Gbọṣi Adà Jehovah Tọn Mẹ

1, 2. Fitẹ wẹ mí sọgan mọ hihọ́ te to egbehe?

MÍ NI dọ dọ a to yìyì to aliji bọ yujẹhọn de bẹ. Agahomẹ jẹ súsú ji, abì jẹ gbigbò dlan ji, bọ hẹviosò sọ jẹ núdọ ji. To madẹnmẹ, jikun sinsinyẹn de bẹ. A jẹ bẹtẹn de dín ji. Lehe homẹ towe na hùn do sọ whenue a wá mọ fihe to húhú de bo họ̀n whlá do!

² Ninọmẹ mọnkọtọn de mẹ wẹ mí te to egbehe. Ninọmẹ aihọn tọn fọ́n bo to yinylan deji. A sọgan nọ kanse dewe dọ, ‘Fie wẹ n’na mọ hihọ́ te?’ Salmu-kantọ de wlan dọmọ: “Yẹn na dọna Jehovah dọmọ: ‘Hiẹ wẹ fibẹtado po figángán ṣie po, yèdọ Jiwheyẹwhe ṣie, mẹhe go yẹn dejido.’” (Salmu lẹ 91:2) Mọwẹ, Jehovah sọgan na mí kọgbọ sọn nuhahun mítọn lẹ mẹ todin, podọ e sọgan na mí todido jiawu de na sọgodo.

 3. Nawẹ mí sọgan yí Jehovah do basi fibẹtado mítọn gbọn?

³ Nawẹ Jehovah sọgan basi hihọ́na mí gbọn? E gán gọalọna mí nado duto nuhahun depope he mí tindo ji, e sọ dohuhlọn taun hú mẹdepope he sọgan tẹnpọn nado gbleawuna mí. Eyin nuylankan de tlẹ jọ do mí go todin, mí gán deji dọ Jehovah na vọ́ ninọmẹ lọ jlado to sọgodo. Biblu na mí tuli dọmọ: “Mì . . . hẹn mìde do owanyi Jiwheyẹwhe tọn mẹ.” (Juda 21) Mí dona gbọṣi adà Jehovah tọn mẹ nado mọ alọgọ etọn to ojlẹ awusinyẹn tọn lẹ mẹ. Amọ́, nawẹ mí gán wàmọ gbọn?

4, 5. Nawẹ Jehovah ko do owanyi etọn hia mí gbọn?

⁴ Nado gbọṣi adà Jehovah tọn mẹ, mí dona yọ́n obá he mẹ ewọ yiwanna mí jẹ. Lẹnnupọndo nuhe Jehovah ko wà na mí lẹpo ji. E na mí aigba whanpẹnọ de bo yí atin po kanlin dagbedagbe lẹpo do gọ́ e ji. E sọ nọ na mí núdùdù he dotọ́n lẹ nado dù podọ osin dagbe nado nù. Gbọn Biblu gblamẹ, Jehovah ko plọn mí yinkọ etọn po jẹhẹnu dagbedagbe etọn lẹ po. Hú popolẹpo, e do owanyi etọn hia mí to whenue e do Visunnu vivẹ́ etọn Jesu hlan aigba ji nado ze ogbẹ̀ etọn jo do ota mítọn mẹ. (Johanu 3:16) Podọ na avọ́sinsan enẹ wutu, mí tindo todido jiawu de na sọgodo.

⁵ Jehovah ko wleawuna Ahọluduta Mẹsia tọn lọ, yèdọ gandudu olọn mẹ tọn de he na hẹn yajiji lẹpo wá opodo to madẹnmẹ. Ahọluduta lọ na diọ aigba zun paladisi, fie mẹdopodopo na nọ jijọho po ayajẹ po mẹ te kakadoi. (Salmu lẹ 37:29) Aliho devo he mẹ Jehovah ko do owanyi etọn hia mí te wẹ yindọ e ko plọn mí lehe mí sọgan zan gbẹzan dagbe hugan lọ gbọn todin. E sọ basi oylọna mí nado nọ hodẹ̀ hlan ẹn, podọ e nọ wleawufo to whelẹponu nado dotoaina odẹ̀ mítọn lẹ. E họnwun dọ Jehovah ko do owanyi etọn hia dopodopo mítọn.

 6. Nawẹ a sọgan dohia dọ a kẹalọyi owanyi Jehovah tọn gbọn?

⁶ Nawẹ a sọgan dohia dọ a kẹalọyi owanyi Jehovah tọn gbọn? Nọ dohia ẹ dọ a yọ́n pinpẹn nuhe e ko wà na we lẹpo tọn. E blawu dọ, mẹsusu wẹ yin mayọndagbenọ to egbehe. Nudopolọ wẹ jọ to whenue Jesu to aigba ji. To gbèdopo, Jesu gbọazọ̀nna pòtọnọ ao delẹ, ṣigba dopo gee to yé mẹ wẹ wá dopẹna ẹn. (Luku 17:12-17) Mí jlo na taidi dawe he dopẹna Jesu lọ. Mí dona nọ dopẹna Jehovah to whelẹponu.

 7. Nawẹ owanyi mítọn na Jehovah dona siso sọ?

⁷ Mí sọ dona dohia Jehovah dọ mí yiwanna ẹn. Jesu dọna devi etọn lẹ dọ yé dona yí ahun yetọn lẹpo, alindọn yetọn lẹpo podọ ayiha yetọn lẹpo do yiwanna Jehovah. (Hia Matiu 22:37.) Etẹwẹ enẹ zẹẹmẹdo?

8, 9. Nawẹ mí sọgan dohia Jehovah dọ mí yiwanna ẹn gbọn?

⁸ Be e ko pé nado dọ poun dọ mí yiwanna Jehovah wẹ ya? Lala. Eyin mí yí ahun, alindọn po ayiha mítọn lẹpo po do yiwanna Jehovah nugbonugbo, e na nọ sọawuhia to nuyiwa mítọn lẹ mẹ. (Matiu 7:16-20) Biblu plọn mí to aliho he họnwun mẹ dọ eyin mí yiwanna Jiwheyẹwhe, mí na nọ setonuna gbedide etọn lẹ. Be enẹ vẹawu wẹ ya? Lala, na “gbedide [Jehovah tọn] lẹ ma pẹnagbànmẹ.”—Hia 1 Johanu 5:3.

⁹ Eyin mí setonuna Jehovah, gbẹzan mítọn nọ gọ́ na ayajẹ po pekọ po. (Isaia 48:17, 18) Ṣigba, etẹwẹ na gọalọna mí nado gbọṣi adà Jehovah tọn mẹ? Gbọ mí ni pọ́n.

10. Naegbọn a dona zindonukọn nado to nuplọn gando Jehovah go?

¹⁰ Nawẹ a wagbọn do lẹzun họntọn Jehovah tọn? Gbọn Biblu pinplọn towe gblamẹ, a wá yọ́n Jehovah dogọ bo jihọntọn hẹ ẹ. Họntọnjiji enẹ sọgan yin yiyijlẹdo miyọ́n he a ma jlo dọ ni ṣí de go. Kẹdẹdile miyọ́n de do nuhudo nake tọn nado to jiji do, a dona zindonukọn nado to nuplọn gando Jehovah go, na họntọn mìtọn nido vẹ́ zọnmii.—Howhinwhẹn lẹ 2:1-5.

11. Nawẹ nuplọnmẹ Biblu tọn lẹ na yinuwado ji we gbọn?

¹¹ Dile a zindonukọn nado to Biblu plọn, a na plọn nudelẹ he na yinuwado ahun towe ji taun. Pọ́n numọtolanmẹ he awe to devi Jesu tọn lẹ mẹ tindo to whenue Jesu to zẹẹmẹ basi na yé do dọdai Biblu tọn delẹ ji. Yé dọmọ: “Be ahun mítọn ma yin whinwhàn sinsinyẹn to ohò mítọn mẹ dile ewọ to hodọna mí to aliji, bo to Owe-wiwe lẹ hùn na mí to gigọ́ mẹ ya?”—Luku 24:32.

12, 13. (a) Etẹwẹ sọgan jọ do owanyi mítọn na Jiwheyẹwhe go? (b) Nawẹ mí sọgan hẹn owanyi mítọn na Jehovah dote gbọn?

¹² Kẹdẹdile ahun devi lọ lẹ tọn yin whinwhàn to whenue yé mọnukunnujẹ Owe-wiwe lẹ mẹ do, apàpà sọgan ko sọ́ hiẹ lọsu to whenue a jẹ nukunnumọjẹ Biblu mẹ ji. Enẹ ko gọalọna we nado yọ́n Jehovah bo yiwanna ẹn. A ma na jlo dọ owanyi enẹ ni miọn.—Matiu 24:12.

¹³ Todin he a ko lẹzun họntọn Jiwheyẹwhe tọn, a dona dovivẹnu vẹkuvẹku na họntọn mìtọn nido vẹ́ dogọ. A dona zindonukọn nado nọ plọnnu gando ewọ po Jesu po go bo nọ lẹnnupọndo nuhe plọn a te lẹ po lehe a sọgan yí yé zan to gbẹzan towe mẹ do po ji. (Johanu 17:3) Eyin a hia kavi plọn Biblu, nọ kanse dewe dọ: ‘Etẹwẹ ehe plọn mi gando Jehovah Jiwheyẹwhe go? Naegbọn n’dona yí ahun ṣie po alindọn ṣie lẹpo po do yiwanna ẹn?’—1 Timoti 4:15.

14. Nawẹ odẹ̀ nọ gọalọna mí nado hẹn owanyi mítọn na Jehovah lodo gbọn?

¹⁴ Eyin a tindo họntọn vivẹ́ de, a nọ dọho hẹ ẹ whẹwhẹ bọ enẹ nọ zọ́n bọ mì nọ vẹ́ dogọ. Mọdopolọ, eyin mí nọ dọho hẹ Jehovah to odẹ̀ mẹ whẹwhẹ, owanyi he mí tindo na ẹn na lodo dogọ. (Hia 1 Tẹsalonikanu lẹ 5:17.) Nunina jiawu de wẹ odẹ̀ yin sọn Otọ́ olọn mẹ tọn mítọn dè. Mí dona nọ dọhona ẹn sọn ahun mẹ wá to whelẹponu. (Salmu lẹ 62:8) Mí ma dona nọ plọn odẹ̀ mítọn lẹ do tamẹ bo nọ to vivọdọ, ṣigba nuhe duahunmẹna mí nugbonugbo lẹ wẹ mí dona nọ dọ. Mọwẹ, eyin mí zindonukọn nado nọ plọn Biblu bo nọ hodẹ̀ sọn ahun mẹ wá, owanyi mítọn na Jehovah na lodo dogọ.

15, 16. Nukun tẹwẹ a nọ yí do pọ́n azọ́n yẹwhehodidọ tọn?

¹⁵ Eyin mí jlo na gbọṣi adà Jehovah tọn mẹ, mí sọ dona nọ dọhona mẹdevo lẹ gando yise mítọn go. Lẹblanulọkẹyi vonọtaun de wẹ e yin nado nọ dọhona mẹdevo lẹ gando Jehovah go. (Luku 1:74) Podọ azọngban de wẹ, he Jesu zedo alọmẹ na Klistiani nugbo lẹpo. Dopodopo mítọn dona nọ dọyẹwheho wẹndagbe Ahọluduta Jiwheyẹwhe tọn. Be a ko jẹ mọwà ji ya?—Matiu 24:14; 28:19, 20.

¹⁶ Apọsteli Paulu mọdọ nuhọakuẹ tlala de wẹ azọ́n yẹwhehodidọ tọn lọ yin; e ylọ ẹ dọ “adọkunnu.” (2 Kọlintinu lẹ 4:7) Azọ́n titengbe hugan he hiẹ sọgan wà wẹ nado nọ dọhona mẹdevo lẹ gando Jehovah po lẹndai etọn po go. Aliho sinsẹ̀n-bibasi hlan Jehovah tọn de wẹ e yin, ewọ sọ nọ yọ́n pinpẹn nuhe a wà na ẹn lẹ tọn. (Heblu lẹ 6:10) Yẹwhehodidọ sọ sọgan hẹn ale wá na hiẹ po mẹhe to todoaina we lẹ po, na e na gọalọna hiẹ po yé po nado dọnsẹpọ Jehovah bo mọ ogbẹ̀ madopodo yí. (Hia 1 Kọlintinu lẹ 15:58.) Be azọ́n devo de tin he gán hẹn pekọ wá na we humọ ya?

17. Naegbọn azọ́n yẹwhehodidọ tọn do yin onú niyaniya tọn de?

¹⁷ Onú niyaniya tọn de wẹ azọ́n yẹwhehodidọ tọn yin. Mí dona “nọ dọyẹwheho ohó lọ tọn,” bo “gbọṣi e kọ̀n po niyaniya-yinyin po.” (2 Timoti 4:2) Mẹlẹ dona sèhó gando Ahọluduta Jiwheyẹwhe tọn go. Biblu dọmọ: “Azán daho Jehovah tọn ko sẹpọ! E ko sẹpọ podọ e to dindọnsẹpọ po awuyiya daho po!” Opodo lọ “ma na gbọwhenu!” (Zefania 1:14; Habakuku 2:3) Mọwẹ, to madẹnmẹ din, Jehovah na và aihọn ylankan Satani tọn sudo. Whẹpo enẹ nido jọ, avase dona yin nina mẹlẹ, na yé nido sọgan de nado sẹ̀n Jehovah.

18. Naegbọn mí dona nọ sẹ̀n Jehovah to pọmẹ hẹ Klistiani nugbo devo lẹ?

¹⁸ Jehovah jlo dọ mí ni nọ sẹ̀n emi to pọmẹ hẹ Klistiani nugbo devo lẹ. Biblu dọmọ: “Mì gbọ mí ni nọ na ayidonugo ode awetọ nado nọ whàn mídelẹ hlan owanyi po azọ́n dagbe lẹ po kọ̀n, e ma yin nado nọ gbẹkọ pipli dopọ mítọn lẹ go, dile mẹdelẹ tindo aṣa lọ do gba, ṣigba nado nọ na tuli ode awetọ, podọ humọ dile mì mọdọ azán lọ to dindọnsẹpọ.” (Heblu lẹ 10:24, 25) Mí dona wà nuhe go mí pé lẹpo nado nọ yì opli lẹpo. Opli lẹ nọ hùn dotẹnmẹ dote na mí nado na tuli ode awetọ bo hẹn mínọzo lodo.

19. Etẹwẹ sọgan gọalọna mí nado yiwanna mẹmẹsunnu po mẹmẹyọnnu mítọn lẹ po?

¹⁹ Eyin a yì opli lẹ, a na mọ họntọn dagbe lẹ he na gọalọna we nado sẹ̀n Jehovah. A na mọ mẹmẹsunnu po mẹmẹyọnnu voovo lẹ po he to nuhe go yé pé lẹpo wà nado sẹ̀n Jehovah dile a to wiwà do. Taidi hiẹ lọsu, mapenọ wẹ yé bọ yé nọ ṣinuwa. Eyin yé wá ṣinuwa do we janwẹ, nọ wleawufo nado jona yé. (Hia Kolosinu lẹ 3:13.) Nọ ze ayidonugo do jẹhẹnu dagbe mẹmẹsunnu po mẹmẹyọnnu towe lẹ tọn po ji to whelẹponu, podọ mọwiwà na gọalọna we nado yiwanna yé bo dọnsẹpọ Jehovah dogọ.

20, 21. Etẹwẹ yin “ogbẹ̀ nujọnu tọn lọ”?

²⁰ Jehovah jlo dọ họntọn etọn lẹpo ni zan gbẹzan dagbe hugan lọ. Biblu plọn mí dọ ogbẹ̀ mítọn sọgodo tọn na gbọnvo pete na egbehe tọn.

²¹ To sọgodo, mí na nọgbẹ̀ kakadoi, e ma yin na owhe 70 kavi 80 poun. Mí na duvivi “ogbẹ̀ madopodo” tọn to agbasalilo pipé, jijọho po ayajẹ po mẹ to paladisi whanpẹnọ de mẹ. Nuhe Biblu ylọdọ “ogbẹ̀ nujọnu tọn lọ” niyẹn. Jehovah dopagbe dọ emi na na mí ogbẹ̀ nujọnu tọn ehe, amọ́ mí dona wà nuhe go mí pé lẹpo todin nado “tẹdo [e] go gligli.”—1 Timoti 6:12, 19.

22. (a) Nawẹ mí sọgan “tẹdo ogbẹ̀ nujọnu tọn lọ go gligli” gbọn? (b) Naegbọn nude ma tin he mí gán wà nado jẹna ogbẹ̀ madopodo?

²² Nawẹ mí sọgan “tẹdo ogbẹ̀ nujọnu tọn lọ go gligli” gbọn? Mí dona “nọ wà dagbe” bo “sudeji to azọ́n dagbe lẹ mẹ.” (1 Timoti 6:18) Ehe zẹẹmẹdo dọ mí dona nọ yí nuhe mí plọn to Biblu mẹ lẹ do yizan mẹ. Ṣigba, ogbẹ̀ nujọnu tọn lọ ma sinai do vivẹnudido mítọn titi kẹdẹ ji. Nude ma tin he mí gán wà nado jẹna ogbẹ̀ madopodo gbede. Nunina vọnu de wẹ, he Jehovah nọ na devizọnwatọ nugbonọ etọn lẹ, yèdọ dohia “nukundagbe majẹhẹ” etọn tọn. (Lomunu lẹ 5:15) Otọ́ olọn mẹ tọn mítọn ka jlo vẹkuvẹku nado na nunina ehe devizọnwatọ nugbonọ etọn lẹ.

23. Naegbọn a dona basi nudide he sọgbe lẹ todin?

²³ Kanse dewe dọ, ‘Be n’to Jiwheyẹwhe sẹ̀n dile ewọ jlo do ya?’ Eyin a mọdọ emi dona basi diọdo delẹ, yawu wàmọ hadopo. Eyin mí ganjẹ Jehovah go bo nọ wà nuhe go mí pé lẹpo nado setonuna ẹn, Jehovah na yin fibẹtado mítọn. E na basi hihọ́na devizọnwatọ nugbonọ etọn lẹ to azán godo tọn aihọn ylankan Satani tọn ehelẹ mẹ. Enẹgodo, Jehovah na hẹn ẹn diun dọ mí na nọgbẹ̀ kakadoi to Paladisi mẹ, dile e ko dopà etọn do. Mọwẹ, a sọgan mọ ogbẹ̀ nujọnu tọn lọ yí eyin a basi nudide he sọgbe lẹ todin!