Nupinplọn sọn Nuṣiwa He Ko Wayi lẹ Mẹ

OSẸ́N walọdagbe Mẹdatọ mítọn tọn lẹ yin madopodo bo ma nọ diọ gba. Na whẹwhinwhẹ́n ehe tọn wutu nunọwhinnusẹ́n heyin mimọ to Galatianu lẹ 6:7 mẹ yọn-na-yizan to egbehe dọmọ: “Nudepope gbẹtọ do, enẹ wẹ e na gbẹ̀n ga.” Na nugbo tọn, mẹdopodopo lẹ sọgan gbẹ́ gbedido na Jiwheyẹwhe dai, ṣigba osẹ́n sọn olọn mẹ wá lọ gbẹsọ yin nudopolọ. Yigodo yinukọn, gbẹtọvi depope ma na họngán sọn kọdetọn nuyiwa etọn lẹ tọn mẹ gba.

Etẹwẹ dogbọn mẹde he nọ zan gbẹzan tasinsinyẹn tọn bọ to enẹgodo diọ, bo lẹzun devizọnwatọ Jiwheyẹwhe tọn de dali? E sọgan gbẹsọ nọgbẹ̀ po kọdetọn aliho gbẹninọ tọn etọn he ko wayi lẹ po. Etomọṣo, ehe ma zẹẹmẹdo dọ, Jiwheyẹwhe ma ko jona ẹn gba. Kọndopọ ayọdide Ahọlu Davidi tọn hẹ Bati-ṣeba hẹn nugbajẹmẹji susu wá gbẹzan etọn mẹ. E ma sọgan họngán sọn ehe mẹ gba. Ṣigba e lẹnvọjọ, podọ e sọ mọ jona Jiwheyẹwhe tọn yí.—2 Samuẹli 12:13-19; 13:1-31.

Be hiẹ ko tindo numọtolanmẹ homẹgble tọn pọ́n to whenuena hiẹ jiya kọdetọn nuṣiwa he hiẹ ko basi lẹ tọn ya? Eyin e yin pinpọnhlan to aliho he sọgbe mẹ, numọtolanmẹ linlẹn didiọ tọn sọgan yinuwa taidi nuflinmẹ de na mí nado ‘payiha na mí ni ma lẹhlan oylanwa blo.’ (Job 36:21) Mọwẹ, numọtolanmẹ nuvẹnamẹ tọn sọgan gọalọna mí nado dapana nuṣiwa de vivọ́ basi. Dehe tlẹ yọnhugan, Davidi yí numimọ he e mọyi sọn ylando he e wà lọ mẹ zan na alemọyi e mayin edetiti kẹdẹ tọn gba ṣigba na mẹdevo lẹ ga. E dọmọ: “Yẹn na plọn ali towe tasinyẹntọ lẹ: Ylandonọ lẹ nasọ lẹgọ wá dè we.”—Psalm 51:13.

[Yẹdide to weda 7]

Davidi plọnnu sọn ylando etọn hẹ Bati-ṣeba mẹ