Be A Nọ Dọhodopọ hẹ Mẹyiwanna Towe lẹ Ya?

“NUGOPIPE he mí tindo nado nọ dọhodopọ hẹ mẹyiwanna mítọn lẹ to didepo tlala,” wẹ linlinwe sẹmẹsẹmẹ Pologne tọn lọ Polityka dọ. To États-Unis, dodinnanu lẹ dohia dọ nudi nukunwhiwhe ṣidopo poun wẹ alọwlemẹ lẹ nọ yizan to azán dopo gbè nado tindo hodọdopọ nujọnu tọn de. Weyọnẹntọ delẹ lẹndọ awugbopo ehe wẹ nọ hẹn madoawe kinklan po gbẹdai lẹ po tọn wá.

Etẹwẹ sọgan yin didọ dogbọn hodọdopọ to mẹjitọ lẹ po ovi lẹ po ṣẹnṣẹn dali? To paa mẹ, “kakati nido yin hodọdopọ de, e nọ lẹzun hokansemẹ taidi: Nawẹ e yì do to wehọmẹ? Họntọn towe lẹ lo?” wẹ linlinwe he yin nùdego to aga lọ dọ. E sọ kanse dọ, “Nawẹ ovi mítọn lẹ na wá plọn nado wleawuna haṣinṣan he sinai do numọtolanmẹ ji lẹ gbọn?”

To whenuena e yindọ mẹde ma nọ jọ po nugopipe hodọdopọ dagbe tọn po, nawẹ mí sọgan plọn nado hẹn ẹn pọnte gbọn? Devi Jakobu na mí ayinamẹ titengbe ehe dọmọ: “Omẹ dopodopo ni nọ yawu nado sè, ni whleawu nado gblọn, bosọ whleawu nado gblehomẹ.” (Jakobu 1:19) Mọwẹ, hodọdopọ mẹjlọdote tọn de tintindo nọ biọ dọ mí ni dotoai po sọwhiwhe po bo ma gbòhódonù namẹ kavi wá tadona kọ̀n to plaplaji blo. Dapana homọdọdomẹgo na e sọgan doalọtena hodọdopọ de po awubibọ po. Humọ, Jesu nọ yí kanbiọ nuyọnẹn tọn lẹ zan, e ma yin nado yihó sọn onù namẹ gba, ṣigba nado hẹn hosetọ etọn lẹ nado dọ nuhe tin to ahun yetọn mẹ tọ́n bo hẹn kanṣiṣa he e tindo hẹ yé lodo.—Howhinwhẹn lẹ 20:5; Matiu 16:13-17; 17:24-27.

To nunọwhinnusẹ́n dagbedagbe he tin to Biblu mẹ lẹ hihodo mẹ, ze afọdide tintan nado tindo hodọdopọ hẹ mẹvivẹ towe lẹ. Ehe sọgan dekọtọn do haṣinṣan zohunhunnọ de mẹ he na yin bowlena na owhe susu—etlẹ yin to gbẹzan towe blebu mẹ.