Kanbiọ lẹ sọn Wehiatọ lẹ Dè

To whenuena devi lẹ sè dọ Pita he yin wiwle do ganpamẹ tin to họngbo ji, naegbọn yé dọmọ: “Angẹli etọn wẹ”?—Owalọ lẹ 12:15.

Devi lẹ sọgan ko gbọn nuṣiwa dali lẹndọ angẹli wẹnsagun de he wá to yinkọ Pita tọn mẹ wẹ tin to ote to họngbo ji. Lẹnnupọndo lẹdo hodidọ wefọ ehe tọn ji.

Pita yin wiwle gbọn Hẹlodi dali, mẹhe ko degbè bọ Jakobu yin hùhù. Enẹwutu, devi lẹ tindo whẹwhinwhẹ́n lẹpo nado lẹndọ Pita lọsu na yin hùhù ga. Pita tin to gẹdẹ mẹ to ganpamẹ, bọ awhànpa pẹvipẹvi ẹnẹ he dopodopo yetọn bẹ awhànvipẹ ẹnẹ hẹn nọ diọ yede nado ṣọ́ ẹ. To ozán dopo mẹ, e yin tuntundote gbọn azọ́njiawu dali bo yin pinplan jẹgbonu sọn ganpa lọ mẹ gbọn angẹli de dali. To whenuena Pita wá mọnukunnujẹ nuhe to jijọ lọ mẹ, e dọmọ: “Dinvie wẹ yẹn yọnẹn nugbo, dọ [Jehovah] do angẹli etọn hlan, bosọ whlẹn mi sọn alọ Hẹlodi tọn mẹ.”—Owalọ lẹ 12:1-11.

To afọdopolọji, Pita yì owhé Malia onọ̀ Johanu Malku tọn gbè, fie devi susu pli do. E húhú họngbo bọ deviyọnnu de he nọ yin Lodẹ wá nado siọ ẹ. To whenuena viyọnnu lọ sè ogbè Pita tọn, e ma tlẹ sọ hùnhọ̀n na ẹn ba, bo họ̀nwezun nado yì dọna mẹhe pò lẹ! E vẹawuna devi lẹ nado yise tlolo dọ Pita wẹ tin to họngbo ji. Kakatimọ, yé gbọn nuṣiwa dali dọ dọ: “Angẹli etọn wẹ.”—Owalọ lẹ 12:12-15.

Be devi lẹ yise dọ Pita ko yin hùhù bọ gbigbọ etọn he tlọ́n agbasa mẹ tin to họngbo ji wẹ ya? E na vẹawu dọ e ni yinmọ, na hodotọ Jesu tọn lẹ yọ́n nugbo Owe-wiwe tọn gando ninọmẹ oṣiọ lẹ tọn go—dọ yé “ma yọ́n nude.” (Yẹwhehodọtọ 9:5, 10) To whelọnu lo, etẹwẹ na ko tin to linlẹn mẹ na devi lẹ to whenuena yé dọmọ: “Angẹli etọn wẹ”?

Devi Jesu tọn lẹ yọnẹn dọ angẹli lẹ ko gọalọna omẹ Jiwheyẹwhe tọn lẹ tlọlọ to whenuho mẹ. Di apajlẹ, Jakobu dọho dogbọn “angẹli he fli mi sọn oylan lẹpo mẹ” dali. (Gẹnẹsisi 48:16) Jesu sọ dọna hodotọ etọn lẹ gando ovi pẹvi de he tin to ṣẹnṣẹn yetọn go dọmọ: “Mì payi, dọ mì vlẹ dopo to pẹvi helẹ de mẹ blo: na yẹn dọ hlan mì, dọ, to olọn mẹ, whepoponu wẹ angẹli yetọn lẹ nọ pọ́n nukun mẹ Otọ́ ṣie he tin to olọn mẹ tọn.”—Matiu 18:10.

E jẹna ayidego dọ hogbe lọ agʹge·los (“angẹli”) yin lilẹdogbedevomẹ dọ “wẹnsagun” to Biblu Young’s Literal Translation of the Holy Bible mẹ. E taidi dọ delẹ to Ju lẹ mẹ yise dọ devizọnwatọ Jiwheyẹwhe tọn dopodopo tindo angẹli etọn titi—yèdọ “angẹli mẹgopọntọ” de. Na nugbo tọn, linlẹn ehe ma wá sọn Ohó Jiwheyẹwhe tọn mẹ tlọlọ gba. Ṣigba, e yọnbasi dọ to whenuena devi lẹ dọ dọ “angẹli etọn wẹ,” linlẹn yetọn wẹ yindọ angẹli wẹnsagun de he wá to yinkọ Pita tọn mẹ wẹ tin to ote to họngbo ji.