Johanu

20 To azán tintan* osẹ lọ tọn gbè, Malia Magdaleni wá yọdò* lọ kọ̀n to afọnnu fuu,+ to whenue ai ma ko họ́n bo mọdọ zannu lọ ko yin didesẹ sọn yọdò* lọ nù.+ 2 Enẹwutu, e họ̀nwezun wá Simọni Pita po devi lọ he Jesu yiwanna po+ dè bo dọna yé dọmọ: “Yé ko ze Oklunọ sẹ̀ sọn yọdò lọ mẹ,+ podọ mí ma yọ́n fihe yé tẹ́ ẹ do.”

3 To whenẹnu, Pita po devi diẹ lọ po dedo yọdò lọ kọ̀n. 4 Yé omẹ awe lẹ jẹ wezunhọ̀n ji dopọ, ṣigba devi diẹ họ̀nwezun po awuyiya po hú Pita bo jẹ yọdò lọ kọ̀n jẹnukọn. 5 Whenue e dẹ́ hlan nukọn, e mọ alavọ lẹ to kọmẹ finẹ,+ ṣigba e ma biọ e mẹ. 6 To whenẹnu, Simọni Pita he to hihodo e lọ lọsu wá bo biọ yọwhé lọ. E sọ mọ alavọ lọ lẹ to kọmẹ finẹ. 7 Avọ̀ he to ota na ẹn dai lọ ma topọ hẹ avọ̀ biblá diẹ lẹ to kọmẹ, ṣigba yin hihá dovo do fidopo. 8 To whenẹnu, devi diẹ he ko jẹ yọdò lọ kọ̀n jẹnukọn sọ biọ e mẹ ga, podọ ewọ mọ bo yise. 9 Na kakajẹ din, yé ma ko mọnukunnujẹ adà Owe-wiwe tọn lọ mẹ he dohia dọ ewọ dona yin finfọn sọn oṣiọ lẹ mẹ.+ 10 Enẹwutu, devi lẹ lẹkọyi owhé yetọn lẹ gbè.

11 Ṣigba, Malia gbọṣi ote to gbonu sẹpọ yọdò lọ bo to avivi. Dile e to avivi, e dẹ́ hlan nukọn nado pọ́n yọdò lọ mẹ, 12 e sọ mọ angẹli awe+ to aisinsin to avọ̀ wewe mẹ to fihe oṣiọ Jesu tọn ko yin titẹ́ do dai, dopo to taligbé bọ awetọ to afọligbé. 13 Yé sọ dọna ẹn dọmọ: “Yọnnu, naegbọn hiẹ do to avivi?” E dọna yé dọmọ: “Yé ko ze Oklunọ ṣie sẹ̀ bọ n’ma yọ́n fihe yé tẹ́ ẹ do.” 14 To ehe didọ godo, e lẹgodo bo mọ Jesu to ote to finẹ, ṣigba e ma yọnẹn dọ Jesu wẹ.+ 15 Jesu dọna ẹn dọmọ: “Yọnnu, naegbọn hiẹ do to avivi? Mẹnu dín wẹ a te?” Na e lẹndọ jipa-họ́tọ lọ wẹ wutu, e dọna ẹn dọmọ: “Mẹdaho, eyin hiẹ ko ze e sẹ̀, dọ fihe hiẹ tẹ́ ẹ do na mi, na yẹn nido ze e.” 16 Jesu dọna ẹn dọmọ: “Malia!” Whenue e lilẹ́, e dọna ẹn to Heblugbe mẹ dọmọ: “Laboni!” (he zẹẹmẹdo “Mẹplọntọ!”) 17 Jesu dọna ẹn dọmọ: “Gbọ titẹdo go e, na n’ma ko hẹji yì Otọ́ dè. Ṣigba, yì mẹmẹsunnu ṣie lẹ dè+ bo dọna yé dọ, ‘Yẹn hẹji jei Otọ́ ṣie+ po Otọ́ mìtọn po dè podọ jei Jiwheyẹwhe ṣie+ po Jiwheyẹwhe mìtọn po dè.’” 18 Malia Magdaleni yì bo hẹn linlin lọ wá na devi lẹ dọmọ: “N’ko mọ Oklunọ!” Ewọ sọ dọ nuhe e dọna ẹn lẹ na yé.+

19 To whenue ozán kú to gbenẹgbe, yèdọ azán tintan osẹ lọ tọn, dile ohọ̀n fihe devi lẹ te lọ tọn lẹ to súsú gbanun-gbanun na budisi Ju lẹ wutu, Jesu sọawuhia bo ṣite to ṣẹnṣẹn yetọn bosọ dọna yé dọmọ: “Jijọho ni tin hlan mì.”+ 20 To ehe didọ godo, e do alọ etọn lẹ po adàja etọn po hia yé.+ To whenẹnu, devi lẹ jaya to whenue yé mọ Oklunọ.+ 21 Jesu sọ vọ́ dọna yé dọmọ: “Jijọho ni tin hlan mì.+ Kẹdẹdile Otọ́ ko do mi hlan do,+ yẹnlọsu to dido mì hlan.”+ 22 To ehe didọ godo, e fú jẹhọn do yé bo dọna yé dọmọ: “Gbigbọ ni jẹ mì ji.+ 23 Eyin mì jo ylando mẹdepope tọn na ẹn, e na yin jijona ẹn; eyin mì ma jo mẹdepope tọn na ẹn, e ma na yin jijona ẹn.”

24 Ṣigba, Tọmasi,+ dopo to Omẹ Wiawe lẹ mẹ he nọ yin yiylọdọ Ahoho lọ, ma tin po yé po to whenue Jesu wá. 25 Enẹwutu, devi he pò lẹ to didọna ẹn dọmọ: “Míwlẹ ko mọ Oklunọ!” Ṣigba, e dọna yé dọmọ: “Eyin n’ma mọ oṣó-pà* to alọ etọn lẹ go bo zín alọvi ṣie do oṣó-pà lọ lẹ mẹ bosọ zín alọ ṣie do adàja etọn mẹ,+ yẹn ma na yí ehe sè gbede.”

26 Todin, azán ṣinatọ̀n to enẹgodo, devi etọn lẹ to họ̀nsudo whladopo dogọ, Tọmasi sọ tin po yé po. Dile ohọ̀n lọ lẹ tlẹ to súsú gbanun-gbanun, Jesu sọawuhia bo ṣite to ṣẹnṣẹn yetọn bosọ dọmọ: “Jijọho ni tin hlan mì.”+ 27 Enẹgodo, e dọna Tọmasi dọmọ: “Yí alọvi towe dofi bo pọ́n alọ ṣie lẹ, podọ zín alọ towe do adàja ṣie mẹ, bosọ gbọ ayihaawe tindo,* ṣigba bo yise.” 28 Tọmasi sọ gblọnna ẹn dọmọ: “Oklunọ ṣie podọ Jiwheyẹwhe ṣie!” 29 Jesu dọna ẹn dọmọ: “Na hiẹ mọ mi wutu wẹ zọ́n bọ a do yise ya? Ayajẹnọ wẹ mẹhe ma mọ ṣogan bo yise lẹ.”

30 Na nugbo tọn, Jesu sọ basi ohia susu devo lẹ ga to devi etọn lẹ nukọn he ma yin kinkandai do owe-hihá ehe mẹ.+ 31 Ṣigba, ehelẹ ko yin kinkandai, na mìwlẹ nido sọgan yise dọ Jesu wẹ Klisti lọ, yèdọ Visunnu Jiwheyẹwhe tọn, bọ eyin mì tindo yise, mì sọgan tindo ogbẹ̀ gbọn oyín etọn gblamẹ.+