Etẹwẹ Jiwheyẹwhe to Linlẹn Nado Wà Na Mí?

EYIN a hia linlinwe de, pọ́n televiziọn, kavi dotó ladio, a nọ mọ kavi sè nususu gando sẹ́nhẹngba, awhàn po nuyiwa nukunbianamẹtọ lẹ tọn po go. Vlavo hiẹ lọsu tlẹ to yaji to alọnu na azọ̀n kavi okú mẹyiwanna de tọn wutu.

Kanse dewe dọ:

• Be nuhe Jiwheyẹwhe jlo na yẹn po whẹndo ṣie po niyẹn ya?

• Fie wẹ n’sọgan mọ alọgọ te nado duto nuhahun ṣie lẹ ji?

• Be jijọho nujọnu tọn na wá tin to gbèdopo ya?

Biblu na gblọndo he dutomẹji lẹ na kanbiọ enẹlẹ.

• Mẹde ma nasọ mọ awufiẹsa, poyọnho kavi kú ba.—Osọhia 21:4

• “Sẹkunọ na nọ lọ́n di agbanlin.”—Isaia 35:6

• “Nukun nukuntọ́nnọ lẹ tọn na yin hùnhùn.”—Isaia 35:5

• Oṣiọ lẹ na gọwá ogbẹ̀.—Johanu 5:28, 29

• Mẹde ma nasọ jẹazọ̀n ba.—Isaia 33:24

• Mẹhe to aigba ji lẹpo na nọ mọ núdù gọ́ho.—Salmu lẹ 72:16

  

E bọawu nado lẹndọ odlọ de poun wẹ nuhe a ṣẹṣẹ hia to weda owe ehe tọn he jẹnukọn lọ lẹ mẹ yin. Ṣigba, Jiwheyẹwhe dopagbe dọ emi na hẹn diọdo enẹlẹ wá aigba ji to madẹnmẹ bọ Biblu sọ do lehe e na wàmọ do hia.

Biblu tlẹ sọ dọ nususu humọ. E dọ nuhe mí dona yọnẹn nado tindo ayajẹ nujọnu tọn bo duvivi ogbẹ̀ tọn bẹsọn din na mí. Yiagbọji kleun bo lẹnnupọndo nuhe nọ hẹn we hanú lẹ ji. E sọgan yin nuhahun akuẹ tọn kavi whẹndo tọn, agbasamalo kavi okú mẹyiwanna de tọn. Biblu sọgan gọalọna we nado pehẹ nuhahun enẹlẹ, podọ e gán miọnhomẹna we gbọn alọgigọna we nado mọ gblọndo kanbiọ he bọdego ehelẹ tọn dali:

• Naegbọn mí do nọ jiya?

• Nawẹ mí sọgan didẹ nuhahun mítọn lẹ gbọn?

• Be whẹndo mítọn sọgan yin ayajẹnọ ya?

• Etẹwẹ nọ jọ do mí go to whenue mí kú?

• Be mí na wá gọ̀ mẹyiwanna mítọn he ko kú lẹ mọ to gbèdopo ya?

• Naegbọn mí sọgan deji dọ Jiwheyẹwhe na hẹn opagbe etọn lẹpo di?

Nugbo lọ dọ a to owe ehe hia dohia dọ a jlo na yọ́n nuhe Biblu plọnmẹ. Owe ehe na gọalọna we. Kanbiọ delẹ nọ zọnpọ hẹ hukan lọ lẹ nado gọalọna we, na a nido mọnukunnujẹ Biblu mẹ ganji. Gbẹtọ livi susu lẹ wẹ ko duvivi hodọdopọ do Biblu ji tọn hẹ Kunnudetọ Jehovah tọn lẹ. Todido mítọn wẹ yindọ hiẹ lọsu ni duvivi etọn. Na Jiwheyẹwhe ni dona we dile a to dogbapọnna nuhe Biblu sọgan plọn we!