Mẹnu lẹ Wẹ Tindo Nukun Dagbe Jiwheyẹwhe Tọn?

MÍMẸPO wẹ nọ jlo nado yin wanyina gbọn ogbẹ́ mítọn lẹ dali. Na Klistiani de ojlo sinsinyẹn he siso hugan wẹ yin nado mọ nukun dagbe Jiwheyẹwhe tọn yí. Gando Jehovah Jiwheyẹwhe go, e yin didọ to Psalm 84:11 mẹ dọmọ: “Oklunọ na na ojọmiọn po gigo po omẹ: e ma to na whlẹn onu dagbe de do yé he to zọnlin jlọjlọ zìn lẹ.” To jiji Jesu tọn whenu, awhá ayajẹ angẹli olọnmẹ tọn lẹ dopagbe dọ “jijọho to aigba ji na gbẹtọ he tindo nukun dagbe etọn lẹ!”—Luku 2:14, Osty.

Ṣigba mẹnu lẹ wẹ nọ tindo nukun dagbe Jiwheyẹwhe tọn? Be nujinọtedo Jiwheyẹwhe tọn lẹ yin onu dopolọ po gbẹtọ tọn po ya? Matin ayihaawe, yé ma yin dopolọ gba, dile eyin didohia do to nuhe yin zẹẹmẹ basina to hosọ he wayi mẹ. Na nugbo tọn, to whenuena e yindọ Klistiani lẹ yin tudohomẹna nado lẹzun “hodotọ Jiwheyẹwhe tọn,” dopodopo mítọn na wà dagbe nado sọgan kanse dọ, Be yẹn nọ do nukun dagbe hia mẹhe Jiwheyẹwhe do nukun dagbe hia na lẹ ya, kavi be yẹn nọ tindo ayilinlẹn lọ nado hodo nujinọtedo aihọn tọn to gbẹtọ lẹ pinpọ́n ṣie mẹ? (Efesunu lẹ 5:1) Nado duale nukun dagbe po alọkẹyi Jehovah tọn po, mí dona họ́ míde nado pọ́n onu lẹ sọn pọndohlan etọn mẹ.

Nujinọtedo Yiaga Jiwheyẹwhe Tọn Lẹ

“Jiwheyẹwhe ma yin mẹnukuntahopọntọ gba,” wẹ yin nuhe apọsteli Pita dọ “ṣigba to akọta lẹpo mẹ, mẹhe dibu si i, bo wazọ́n dodo, wẹ yè kẹalọyi to e de.” Yinukọn dogọ, apọsteli Paulu dekunnuna dọ Jiwheyẹwhe “yí ohùn dopo do da akọta gbẹtọ lẹpo tọn.” (Owalọ lẹ 10:34, 35; 17:26) Enẹwutu, nuhe sọgbe hẹ lẹnpọn dagbe poun wẹ e yin nado wá tadona lọ kọ̀n dọ, gbẹtọ lẹpo wẹ sọzẹn to nukun Jiwheyẹwhe tọn mẹ mahopọnna nuhe awusọhia agbasa tọn yetọn lẹ sọgan yin. Eyin enẹ wẹ yin whẹho lọ, e ma na hẹn ale wá na Klistiani de nado yí nukun dagbe do pọ́n mẹde matin lẹnpọn dagbe na omẹ enẹ wá sọn awa titengbe de ji kavi yin omẹ sinmẹ ayú titengbe de kavi yin omẹ akọ̀ devo tọn de wutu gba. Kakatimọ, e na wàdagbe nado hodo Apajlẹzedaitọ etọn, yedọ Jesu Klisti, dogbọn mẹhe dali kẹntọ lẹ lọsu tlẹ yigbe dọ e ma do mẹnukuntahopọn hia gba.—Matiu 22:16.

Hogbe lọ “nukunta” to whedelẹnu nọ yin yiyizan nado basi zẹẹmẹ nude tọn he ma siso kavi ma yin onu titengbe. Mọpẹpẹ wẹ sinmẹ ayú tọn te; kiki onu nukunta tọn poun wẹ e yin. Sinmẹ ayú mẹde tọn to aliho depope mẹ ma nọ do gbẹtọ-yinyin kavi jẹhẹnu homẹ tọn etọn tọn hia gba. To whenuena ninọmẹ lọ wá nado dè mẹde he yè na dogbẹ hẹ, dunù hẹ, kavi nado ná-alọ, na taun tọn mí ma dona pọ́n sinmẹ ayú tọn na titengbe tọn gba. Flindọ, viyọnnu jọja lọ he gbọdo delẹ to hogbe milomilo whanpẹnọ po numọtolanmẹ tọn po he yin kinkan pọn gbede dọ gando ede go dọmọ: “Yẹn diyuu, ṣigba whanpẹnọ, ... A pọ́n mi, na yẹn diyuu wutu blo, na owhè dekọpọn mi wutu.” (Ohan Sọlọmọni tọn 1:5, 6) Akọ̀ wẹo kavi sinmẹ agbasa tọn ma yin dodonu he jẹ na nukun dagbe didohia gba. Nuhe yin nujọnu hugan wẹ yin eyin vlavo omẹ lọ dibusi Jiwheyẹwhe bo nọ wazọ́n dodo tọn.

Etẹwẹ yin numọtolanmẹ Jiwheyẹwhe tọn dogbọn nutindo agbasa tọn lẹ dali? To mẹlẹpo he Jiwheyẹwhe yiwanna bo tindo nukun dagbe na lẹ mẹ, Visunnu etọn, yedọ Jesu Klisti, wẹ yin omẹ tintan lọ. Ṣogan, to whenuena e tin to aigba ji, Jesu ma tindo “ofi é na yí ota etọn dai te.” (Matiu 8:20) E ma tindo aigba depope, owhé lẹ, ogle lẹ, atín sinsẹ́n lẹ, kavi kanlin lẹ gba. Ṣogan, Jehovah doyẹyigona ẹn bo ze e daga do otẹ̀n de mẹ he yiaga hú mẹdepope tọn to wẹkẹ lọ mẹ gbọnvona Jiwheyẹwhe lọsu tọn.—Filippinu lẹ 2:9.

Jesu Klisti mọ nukun dagbe Jiwheyẹwhe tọn na ewọ yin adọkunnọ e ma yin to nutindo agbasa tọn lẹ mẹ gba ṣigba to azọ́n dagbe lẹ mẹ. (Yijlẹdo 1 Timọti 6:17, 18 go.) E dotuhomẹna hodotọ etọn lẹ dọmọ: “Mì bẹ́ adọkunnu pli na mìde to aigba ji blo, fie owán po okọ́ po nọ hẹn ẹn gble te, podọ fie ajotọ lẹ nọ gboadó bo finnu te: Ṣigba mì bẹ́ adọkunnu pli na mìde to olọn mẹ, fie na owán kavi okọ́ ma nọ hẹn gble te, podọ fie ajotọ lẹ ma nọ gboadó bo sọ finnu te.” (Matiu 6:19, 20) Gbọnmọ dali, kakati nado do nukun dagbe hia na mẹhe yin adọkunnọ to nutindo aihọn ehe tọn mẹ lẹ, Klistiani lẹ ma na basi vogbingbọn to dodonu nutindo aihọn ehe tọn lẹ tọn ji gba. Yé na din enẹnọ he yin adọkunnọ hlan Jiwheyẹwhe lẹ mahopọnna eyin vlavo yé yin adọkunnọ wẹo kavi hẹntọnọ to agbasa liho. A wọnji gbede blo dọ “Jiwheyẹwhe ma ko dè wamọnọ aihọn he tọn lẹ do basi adọkunnọ yise tọn, podọ whedutọ ahọludu lọ tọn.” (Jakobu 2:5) Eyin hiẹ hẹn pọndohlan Jiwheyẹwhe tọn go, hiẹ ma na jai biọ nuyiwa paa nukun dagbe tintindo na adọkunnọ to agbasa liho tọn lẹ mẹ gbede pọn gba.

Na nuhe dù weyinyọnẹn, Biblu dohia hezeheze dọ Jiwheyẹwhe dotuhomẹna mí nado din oyọnẹn po nuyọnẹn po podọ ga dọ Jesu Klisti wẹ yin mẹplọntọ daho hugan lọ he ko nọ aigba ji fi pọ́n. (Howhinwhẹn lẹ 4:7; Matiu 7:29; Johanu 7:46) Ṣigba e ma yin nuyọnẹn aihọn tọn kavi weyinyọnẹn wẹ nọ hẹnmẹ tindo nukun dagbe Jiwheyẹwhe tọn gba. To vogbingbọn mẹ, Paulu dọ na mí dọ “é ma yin nuyọnẹntọ susu gbọn agbasalan tọn mẹ ... wẹ yè ylọ gba; ṣigba Jiwheyẹwhe ko dè onu aihọn tọn lẹ he lunu nado dowinyan nuyọnẹntọ lẹ.”—1 Kọlintinu lẹ 1:26, 27.

Jiwheyẹwhe nọ tindo nukun dagbe na enẹnọ he yọ́nwe ganji lẹ, e ma yin to nupinplọn aihọn tọn lẹ he nọ yin pinplọn to wehọmẹ daho lẹ mẹ gba, ṣigba to “ogbè wiwe-ṣeke” nugbo lọ tọn he yin mimọ to Ohó etọn, Biblu lọ mẹ. (Zefania 3:9) Na nugbo tọn, Jehovah lọsu na ede to omẹ etọn lẹ plọn to egbehe gbọn yizan tito-to-whinnu mẹpinplọn tọn de he dlẹnkan sọyì agosu dindẹn aigba lọ tọn lẹ ji dali. Dile e yin didọdai gbọn yẹwhegan Isaia dali do, gbẹtọ akọta lẹpo tọn to gbeyi gbọn didọ dali dọmọ: “Mì wá na mí ni yi osó Oklunọ tọn ji, yì owhé Jiwheyẹwhe Jakob tọn tọn gbè; ewọ na sọ plọn ali etọn mí, mí na sọ zinzọnlin to omọ́ etọn mẹ.” Enẹwutu, kakati nado pagigona weyinyọnẹn aihọn tọn, Klistiani lẹ na din enẹnọ lẹ he dohia gbọn hodidọ po nuyiwa yetọn lẹ po dali dọ yé yin “pinplọn sọn Oklunọ de.” Gbọn mọ bibasi dali, yé na duvivi ‘jijọho susu’ he Jiwheyẹwhe nọ na tọn.—Isaia 2:3; 54:13.

Mí Sọgan Mọ Nukun Dagbe Jiwheyẹwhe Tọn Yí

Mọwẹ, nujinọtedo Jiwheyẹwhe tọn na yíyí nukun dagbe do pọ́n mẹdevo lẹ gbọnvo talala na gbẹtọ tọn. Etomọṣo, mí dona dovivẹnu vẹkuvẹku nado yin anadena gbọn aliho etọn lẹ dali eyin mí jlo na mọ nukun dagbe etọn yí. Enẹ zẹẹmẹdo dọ mí dona plọn nado nọ pọ́n mẹdevo lẹ sọn pọndohlan Jiwheyẹwhe tọn mẹ bo ma yin gbọn nujinọtedo gbẹtọ tọn lẹ dali, he nọ yin nuyiwadeji gbọn ṣejannabi po owanyi akọta tọn po dali gba. Nawẹ mí sọgan wà enẹ gbọn?

Jehovah Jiwheyẹwhe nọ gbadopọnna ayiha gbẹtọ tọn bo nọ yí nukun dagbe do pọ́n enẹnọ lẹ he nọ do jẹhẹnu mọnkọtọn lẹ hia taidi owanyi, dagbewa, walọ dagbe, po linsinsinyẹn po. Mí dona wà nudopolọ. (1 Samuẹli 16:7; Galatianu lẹ 5:22, 23) Mí dona nọ pọn omẹ homẹ tọn, jẹ oba he mẹ míwlẹ taidi gbẹtọ lẹ sọgan do, podọ e ma yin sinmẹ ayú tọn kavi akọ̀ etọn gba. Kakati nado din enẹnọ he yin adọkunnọ to onu agbasa tọn mẹ lẹ, mí na wàdagbe nado tindo pọndohlan Jiwheyẹwhe tọn gando adọkun go to ayiha mẹ bo dovivẹnu nado “nọ sù to azọ́n dagbe lẹ mẹ, yé ni nọ wleawu nado manamẹ, bo sọ jlo nado nọ kọndopọ.” (1 Timoti 6:18) Nado duale nukun dagbe Jiwheyẹwhe tọn, mí dona zindonukọn nado din oyọnẹn he pegan Jiwheyẹwhe po Visunnu etọn, Jesu Klisti po tọn, bo lẹzun weyọnẹntọ ganji to ogbè wiwe-ṣeke nugbo tọn mẹ. (Johanu 17:3, 17) To mọ wiwà mẹ, míwlẹ ga na tin to enẹnọ he tindo nukun dagbe Jiwheyẹwhe tọn lẹ mẹ. (Pọ́n w-F 1/12/92, weda 5.)