Nuhewutu Mẹdelẹ to Sinsẹ̀n Yetọn Diọ

Na mẹsusu, sinsẹ̀n yin hiadogonamẹnu de poun. E sọgan do fie mẹde nọ yì vlavo to dimanche, fie e wlealọ te, podọ fie e na yin dìdì te hia. Ṣigba e ma nọ dọ wunmẹ mẹhe tọn ewọ yin kavi nuhe ewọ yọnẹn bo yise lọ gba. Di apajlẹ, dodinnanu dopo dohia dọ 50 to kanweko ji mẹhe ylọ yede dọ Klistiani lẹ tọn ma yọ́n mẹhe dọ Yẹwhehodidọ Osó ji tọn lọ gba. Etẹ, yèdọ etlẹ yin nukọntọ diyin Inde tọn lọ Mohandas Gandhi, Hindu de, yọ́n enẹ!

BE NUPAṢAMẸ wẹ e yin dọ gbẹtọ lẹ to hinhọ̀n sọn sinsẹ̀n mẹ to whenuena e yindọ susu sọmọ yetọn tindo oyọnẹn vude poun dogbọn yise yetọn dali ya? Lala, e mayin mọ paali. Ṣigba, e masọ yin nuhe yè ma sọgan dapana de gba. Mẹhe ko kẹalọyi alọgọ nado plọnnu dogbọn Biblu dali lẹ nọ saba yin pipaṣa nado mọ lehe yé mọaleyi sọn e mẹ do. Biblu lọsu dọmọ: “Yẹn wẹ OKLUNỌ Jiwheyẹwhe towe, he plọn we na ale, he plan we gbọn aliho he ji hiẹ na gbọ̀n.”—Isaia 48:17, wekun flinflin lẹ yin mítọn.

Etẹwẹ mẹhe ma tindo pekọ na huvẹ gbigbọmẹ tọn lẹ dona wà? Yé ma dona jo Jiwheyẹwhe sinsẹ̀n do gba! Kakatimọ, yé dona pọ́n Biblu mẹ nado mọ nuhe Jiwheyẹwhe lọsu na edetiti hẹn tin-to-aimẹ na yé.

Gblọndo Hlan Kanbiọ Sinsinyẹn Lẹ

To owhe ṣinawe-mẹvi mẹ, Bernd to onọ̀ etọn pọ́n dile e to kúkú.a To jọja-yinyin etọn blebu whenu, e yin pipaṣa dọ, ‘Fie wẹ onọ̀ ṣie tin te? Naegbọn yẹn dona whẹ́n matin ewọ?’ Taidi jọja aflanmẹ de, Bernd yin hagbẹ zohunhunnọ ṣọṣi tọn de. Yin ahunmẹduna dogbọn yajiji gbẹtọvi lẹ tọn dali, e tindo todido lọ nado lẹzun azọ́nwatọ alọgọnamẹtọ tògodo tọn de. Etomọṣo, e gbẹsọ yin tuklado dogbọn kanbiọ he ṣọṣi etọn ma ko na gblọndo pekọhẹnwanamẹ tọn na lẹ dali.

Enẹgodo wẹ Bernd dọho hẹ wehọmẹvi-gbẹ́ de mẹhe yin dopo to Kunnudetọ Jehovah tọn lẹ mẹ. Jọja ehe dohia Bernd sọn Biblu mẹ dọ onọ̀ etọn tin to ninọmẹ nude mayọnẹn tọn mẹ, yèdọ damlọn to okú mẹ. Bernd plọn wefọ susu he basi zẹẹmẹ ehe tọn lẹ, taidi Yẹwhehodọtọ 9:5 he dọmọ: “Na oṣiọ lẹ ma yọ́n nude.” Enẹwutu Bernd ma tindo whẹwhinwhẹ́n depope nado hanu dogbọn vlavo onọ̀ etọn to yaji to wunmẹ lẹwezomẹ tọn de mẹ—kavi he ylan hugan mọ de gba. Dile etlẹ yindọ sinsẹ̀n-nuplọnmẹ jọmaku alindọn tọn nọ yin pinplọn to sinsẹ̀n suhugan lẹ mẹ, Bernd mọ to Biblu mẹ dọ alindọn gbẹtọ tọn wẹ yin omẹ lọ lọsu. To whenuena omẹ lọ kú, alindọn lọ kú. “Alindọn he waylando, e na kú.”—Ezekiẹli 18:4.

Bernd sọ plọnnu dogbọn todido jiawu he tin na oṣiọ lẹ dali. E hia na edetiti sọn owe Biblu tọn Owalọ lẹ mẹ dọmọ: “Fọnsọnku dodonọ lẹ tọn, po mawadodonọ lẹ po tọn de na tin.” (Owalọ lẹ 24:15) Lehe e yin homẹhunnọ do sọ nado mọdọ fọnsọnku ehe na wá aimẹ tofi to aigba, ehe Jiwheyẹwhe na hẹn lẹzun paladisi de ji!—Psalm 37:29; Osọhia 21:3, 4.

To madẹnmẹ nuhudo gbigbọmẹ Bernd tọn lẹ yin pekọhẹnwana gbọn oyọnẹn nujọnu Biblu tọn dali. Bernd ma hẹn todido bu to sinsẹ̀n mẹ gba. Kakatimọ, e jo ṣọṣi he ma sọgan na pekọ huvẹ etọn lọ do bo kẹalọyi wunmẹ sinsẹ̀n-bibasi he sinai sisosiso do Biblu ji. E dọmọ: “Enẹ yin owhe 14 die wayi, podọ afọdide enẹ ma ko vẹ́ na mi pọ́n gbede. Todin yẹn yọnẹn dọ Mẹdatọ lọ ma nọ hẹn yajiji wá gba. Satani wẹ yin yẹwhe titonu ehe tọn, podọ ewọ wẹ dona yin whẹgbledo na ninọmẹ he lẹdo mí pé lẹ. Ṣigba to madẹnmẹ Jiwheyẹwhe na jla awugble he ko yin hinhẹnwa gbọn aihọn Satani tọn dali lẹpo do. Onọ̀ ṣie lọsu ga na lẹkọwa to fọnsọnku mẹ. Ayajẹ nankọ die ehe na yin!”

Po kosọ po, Bernd ko jẹ yanwle etọn nado wazọ́n to tògodo nado gọalọna mẹdevo lẹ kọ̀n. E to azọ́nwa to otò jonọ tọn mẹ to alọgigọna mẹdevo lẹ nado plọnnu dogbọn Ahọluduta Jiwheyẹwhe tọn dali, yèdọ pọngbọ nujọnu tọn lọ na awubla yetọn lẹ. Taidi Bernd, livi susu lẹ ko plọn dọ Jiwheyẹwhe na hẹn opodo wá na yajiji gbẹtọvi tọn to madẹnmẹ. Yé yin homẹhunnọ nado mọdọ sinsẹ̀n de tin he nọ na pekọ nuhudo gbigbọmẹ tọn yetọn.—Matiu 5:3.

Etẹwẹ Yin Lẹndai Ogbẹ̀ Tọn?

Dile Otò Europe tọn lẹ po Amelika po to nukunhùn deji, mẹsusu kanse dọ, ‘Etẹwẹ yin lẹndai ogbẹ̀ tọn?’ Gblọndo lọ na yin mimọ to Biblu mẹ, dile Michael mọ do. To gblagbla owhe 1970 lẹ tọn mẹ, Michael jlo na kọnawudopọ hẹ ogbẹ́ nukunbianamẹ tọn de. E tindo yanwle dopo gee to gbẹ̀mẹ—yèdọ nado yangbe mẹhe e mọdọ yé wẹ nọ hẹn whẹdida agọ̀ titonu ajọwiwa tọn wá lẹ. “Yẹn ma tọ́n sọn whégbè pọ́n gbede matin osò ṣie gba,” wẹ e dọ. “Lẹndai ṣie wẹ nado hù susu tonudọtọ po ajọwatọ gbóogbó lẹ po dile e sọgan yọnbasi do. Yẹn na tlẹ ko yí ogbẹ̀ ṣie do sanvọ́na nuyiwa lọ.”

Michael yin ṣọṣi-yitọ de, ṣigba mẹdepope matin to ṣọṣi etọn mẹ he sọgan basi zẹẹmẹ lẹndai nujọnu ogbẹ̀ tọn gba. Enẹwutu to whenuena Kunnudetọ Jehovah tọn lẹ dla owhé etọn pọ́n bo do gblọndo Biblu tọn lẹ hlan kanbiọ etọn lẹ hia ẹ, Michael dotoai po sọwhiwhe po. E jẹ opli lẹ na sinsẹ̀n-bibasi yì ji to Plitẹnhọ Ahọluduta Kunnudetọ Jehovah tọn lẹ tọn okọ́ lọ mẹ tọn mẹ.

Họntọn Michael tọn lẹ dín tlintlindo dogbọn ojlo yọyọ etọn to Biblu mẹ dali. “Mì wá opli to dimanche ehe,” wẹ Michael dotuhomẹna yé dọ. “Mì nọte na ojlẹ de. Eyin mì ma yiwanna nuhe mì sè, whenẹnu mì yì owhé.” Na nugbo tọn, to hodidọ sinai-do-Biblu ji nukunwhiwhe 45 tọn godo, suhugan họntọn etọn lẹ tọn tọ́n sọn plitẹnhọ lọ mẹ. Ṣigba dopo—yèdọ Susan—gbọṣi aimẹ. Yọnnu jọja ehe yin dindọndogo gbọn nuhe e sè dali. Michael po Susan po wlealọ to godo mẹ bo yin bibaptizi taidi Kunnudetọ Jehovah tọn lẹ. “Todin yẹn yọ́n nuhewutu mí tin tofi to aigba ji,” wẹ Michael dọ. “Mí yin didá gbọn Jehovah dali. Lẹndai nujọnu tọn mítọn to ogbẹ̀ mẹ wẹ nado yọ́n ewọ bosọ wà ojlo etọn. Enẹ wẹ yin nuhe nọ hẹn pekọ nugbo tọn wá!”

Livi susu wẹ kẹalọyi nujikudo Michael tọn. Yé nọ hẹn hogbe Biblu tọn lẹ do ahun mẹ he dọmọ: “Gbọ mí ni sè opodo ohó lẹpo tọn: Dibusi Jiwheyẹwhe bosọ yìn osẹ́n etọn lẹ: na ehe wẹ azọ́n gbẹtọ lẹpo tọn.”—Yẹwhehodọtọ 12:13.

Pipehẹ Nuhahun Gbẹ̀mẹ Tọn Lẹ

Mímẹpo wẹ nọ tindo numimọ hẹndi dọdai heyin mimọ to 2 Timoti 3:1 mẹ tọn he dọmọ: “Ehe wẹ mì ni yọnẹn ga, dọ to azán lẹ godo ojlẹ awusinyẹn tọn lẹ na wá.” Mẹdepope ma sọgan họngán sọn nuhahun ‘ojlẹ awusinyẹn tọn’ ehelẹ mẹ gba. Ṣigba Biblu gọalọna mí nado pehẹ yé.

Lẹnnupọndo Steven po Olive po ji, asu po asi po de. To whenuena yé jẹ Biblu plọn ji hẹ Kunnudetọ Jehovah tọn lẹ, yewlẹ, taidi mẹsusu devo lẹ, tindo nuhahun alọwle tọn lẹ. “Mí to nukọnpan kinklan,” wẹ Steven basi zẹẹmẹ dọ. “Mí tindo yanwle po ojlo he gbọnvo lẹ po.” Etẹwẹ gọalọna yé nado gbọṣi pọninọ mẹ? “Kunnudetọ Jehovah tọn lẹ do lehe mí sọgan yí nunọwhinnusẹ́n Biblu tọn lẹ do yizan mẹ to gbẹzan mítọn mẹ do hia mí,” wẹ Steven zindonukọn dọ. “Na ojlẹ tintan, mí plọn nuhe e zẹẹmẹdo ma nado yin ṣejannabinọ podọ mẹtọnhopọntọ. Yíyí nunọwhinnusẹ́n Biblu tọn lẹ do yizan mẹ kọ̀n mí dopọ pẹkipẹki. Todin mí to vivi alọwle ayajẹnọ, he lodo de tọn dù.”

Haṣinṣan Pẹkipẹki hẹ Jiwheyẹwhe

Sọgbe hẹ hokansemẹ dodinnanu agọe tọn de, 96 to kanweko ji Amelikanu lẹ tọn wẹ yise to Jiwheyẹwhe mẹ, podọ suhugan ehelẹ tọn nọ hodẹ̀ hlan ewọ. Ṣogan, hokansemẹ devo de dohia dọ sọha mẹhe nọ yì ṣọṣi po sinagọgu po mẹ lẹ jẹ doyiyi pete etọn kọ̀n todin to odá owhe kanweko tọn mẹ. Nudi 58 to kanweko ji Amelikanu delẹ tọn dọ dọ yé nọ yì ṣọṣi whladopo to osun dopo mẹ kavi whè hugan mọ. E họnwun dọ, sinsẹ̀n ma ko dọ̀n yé sẹpọ Jiwheyẹwhe pẹkipẹki gba. Podọ nuhahun ehe ma nọte do États-Unis kẹdẹ gba.

Linda whẹn to Bavaria. E yin yisenọ Katoliki tọn de bosọ nọ hodẹ̀ to gbesisọmẹ. To ojlẹ dopolọ mẹ, e nọ to budina sọgodo. E ma yọ́n nudepope gando lẹndai Jiwheyẹwhe tọn go na gbẹtọ gba. To whenuena e yin owhe 14-mẹvi poun, Linda dukosọ hẹ Kunnudetọ Jehovah tọn lẹ, podọ e na linlin dọmọ: “Nuhe yé dọ fọnjlodote, enẹwutu yẹn kẹalọyi alọgọnamẹnu plọnmẹ Biblu tọn awe bosọ hia yé to afọdopolọ ji.” To owhe awe godo, Linda jẹ Biblu plọn hẹ Kunnudetọ Jehovah tọn lẹ ji. “Nulẹpo he yẹn plọn dogbọn Jiwheyẹwhe dali sọn Biblu mẹ sọgbe hẹ lẹnpọn dagbe,” wẹ e dọ. Linda jo ṣọṣi etọn do bo yin bibaptizi taidi Kunnudetọ Jehovah tọn de to owhe 18-mẹvi mẹ.

Etẹwẹ sisẹ́ Linda nado diọ sinsẹ̀n etọn? E basi zẹẹmẹ dọmọ: “Ṣọṣi ṣie gọalọna mi nado mọdọ Jiwheyẹwhe de tin, podọ yẹn sọ plọn nado yise to ewọ mẹ. Ṣigba ewọ mayin gbẹtọ de gba bosọ dẹn do mẹ taun. Biblu pinplọn ṣie ma hẹn yise ṣie lodo to Jiwheyẹwhe mẹ kẹdẹ gba ṣigba sọ gọalọna mi nado wá yọ́n ẹn bosọ yiwanna ẹn. Todin yẹn tindo haṣinṣan họakuẹ de hẹ Jiwheyẹwhe, yèdọ nude he họakuẹ hugan nudevo depope.”

Sinsẹ̀n Nugbo Yin Nujọnu!

Be sinsẹ̀n towe na anademẹ gbigbọmẹ tọn we bo do lehe Biblu sọgan gọalọna we nado pehẹ nuhahun gbẹ̀mẹ tọn lẹ do hia we ya? Be e plọn todido Biblu tọn na sọgodo mẹ ya? Be e ko hẹn we wá haṣinṣan pẹkipẹki, mẹdetiti tọn mẹ hẹ Mẹdatọ lọ, he sinai do oyọnẹn he pegan Biblu tọn ji ya? Eyin e mayin mọ, ma gbọjọ blo. Kakati nado hẹn todido bu to sinsẹ̀n mẹ, dín wunmẹ sinsẹ̀n-bibasi tọn heyin zize sinai do Biblu ji gligli lọ. To whenẹnu hiẹ na wá taidi mẹhe go yé dọ dọdai do to owe Biblu Isaia tọn mẹ lẹ dọmọ: “Le wẹ Oklunọ Jiwheyẹwhe dọ, doayi e go, devi ṣie lẹ na dùnú . . . devi ṣie lẹ na nù . . . devi ṣie lẹ na jaya . . . devi ṣie lẹ na jihàn na homẹvivi ayiha tọn.”—Isaia 65:13, 14.

[Nudọnamẹ Odò tọn]

[Yẹdide to weda 4]

Biblu nọ gọalọna mí nado wá yọ́n bosọ yiwanna Jiwheyẹwhe