Ẹsteli

2 To onú ehelẹ godo, to whenue adi Ahọlu Ahasuelusi+ tọn ko yìdo, e flin nuhe Vaṣti wà+ po nudide he ko yin bibasi gando e go po.+ 2 Whenẹnu wẹ mẹhe nọ wadevizọn na ahọlu tlọlọ lẹ dọmọ: “Dodinnanu de ni yin bibasi nado dín awhli whanpẹnọ he to alọji lẹ na ahọlu. 3 Podọ na ahọlu ni de anadenanutọ lẹ to agbegbe* he to gandudu etọn glọ lẹpo mẹ+ nado bẹ awhli whanpẹnọ he to alọji lẹpo pli do Ṣuṣani* figángán* lọ, yèdọ do owhé yọnnu lẹ tọn* gbè. Dike yé ni yin bibẹdo anademẹ Hegai+ he yin ojọ̀ ahọlu tọn po mẹgopọntọ yọnnu lẹ tọn po tọn glọ bo gbọ yé ni mọ nukunpedomẹgo mẹhẹn yọnwhanpẹ tọn* yí. 4 Podọ jọja yọnnu he yọnwhanpẹ hugan to nukun ahọlu tọn mẹ na lẹzun ahọsi do otẹn Vaṣti tọn mẹ.”+ Ayinamẹ lọ sọ yọ́n to nukun ahọlu tọn mẹ bọ e wà domọ.

5 Dawe Ju de tin to Ṣuṣani*+ figángán* lọ he nọ yin Mọldekai+ visunnu Jaili tọn visunnu Ṣimei tọn visunnu Kiṣi tọn, Bẹnjamininu de,+ 6 mẹhe ko yin hinhẹn yì kanlinmọgbenu sọn Jelusalẹm hẹ mẹhe yin bibẹ yì po Ahọlu Jẹkonia*+ Juda tọn po lẹ, yèdọ mẹhe Ahọlu Nẹbukadnẹzali Babilọni tọn ko hẹn yì kanlinmọgbenu. 7 Ewọ wẹ yin mẹgopọntọ* Hadasa* tọn, enẹ wẹ Ẹsteli, yèdọ viyọnnu tavẹ etọn tọn,+ na ewọ masọ tindo otọ́ po onọ̀ po ba. Jọja yọnnu lọ yọnwhanpẹ taun bọ awusọhia etọn dọnmẹ, podọ to whenue otọ́ etọn po onọ̀ etọn po ko kú godo, Mọldekai wẹ yí i taidi viyọnnu etọn. 8 To whenue ohó ahọlu tọn po osẹ́n etọn po yin lilá podọ to whenue jọja yọnnu susu yin bibẹpli do Ṣuṣani* figángán* lọ to anademẹ Hegai tọn glọ,+ Ẹsteli lọsu yin hinhẹn yì owhé* ahọlu tọn gbè to anademẹ Hegai mẹgopọntọ yọnnu lẹ tọn glọ.

9 Todin, jọja yọnnu lọ yọnwhanpẹ to nukun etọn mẹ bo mọ nukundagbe* etọn, enẹwutu e basi tito to afọdopolọji na nukunpedomẹgo mẹhẹn yọnwhanpẹ tọn* na ẹn+ podọ na núdùdù wunmẹ he dona nọ yin nina ẹn, e sọ ṣinyan jọja yọnnu ṣinawe sọn owhé ahọlu tọn gbè nado nọ yilizọn na ẹn. E sọ diọtẹnna ewọ po devizọnwatọ jọja etọn lẹ po yì nọtẹn he yọ́n hugan to owhé yọnnu lẹ tọn* gbè. 10 Ẹsteli ma dọ nudepope gando omẹ etọn lẹ+ kavi hẹnnumẹ etọn lẹ go, na Mọldekai+ ko na ẹn anademẹ ma nado dọna mẹdepope.+ 11 Egbesọegbesọ, Mọldekai nọ zinzọnlin gbọn awánu owhé yọnnu lẹ tọn* nukọn nado yọ́n lehe Ẹsteli te do podọ lehe nulẹ to yìyì na ẹn do.

12 Jọja yọnnu dopodopo tindo ojlẹ he mẹ e na yì Ahọlu Ahasuelusi dè to whenue e ko dotana nukunpedomẹgo osun 12 tọn he yọnnu lọ lẹ nọ mọyi godo, na aliho ehe mẹ wẹ yé dona dotana nukunpedomẹgo mẹhẹn yọnwhanpẹ tọn* yetọn te—amì zuya+ tọn nọ yin zinzan na osun ṣidopo podọ amì balsami* tọn na osun ṣidopo gọna amì+ owán gblingblinnọ voovo lẹ to nukunpedomẹgo mẹhẹn yọnwhanpẹ tọn* lọ whenu. 13 Enẹgodo, jọja yọnnu lọ ko nọ wleawufo nado yì ahọlu dè, podọ to whenue e jlo na tọ́n sọn owhé yọnnu lẹ tọn* gbè yì owhé ahọlu tọn gbè, nudepope he ewọ biọ na yin nina ẹn. 14 Awhli dopo nọ yì to whèjai bo nọ lẹkọyi owhé yọnnu lẹ tọn* awetọ gbè to afọnnu, to anademẹ Ṣaaṣigazi he yin ojọ̀ ahọlu tọn+ po mẹgopọntọ asimọwhlá lẹ tọn po tọn glọ. E ma nasọ lẹkọyi ahọlu dè adavo homẹ ahọlu tọn hùn do e go bọ ahọlu biọ tlọlọ dọ ewọ ni wá.+

15 Podọ to whenue ojlẹ Ẹsteli viyọnnu Abihaili he yin tavẹ Mọldekai he ko penukundo e go taidi viyọnnu etọn lọ tọn wá nado yì ahọlu dè,+ ewọ ma biọ nudepope adavo nuhe Hegai he yin ojọ̀ ahọlu tọn po mẹgopọntọ yọnnu lẹ tọn po na ẹn ayinamẹ etọn lẹ. (To ojlẹ enẹ lẹpo mẹ, Ẹsteli to nukundagbe mẹhe nọ mọ ẹn lẹpo tọn tindo.) 16 Ẹsteli yin hinhẹn yì Ahọlu Ahasuelusi dè to owhé ahọlu tọn etọn gbè to osun aotọ mẹ, enẹ wẹ osun Tebẹti* tọn, to owhe ṣinawetọ+ gandudu etọn tọn mẹ. 17 Ahọlu sọ wá yiwanna Ẹsteli hugan yọnnu he pò lẹpo, podọ e mọ nukundagbe po alọkẹyi* etọn po hugan awhli he pò lẹpo. Enẹwutu, e ze tabla ahọsi tọn do ota na ẹn bo yí i do basi ahọsi+ do otẹn Vaṣti tọn mẹ.+ 18 Podọ ahọlu basi hùnwhẹ daho de na ahọvi po devizọnwatọ etọn lẹpo po, yèdọ hùnwhẹ de do ota Ẹsteli tọn mẹ. Enẹgodo, ahọlu lá tundote de na agbegbe* lẹ bo to nunina lẹ na sọgbe hẹ adọkun ahọlu tọn.

19 Todin, whenue awhli*+ lọ lẹ yin bibẹpli whla awetọ, Mọldekai to aisinsin to họngbo ahọlu tọn ji. 20 Ẹsteli ma dọ nudepope gando hẹnnumẹ po omẹ etọn lẹ po go,+ kẹdẹdile Mọldekai ko na ẹn anademẹ do; Ẹsteli zindonukọn nado to nuhe Mọldekai dọna ẹn lẹ wà, taidi to whenue e gbẹ́ to anademẹ etọn glọ.+

21 To ojlẹ enẹ mẹ, dile Mọldekai to aisinsin to họngbo ahọlu tọn ji, awe to ahọluzọnwatọ họ̀nmẹ tọn lẹ mẹ he yin họ̀njinọtọ lẹ, yèdọ Bigitani po Telẹṣi po gblehomẹ bo blasé nado hù* Ahọlu Ahasuelusi. 22 Ṣigba, Mọldekai sè bo dọna Ahọsi Ẹsteli to afọdopolọji. Ẹsteli sọ dọhona ahọlu to yinkọ* Mọldekai tọn mẹ. 23 Enẹwutu, whẹho lọ yin dodinna bo wá yin mimọ domọ, bọ sunnu awe lọ lẹ yin zizepla do pòtin go; podọ ehe lẹpo yin kinkandai do owe whenuho tọn mẹ to ahọlu nukọn.+