WETA 15

Mọ Ayajẹ to Azọ́n Sinsinyẹn Towe Mẹ

“Mẹdopodopo ni . . . to vivi magbọjẹ [kavi azọ́n sinsinyẹn] etọn lẹpo tọn dù.”—YẸWHEHODỌTỌ 3:13.

1-3. (a) Nukun tẹwẹ mẹsusu nọ yí do pọ́n azọ́n yetọn? (b) Pọndohlan tẹwẹ Biblu na mí tuli nado tindo gando azọ́n go, podọ kanbiọ tẹlẹ wẹ mí na gbadopọnna to weta ehe mẹ?

MẸSUSU ma nọ mọ ayajẹ to azọ́n yetọn mẹ to egbehe. Azọ́n sinsinyẹn wiwà na ganhiho susu lẹ to azọ́n he yé ma yiwanna sọmọ de kọ̀n nọ hẹn yé whleawu nado yì azọ́nmẹ to azán dopodopo ji. Etẹwẹ sọgan whàn mẹhe tindo pọndohlan mọnkọtọn lẹ nado tindo ojlo to azọ́n yetọn mẹ—kaka bo na wá dọ dọ yé ni mọ pekọ to agbasazọ́n yetọn mẹ?

² Biblu nọgodona pọndohlan dagbe tintindo gando azọ́n sinsinyẹn wiwà go. E dọ dọ azọ́n po sinsẹ́n etọn po yin dona de. Sọlọmọni wlan dọmọ: “Mẹdopodopo ni to dùdù, bosọ to nùnù, na e ni to vivi [azọ́n sinsinyẹn] etọn lẹpo tọn dù, nunina Jiwheyẹwhe tọn wẹ.” (Yẹwhehodọtọ 3:13) Jehovah, mẹhe yiwanna mí bo nọ jlo dagbe mítọn to whepoponu, jlo dọ mí ni mọ pekọ to azọ́n mítọn mẹ bosọ duvivi sinsẹ́n tuklajijẹ mítọn tọn. Eyin mí jlo na gbọṣi owanyi etọn mẹ, mí dona yinuwa sọgbe hẹ pọndohlan po nunọwhinnusẹ́n etọn lẹ po gando azọ́n go.—Yẹwhehodọtọ 2:24; 5:18.

³ To weta ehe mẹ, mí na gbadopọnna kanbiọ ẹnẹ delẹ: Nawẹ mí sọgan mọ ayajẹ to azọ́n sinsinyẹn mítọn mẹ gbọn? Azọ́n tẹlẹ wẹ Klistiani nugbo lẹ ma sọgan wà? Nawẹ mí sọgan hẹn agbasazọ́n po gbigbọnu lẹ po do jlẹkaji gbọn? Podọ azọ́n titengbe hugan tẹwẹ mí sọgan wà? Jẹnukọn whẹ́, mì gbọ mí ni gbadopọnna apajlẹ azọ́nwatọ daho hugan awe wẹkẹ lọ tọn lẹ tọn—yèdọ Jehovah Jiwheyẹwhe po Jesu Klisti po.

AZỌ́NWATỌ DAHO HUGAN LỌ PO AZỌ́NWATỌGAN LỌ PO

4, 5. Nawẹ Biblu dohia dọ Jehovah yin azọ́n sinsinyẹn watọ gbọn?

⁴ Jehovah wẹ Azọ́nwatọ Daho Hugan lọ. Gẹnẹsisi 1:1 dọmọ: “To whẹwhẹwhenu Jiwheyẹwhe dá olọn po aihọn po.” To whenuena Jiwheyẹwhe dotana azọ́n nudida tọn etọn gando aigba go, e lá dọ, e “yọ́n tlala.” (Gẹnẹsisi 1:31) To hogbe devo lẹ mẹ, azọ́n aigba ji tọn etọn lẹpo hẹn pekọ susu wá na ẹn. Matin ayihaawe, azọ́n sinsinyẹn wiwà hẹn ayajẹ daho wá na Jehovah, ‘Jiwheyẹwhe ayajẹnọ lọ.’—1 Timoti 1:11.

⁵ Jiwheyẹwhe azọ́n sinsinyẹn watọ mítọn gbẹ́ pò to azọ́nwa kakajẹ din. Ojlẹ dindẹn to whenuena aigba po nuhe tin to e ji lẹpo po ko yin didá godo, Jesu dọmọ: “Otọ́ ṣie wazọ́n kakajẹ dinvie.” (Johanu 5:17) Etẹwẹ Otọ́ lọ to wiwà? Sọn fininọ olọn mẹ tọn etọn mẹ, e ko hẹn alọnu ede tọn ján to anadidena gbẹtọvi lẹ mẹ podọ to nukunpipedo yé go mẹ. E ko wleawuna ‘nudida yọyọ de,’ yèdọ Klistiani he yin jiji gbọn gbigbọ dali lẹ he na wá dugán hẹ Jesu to olọn mẹ. (2 Kọlintinu lẹ 5:17) E ko to azọ́nwa nado hẹn lẹndai etọn gando gbẹtọvi lẹ go di—yèdọ lẹndai lọ dọ mẹhe yiwanna ẹn lẹ ni duvivi ogbẹ̀ madopodo tọn to aihọn yọyọ de mẹ. (Lomunu lẹ 6:23) Kọdetọn azọ́n ehe tọn na hẹn homẹ Jehovah tọn hùn taun. Livi susu gbẹtọ lẹ tọn ko do ojlo hia to owẹ̀n Ahọluduta lọ tọn mẹ bọ Jiwheyẹwhe nọ dọ̀n yé, podọ yé nọ basi diọdo lẹ to gbẹzan yetọn mẹ nado sọgan gbọṣi owanyi etọn mẹ.—Johanu 6:44.

6, 7. Kandai ojlẹ dindẹn azọ́n sinsinyẹn wiwà tọn tẹwẹ Jesu tindo?

⁶ Jesu yin yinyọnẹn taidi azọ́n sinsinyẹn watọ sọn ojlẹ dindẹn die. Whẹpo e do wá aigba ji, e wazọ́n taidi “azọ́nwatọgan” Jiwheyẹwhe tọn to nuhe tin “to olọn lẹ mẹ, po ehe tin to aihọn mẹ po” lẹpo didá mẹ. (Howhinwhẹn lẹ 8:22-31; Kọlọsinu lẹ 1:15-17) To whenuena Jesu wá aigba ji, e zindonukọn to azọ́n sinsinyẹn wiwà mẹ. To ovu whenu etọn, e plọn azọ́n họgbigbá tọn, bo wá yin yinyọnẹn taidi “atinpatọ.” (Malku 6:3) Azọ́n ehe yin huhlọnzọ́n bo nọ biọ dọ azọ́nwatọ lọ ni tindo nugopipe azọ́nyinyọnẹn tọn voovo lẹ—titengbe to ojlẹ he mẹ zomọ whlẹzizẹ tọn lẹ, whlẹsatẹn lẹ, po azọ́nwanu dahodaho lẹ po ma ko tin. Be hiẹ sọgan yí nukun homẹ tọn do pọ́n Jesu dile e tọ́n atin daho lẹ gbé—vlavo bo tlẹ gbò atin lọ lẹ bo dọ̀n yé yì fihe e to azọ́nwa te lẹ ya? Be a sọgan yí nukun homẹ tọn do mọ dile e to ohọ̀ lẹ gbá—bo to atin lẹ pà bosọ to ohọ̀ lẹ gla, to ohọ̀n lẹ basi, bo tlẹ sọ to nuyizan owhlẹ tọn delẹ basi ya? Matin ayihaawe, Jesu tindo numimọ pekọ he nọ wá sọn azọ́n sinsinyẹn he yin wiwà ganji mẹ tọn tlọlọ.

⁷ Jesu yin vivẹnudotọ ayidego tọn de to lizọnyizọn etọn hinhẹndi mẹ. E hẹn alọnu ede tọn ján taun po azọ́n titengbe ehe po na owhe atọ̀n-daa. Na e jlo na jẹ suhugan gbẹtọ lẹ tọn dè wutu, e ma hẹn whenu depope gú bo nọ fọ́n to afọnnu fuu bosọ nọ to azọ́nwa kakajẹ zánmẹ. (Luku 21:37, 38; Johanu 3:2) E zingbejizọnlin “lẹdo tòdaho po gbéta lẹ po pé bo to yẹwhehodọ, bosọ to wẹndagbe ahọludu Jiwheyẹwhe tọn tọn” lá. (Luku 8:1) Jesu zingbejizọnlin na kilomẹtlu susu po afọ po gbọn ali kọ́gudu tọn lẹ ji nado sọgan hẹn wẹndagbe lọ jẹ gbẹtọ lẹ dè.

8, 9. Nawẹ Jesu mọ ayajẹ to azọ́n sinsinyẹn etọn mẹ gbọn?

⁸ Be Jesu mọ ayajẹ to azọ́n sinsinyẹn he e wà to lizọnyizọn lọ mẹ ya? Mọwẹ! E dó okún nugbo Ahọluduta lọ tọn lẹ, podọ taidi kọdetọn de ogle lọ ko whẹ́n na gbingbẹ̀n. Azọ́n Jiwheyẹwhe tọn wiwà na huhlọn Jesu sọmọ bọ e wleawufo nado gbẹkọ núdùdù go nado sọgan wà azọ́n lọ dotana. (Johanu 4:31-38) Lẹnnupọndo pekọ he e na ko tindo ji to whenuena e dotana lizọnyizọn aigba ji tọn etọn bo dọna Otọ́ etọn po nujikudo po dọ: “Yẹn ko pagigona we to aihọn mẹ; yẹn ko dotana azọ́n he hiẹ na mi nado wà lọ.”—Johanu 17:4.

⁹ Na jide tọn, Jehovah po Jesu po wẹ yin omẹ tintan he mọ ayajẹ to azọ́n sinsinyẹn yetọn mẹ. Owanyi he mí tindo na Jehovah nọ whàn mí nado “yin mẹhodotọ Jiwheyẹwhe tọn.” (Efesunu lẹ 5:1) Owanyi he mí tindo na Jesu nọ sisẹ́ mí nado ‘hodo afọdòmẹ etọn’ pẹkipẹki. (1 Pita 2:21) Enẹwutu mì gbọ mí ni gbadopọnna lehe mílọsu sọgan mọ ayajẹ to azọ́n sinsinyẹn mítọn mẹ do.

LEHE MÍ SỌGAN MỌ AYAJẸ TO AZỌ́N SINSINYẸN MÍTỌN MẸ DO

Nunọwhinnusẹ́n Biblu tọn lẹ hihodo sọgan gọalọna we nado mọ ayajẹ to azọ́n sinsinyẹn towe mẹ

10, 11. Etẹwẹ sọgan gọalọna mí nado wleawuna pọndohlan dagbe gando azọ́n mítọn go?

¹⁰ Agbasazọ́n tindo otẹn etọn to gbẹzan Klistiani nugbo lẹ tọn mẹ. Mí jlo na mọ pekọ jẹ obá de mẹ to azọ́n mítọn mẹ, ṣigba ehe sọgan vẹawu taun eyin mí nọ wà agbasazọ́n he mí ma yiwanna de. Nawẹ mí sọgan mọ ayajẹ to azọ́n mítọn mẹ to ninọmẹ mọnkọtọn lẹ glọ gbọn?

¹¹ Mí dona wleawuna pọndohlan dagbe. Nugbo wẹ dọ mí ma sọgan diọ ninọmẹ mítọn lẹ to whepoponu, ṣigba mí sọgan diọ pọndohlan mítọn. Ayihamẹlinlẹnpọn do nuhe yin pọndohlan Jiwheyẹwhe tọn ji sọgan gọalọna mí nado wleawuna pọndohlan dagbe gando azọ́n go. Di apajlẹ, eyin tatọ́ whẹndo tọn de wẹ hiẹ yin, lẹnnupọndo nugbo lọ ji dọ, mahopọnna lehe azọ́n towe sọgan demẹpò sọ, e nọ hẹn we penugo nado wleawuna dandannu gbẹ̀mẹ tọn lẹ na whẹndo towe. Nukunpipedo mẹyiwanna towe lẹ go to aliho mọnkọtọn mẹ yin nujọnu to nukun Jiwheyẹwhe tọn mẹ. Ohó etọn dọ dọ mẹhe gboawupo nado wleawudaina whédo etọn “ylanhu mayisenọ.” (1 Timoti 5:8) Eyin a flindọ azọ́n towe nọ hẹn ẹn yọnbasi na we nado jẹ yanwle dagbe de kọ̀n—enẹ wẹ nado hẹn azọngban he Jiwheyẹwhe dena we di—ehe sọgan gọalọna we nado mọ pekọ jẹ obá de mẹ to azọ́n lọ wiwà mẹ, yèdọ pekọ he azọ́nwatọgbẹ́ towe lẹ sọgan nọma tindo.

12. Aliho tẹlẹ mẹ wẹ azọ́n sinsinyẹn wiwà po nugbonọ-yinyin to azọ́n mítọn mẹ po nọ hẹn ale wá te?

¹² Mí dona yin azọ́n sinsinyẹn watọ bosọ yin nugbonọ. Azọ́n sinsinyẹn wiwà podọ pinplọn nado wà azọ́n mítọn ganji sọgan hẹn ale wá na mí. Ogán lẹ nọ yọ́n pinpẹn azọ́nwatọ he nọ dovivẹnu bo nọ penukundo azọ́n yetọn lẹ go tọn taun. (Howhinwhẹn lẹ 12:24; 22:29) Taidi Klistiani nugbo lẹ, mí sọ dona yin nugbonọ to azọ́n mítọn mẹ—bo ma na nọ fìn akuẹ, azọ́nwanu, kavi whenu ogán mítọn tọn. (Efesunu lẹ 4:28) Dile mí mọ do to weta he wayi mẹ, nugbonọ-yinyin nọ hẹn ale wá. Eyin mẹhe yè yí do azọ́nmẹ yin yinyọnẹn taidi nugbonọ, e yọnbasi dọ yè ni dejidego. Podọ eyin ogán mítọn doayi azọ́n sinsinyẹn wiwà mítọn go kavi lala, mí sọgan tindo pekọ na mí yọnẹn dọ mí tindo ‘ayihadawhẹnamẹnu dagbe’ bosọ to homẹ Jiwheyẹwhe he mí yiwanna lọ tọn hẹn hùn.—Heblu lẹ 13:18; Kọlọsinu lẹ 3:22-24.

13. Ale tẹlẹ wẹ sọgan dekọtọn sọn apajlẹ dagbe he mí nọ zedai to azọ́nwatẹn mítọn mẹ?

¹³ Mí dona yọnẹn dọ walọ mítọn sọgan pagigona Jiwheyẹwhe. Taidi Klistiani de, eyin mí hẹn nujinọtedo he yiaga walọyizan tọn mítọn go to azọ́nmẹ, mẹdevo lẹ na doayi e go janwẹ. Po kọdetọn tẹ po? Mí sọgan gbọnmọ dali “doaṣọ́na oplọn Jiwheyẹwhe Whlẹngántọ mítọn tọn.” (Titu 2:9, 10) Mọwẹ, walọ dagbe mítọn sọgan hẹn mẹdevo lẹ nado mọ whanpẹ sinsẹ̀n-bibasi mítọn tọn, bo hẹn ẹn yin nuhọakuẹ dogọ to nukun yetọn mẹ. Pọ́n nuhe na yin numọtolanmẹ towe eyin azọ́nwatọgbẹ́ de jẹ ojlo tindo to nugbo lọ mẹ ji na apajlẹ dagbe towe to azọ́n lọ mẹ wutu! Hú popolẹpo, lẹnnupọndo ehe ji: Ale tẹwẹ sọ klo hugan yinyọnẹn dọ walọ dagbe towe nọ pagigona Jehovah bosọ nọ hẹn homẹ etọn hùn?—Howhinwhẹn lẹ 27:11; 1 Pita 2:12.

AGBASAZỌ́N LẸ DIDE PO WUNTUNTUN PO

14-16. To whenuena mí pannukọn nudide agbasazọ́n tọn lẹ, kanbiọ titengbe tẹlẹ wẹ mí dona gbadopọnna?

¹⁴ Biblu ma basi todohukanji agbasazọ́n he sọgbe po dehe ma sọgbe lẹ po tọn gba. Ehe ma zẹẹmẹdo dọ mí sọgan kẹalọyi agbasazọ́n depope poun mahopọnna nuhe e bẹhẹn lẹ gba. Owe-wiwe sọgan gọalọna mí nado de agbasazọ́n dagbe he sọgbe he na hẹn homẹhun Jiwheyẹwhe bo nasọ gọalọna mí nado dapana agbasazọ́n he e gbẹwanna lẹ. (Howhinwhẹn lẹ 2:6) To whenuena mí pannukọn nudide agbasazọ́n tọn lẹ, mí dona gbadopọnna kanbiọ titengbe awe.

¹⁵ Be azọ́n ehe wiwà yin nuyiwa he Biblu jẹagọdo wẹ ya? Ohó Jiwheyẹwhe tọn jẹagọdo ajojijẹ, lalodido, po boṣiọ lẹ bibasi po tlọlọ. (Eksọdusi 20:4; Owalọ lẹ 15:29; Efesunu lẹ 4:28; Osọhia 21:8) Mí dona gbẹ́ agbasazọ́n depope he na biọ dọ mí ni wà onú mọnkọtọn lẹ. Owanyi mítọn na Jehovah ma na na mí dotẹnmẹ gbede nado kẹalọyi agbasazọ́n he na biọ dọ mí ni tindo mahẹ to nuyiwa he osẹ́n Jiwheyẹwhe tọn jẹagọdo lẹ mẹ.—1 Johanu 5:3.

¹⁶ Be azọ́n ehe wiwà na hẹn mí yin mahẹtọ kavi mẹhe to godonọna walọ ylankan wẹ ya? Lẹnnupọndo apajlẹ de ji. Nude ma ylan to e mẹ nado wazọ́n to fide taidi mẹhe na nọ dokuavọna jonọ lẹ. Ṣigba, etẹwẹ eyin azọ́n mọnkọtọn yin zizedonukọnna Klistiani de to dotowhé he yè nọ dehò te de? Nugbo wẹ dọ azọ́n etọn ma na biọ dọ e ni tindo mahẹ tlọlọ to hòdide mẹ. Etomọṣo, be azọ́nwiwa etọn to gbesisọ mẹ to finẹ ma na nọgodona nukọnyiyi dotowhé he nọ dehò de tọn—yèdọ walọ he Ohó Jiwheyẹwhe tọn jẹagọdo de ya? (Eksọdusi 21:22-24) Taidi mẹhe yiwanna Jehovah lẹ, mí ma jlo na tindo mahẹ depope to walọ he ma sọgbe hẹ Owe-wiwe lẹ mẹ.

17. (a) Etẹlẹ ji wẹ mí dona lẹnnupọndo to whenuena mí to nudide basi gando agbasazọ́n go? (Pọ́n apotin lọ “Be N’Sọgan Kẹalọyi Azọ́n lọ Ya?”) (b) Nawẹ ayihadawhẹnamẹnu mítọn sọgan gọalọna mí nado basi nudide he nọ hẹn homẹhun Jiwheyẹwhe lẹ gbọn?

¹⁷ Mí na mọ gblọndo na suhugan kanbiọ he gando agbasazọ́n go lẹ tọn eyin mí yí sọwhiwhe do gbadopọnna gblọndo kanbiọ titengbe awe he yin kinkanse to hukan 15 po 16 po mẹ lẹ tọn. To yidogọ mẹ, onú devo lẹ tin he mí dona gbadopọnna po sọwhiwhe po eyin mí to nudide basi gando agbasazọ́n go.a Mí ma sọgan donukun dọ afanumẹ nugbonọ nuyọnẹntọ lọ ni wleawuna nunọwhinnusẹ́n he na yin hihodo to ninọmẹ he sọgan fọ́n lẹpo mẹ gba. Fie e nọ biọ dọ mí ni yí wuntuntun zan te niyẹn. Dile mí mọ do to Weta 2tọ mẹ, mí dona plọn ayihadawhẹnamẹnu mítọn gbọn dogbigbapọnna lehe mí na yí Ohó Jiwheyẹwhe tọn zan to gbẹzan mítọn mẹ do dali. Eyin mí plọn ‘huhlọn wuntuntun tọn’ mítọn gbọn ‘yíyí ì zan’ dali, ayihadawhẹnamẹnu mítọn sọgan gọalọna mí nado basi nudide he na hẹn homẹhun Jiwheyẹwhe bo nasọ gọalọna mí nado gbọṣi owanyi etọn mẹ lẹ.—Heblu lẹ 5:14.

BE N’SỌGAN KẸALỌYI AZỌ́N LỌ YA?

Nunọwhinnusẹ́n: “Mì nọ wà [onú] popo hlan gigo Jiwheyẹwhe tọn.”—1 Kọlintinu lẹ 10:31.

Kanbiọ delẹ he hiẹ dona kanse dewe

Be agbasazọ́n lọ na biọ dọ ma wà nuhe Ohó Jiwheyẹwhe tọn jẹagọdo tlọlọ lẹ wẹ ya?—Eksọdusi 20:13-15.
Be azọ́n lọ wiwà na hẹn mi zun mẹhe to godonọna walọ he ma sọgbe de wẹ ya?—Osọhia 18:4.
Be azọ́n he na hẹn ale wá na mẹdevo lẹ bo ma jẹagọdo nunọwhinnusẹ́n Owe-wiwe tọn lẹ wẹ e yin ya?—Owalọ lẹ 14:16, 17.
Nawẹ azọ́n lọ wiwà na yinuwado mẹdevo lẹ ji gbọn; be e na hẹn ayihadawhẹnamẹnu yetọn hoapa wẹ ya?—Lomunu lẹ 14:19-22.
Eyin n’mọ azọ́n do otò devo mẹ bo jo whẹndo ṣie do, nawẹ e na yinuwado yé ji to numọtolanmẹ-liho podọ to gbigbọ-liho gbọn?—Efesunu lẹ 5:28–6:4.

HẸN PỌNDOHLAN JLẸKAJI TỌN GO GANDO AGBASAZỌ́N GO

18. Naegbọn e do vẹawu nado hẹn jlẹkajininọ go to gbigbọ-liho?

¹⁸ E vẹawu nado hẹn jlẹkajininọ go to gbigbọ-liho to ‘azán godo tọn’ he gọ́ na “ojlẹ awusinyẹn tọn” ehelẹ mẹ. (2 Timoti 3:1) Nado mọ azọ́n bo hẹn e go ma bọawu paali. Taidi Klistiani nugbo lẹ, mí yọnẹn dọ nujọnu wẹ e yin nado wazọ́n sinsinyẹn nado sọgan penukundo whẹndo mítọn go. Ṣigba eyin mí ma tin to aṣeji, kọgbidinamẹnu azọ́nmẹ tọn lẹ kavi pọndohlan agọ̀ aihọn tọn gando agbasanu lẹ bibẹpli go sọgan glọnalina yanwle gbigbọmẹ tọn mítọn lẹ. (1 Timoti 6:9, 10) Mì gbọ mí ni gbadopọnna lehe mí sọgan hẹn jlẹkajininọ mítọn go bo mọdona “onú he gbọnvo” kavi he yin nujọnu hugan lẹ do.—Filippinu lẹ 1:10.

19. Naegbọn mí dona dejido Jehovah go mlẹnmlẹn, podọ etẹwẹ jidide mọnkọtọn nọ gọalọna mí nado dapana?

¹⁹ Dejido Jehovah go mlẹnmlẹn. (Howhinwhẹn lẹ 3:5, 6) Be e ma jẹna jidedomẹgo mọnkọ wẹ ya? To popolẹpo mẹ, e nọ hò mítọn pọ́n. (1 Pita 5:7) E yọ́n nuhudo mítọn lẹ hugan mílọsu, podọ alọ etọn ma whete nado penukundo mí go gbede. (Psalm 37:25) Enẹwutu, nuyọnẹnnu wẹ e na yin nado dotoai to whenuena Ohó etọn flinnu mí dọmọ: “Mì gbọ walọ mìtọn ni tin matin nukunkẹn; nuhe mì tindo ni pé mì: na [Jiwheyẹwhe] ko dọmọ, Yẹn ma to na jo we dai gbede, kavi gbẹ́ we gba.” (Heblu lẹ 13:5) Susu mẹhe tin to sinsẹ̀nzọn whenu-gigọ́ tọn mẹ lẹ tọn sọgan dekunnu dọ Jiwheyẹwhe penugo nado wleawuna dandannu gbẹ̀mẹ tọn lẹ. Eyin mí deji mlẹnmlẹn dọ Jehovah na penukundo mí go, mí ma na nọ hanú glanglan gando nukunpipedo whẹndo mítọn go. (Matiu 6:25-32) Mí ma na dike agbasazọ́n ni hẹn mí nado gbẹkọ nuwiwa gbigbọmẹ tọn lẹ go, taidi yẹwheho wẹndagbe lọ tọn didọ po opli lẹ yìyì po.—Matiu 24:14; Heblu lẹ 10:24, 25.

20. Etẹwẹ nukun hinhẹn do fidopo zẹẹmẹdo, podọ nawẹ hiẹ sọgan hẹn pọndohlan enẹ go gbọn?

²⁰ Hẹn nukun towe tin to fidopo. (Matiu 6:22, 23) Nukun hinhẹn do fidopo zẹẹmẹdo gbẹzan mítọn hinhẹn bọawu. Klistiani he nukun etọn tin to fidopo nọ ze nukun do onú dopo gee ji—enẹ wẹ ojlo Jiwheyẹwhe tọn wiwà. Eyin mí ze nukun mítọn do fidopo dín in, mí ma na to agbasazọ́n he akuẹ etọn tli po gbẹzan fẹẹmẹninọ tọn po dín to aliho egblemaku tọn mẹ gba. Mọjanwẹ mí ma na dike ojlo zogbe whepoponu tọn nado tindo nutindo agbasa tọn dagbe hugan he to zoji lẹ ehe ajọjlatọ lẹ na tẹnpọn nado diọlinlẹnna mí dọ yé yin dandannu nado sọgan tindo ayajẹ ni do magbọjẹ na mí do niyẹn. Nawẹ hiẹ sọgan hẹn nukun towe tin to fidopo gbọn? Ma dotukla dewe po ahọ́ he ma yin dandan tọn lẹ po blo. Ma yí nutindo he nọ yí whenu po ayidonugo susu to mẹsi po lẹ do jantẹnna dewe to gbẹzan mẹ blo. Setonuna ayinamẹ Biblu tọn nado nọ tindo pekọ to “núdùdù po avọ̀ po” mẹ. (1 Timoti 6:8) Tẹnpọn nado hẹn gbẹzan towe bọawu dile e sọgan yọnbasi do.

21. Naegbọn mí dona ze yanwle lẹ dai, podọ etẹwẹ dona tin to otẹn tintan mẹ na mí to gbẹ̀mẹ?

²¹ Ze yanwle gbigbọmẹ tọn lẹ dai bo tẹdo yé go. To whenuena e yindọ nuhe mí sọgan wà to gbẹ̀mẹ tindo dogbó, mí dona ze yanwle lẹ dai. Eyin e ma yinmọ, numadinu lẹ sọgan yí whenu họakuẹ mítọn, bo glọnalina nuhe yin nujọnu hugan lẹ. Etẹwẹ dona tin to otẹn tintan mẹ na mí to gbẹ̀mẹ? Yanwle tintan mẹsusu tọn to aihọn lọ mẹ wẹ nado doafọna wepinplọn dahodaho lẹ nado sọgan mọ agbasazọ́n he akuẹ etọn tli. To vogbingbọn mẹ, Jesu dotuhomẹna hodotọ etọn lẹ nado nọ ‘dín ahọluduta lọ whẹ́.’ (Matiu 6:33) Mọwẹ, taidi Klistiani nugbo lẹ, mí nọ ze Ahọluduta Jiwheyẹwhe tọn do otẹn tintan mẹ to gbẹzan mítọn mẹ. Gbẹzan mítọn—nudide he mí nọ basi, yanwle he mí zedai, po nuwiwa he mí nọ doafọna lẹ po—dona nọ dohia dọ Ahọluduta lọ po ojlo Jiwheyẹwhe tọn wiwà po yin nujọnu na mí hugan agbasanu lẹ po nuhe nọ yin afọdona devo lẹ po.

“NUDIDE ṢIE HẸN AYAJẸ PO PEKỌ PO WÁ NA MI”

“N’tindo kọdetọn dagbe to nupinplọn wehọmẹ tọn ṣie lẹ mẹ bo mọ gbedewema yí nado plọnnu vọnu to wehọmẹ he nọ yin sisi na taun de mẹ to New York to Amelika. Otọ́ ṣie do magbọjẹ na mi nado ze yinkọ dai to wehọmẹ alavọ tọn nukundeji voovo lẹ mẹ. Delẹ to yé mẹ kẹalọyi obiọ ṣie bọ n’tlẹ sọ mọ gbedewema yí nado yì plọnnu vọnu to dopo to wehọmẹ alavọ tọn he diyin hugan to États-Unis lẹ mẹ. Ṣigba, n’gbẹ́ nuzedonukọnnamẹ lọ dai na whẹwhinwhẹ́n awe wutu. N’mọ hlan nukọn dọ owù susu tin to e mẹ nado nọ̀ opá wehọmẹ alavọ tọn mẹ dẹn do whégbè, podọ n’tindo ojlo sinsinyẹn nado lẹzun gbehosọnalitọ.

“N’ko lẹzun gbehosọnalitọ whepoponu tọn todin na nuhe hugan owhe 20. N’ko hẹn alọnu ján to adà lizọnyizọn lọ tọn susu mẹ—taidi devizọnwiwa to fie nuhudo sù te, alọgigọ nado gbá Plitẹnhọ Ahọluduta tọn lẹ, podọ awuwiwlena alọgọ kọgbọ tọn to nugbajẹmẹji lẹ whenu. To agọe, homẹ ṣie hùn nado gọalọna kándo he nọ dó jonọgbè de to New York.

“Eyin n’flin owhe he n’ko yizan to sinsẹ̀nzọn whenu-gigọ́ tọn mẹ lẹ, n’nọ mọ lehe dona ṣie lẹ sù sọ. Nudide he n’basi hẹn ayajẹ po pekọ po wá na mi to gbẹzan ṣie mẹ. N’ma sọgan yí onú devo depope do diọ numimọ po họntọn he n’ko tindo lẹ po.”—Zenaida.

AZỌ́N SINSINYẸN WIWÀ TO LIZỌNYIZỌN LỌ MẸ

Mí sọgan dohia dọ mí yiwanna Jehovah gbọn azọ́n yẹwhehodidọ tọn zizedo otẹn tintan mẹ to gbẹzan mítọn mẹ dali

22, 23. (a) Azọ́n tẹwẹ yin nujọnu hugan na Klistiani nugbo lẹ, podọ nawẹ mí sọgan dohia dọ azọ́n ehe yin nujọnu na mí gbọn? (Pọ́n apotin lọ Nudide Ṣie Hẹn Ayajẹ po Pekọ po Wá Na Mi.”) (b) Etẹwẹ yin gbemima towe gando agbasazọ́n go?

²² Na mí ko sẹyì nukọn taun to azán godo tọn lẹ mẹ wutu, mí nọ ze ayidonugo lẹpo do azọ́n he yin nujọnu hugan na Klistiani lẹ ji—enẹ wẹ yẹwhehodidọ po azọ́n mẹhẹnzun devi tọn po. (Matiu 24:14; 28:19, 20) Taidi Apajlẹnọ mítọn, Jesu, mí jlo na hẹn alọnu ján petepete to azọ́n gbẹwhlẹngán tọn ehe mẹ. Nawẹ mí sọgan dohia dọ azọ́n ehe yin nujọnu na mí gbọn? Suhugan omẹ Jiwheyẹwhe tọn lẹ tọn wẹ nọ ze yede jo na azọ́n yẹwhehodidọ tọn ehe po ahundopo po taidi wẹnlatọ agun tọn lẹ. Mẹdelẹ ko vọ́ tito yetọn lẹ basi nado wadevizọn taidi gbehosọnalitọ kavi mẹdehlan lẹ. Na mẹjitọ susu yọnẹn dọ nujọnu wẹ e yin nado ze yanwle gbigbọmẹ tọn lẹ dai wutu, yé ko na tuli ovi yetọn lẹ nado yí sinsẹ̀nzọn whenu-gigọ́ tọn do basi yanwle gbẹzan yetọn tọn. Be lilatọ Ahọluduta lọ tọn zohunhunnọ lẹ nọ mọ ayajẹ to azọ́n sinsinyẹn he wà yé te to lizọnyizọn lọ mẹ ya? Gbau! Aliho dagbe hugan nado duvivi gbẹzan he gọ́ na ayajẹ, pekọ, po dona madosọha lẹ po tọn wẹ nado sẹ̀n Jehovah po ahun lẹpo po.—Howhinwhẹn lẹ 10:22.

²³ Suhugan mítọn wẹ nọ yí whenu susu zan to agbasazọ́n mẹ nado penukundo whẹndo mítọn go. Flindọ Jehovah jlo dọ mí ni tindo ayajẹ to azọ́n sinsinyẹn mítọn mẹ. Eyin mí hẹn pọndohlan po nuyiwa mítọn lẹ po sọgbe hẹ pọndohlan po nunọwhinnusẹ́n etọn lẹ po, mí sọgan mọ pekọ to azọ́n mítọn mẹ. Enẹwutu, mì gbọ mí ni magbe ma nado dike agbasazọ́n ni fẹayihasẹna mí sọn azọ́n titengbe hugan mítọn kọ̀n gbede—yèdọ azọ́n lọ nado lá wẹndagbe Ahọluduta Jiwheyẹwhe tọn. Gbọn azọ́n ehe zizedo otẹn tintan mẹ to gbẹzan mítọn mẹ dali, mí na dohia dọ mí yiwanna Jehovah bo nasọ gbọnmọ dali gbọṣi owanyi etọn mẹ.

a Nado mọ nudọnamẹ gigọ́ do nuhe dona yin dogbapọnna gando agbasazọ́n go lẹ, pọ́n Atọ̀họ̀-Nuhihọ́ Lọ Tọn 15 avril 1999, weda 28-30 po Atọ̀họ̀-Nuhihọ́ Lọ Tọn [Flansegbe] 15 octobre 1982, weda 26 po.