Otàn Gbẹzan Tọn

Onukinkan de He Diọ Gbẹzan Ṣie

DILE E YIN DIDỌ GBỌN IRENE HOCHSTENBACH DALI

Whèjai mardi tọn de wẹ to 1972. Owhe 16 wẹ n’tindo bo hodo mẹjitọ ṣie lẹ yì opli sinsẹ̀n tọn de to Eindhoven, heyin tòdaho de to agbegbe Brabant tọn mẹ, to Pays-Bas. Yẹn ma vò to dee mẹ bosọ to linlẹn dọ e na ko pọnte hugan eyin fidevo wẹ n’tin te. Ojlẹ enẹ mẹ wẹ awhli awe ze nukinkan de na mi he tindo nudọnamẹ ehe: “Irene vivẹ́, mí na jlo nado gọalọna we.” Yẹn ma yọnẹn dọ nudọnamẹ ehe na wá diọ gbẹzan ṣie gba. Ṣigba whẹpo ma dọ nuhe jọ bọdego, mì gbọ ma dọ nude na mì gando dee go.

YẸN yin jiji to lopo Belitung tọn ji, to Indonésie. Yẹn flin nudidọ lopo yozònọ enẹ ji tọn delẹ—nudidọ odétin lẹ tọn to jẹhọn nù, sisà otọ̀ he to yakẹ de tọn, nukiko ovi he to aihunda lẹdo owhé mítọn lẹ tọn, gọna nudidọ húnhiho he nọ gọ́ owhé mítọn gbè tọn. To 1960 to whenuena yẹn yin owhe ẹnẹ mẹvi, whẹndo mítọn sẹtẹn sọn Indonésie yì Pays-Bas. Mí zìn gbejizọnlin gaa ehe to bato mẹ, bọ nudidọ he yẹn flin taun lọ wẹ aihundanu yiwanna de tọn he yẹn hẹn, he nọ dó nukiko namẹ. Yẹn kúto to whenuena n’pé owhe ṣinawe mẹvi na awutu de wutu. Podọ sọn whenẹnu gbọ́n, yẹn ma sọgan se nudepope ba. Nuhe n’ko se wayi lẹ kẹdẹ wẹ n’flin.

Whinwhẹ́n Taidi Tókunọ De

Na mẹtọnhopọn owanyinọ mẹjitọ ṣie lẹ tọn wutu, yẹn ma yọ́n aliglọnnamẹnu tókunọ yinyin tọn lẹ to tintan whenu. Taidi ovivu de, yẹn lẹndọ aihundanu de poun wẹ nuhe nọ gọalọna mi nado sènu lọ yin, na e ma nọ gọalọ susu de na mi wutu. Eyin ovi lẹdo lọ tọn lẹ jlo na dọho hẹ mi, yé nọ kàn nuhe yé jlo na dọ lọ lẹpo do adó go, bọ yẹn nọ na gblọndo gbọn hodidọ na yé dali, dile etlẹ yindọ n’ma sọgan se ogbè dee titi tọn.

Dile yẹn to whinwhẹ́n, n’wá doayi e go dọ n’gbọnvona mẹhe lẹdo mi lẹ. N’sọ jẹ ayidego ji dọ mẹdelẹ nọ ṣàn mi kò na tókuku ṣie wutu, bọ mẹdevo lẹ ma nọ jlo nado dogbẹ́ hẹ mi. Yẹn jẹ numọtolanmẹ ṣokẹdẹninọ tọn tindo ji. N’jẹ nukunnumọjẹ nuhe e zẹẹmẹdo nado kúto mẹ ji, podọ dile n’to whinwhẹ́n deji, mọwẹ obu he n’tindo na mẹhe ma kúto lẹ to susu deji do niyẹn.

Na yẹn nido sọgan yì wehọmẹ vonọtaun tókunọ lẹ tọn de, mẹjitọ ṣie lẹ sẹtẹn na whẹndo lọ blebu sọn gbetatò de mẹ to agbegbe Limburg tọn mẹ yì tòdaho Eindhoven tọn mẹ. Otọ́ ṣie mọ agbasazọ́n to finẹ, bọ nọvisunnu po nọviyọnnu ṣie lẹ po bẹ wehọmẹ yọyọ devo. Yẹn dopẹ́ na adadidiọ he yé basi na ṣie tọn wutu lẹpo. To wehọmẹ, yé plọn mi nado nọ diọadana agayiyi ogbè ṣie tọn bo nọ dọho hezeheze. Dile mẹplọntọ lọ lẹ ma tlẹ nọ yí ogbè alọ-yido-dọho tọn zan, klasigbẹ́ ṣie lẹ plọn mi nado nọ wàmọ.

Gbẹninọ Taidi Tókunọ

Dile n’to whinwhẹ́n, mẹjitọ ṣie lẹ nọ tẹnpọn taun nado dọho hẹ mi, ṣigba nususu mẹ wẹ yẹn ma nọ mọnukunnujẹ. Di apajlẹ, yẹn ma yọnẹn dọ mẹjitọ ṣie lẹ to Biblu plọn hẹ Kunnudetọ Jehovah tọn lẹ. Ṣigba n’flindọ whẹndo mítọn dla fide he mẹsusu sinai te pọ́n to gbèdopo. Yemẹpo wẹ zín nukun do nukọn, nọ hopẹ́ to whedelẹnu, bo nọ fọ́nṣite gbọzangbọzan—ṣigba yẹn ma yọ́n nuhewutu yé to ehe lẹpo wà. To godo mẹ, n’wá yọnẹn dọ plidopọ agbegbe Kunnudetọ Jehovah tọn lẹ tọn de tẹnmẹ wẹ n’yì. Mẹjitọ ṣie lẹ sọ nọ plan mi yì ohọ̀ pẹvi de mẹ to tòdaho Eindhoven tọn mẹ. N’nọ voawu to finẹ na mẹlẹpo wẹ jọmẹ bọ whẹndo ṣie nọ jaya ga, ṣigba yẹn ma yọ́n nuhewutu mí nọ saba yì finẹ. Todin n’yọnẹn dọ Plitẹnhọ Ahọluduta Kunnudetọ Jehovah tọn lẹ tọn de wẹ ohọ̀ pẹvi lọ yin.

E blawu dọ mẹdepope matin to opli ehelẹ ji he nọ basi zẹẹmẹ tito-to-whinnu lọ tọn na mi. N’yọnẹn todin dọ mẹhe to finẹ lẹ jlo nado gọalọna mi ṣigba yé ma yọ́n lehe yé na yinuwa hẹ tókuku ṣie do. Yẹn nọ tindo numọtolanmẹ ṣokẹdẹninọ tọn to opli ehelẹ ji bo nọ lẹndọ, ‘e na ko pọnte eyin wehọmẹ wẹ n’tin te.’ Ṣigba dile n’to nulẹnpọndo linlẹn ehelẹ ji wẹ awhli awe kàn nude do wema de ji bo yí na mi. Nukinkan enẹ go wẹ n’donu to bẹjẹeji. Yẹn ma yọnẹn dọ nukinkan ehe na yin bẹjẹeji họntọnjiji họakuẹ de tọn he na de mi sọn ninọmẹ ṣokẹdẹninọ tọn ṣie mẹ gba.

Awuwiwlena Họntọnjiji Họakuẹ De

Colette po Hermine po, he do nukinkan lọ hlan lẹ tin to bẹjẹeji owhe 20 yetọn tọn mẹ. To nukọnmẹ, yẹn wá yọnẹn dọ yé wá agun Kunnudetọ Jehovah tọn lẹ tọn he yẹn dla pọ́n lọ mẹ nado sẹ̀n taidi gbehosọnalitọ whepoponu tọn, kavi lizọnyizọnwatọ whenu-gigọ́ tọn lẹ. Dile yé ma tlẹ se ogbè alọ-yido-dọho tọn, yẹn penugo nado nọ pọ́n nùflo yetọn to whenuena yé to hodọna mi, podọ to aliho ehe mẹ, mí nọ dọho dopọ ganji.

Homẹ mẹjitọ ṣie lẹ tọn hùn to whenuena Colette po Hermine po biọ nado plọn Biblu hẹ mi, ṣigba viyọnnu ehelẹ wà hugan mọ. Yé nọ dovivẹnu nado basi zẹẹmẹ opli lẹ tọn to Plitẹnhọ Ahọluduta tọn mẹ na mi bosọ nọ hẹn mi nado dogbẹ́ hẹ mẹdevo lẹ to agun lọ mẹ. Yé nọ basi zepọn nuzedonukọnnamẹ Biblu tọn he yẹn na yizan to yẹwhehodidọ mẹ lẹ tọn hẹ mi, bosọ nọ gọalọna mi nado wleawuna hodidọ wehọmẹvi tọn lẹ na Wehọmẹ Lizọnyizọn Yẹwhehọluduta tọn. Yí nukun homẹ tọn do pọ́n ninọmẹ lọ, yẹn penugo todin nado nọ na hodidọ de to pipli mẹhe ma kúto lẹ tọn de nukọn!

Humọ, Colette po Hermine po plọn mi nado dejido yé go. Yé yin sọwhiwhenọ bo nọ dotoaina mi. Dile etlẹ yindọ mí nọ saba konu do nuṣiwa ṣie lẹ ji, yé ma nọ ṣàn mi ko gbede; mọjanwẹ winyan ma nọ hù yé na yẹn tin hẹ yé wutu. Yé tẹnpọn bo mọnukunnujẹ numọtolanmẹ ṣie lẹ mẹ bosọ nọ yinuwa hẹ mi taidi mẹhe sọzẹn hẹ yé. Awhli he jọmẹ ehelẹ na mi nunina whanpẹnọ de—owanyi po họntọnjihẹmẹ yetọn po.

Na taun tọn, yé plọn mi dọ yẹn dona yọ́n Jiwheyẹwhe mítọn, Jehovah, taidi họntọn he go mí sọgan dejido de. Yé basi zẹẹmẹ dọ Jehovah ko mọ mi to aisinsin to Plitẹnhọ Ahọluduta tọn lọ mẹ podọ e yọ́n nuhe e zẹẹmẹdo nado yin tókunọ. Lehe homẹ ṣie hùn do sọ dọ owanyi mítọn na Jehovah kọ̀n mí omẹ atọ̀n lẹ dopọ taidi họntọn! Mẹtọnhopọn Jehovah tọn whàn mi, podọ na owanyi ṣie hlan ẹn wutu, n’basi dohia klandowiwe ṣie tọn hlan ẹn gbọn baptẹm osin mẹ tọn dali to juillet 1975.

Awukinkọndopọ hẹ Họntọn Vonọtaun De

To owhe he bọdego lẹ mẹ, n’jẹakọhẹ mẹmẹsunnu po mẹmẹyọnnu Klistiani tọn susu dogọ lẹ po. Mẹmẹsunnu dopo lẹzun họntọn vonọtaun de hlan mi, bọ mí wlealọ to 1980. To madẹnmẹ to enẹgodo, yẹn lẹzun gbehosọnalitọ, bọ asu ṣie Harry po yẹn po yin dide to 1994 nado sẹ̀n taidi gbehosọnalitọ titengbe lẹ to lẹdo Ogbè Alọ-Yido-Dọho Pays-Bas tọn mẹ. To owhe he bọdego mẹ, yẹn pannukọn azọ́ndenamẹ sinsinyẹn de. Azọ́ndenamẹ lọ wẹ nado nọ zọnhẹ asu ṣie he ma kúto, dile e to agun voovo lẹ dlapọ́n taidi nugopọntọ lẹdo tọn tẹnmẹpọnnamẹtọ de.

Nuhe n’nọ wà die. Eyin mí dla agun de pọ́n whla tintan, n’nọ yawu dọnsẹpọ mẹmẹsunnu po mẹmẹyọnnu susu po nado do dee hia yé. N’nọ dọna yé dọ tókunọ wẹ n’yin bo nọ biọ dọ yé ni nọ to pinpọn mi dile yé to hodọ na mi to aliho dẹẹdẹ tọn mẹ. N’sọ nọ tẹnpọn nado na gblọndo jẹnukọn to opli agun tọn lẹ ji. Podọ n’nọ kanse eyin mẹde jlo nado yin gbesetọ ṣie na osẹ enẹ to opli agun tọn lẹ ji podọ to lizọnyizọn kunnudegbe tọn mẹ.

Nuyiwa ehe tindo kọdetọn dagbe sọmọ bọ mẹmẹsunnu po mẹmẹyọnnu ṣie lẹ po nọ wọn to whedelẹnu dọ tókunọ wẹ n’yin, podọ ehe nọ dekọtọn do ninọmẹ nukiko tọn lẹ mẹ. Di apajlẹ, yé nọ dọna mi dọ eyin yé mọ mi to tòhomẹ, yé nọ kún opẹ̀n mọto yetọn tọn nado dọnudo mi, ṣigba yẹn ma nọ yigbe gba. Yẹn lọsu nọ wọnji dogbó ṣie lẹ go ga—taidi to ojlẹ he mẹ yẹn nọ tẹnpọn nado depá aṣli-hó de tọn na asu ṣie. Eyin n’mọdọ e vó to ajijimẹ, n’nọ yọnẹn dọ “pádide” ṣie ko lẹzun awhádido.

Ovi lẹ gọalọ to aliho madonukun lẹ mẹ. To agun he mí dla pọ́n na ojlẹ tintan de mẹ, visunnu owhe-ṣinẹnẹ-mẹvi de ko doayi e go dọ mẹhe to Plitẹnhọ Ahọluduta lọ tọn mẹ delẹ to awuwhle nado dọho hẹ mi, enẹwutu e de nado yí nude wà. E wá dè e, plan mi jẹ ṣẹnṣẹn Plitẹnhọ lọ tọn, bo dawhá dọmọ, “Yẹn jlo na do Irene hia mì—tókunọ wẹ e yin!” Mẹhe to finẹ lẹ wá dè e nado dọnudo mi.

Dile yẹn to zinzọ̀n hẹ asu ṣie to azọ́n lẹdo tọn lọ mẹ, họntọn ṣie lẹ to susu deji. Gbẹzan ṣie gbọnvo todin na owhe he wayi lẹ tọn to whenuena n’nọ tindo numọtolanmẹ ṣokẹdẹninọ tọn. Sọn whèjai enẹ he Colette po Hermine po ze nukinkan pẹvi enẹ na mi gbọ́n, n’ko tindo numimọ huhlọn họntọnjihẹmẹ tọn bo ko sọ dukosọ hẹ mẹhe lẹzun omẹ vonọtaun na mi lẹ. Hú popolẹpo, n’ko wá yọ́n Jehovah, yèdọ Họntọn he họakuẹ hugan lọ. (Lomunu lẹ 8:38, 39) Lehe nukinkan pẹvi enẹ diọ gbẹzan ṣie do sọ!

[Yẹdide to weda 24]

N’flin nudidọ aihundanu yiwanna hugan ṣie tọn

[Yẹdide lẹ to weda 25]

To lizọnyizọn lọ mẹ podọ hẹ asu ṣie, Harry