Aihọn de Matin Sẹ́nhẹngba Tin to Yakẹ

YÍ NUKUN homẹ tọn do pọ́n aihọn de matin sẹ́nhẹngbatọ lẹ! Nuhudo ma na tin ba na ponọ, ganpa, kavi whẹdatẹn dahodaho lẹ. Aihọn de wẹ e na yin fie mẹdopodopo na na sisi ogbẹ̀ po nutindo mẹdevo lẹ tọn po te. Be enẹ taidi hójijlẹ to nukun towe mẹ wẹ ya? Hiẹ sọgan lẹn mọ, ṣigba diọdo jiawu ehe wẹ Biblu dopagbe etọn pẹpẹ. Naegbọn hiẹ ma na gbadopọnna dọdai he Owe-wiwe dọ gando sẹ́nhẹngba po onú ylankan devo he to jijọ to aigba ji lẹ po go?

To owe Psalm tọn mẹ, mí hia dọmọ: “A fiẹ na ylanwatọ lẹ tọn wutu blo, hiẹ sọ yin nuvẹunnọ do yé he nọ wazọ́n mawadodo tọn lẹ go blo. Na yè na sán yé zindai zandevie di ogbé, yé nasọ fiọ di omá mú. Ṣigba homẹmiọnnọ lẹ na dugu aigba tọn; yé na hẹn homẹhun yede to jijọho susu mẹ.” (Psalm 37:1, 2, 11) Na nugbo tọn, mẹde ma sọgan glọnalina Jiwheyẹwhe sọn opagbe ehe po opagbe tulinamẹ tọn etọn devo lẹ po hinhẹndi mẹ gba.

Aliho he Jiwheyẹwhe na yizan nado hẹn dona ehelẹ wá wẹ Ahọluduta etọn. To Odẹ̀ Oklunọ tọn lọ mẹ, Jesu Klisti plọn hodotọ etọn lẹ nado nọ hodẹ̀ na wiwá Ahọluduta lọ tọn podọ na ojlo Jiwheyẹwhe tọn nido yin wiwà “to aigba go, dile e te to olọn mẹ.” (Matiu 6:9, 10) To madẹnmẹ, to Ahọluduta enẹ glọ, mẹde ma na yin whinwhàn to aigba ji nado doalọ to sẹ́nhẹngba mẹ na ohẹ́n, kọgbidinamẹ, kavi ṣejannabi wutu. Kakatimọ, Ohó Jiwheyẹwhe tọn dọmọ: “Gbado susugege na tin finẹ to osó lẹ ji.” (Psalm 72:16) Na nugbo tọn, Jehovah Jiwheyẹwhe na wleawu onú dagbe madosọha lẹ tọn na mẹlẹpo to aigba ji. Dehe yin titengbe hugan, gbẹtọvi lẹ na yin whinwhàn gbọn owanyi na Jiwheyẹwhe po kọmẹnu po dali bọ sẹ́nhẹngba ma na dotukla na aihọn gbede ba.