Be ‘Sinsẹ̀n Nugbo’ Dopo Akàn Wẹ Tin Ya?

“KẸDẸDILE Klisti dopo wẹ tin, mọdopolọ pipli Klisti tọn dopo wẹ tin, bọ Asiyọyọ Klisti tọn dopo wẹ sọ tin: ‘podọ Ṣọṣi Katoliki po apọstoliki tọn po dopo wẹ sọ tin.’ ”—Dominus Iesus.

Zẹẹmẹ he sinsẹ̀ngán Katoliki tọn de, Joseph Ratzinger, basi to nuplọnmẹ ṣọṣi etọn tọn mẹ niyẹn dọ sinsẹ̀n nugbo dopo akàn wẹ dona tin. Podọ dile e dọ do, sinsẹ̀n enẹ heyin “Ṣọṣi dopo akàn Klisti tọn, wẹ Ṣọṣi Katoliki tọn.”

Yé “Mayin Ṣọṣi to Linlẹn He Sọgbe mẹ Gba”

Dile etlẹ yindọ Papa Jean Paul II tẹkudeji dọ kandai lọ Dominus Iesus ma dọ “nudepope he jẹagọ, kavi he do sisi matindo hia na sinsẹ̀n devo lẹ,” sinsẹ̀ngán Plọtẹstant tọn lẹ jẹagọdo kandai lọ sinsinyẹn. Di apajlẹ, to opli daho yetọn (Presbyterian General Assembly) tẹnmẹ to Belfast, to Agewaji Irlande tọn, to juin 2001, sinsẹ̀ngán dopo dọ dọ kandai lọ yin awuwlena gbọn “pipli he diyin de dali to Ṣọṣi Katoliki tọn mẹ . . . he to budina gbigbọ gbekọndopọ tọn he Vatican II zedai.”

Robin Eames heyin Biṣọpu daho Ṣọṣi Irlande tọn, dọ dọ emi na “jẹflumẹ taun” eyin kandai lọ yin “linlẹn he Ṣọṣi Katoliki tọn tindo dai jẹnukọnna Vatican II.” To zẹẹmẹ etọn mẹ do hodidọ Vatican tọn ji dọ ṣọṣi he gbẹ́ sinsẹ̀n-nuplọnmẹ Katoliki tọn delẹ dai “mayin Ṣọṣi to linlẹn he sọgbe mẹ,” Eames dọmọ: “Na yẹn tọn enẹ sọgan yin masinkọndomẹgo.”

Etẹwẹ zọ́n bọ Dominus Iesus do wá aimẹ? E taidi dọ homẹ Sinsẹ̀ngán Katoliki tọn lẹ tọn ma hùn do pọndohlan lọ ji dọ mẹdopodopo sọgan de nuyise sinsẹ̀n tọn etọn lẹ. Linlinwe The Irish Times dọ dọ, “alọkikẹyi nuyiwa aṣa voovo tọn lẹ to agblò sinsẹ̀n tọn mẹ—linlẹn lọ dọ sinsẹ̀n de ma gbọnvona devo . . . lẹzun nude he ma hẹn homẹhun Sinsẹ̀ngán Ratzinger.” E taidi dọ linlẹn ehe wẹ zọ́n bọ e do dọ dọ sinsẹ̀n nugbo dopo wẹ dona tin.

Be Sinsẹ̀n Towe Yin Nujọnu Wẹ Ya?

Na nugbo tọn, to linlẹn mẹdelẹ tọn mẹ, “pọndohlan lọ dọ mẹdopodopo sọgan de nuyise sinsẹ̀n tọn etọn lẹ” kavi “alọkikẹyi nuyiwa aṣa voovo tọn lẹ to agblò sinsẹ̀n tọn mẹ” yin nuhe sọgbe bo dọnmẹdogo hú linlẹn lọ dọ sinsẹ̀n nugbo dopo akàn wẹ dona tin. Na yewlẹ, sinsẹ̀n dona yin whẹho nujlomẹ mẹdetiti tọn. Enẹwutu yé dọ dọ, ‘to popolẹpo mẹ, sinsẹ̀n he mẹde nọ kọnawudopọ hẹ ma yin nujọnu lọ gba.’

Enẹ sọgan taidi aliho he yọnhugan ma nado yin hẹngogonọ—ṣigba dopo to kọdetọn etọn lẹ mẹ wẹ yindọ e ko hẹn sinsẹ̀n lẹ nado má do flinflin gbọn kámẹ-gòmẹ. Dile mẹsusu dọ do, ‘mimá do flinflin sinsẹ̀n tọn mọnkọtọn yin aliho de poun nado do mẹdekannujẹ mẹdopodopo tọn hia.’ Ṣigba sọgbe hẹ wekantọ Steve Bruce, nado dọ hójọhó, “alọkẹyi nulẹpo to sinsẹ̀n-liho” mọnkọtọn mayin nudevo hú “vọ́dona sinsẹ̀n.”—A House Divided: Protestantism, Schism, and Secularization.

To whelọnu lo, pọndohlan tẹwẹ sọgbe? Be sinsẹ̀n nugbo dopo akàn wẹ tin ya? Be Ṣọṣi Katoliki tọn wẹ ya? Kavi be Jiwheyẹwhe kẹalọyi sinsẹ̀n he pò lẹ lọsu wẹ ya? Na kanbiọ ehelẹ gando haṣinṣan mítọn hẹ Mẹdatọ mítọn go wutu, na nugbo tọn, e jẹ dọ mí ni yọ́n nuhe yin pọndohlan etọn gando whẹho lọ go. Nawẹ mí sọgan wà ehe gbọn? Gbọn dodindinna Ohó gbọdo Jiwheyẹwhe tọn, Biblu lọ dali. (Owalọ lẹ 17:11; 2 Timoti 3:16, 17) Mì gbọ mí ni dindona nuhe e dọ gando whẹho sinsẹ̀n nugbo dopo akàn tọn ehe go.