Nawẹ Okú Jesu Tọn Gán Whlẹn Mí Gbọn?

Mí nọ waylando, jiya bosọ nọ kú, na asu po asi po tintan lọ Adam po Evi po vẹtolina Jiwheyẹwhe wutu.a Ṣigba, todido gbẹ́ tin na mí. Jehovah ko deali de, na mí nido yin tuntundote sọn dẹ̀hodo okú po ylando po tọn glọ, gbọn Visunnu etọn Jesu Klisti gblamẹ. Biblu plọnmẹ dọ Jesu kú nado wleawuna ofligọ de. Ahọ́ he yin súsú nado tún mẹde dote wẹ nọ yin yiylọdọ ofligọ. Ahọ́ he Jesu sú wẹ ogbẹ̀ họakuẹ gbẹtọvi pipé tọn etọn. (Hia Matiu 20:28.) Whenue Jesu desọn ojlo mẹ nado yí jlọjẹ gbẹninọ kakadoi tọn etọn do sanvọ́ to aigba ji, ewọ hùn dotẹnmẹ dote na mí nado vọ́ nuhe Adam po Evi po ko hẹnbu lẹpo mọyi whladopo dogọ. Jesu sọ do obá he mẹ ewọ po Jehovah po yiwanna mí jẹ hia. Nupinplọn ehe na gọalọna we nado yọ́n pinpẹn okú Jesu tọn dogọ.

1. Nawẹ mí sọgan mọaleyi sọn okú Jesu tọn mẹ to egbehe gbọn?

Na mí yin ylandonọ wutu, mí nọ wà nususu he ma nọ hẹn homẹ Jehovah tọn hùn. Ṣigba, eyin ylando mítọn lẹ vẹna mí nugbonugbo bọ mí biọ Jehovah gbọn Jesu Klisti gblamẹ dọ ni jona mí bosọ wà nuhe go mí pé lẹpo ma nado vọ́ onú dopolọ lẹ ṣiwà, mí gán duvivi họntọnjiji dagbe de tọn hẹ Jiwheyẹwhe. (1 Johanu 2:1) Biblu dọ dọ: “Klisti kú whladopo podọ kakadoi na ylando lẹ, yèdọ omẹ dodonọ de na mawadodonọ lẹ, nado sọgan deanana mì yì Jiwheyẹwhe dè.”—1 Pita 3:18.

2. Nawẹ mí gán mọaleyi sọn okú Jesu tọn mẹ to sọgodo gbọn?

Jehovah do Jesu hlan nado ze ogbẹ̀ pipé etọn jo taidi gbẹtọvi de, “na mẹdepope he do yise hia to [Jesu] mẹ ma nado yin vivasudo adavo nado tindo ogbẹ̀ madopodo.” (Johanu 3:16) Na nuhe Jesu wà wutu, to madẹnmẹ Jehovah na vọ́ nuhe tolivivẹ Adam tọn ko hẹngble lẹpo jlado. Ehe zẹẹmẹdo dọ eyin mí do yise hia to avọ́sinsan Jesu tọn mẹ, mí na tindo dotẹnmẹ hundote lọ nado nọgbẹ̀ kakadoi to paladisi aigba ji tọn de mẹ!—Isaia 65:21-23.

DINDONANU DOGỌ

3. Okú Jesu tọn tún mí dote sọn ylando po okú po si

VIDEO: Naegbọn Jesu Do Kú?—Apá 1 (2:01)

• Dotẹnmẹ etẹ tọn wẹ Adam hẹnbu to whenue e vẹtolina Jiwheyẹwhe?

Hia Lomunu lẹ 5:12, enẹgodo dọhodo kanbiọ ehe ji:

• Kọdetọn tẹwẹ ylando Adam tọn hẹnwa jiwe?

Hia Johanu 3:16, enẹgodo dọhodo kanbiọ ehe ji:

• Naegbọn Jehovah do dó Visunnu etọn hlan aigba ji?

1. Adam yin sunnu pipé de he vẹtolina Jiwheyẹwhe bo hẹn ylando po okú po plá gbẹtọvi lẹ

2. Jesu yin sunnu pipé de he setonuna Jiwheyẹwhe bo hẹn ẹn yọnbasi na gbẹtọvi lẹ nado lẹzun mẹpipe bo nọgbẹ̀ kakadoi

4. Okú Jesu tọn gán hẹn ale wá na gbẹtọvi lẹpo

VIDEO: Naegbọn Jesu Do Kú?—Apá 2 (2:00)

• Nawẹ okú mẹdopo gee tọn gán hẹn ale wá na mẹlẹpo gbọn?

Hia 1 Timoti 2:5, 6, enẹgodo dọhodo kanbiọ ehe ji:

• Adam yin sunnu pipé de he hẹn ylando po okú po plá gbẹtọvi lẹ. Jesu lọsu yin sunnu pipé de. Enẹwutu, nawẹ ogbẹ̀ etọn he e zejo “yin ofligọ he sọzẹn de” gbọn, podọ ale tẹwẹ enẹ hẹnwa na gbẹtọvi lẹ?

5. Ofligọ lọ yin nunina de he Jehovah na we

Họntọn Jehovah tọn lẹ nọ pọ́n ofligọ lọ hlan taidi nunina de he yé mọyi tlọlọ. Di apajlẹ, hia Galatianu lẹ 2:20, bo dọhodo kanbiọ ehe ji:

• Nawẹ apọsteli Paulu dohia dọ emi nọ pọ́n ofligọ lọ hlan taidi nunina de he emi mọyi tlọlọ gbọn?

Whenue Adam waylando, ewọ po kúnkan etọn lẹpo po wẹ owhẹ̀ okú tọn yin didá na. Amọ́, Jehovah do Visunnu etọn hlan nado kú, na a nido tindo dotẹnmẹ lọ nado duvivi ogbẹ̀ tọn kakadoi.

Dile a to wefọ he bọdego lẹ hia, pọ́n numọtolanmẹ he Jehovah na ko tindo to whenue e mọ bọ Visunnu etọn to yaji. Hia Johanu 19:1-7, 16-18, enẹgodo dọhodo kanbiọ ehe ji:

• Numọtolanmẹ tẹwẹ a tindo gando nuhe Jehovah po Jesu po wà na we go?

BLADOPỌ

Na Jesu kú wutu, Jehovah sọgan jona ylando mítọn lẹ bọ mí sọgan nọgbẹ̀ kakadoi.

Dogbapọn

• Naegbọn Jesu do kú?

• Aliho tẹ mẹ wẹ ogbẹ̀ gbẹtọvi tọn pipé Jesu tọn yin ofligọ he sọzẹn de te?

• Nawẹ okú Jesu tọn sọgan hẹn ale wá na we gbọn?

PỌ́N NUDỌNAMẸ DEVO LẸ

Pọ́n nuhewutu ogbẹ̀ gbẹtọvi tọn pipé Jesu tọn do yin yiylọdọ ofligọ.

“Nawẹ Avọ́sinsan Jesu Tọn Yin ‘Ofligọ de Do Ota Mẹsusu Tọn mẹ’ Gbọn?” (Hosọ Intẹnẹt ji tọn)

Pọ́n nuhe mí dona wà nado yin whinwhlẹngán.

“Jesu Nọ Whlẹnmẹ—Gbọnna?” (Hosọ Intẹnẹt ji tọn)

Be Jehovah gán jona mí eyin mí tlẹ waylando sinsinyẹn lẹ ya?

“Gblọndo Na Kanbiọ Sinai Do Biblu Ji Lẹ” (Alọnuwe Atọ̀họ̀- Nuhihọ́ lọ Tọn, 1^er mai 2013 tọn)

Pọ́n lehe nupinplọn gando avọ́sinsan Klisti tọn go gọalọna dawe de nado diọ gbẹtọ-yinyin etọn do.

“N’Masọ Yin Afanumẹ Na Danuwiwa Ba” (Hosọ Intẹnẹt ji tọn)