Kunnudide Mayin Aṣa Tọn to Lẹdo Glẹnsigbe-dótọ lẹ Tọn mẹ to Mexique

WHENUENA apọsteli Paulu to tenọpọn gbejizọnlinzintọ hatọ etọn lẹ to Atẹni, e yí dotẹnmẹ hundote enẹ zan nado dekunnu mayin aṣa tọn. Biblu dọmọ: “E to ohó yí do to hójlẹ . . . to ahi mẹ egbesọegbesọ hẹ omẹ he dukosọ na ẹn lẹ.” (Owalọ lẹ 17:17) To gbejizọnlin etọn ji sọn Jude jei Galili, Jesu dekunnu mayin aṣa tọn na yọnnu Samalianu de to dotọ̀ de kọ̀n. (Johanu 4:3-26) Be hiẹ nọ yí dotẹnmẹ hundote lẹpo zan nado lá wẹndagbe Ahọluduta Jiwheyẹwhe tọn ya?

Lẹdo Glẹnsigbe-dótọ lẹ tọn to Mexique yọ́n na kunnudide mayin aṣa tọn taun. Jonọ lẹ nọ dla ayidedai-tẹn lẹ pọ́n, nuplọntọ wehọmẹ alavọ tọn yọyọ lẹ nọ to wiwá, podọ jonọ he ko yí gbọjẹ whenu-gaa tọn to Mexique lẹ nọ saba yì gbọjẹ-yítẹn po ahànnutẹn lẹ po mẹ. Susu to Kunnudetọ Jehovah tọn he sè Glẹnsigbe lẹ mẹ ko lẹzun azọ́nyọnẹntọ to hodọdopọ lẹ bibẹjẹeji hẹ omẹ mọnkọtọn lẹ mẹ. Na nugbo tọn, yé nọ dín dotẹnmẹ hundote lẹ nado dọho hẹ mẹdepope he awusọhia etọn di jonọ kavi he nọ dó Glẹnsigbe. Mì gbọ mí ni pọ́n lehe yé nọ wà ehe gbọn.

Kunnudetọ he wá sọn tògodo bo to azọ́nwa to lẹdo Glẹnsigbe-dótọ lẹ tọn mẹ nọ do yede hia jonọ devo lẹ poun bo nọ kàn fie yé wá sọn sè. Podọ to paa mẹ jonọ lọ lọsu nọ kàn nuhe Kunnudetọ lọ to wiwà to Mexique sè bọ ehe nọ hùn dotẹnmẹ lọ dote nado má nuyise Klistiani tọn lẹ. Di apajlẹ, Gloria, he to sinsẹ̀n to fie nuhudo sù te to lẹdo Glẹnsigbe-dótọ lẹ tọn mẹ to Oaxaca, mọ ẹn taidi nuhe bọawu taun nado bẹ hodọdopọ lẹ jẹeji to aliho enẹ mẹ. To whenuena e ko fó yẹwhehodidọ mayin aṣa tọn etọn to nọtẹn gbangba tòpẹvi lọ tọn mẹ bo lẹkọ jei whé, asu po asi po de he wá sọn Angleterre dọnsẹpọ Gloria. Yọnnu lọ vó dọ: “E vẹawu na mi nado yise dọ n’to yọnnu heyin mẹyuu mọ tofi to Oaxaca!” Kakati nado gblehomẹ, Gloria konu, bọ yé jẹ hodọ do nuhewutu e do tin to Mexique ji. Yọnnu lọ basi oylọna Gloria yì owhé etọn gbè nado nù kafe dopọ. To dope dido godo, Gloria ze linlinnamẹwe Atọ̀họ̀-Nuhihọ́ Lọ Tọn po Réveillez-vous! po donukọnna yọnnu lọ, ṣigba e gbẹ́, bo dọ dọ emi ma yise dọ Jiwheyẹwhe tin gba. Gloria yigbe dọ homẹ emitọn nọ hùn nado dọho hẹ mẹhe ma yise dọ Jiwheyẹwhe tin lẹ bo nasọ jlo nado yọ́n linlẹn etọn gando hosọ lọ go “Sinsẹ̀n Basitẹn Lẹ—Be Mí Tindo Nuhudo Yetọn Wẹ?” Yọnnu lọ kẹalọyi, bo dọmọ: “Eyin a sọgan diọlinlẹn na mi dọ Jiwheyẹwhe tin, be nuhe jiawu de wẹ a wadotana.” Yé duvivi hodọdopọ he fọnjlodotenamẹ susu tọn dile yé to kafe lọ nù. To godo mẹ, asu po asi po lọ lẹkọyi Angleterre, ṣigba yé gbẹ́ nọ kanwe hlan Kunnudetọ lọ gbọn ọdinatẹẹ ji.

Gloria sọ bẹ hodọdopọ jẹeji hẹ Saron, wehọmẹvi de sọn Washington, D.C., he to azọ́n mẹdezejo tọn wà hẹ yọnnu Mexique-vijiji lẹ to Oaxaca nado dotana wepinplọn wehọmẹ alavọ tọn etọn. To nudọdo Saron na vivẹnudido etọn lẹ godo, Gloria dọ nuhewutu e do tin to Mexique na ẹn. Ehe dekọtọn do hodọdopọ dagbe de mẹ do Biblu ji podọ do nuhe Jiwheyẹwhe na wà e mayin na wamọnọ lẹ kẹdẹ gba ṣigba na mẹlẹpo ji. Saron dọ dọ nupaṣamẹ wẹ e yin dọ emi ma ko dọho hẹ Kunnudetọ lẹ pọ́n to États-Unis, ṣigba dopo to omẹ tintan he emi dukosọ hẹ to Mexique lẹ mẹ yin Kunnudetọ Jehovah tọn de! Saron kẹalọyi plọnmẹ Biblu bo jẹ opli Klistiani tọn lẹ yì ji to afọdopolọji.

Jonọ susu ko sẹtẹn yì gbọjẹ-yítẹn he tin to huto-waji lẹ to Mexique na yé to ninọmẹ he taidi paladisi tọn lẹ dín wutu. Laurel nọ yí ehe zan nado bẹ hodọdopọ jẹeji to Acapulco, bo nọ kanse gbẹtọ lẹ eyin Acapulco taidi paladisi de to yijlẹdo fie yé wá sọn go podọ nuhe yé yiwanna to finẹ. Enẹgodo e nọ basi zẹẹmẹ dọ to madẹnmẹ aigba lẹpo na lẹzun paladisi nujọnu tọn. Aliho ehe wẹ e yizan hẹ yọnnu Canada-nu de he e dukosọ hẹ to wekantẹn doto kanlin lẹ tọn de mẹ bọ e dekọtọn do plọnmẹ Biblu de mẹ. Be aliho dopolọ sọgan yọn-na-yizan to fie hiẹ nọ nọ̀ ya?

‘To Aliji Podọ to Gbangba’

Hodọdopọ nọ saba bẹjẹeji to aliji podọ to gbangba gbọn kinkanse dali dọ: “Be hiẹ sè Glẹnsigbe ya?” Mexique-vijiji susu wẹ sè na yé ko nọ̀ États-Unis dai wutu.

Kunnudetọ asu po asi po de dọnsẹpọ nawe yọnhonọ de he doto mẹgopọntọ de to sisisẹ to kẹkẹ sẹkunọ tọn mẹ. Yé kanse nawe lọ eyin e sè Glẹnsigbe. E yigbe dọ emi sè na emi ko nọ̀ États-Unis na owhe susu wutu. E kẹalọyi Atọ̀họ̀-Nuhihọ́ Lọ Tọn po Réveillez-vous! po, he e ma ko hia pọ́n dai, podọ e na yé adlẹsi etọn bosọ dọna yé dọ emi nọ yin Consuelo. To whenuena yé dla ẹ pọ́n to azán ẹnẹ godo, yé mọdọ owhé mẹgopinpọn tọn he yẹwhenọ-yọnnu Katoliki lẹ nọ deanana de gbè wẹ e nọ nọ̀. To tintan whenu, e vẹawu nado mọ Consuelo na yẹwhenọ-yọnnu lọ lẹ tindo ayihaawe gando yé go bo dọ dọ Consuelo ma sọgan yí yé gba. Yé vẹ̀ yẹwhenọ-yọnnu lọ lẹ nado dike Consuelo ni yọnẹn dọ yé tin to finẹ bosọ jlo na dọnudo e. Consuelo plan asu po asi po lọ biọ họmẹ. Sọn whenẹnu, nawe owhe 86 mẹvi ehe ko to vivi plọnmẹ Biblu gbesisọ tọn de dù, mahopọnna hodidọ agọ̀ yẹwhenọ-yọnnu lọ lẹ tọn. E ko sọ yì opli Klistiani tọn delẹ ga.

Howhinwhẹn lẹ 1:20 dọmọ: “Nuyọnẹn to awhá lélé dó to aligbó ji; e to ogbè etọn dó to ofi gbigblo lẹ.” Doayi lehe enẹ jọ do go to nọtẹn gbangba San Miguel de Allende tọn mẹ. To afọnnu-fuu dopo, Ralph dọnsẹpọ dawe mẹhomẹ de he sinai to oján gaa de ji. E paṣa dawe lọ dọ Atọ̀họ̀-Nuhihọ́ Lọ Tọn po Réveillez-vous! po yin zizedonukọnna ẹn bọ e dọ otàn gbẹzan etọn tọn na Ralph.

Awhànfuntọ Vietnam tọn de wẹ e yin dai he ko jiya apọṣimẹ sinsinyẹn apọ̀nmẹ tọn to awhàn pinplọn etọn whenu na oṣiọ madosọha lẹ mimọ wutu. E ko yin didohlan sọn awhàngbenu nado yì gbọṣi osla awhànfuntọ lẹ tọn mẹ. To finẹ, e yin azọ́ndena nado nọ lawu na awhànfuntọ he ko kú lẹ nado sọgan jla yé do bo do yé hlan États-Unis. Todin, to owhe 30 godo, e gbẹ́ nọ kúdlọ ylankan lẹ gbọzangbọzan bo nọ tin to sijọsijọ ji. Odẹ̀ hò na alọgọ wẹ e te to afọnnu enẹ, dile e sinai to nọtẹn gbangba tọn lọ mẹ.

Awhànfuntọ lọ kẹalọyi owe heyin zizedonukọnna ẹn po oylọ-basinamẹ wá Plitẹnhọ Ahọluduta tọn mẹ po. To opli lọ yìyì godo, e dọ dọ to ganhiho awe he emi yizan to Plitẹnhọ Ahọluduta tọn mẹ enẹlẹ whenu, whla tintan niyẹn to owhe 30 he wayi lẹ mẹ bọ emi tindo numọtolanmẹ jijọho tọn. Osẹ vude poun wẹ dawe ehe yizan to San Miguel de Allende, ṣigba e duvivi plọnmẹ Biblu susu tọn bosọ yì opli lẹpo kakajẹ kọlilẹ etọn whenu. Tito lẹ yin bibasi na oplọn etọn nido zindonukọn.

Kunnudide Mayin Aṣa Tọn to Azọ́nmẹ Podọ to Wehọmẹ

Be hiẹ nọ do dewe hia di dopo to Kunnudetọ Jehovah tọn lẹ mẹ to azọ́nwatẹn towe ya? Adrián, he nọ haya adọtẹn na mẹhe wá gbọjẹ to Cape San Lucas lẹ, nọ wàmọ. Taidi kọdetọn de, azọ́nwatọgbẹ́ etọn Judy dọmọ: “To nudi owhe atọ̀n poun wayi, eyin mẹde dọna mi dọ yẹn na lẹzun dopo to Kunnudetọ Jehovah tọn lẹ mẹ, yẹn na ko yigbe dọ, ‘Gbede pọ́n!’ Nalete yẹn basi dide nado hia Biblu. Linlẹn ṣie wẹ yindọ, ‘Enẹ ma na vẹawu na yẹn yiwanna wehihia.’ Nado dọhojọho, n’ma lẹndọ n’ko hia hugan weda ṣidopo whẹpo do mọdọ yẹn tindo nuhudo alọgọ tọn. Omẹ dopo he yẹn lẹndọ e sọgan gọalọna mi wẹ azọ́nwatọgbẹ́ de he nọ yin Adrián. E nọ jlo mi dọ ma dọho hẹ ẹ na ewọ dopo kẹdẹ wẹ tindo walọdagbe to azọ́nwatẹn lọ.” Adrián yigbe to afọdopolọji nado wá po asi-mọdo-aliji etọn Katie po, bo na gblọndo kanbiọ he Judy tindo lẹpo tọn. Katie jẹ Biblu plọn hẹ ẹ ji, podọ to madẹnmẹ Judy lẹzun Kunnudetọ he ko yí baptẹm de.

Be hiẹ sọgan dekunnu mayin aṣa tọn to wehọmẹ ya? Kunnudetọ awe to Espagne-gbè plọn to wehọmẹ alavọ tọn ṣigba yé gọ̀n wehọmẹ to gbèdopo na yé yì plidopọ Klistiani tọn de wutu. To whenuena yé lẹkọ, e yin bibiọ to yé si nado dọ nuhe yé yì wà to Espagne-gbè mẹ. Yé yí dotẹnmẹ lọ zan nado dekunnu to Espagne-gbè mẹ. Mẹplọntọ yetọn, Silvia, tindo ojlo titengbe to dọdai Biblu tọn lẹ mẹ. E kẹalọyi plọnmẹ Biblu to Glẹnsigbe mẹ podọ todin e ko yin wẹnlatọ wẹndagbe lọ tọn de. Mẹsusu to whẹndo etọn mẹ sọ to nuplọn ga. Silvia dọmọ: “Yẹn mọ nuhe dín yẹn ko te to gbẹzan ṣie lẹpo mẹ.” Mọwẹ, kunnudide mayin aṣa tọn sọgan de sinsẹ́n dagbe tọ́n.

Dotẹnmẹ Hundote Devo lẹ Yiyizan

Johẹmẹ sọgan hùn dotẹnmẹ kunnudide tọn dote. Jim po Gail po he to sinsẹ̀nzọnwa to San Carlos, Sonora, mọdọ nugbo wẹ ehe yin. Yọnnu owhe 60 mẹvi de to sadi po avún etọn lẹ po to ogàn 6:00 afọnnu tọn mẹ bo nọte nado pọ́n whanpẹ jipa yetọn tọn. Jim po Gail po basi oylọna ẹn biọ họmẹ nado nù kafe. Whla tintan niyẹn to gbẹwhenu etọn he e sèhó gando Jehovah po nukundido ogbẹ̀ madopodo tọn po go. Plọnmẹ Biblu de bẹjẹeji.

Adrienne lọsu nọ yí homẹdagbe zan hẹ jonọ lẹ. E to núdù to núdùtẹn de to Cancún to whenuena dẹpẹ de dọnsẹpọ ẹ bo kanse eyin Canada-nu de wẹ ewọ yin. To whenuena e yigbe dọ mọwẹ, dẹpẹ lọ dọ dọ emi to tintẹnpọn po onọ̀ emitọn po nado gọalọna nọviyọnnu emitọn nado wleawuna linlin wehọmẹ tọn de do Canada-nu lẹ ji. Onọ̀ lọ, he sè Glẹnsigbe, dọnsẹpọ yé. Adrienne yí sọwhiwhe do dọ nuhe e jlo na sè gando Canada-nu lẹ go na ẹn, enẹgodo e dọmọ: “Ṣigba whẹwhinwhẹ́n titengbe devo tin he wutu yẹn tọ́nsọn Canada bo wáfi—nado gọalọna gbẹtọ lẹ nado plọn Biblu. Be hiẹ tindo ojlo to enẹ mẹ ya?” Yọnnu lọ yigbe dọ mọwẹ. E ko jo sinsẹ̀n etọn do sọn owhe ao die bo ko to tintẹnpọn nado plọn Biblu na ede. E na adlẹsi po sọha alokan etọn tọn po Adrienne bọ plọnmẹ Biblu dagbe de bẹjẹeji.

“Vúnvún Núdùdù Towe do Osin Nukunta”

Dotẹnmẹ hundote lẹpo yiyizan nado dọho do nugbo Biblu tọn ji nọ saba dekọtọn do kunnudide na mẹhe ma ko sè owẹ̀n Ahọluduta lọ tọn dai lẹ mẹ. To núdùtẹn he gọ́ de mẹ to tòpẹvi bato-glintẹn Zihuatanejo tọn, Kunnudetọ de basi oylọna jonọ asu po asi po de nado sinai to tafo etọn kọ̀n, na tẹnmẹ ma pò to núdùtẹn lọ mẹ ba wutu. Asu po asi po ehe ko nọ to yìyì sọn fide jẹ fidevo to tọjihun mẹ na owhe ṣinawe. Yé dọ numọtolanmẹ agọ̀ he yé tindo gando Kunnudetọ Jehovah tọn lẹ go. To enẹgodo, Kunnudetọ lọ dla yé pọ́n to tọjihun yetọn mẹ bo basi oylọna yé nado wá owhé etọn gbè. Yé kẹalọyi linlinnamẹwe 20 po owe 5 po bosọ dopagbe nado dín Kunnudetọ lẹ mọ to bato-glintẹn devo he yé na jẹ.

Jeff po Deb po doayi whẹndo de he tindo viyọnnu pẹvi whanpẹnọ de go to núdùtẹn de mẹ to lẹdo nusatẹn Cancún tọn. To whenuena yé dọ linlẹn yetọn gando ovivu lọ go, mẹjitọ etọn lẹ basi oylọna yé nado dùnú hẹ yé. Yé wá mọdọ Inde wẹ whẹndo ehe wá sọn. Whẹndo lọ ma ko sèhó gando Kunnudetọ Jehovah tọn lẹ go kavi mọ owe yetọn lẹ pọ́n. Yé kẹalọyi owe Kunnudetọ tọn delẹ.

Onú mọnkọtọn de jọ to lopo de ji sẹpọ hùto Yucatán tọn. Asu po asi po he ṣẹṣẹ wlealọ de biọ to Jeff si nado de fọto na yé, ehe e wà po homẹhunhun po. E wá doayi e go dọ dile etlẹ yindọ yé ko nọ̀ États-Unis na owhe 12, yé ma ko mọ kavi sèhó gando Kunnudetọ Jehovah tọn lẹ go pọ́n gbede! Yé duvivi hodọdopọ dagbe de tọn. Jeff na tuli yé nado dín Kunnudetọ lẹ mọ to whenuena yé lẹkọyi whé.

Nujijọ vonọtaun de sọgan wá aimẹ to lẹdo towe mẹ he na hùn dotẹnmẹ dote nado dekunnu mayin aṣa tọn. Whenuena togán États-Unis tọn dla togán Mexique tọn pọ́n to ogle etọn mẹ sẹpọ Guanajuato, linlinnatọ lẹ wá sọn adà aihọn tọn lẹpo mẹ nado na linlin do nujijọ lọ ji. Whẹndo Kunnudetọ tọn de basi dide nado yí dotẹnmẹ hundote ehe zan nado dọyẹwheho to Glẹnsigbe mẹ. Gbeyiyi lọ fọnjlodotenamẹ. Di apajlẹ, linlinnatọ dopo ko na linlin do awhàn voovo lẹ ji, taidi dehe yin fùnfùn to Kosovo po Koweït po. Azọ́nwatọgbẹ́ de ko kú do awà etọn lẹ mẹ to whenuena awhànfuntọ de desòdo e godo. To whenuena linlinnatọ lọ sèhó gando fọnsọnku go, dasin wayi do e bọ e dopẹ́ na Jiwheyẹwhe na hinhẹn ẹn yọnbasi na ẹn nado yọnẹn dọ ogbẹ̀ tindo lẹndai. E dọ dọ dile etlẹ yindọ emi ma na mọ Kunnudetọ lọ lẹ ba, emi na whlá wẹndagbe Biblu tọn ehe do ahun mẹ.

Dile numimọ ehelẹ dohia do, kọdetọn kunnudide mayin aṣa tọn lẹ ma nọ yin yinyọnẹn to whepoponu gba. Etomọṣo, Ahọlu Sọlọmọni nuyọnẹntọ dọmọ: “Vúnvún núdùdù towe do osin nukunta; na hiẹ na mọ ẹn to ozán susu godo.” E sọ dọmọ: “Donú towe to afọnnu fuu, podọ to whèjai a hẹn alọ towe dote blo: na hiẹ ma yọ́n ehe na wà dagbe, ehe kavi dọ́n tọn, kavi eyin yé omẹ awe lẹ na yọ́n do zẹnzẹn.” (Yẹwhehodọtọ 11:1, 6) Mọwẹ, yí zohunhun do “vúnvún núdùdù towe” do osin nukunta bo “donú towe” susugege, dile Paulu po Jesu po wà do podọ dile Kunnudetọ egbezangbe tọn ehelẹ wà do to lẹdo Glẹnsigbe-dótọ lẹ tọn mẹ to Mexique.