Yé Wadevizọn Na Mẹmẹsunnu Klistiani Tọn lẹ to Otò Devo lẹ Mẹ — WESẸDOTẸN INTẸNẸT JI TỌN Watchtower Tọn

Yé Wadevizọn Na Mẹmẹsunnu Klistiani Tọn lẹ to Otò Devo lẹ Mẹ

BE HIẸ ko se hogbe lọ lẹ “devizọnwatọ tògodo tọn lẹ” po “mẹdezejotọ tògodo tọn lẹ” po pọ́n ya? Kunnudetọ Jehovah tọn he tin to pipli ehe mẹ lẹ nọ ze whenu po nugopipe yetọn lẹ po jo nado gọalọ to owhé he nọ zín owẹ̀n Ahọluduta lọ tọn he tin to Biblu mẹ jẹgbonu bo má ẹn gbayipe lẹ gbigbá mẹ. Mẹdezejotọ mọnkọtọn lẹ sọ nọ gọalọ nado gbá Plitẹnhọ Plidopọ tọn po Plitẹnhọ Ahọluduta tọn lẹ po, he nọ yinuwa taidi Biblu plọntẹn lẹ. Otò voovo 34 mẹ wẹ mẹdezejotọ ehelẹ to alọgọ to azọ́n họgbigbá tọn mẹ te todin, na taun tọn to otò he mayin adọkunnọ sọmọ lẹ mẹ. Ayajẹ po avùnnukundiọsọmẹnu tangan tẹlẹ po wẹ yé nọ pehẹ dile yé to alọgọna mẹmẹsunnu Klistiani tọn lẹ to otò devo lẹ mẹ? Etẹwẹ yin numọtolanmẹ yetọn gando ‘sinsẹ̀nzọn wiwe’ he yé nọ wà lọ go? (Osọhia 7:9, 15) Nado mọ gblọndo, mì gbọ mí ni se nuhe mẹdezejotọ he wadevizọn to Mexique delẹ dọ.

Mẹdezejotọ tògodo tọn lẹ wá Mexique to tintan whenu to mai 1992. To madẹnmẹ, yé yin nukọntọ to azọ́n alahọ he nọ deanana nuwiwa Kunnudetọ Jehovah tọn lẹ tọn to Mexique hinhẹn gblodeji mẹ. Azọ́n hẹngblodeji tọn ehe bẹ ohọ̀ yọyọ 14 gbigbá hẹn, he mẹ adọtẹn mẹdezejotọ lọ lẹ tọn, wezintẹn, po wekantẹn lẹ po tin te.

Nado gọalọ to azọ́n họgbigbá tọn ehe mẹ, hugan mẹdezejotọ 730 sọn Canada, États-Unis, Grande-Bretagne, podọ sọn otò devo lẹ mẹ wazọ́n dopọ hẹ mẹdezejotọ kanweko susu lẹ sọn adà Mexique tọn lẹpo mẹ. Dogọ, hugan Kunnudetọ 28 000 he tin to nudi agun 1 600 he sẹpọ wekantẹn alahọ lọ tọn lẹ gọalọ to nuwiwa họgbigbá lọ tọn lẹ mẹ to sẹfifo lẹ. Mẹlẹpo wẹ wazọ́n sọn ojlo mẹ bo yí nugopipe yetọn lẹ zan vọ́nu. Yé pọ́n ẹn taidi lẹblanulọkẹyi nado sẹ̀n Jehovah to aliho ehe mẹ. To ojlẹ họgbigbá lọ tọn blebu mẹ, yé hẹn hogbe gbọdo heyin mimọ to Psalm 127:1 lẹ do ayiha mẹ dọmọ: “Adavo OKLUNỌ dó ohọ̀ lọ, yé he to didó e lẹ to tuklajẹ yaya.”

Avùnnukundiọsọmẹnu He Yé Nọ Pannukọn Lẹ

Avùnnukundiọsọmẹnu tẹlẹ wẹ mẹdezejotọ tògodo tọn lẹ nọ pannukọn dile yé tin to azọ́ndenamẹ tògodo tọn mẹ? Ayidonugo yetọn delẹ die. Curtis po Sally po, heyin asu po asi po de sọn États-Unis, ko gọalọ to azọ́n họgbigbá tọn mẹ to Allemagne, Inde, Mexique, Paraguay, Roumanie, Russie, Sénegal, po Zambie po. Curtis dọmọ: “Avùnnukundiọsọmẹnu tintan lọ wẹ viyọnnu mítọn, he yin gbehosọnalitọ [lizọnyizọnwatọ whenu-gigọ́ tọn] de, po agun mítọn he tin to Minnesota po jijido. Yẹn po asi ṣie po ko nọ̀ agun ehe mẹ na owhe 24, bọ mí voawu taun to e mẹ.”

Sally dọmọ: “Avùnnukundiọsọmẹnu wẹ e yin nado nọ ninọmẹ he yè ma jẹakọhẹ lẹ glọ, titengbe na yọnnu lẹ hugan sunnu lẹ, ṣigba yẹn plọn dọ e yọnbasi nado diọada. Yẹn tlẹ sọ plọn nado doakọnna owánvu lẹ, yé sù taun!” E yidogọ dọmọ: “To otò dopo mẹ, mí mẹdezejotọ ao nọ̀ ohọ̀ dopo he tindo awulẹpa awe poun bo masọ tindo nudatẹn de mẹ. Yẹn plọn nado nọ fahomẹ taun to finẹ.”

Ogbè yọyọ de pinplọn sọ yin avùnnukundiọsọmẹnu devo he nọ biọ vivẹnudido po whiwhẹ po. Sharon, he ko wadevizọn hẹ asu etọn to azọ́n họgbigbá tọn mẹ to otò voovo mẹ, dọmọ: “Avùnnukundiọsọmẹnu de wẹ e yin ma nado se ogbè otò lọ tọn. To bẹjẹeji, e ma nọ bọawu nado dọnsẹpọ mẹmẹsunnu po mẹmẹyọnnu gbigbọmẹ tọn towe lẹ po na a ma sọgan dọ numọtolanmẹ towe lẹ po awubibọ po wutu. Enẹ nọ hẹnmẹ jẹflumẹ taun. Ṣigba mẹmẹsunnu he mí pehẹ to azọ́ndenamẹ tògodo tọn mítọn mẹ lẹ fahomẹ hẹ mí taun bosọ tindo ojlo to dagbemẹ-ninọ mítọn mẹ. To madẹnmẹ, mí penugo nado jẹ hodọ hẹ yé ji.”

Mahẹ Tintindo to Lizọnyizọn lọ mẹ Nọ Biọ Adọgbigbo

Dile etlẹ yindọ mẹdezejotọ mẹde-yido-sanvọtọ mọnkọtọn lẹ nọ gọalọ taun to nukọnyiyi azọ́n họgbigbá tọn lẹ mẹ, yé yọnẹn dọ yẹwhehodidọ wẹndagbe Ahọluduta Jiwheyẹwhe tọn tọn wẹ yin azọ́n titengbe hugan yetọn. Enẹwutu, yé nọ nọgodona azọ́n yẹwhehodidọ tọn he to yinyin wiwà gbọn agun he yé kọnawudopọ hẹ lọ dali to gigọ́mẹ. Åke po Ing-Mari po, heyin asu po asi po he gọalọ to azọ́n họgbigbá tọn mẹ to Guadeloupe, Malawi, Mexique, po Nigeria po, yigbe dọ e nọ biọ adọgbigbo nado yí jonọgbè zan to lizọnyizọn lọ mẹ to tògodo.

Ing-Mari dọmọ: “To tintan whenu, mahẹ tintindo mítọn tindo dogbó na mí nọ saba zọnhẹ Kunnudetọ lẹdo lọ tọn lẹ bọ, na winyan wutu, mí nọ saba dike yewlẹ ni dọho. Ṣigba, to afọnnu dopo, mí de nado yì lizọnyizọn kunnudegbe tọn mẹ míde ṣo. Mí tọ́nyi lizọnyizọn lọ mẹ, dile etlẹ yindọ mí to budi. Mí dukosọhẹ awhli de he dotoaina nuzedonukọnnamẹ he yẹn ko plọn do tamẹ. Yẹn hia wefọ dopo bo do owe delẹ gbonu. Enẹgodo, yọnnu lọ dọmọ: ‘Jaale dọna mi. Yẹn tindo hẹnnumẹ de he plọn Biblu hẹ Kunnudetọ Jehovah tọn lẹ. Nawẹ yẹn lọsu sọgan plọnnu gbọn?’ Yẹn ma yọ́n nuhe yẹn na dọ ba. Enẹgodo yẹn duto dee ji bo ze plọnmẹ Biblu de donukọnna ẹn.”

Ing-Mari yidogọ dọmọ: “Yí nukun homẹ tọn do pọ́n ayajẹ ṣie po pẹdido ṣie po hlan Jehovah na didona afọdide po ojlo mítọn po nado má nugbo lọ.” Yọnnu ehe zindonukọn bosọ yin bibaptizi taidi Kunnudetọ de to plidopọ agbegbe de ji to Tòdaho Mexique tọn mẹ. Åke po Ing-Mari po basi bladopọ lizọnyizọn yetọn tọn dole: “Mí yọ́n pinpẹn azọ́ndenamẹ mítọn nado yì azọ́n họgbigbá tọn voovo lẹ tẹnmẹ, ṣigba nudepope ma zẹ̀ ayajẹ po pekọ alọgigọna mẹdevo lẹ nado kẹalọyi nugbo lọ tọn po go gba.”

Gbigbọ Mẹdetiti-Yido-Sanvọ́ Tọn De

Nugbo wẹ dọ avọ́sinsan wẹ e yin to adà mẹdezejotọ he jo whẹndo po họntọn yetọn lẹ po do tọn mẹ nado yì gọalọna mẹmẹsunnu yetọn lẹ to tògodo, ṣigba yé sọ nọ tindo ayajẹ susugege ga. Ayajẹ tẹlẹ?

Howard, he ko wadevizọn hẹ asi etọn Pamela, to Angola, Colombie, Équateur, Guyana, Mexique, Porto Rico, po Salvador po, basi zẹẹmẹ dọmọ: “Lẹblanulọkẹyi wẹ e yin nado jẹakọhẹ mẹmẹsunnu po mẹmẹyọnnu lẹ po to otò voovo mẹ bo mọ kọndopọ owanyinọ he tin to mẹmẹsunnu-yinyin akọjọpli tọn mítọn ṣẹnṣẹn tlọlọ. Mí nọ saba hia nususu gando enẹ go, ṣigba eyin hiẹ nọhẹ mẹhe wá sọn otò po aṣa voovo po mẹ lẹ bo wadevizọn hẹ yé, hiẹ na yọ́n pinpẹn mẹmẹsunnu-yinyin họakuẹ mítọn tọn dogọ taun.”

Gary, he ko gọalọ to azọ́n họgbigbá tọn mẹ to Colombie, Costa Rica, Équateur, Mexique, po Zambie po, lọsu lẹndọ emi ko mọale susu yí sọn tito ehe mẹ. E dọmọ: “Azọ́nplọnmẹ he yẹn mọyi to owhe lẹ gblamẹ gbọn gbẹdido hẹ mẹmẹsunnu he whèwhín he to devizọnwa to alahọ otò he mẹ yẹn ko yin azọ́ndena yì lẹ tọn ko gọalọna mi nado pegan ganji na avùnnukundiọsọmẹnu lẹ to azọ́ndenamẹ ṣie mẹ. E ko hẹn yise ṣie lodo na e ko hùn dotẹnmẹ dote na mi nado tindo numimọ pọninọ he nọ dohiagona titobasinanu aigba ji tọn Jehovah tọn—yèdọ pọninọ de he zẹ̀ vogbingbọn to ogbè, akọ, kavi aṣa lẹ mẹ go.”

Todin, azọ́n họgbigbá tọn ko wá vivọnu to Mexique, podọ alahọ heyin hinhẹn gblodeji lọ yin kinklandowiwe to owhe ehe mẹ. Na owanyi yetọn hlan Jiwheyẹwhe whàn yé wutu, devizọnwatọ tògodo tọn lẹ po mẹdezejotọ tògodo tọn lẹ po ko yidogọna hẹngblodeji sinsẹ̀n-bibasi nugbo tọn to Mexique podọ to fidevo lẹ. Kunnudetọ Jehovah tọn lẹ yọ́n pinpẹn gbigbọ ojlo tintindo po mẹde-yido-sanvọ́ tọn yetọn po to alọgigọna mẹmẹsunnu Klistiani tọn yetọn lẹ mẹ lẹdo aihọn pé.

[Yẹdide to weda 25]

Équateur

Colombie

Angola

[Yẹdide to weda 26]

Jipa alahọ lọ tọn

Azọ́n bẹjẹeji to ohọ̀ yọyọ alahọ Mexique tọn lẹ ji

To odò: Hagbẹ Azọ́nwatẹn Họgbigbá tọn delẹ to ohọ̀ yọyọ lọ lẹ nukọn

[Yẹdide to weda 27]

Họgbátọ mẹdezejotọ lẹ duvivi godoninọna azọ́n yẹwhehodidọ tọn hẹ agun lẹdo lọ tọn lẹ