yé na dù bọ e na pò.’”+ 44 Enẹwutu, ewọ bẹ donukọnna yé, yé sọ dù bọ e pò,+ kẹdẹdile Jehovah ko dọ do.