Be Hiẹ Ko Waylando Do Gbigbọ Wiwe Wẹ Ya?
“Ylando de tin hlan okú.”—1 JOHANU 5:16.
1, 2. Nawẹ mí wagbọn do yọnẹn dọ mẹde sọgan waylando do gbigbọ wiwe Jiwheyẹwhe tọn?
“LINLẸN lọ dọ n’ko waylando do gbigbọ wiwe nọ dotukla mi taun,” wẹ yọnnu de wlan to Allemagne, dile etlẹ yindọ ewọ yin devizọnwatọ Jiwheyẹwhe tọn de. Na nugbo tọn, be Klistiani de sọgan waylando do gbigbọ wiwe kavi huhlọn-yido-wazọ́n Jiwheyẹwhe tọn ya?
2 Mọwẹ, mẹde sọgan waylando do gbigbọ wiwe Jehovah tọn. “Ylando depope po nùzinzan lẹpo po wẹ yè na jona gbẹtọ,” wẹ Jesu Klisti dọ, “ṣigba nùzinzan do [gbigbọ wiwe] go, yè ma to na jona gba.” (Matiu 12:31) Avase yin nina mí dọmọ: “Eyin míwlẹ yọnẹn gan an bo wà oylan whenuena míwlẹ ko mọ oyọnẹn nugbo tọn yí godo, avọ́ na ylando ma tin ba gba, ṣigba nukundido he dobu whẹdida tọn de.” (Heblu lẹ 10:26, 27) Podọ apọsteli Johanu wlan dọmọ: “Ylando de tin hlan okú.” (1 Johanu 5:16) Ṣigba, be mẹhe waylando sinsinyẹn wẹ na magbe etọn dọ ewọ ko ‘waylando he nọ hẹn okú wá’ de ya?
Lẹnvọjọ Nọ Hẹn Jona Yọnbasi
3. Eyin ylando he mí ko wà de vẹna mí taun, etẹwẹ enẹ sọgan dohia?
3 Jehovah wẹ na dawhẹ godo tọn na ylanwatọ lẹ. Na nugbo tọn, mímẹpo wẹ na dogbè na ẹn, podọ whẹdida etọn nọ sọgbe to whepoponu. (Gẹnẹsisi 18:25; Lomunu lẹ 14:12) Jehovah wẹ nọ magbe etọn eyin mí ko waylando he ma sọgan yin jijona, podọ e sọgan de gbigbọ etọn sọn mí ji. (Psalm 51:11) Nalete, eyin ylando he mí ko wà de vẹna mí yì ahun mẹ, e yọnbasi taun dọ mí lẹnvọjọ nugbonugbo. Ṣigba, etẹwẹ lẹnvọjọ nugbo yin?
4. (a) Etẹwẹ lẹnvọjọ zẹẹmẹdo? (b) Naegbọn ohó Psalm 103:10-14 tọn lẹ yin homẹmiọnnamẹnu?
4 Nado lẹnvọjọ zẹẹmẹdo dọ mí diọ nuyiwa po pọndohlan mítọn po gando ylanwiwa he wayi kavi dehe mí tindo linlẹn nado wà go. E zẹẹmẹdo dọ ylanwiwa lọ vẹna mí taun kavi hẹn mí blawu bọ mí diọ nuyiwa mítọn. Eyin mí ko waylando sinsinyẹn bo ko sọ ze afọdide dagbe lẹ nado dohia dọ mí lẹnvọjọ nugbonugbo, ohó psalm-kàntọ lọ tọn lẹ sọgan miọnhomẹna mí dọmọ: “E [Jehovah] ma wà hẹ mí kẹdẹdile ylando mítọn te gba; mọ e masọ na ale mí kẹdẹdi ylanwiwa mítọn. Na le olọn yiaga hú aigba do, sọmọ wẹ dagbewanyi etọn hlan omẹ he dibusi i lẹ dali. Dile whèzẹtẹn dẹn do whèyihọ do, dẹn sọmọ wẹ ewọ do ze sẹ́nmẹjẹ mítọn yì dẹn sọn mí dè. Taidile otọ́ de nọ blawuna ovi etọn lẹ do, mọ wẹ OKLUNỌ nọ blawuna yé he dibusi i lẹ do. Na ewọ yọ́n didá mítọn; e sọ flindọ kọ́gudu wẹ mí.”—Psalm 103:10-14.
5, 6. Dọ nuagokun he tin to 1 Johanu 3:19-22 mẹ lẹ bo basi zẹẹmẹ ohó apọsteli lọ tọn lẹ tọn.
5 Ohó apọsteli Johanu tọn lẹ sọ yin homẹmiọnnamẹnu ga dọmọ: “Ehe mẹ wẹ mí yọnẹn te dọ, míwlẹ jọ sọn nugbo lọ dè, bo nasọ hẹn ayiha mítọn diun to nukọn etọn. Na eyin ayiha mítọn gblewhẹdo mí, Jiwheyẹwhe klohu ayiha mítọn bosọ yọ́n onú popo. Mì mẹyiwanna emi, eyin ayiha mítọn ma gblewhẹdo mí gba, míwlẹ tindo tudido [kavi awuvivo hodidọ tọn] hlan Jiwheyẹwhe dè. Onú depope mí kanbiọ, mí mọyi to e dè; na mí yìn osẹ́n etọn wutu, bosọ to onú he yin jijlọ to nukọn etọn lẹ wà.”—1 Johanu 3:19-22.
6 Mí “yọnẹn . . . dọ, míwlẹ jọ sọn nugbo lọ dè” na mí nọ do owanyi mẹmẹsunnu tọn hia bo masọ nọ yí ylanwiwa do do aṣa. (Psalm 119:11) Eyin ayiha mítọn nọ gblewhẹdo mí na whẹwhinwhẹ́n delẹ wutu, mí dona flindọ “Jiwheyẹwhe klohu ayiha mítọn bosọ yọ́n onú popo.” Jehovah nọ do lẹblanu hia mí na e yọ́n “owanyi mẹmẹsunnu tọn madoklọ” mítọn, avùnhiho mítọn sọta ylando, po vivẹnudido mítọn nado wà ojlo etọn po wutu. (1 Pita 1:22) Ayiha mítọn ‘ma na gblewhẹdo mí’ eyin mí dejido Jehovah go, do owanyi mẹmẹsunnu tọn hia, bo ma nọ waylando sọn ojlo mẹ. Mí na tindo ‘awuvivo hodidọ tọn hlan Jiwheyẹwhe’ to odẹ̀ mẹ, podọ e na siọ mí na mí nọ yìn osẹ́n etọn lẹ wutu.
Apajlẹ Mẹhe Waylando do Gbigbọ Wiwe lẹ Tọn
7. Etẹwẹ nọ dohia eyin ylando de sọgan yin jijona kavi lala?
7 Ylando tẹlẹ wẹ ma nọ yin jijona? Nado na gblọndo kanbiọ ehe tọn, mì gbọ mí ni gbadopọnna apajlẹ delẹ to Biblu mẹ. Ehe dona miọnhomẹna mí eyin mí ko lẹnvọjọ dile etlẹ yindọ nuṣiwa sinsinyẹn mítọn lẹ gbẹ́ nọ vẹna mí taun. Mí na mọdọ whẹho lọ ma yin ylando wunmẹ he mẹde wà gba; kakatimọ, mẹwhinwhàn mẹlọ tọn, ninọmẹ ahun mẹ tọn etọn, po obá he mẹ e desọn ojlo mẹ do wà ylando lọ po wẹ nọ dohia eyin ylando lọ sọgan yin jijona kavi lala.
8. Nawẹ sinsẹ̀ngán Ju owhe kanweko tintan tọn delẹ waylando do gbigbọ wiwe gbọn?
8 Sinsẹ̀ngán Ju owhe kanweko tintan tọn he dọho ylankan jẹagọdo Jesu Klisti lẹ waylando do gbigbọ wiwe. Yé mọdọ gbigbọ Jiwheyẹwhe tọn wẹ hẹn Jesu nado wà azọ́njiawu he pagigona Jehovah lẹ. Ṣogan, kẹntọ Klisti tọn ehelẹ dọ dọ huhlọn Satani Lẹgba tọn wẹ e to yiyizan. Sọgbe hẹ nuhe Jesu dọ, mẹhe gbọnmọ dali zannu do gbigbọ wiwe Jiwheyẹwhe tọn lẹ wà ylando de he ma na yin jijona to “aihọn he mẹ, podọ to aihọn he ja mẹ.”—Matiu 12:22-32.
9. Etẹwẹ Jesu dọ gando nùzinzan go?
9 To whenuena e yindọ Jiwheyẹwhe wẹ Asisa gbigbọ wiwe tọn, ohó mẹhẹngble, awugblenamẹ, kavi mẹzunzun tọn lẹ didọ jẹagọdo gbigbọ etọn yin nudopolọ po hodidọ jẹagọdo Jehovah po. Mẹhe gbọn lẹnvọjọ matindo dali zindonukọn to hodidọ mọnkọtọn mẹ ma na yin jijona. Ohó he Jesu dọ gando ylando mọnkọtọn go dohia dọ Jesu to alọdlẹndo mẹhe jẹagọdo nuyiwa gbigbọ wiwe Jiwheyẹwhe tọn sọn ojlo mẹ wá lẹ. Na gbigbọ wiwe Jehovah tọn wẹ hẹn Jesu nado wazọ́n ṣigba bọ agọjẹdomẹtọ etọn lẹ dọ dọ huhlọn Lẹgba tọn yizan wẹ e te wutu, yé zannu bo gbọnmọ dali waylando do gbigbọ lọ. Enẹwutu, Jesu dọmọ: “Mẹdepope he zannu do [gbigbọ wiwe] go, ma na tindo jona gbede, ṣigba e yin whẹylantọ ylando madopodo de tọn.”—Malku 3:20-29.
10. Naegbọn Jesu ylọ Juda dọ “visunnu viva tọn”?
10 Lẹnnupọndo whẹho Juda Iskaliọti tọn ji ga. E doafọna nuyiwa nugbomadọ tọn bo nọ to akuẹ fìn sọn apotin he yin zizedo alọ etọn mẹ. (Johanu 12:5, 6) To godo mẹ, Juda yì nukọntọ Ju tọn lẹ dè bo basi tito hẹ yé nado de Jesu hia na fataka-kuẹ 30. Mọwẹ, e vẹna Juda jẹ obá de mẹ to whenuena e de Jesu hia godo, ṣigba e ma lẹnvọjọ sọn ylando he e yí ojlo do wà mẹ gba. Taidi kọdetọn de, Juda ma jẹna fọnsọnku. Enẹwutu Jesu ylọ ẹ dọ “visunnu viva tọn.”—Johanu 17:12; Matiu 26:14-16.
Apajlẹ Mẹhe Ma Waylando do Gbigbọ Wiwe lẹ Tọn
11-13. Nawẹ Ahọlu Davidi waylando to kọndopọ mẹ hẹ Bati-ṣeba gbọn, podọ tuli tẹwẹ mí sọgan mọyi sọn aliho he mẹ Jiwheyẹwhe penukundo whẹho yetọn go te mẹ?
11 To whedelẹnu, Klistiani he ko yigbe ylando sinsinyẹn yetọn tọn bo ko mọ alọgọ gbigbọmẹ tọn yí sọn mẹho agun tọn lẹ dè sọgan gbẹ́ yin tuklado gando osẹ́n Jiwheyẹwhe tọn he yé gbà wayi lẹ go. (Jakobu 5:14) Eyin hiẹ nọ yin tuklado to aliho ehe mẹ, e yọnbasi taun dọ hiẹ na mọaleyi gbọn dogbigbapọnna nuhe Owe-wiwe dọ gando mẹhe ylando yetọn lẹ yin jijona lẹ go dali.
12 Ahọlu Davidi waylando sinsinyẹn to kọndopọ mẹ hẹ Bati-ṣeba he yin asi Ulia tọn. To whenuena Davidi pọ́n odò sọn họta etọn bo mọ yọnnu whanpẹnọ ehe to awulẹ, e biọ dọ yè ni hẹn ẹn wá họ̀nmẹ etọn, podọ e tindo kọndopọ zanhẹmẹ tọn hẹ ẹ. To whenuena e sè to godo mẹ dọ yọnnu lọ ko mọhò, e kànayiha na Ulia, asu etọn nido tindo kọndopọ hẹ ẹ nado sọgan ṣinyọnnudo ayọdide lọ. To whenuena ahọlu lọ ma jẹ yanwle etọn kọ̀n, e basi tito na Ulia nido yin hùhù to awhàn nukọn. Enẹgodo, Bati-ṣeba lẹzun asi Davidi tọn bo ji ovi de na ẹn, ṣigba ovi lọ kú.—2 Samuẹli 11:1-27.
13 Jehovah penukundo whẹho Davidi po Bati-ṣeba po tọn go. Jiwheyẹwhe jona Davidi, matin ayihaawe gbọn onú delẹ zizedo lẹnpọn mẹ taidi lẹnvọjọ etọn po alẹnu Ahọluduta tọn he e basi hẹ ẹ po dali. (2 Samuẹli 7:11-16; 12:7-14) E họnwun dọ Bati-ṣeba lọsu lẹnvọjọ, na e tindo lẹblanulọkẹyi lọ nado lẹzun onọ̀ Ahọlu Sọlọmọni tọn podọ onọ̀-daho Jesu Klisti tọn. (Matiu 1:1, 6, 16) Eyin mí ko waylando, mí dona flindọ Jehovah nọ mọ gbigbọ lẹnvọjọ tọn he mí dohia.
14. Nawẹ whẹho Ahọlu Manassẹ tọn do obá he mẹ jonamẹ Jiwheyẹwhe tọn gbloada jẹ hia gbọn?
14 Obá he mẹ jonamẹ Jehovah tọn gbloada jẹ sọ yin didohia to whẹho Ahọlu Manassẹ Juda tọn mẹ. E wà nuhe ylan to nukun Jehovah tọn mẹ. Manassẹ do agbà lẹ ai na Baali, sẹ̀n “awhànpa olọn tọn lẹpo,” bo tlẹ sọ do agbà lẹ ai na yẹwhe lalo lẹ to awánu awe tẹmpli tọn mẹ. E hẹn visunnu etọn lẹ gbọ̀n miyọ́n mẹ lùntọ́n, nọgodona afinyọnnuwiwa, bo hẹn tòmẹnu Juda po Jelusalẹm po tọn lẹ nado “wà oylan hú ehe akọta lẹ wà, mẹhe OKLUNỌ và to ovi Islaeli tọn lẹ nukọn.” Avase he yẹwhegán Jiwheyẹwhe tọn lẹ na yin kọgbẹ́ e go. To godo mẹ, ahọlu Assilia tọn wle Manassẹ yì kanlinmọgbenu. To whenuena Manassẹ tin to dọ́n, e lẹnvọjọ bo yí whiwhẹ do to dẹ̀ho hlan Jiwheyẹwhe, mẹhe jona ẹn bo hẹn ẹn gọwá ofìn etọn ji to Jelusalẹm, fihe e ze sinsẹ̀n-bibasi nugbo daga te.—2 Otannugbo lẹ 33:2-17.
15. Etẹwẹ jọ to gbẹzan apọsteli Pita tọn mẹ he dohia dọ Jehovah nọ jonamẹ “susugege”?
15 To owhe kanweko lẹ godo, apọsteli Pita waylando sinsinyẹn gbọn Jesu mimọ́n dali. (Malku 14:30, 66-72) Etomọṣo, Jehovah jona Pita “susugege.” (Isaia 55:7) Etẹwutu? Na Pita lẹnvọjọ sọn ahun mẹ wá wutu. (Luku 22:62) Kunnudenu dohia hezeheze to azán 50 godo dọ Jiwheyẹwhe jona ẹn to whenuena Pita mọ lẹblanulọkẹyi nado na kunnudide adọgbigbo tọn de gando Jesu go to azán Pẹntikọsti tọn gbè. (Owalọ lẹ 2:14-36) Be ehe ma dohia dọ Jiwheyẹwhe na jona Klistiani he lẹnvọjọ nugbonugbo to egbehe lẹ ya? “Oklunọ E, mẹnu wẹ sọgan ṣite, eyin hiẹ, OKLUNỌ na payiha ylando go?” wẹ psalm-kàntọ lọ jihàn dọ, na “jona tin to dè we.”—Psalm 130:3, 4.
Duduto Obu Ylanwiwa Tọn Ji
16. Etẹlẹ wẹ mí dona wà nado mọ jonamẹ Jiwheyẹwhe tọn?
16 Apajlẹ he wayi lẹ dona gọalọna mí nado de magbọjẹ mítọn lẹ pò gando linlẹn lọ go dọ mí ko waylando do gbigbọ wiwe. Yé dohia dọ Jehovah nọ jona ylanwatọ he lẹnvọjọ lẹ. Odẹ̀ vẹkuvẹku hihò hlan Jiwheyẹwhe yin nujọnu taun. Eyin mí ko waylando, mí sọgan biọ jona to dodonu avọ́sinsan Jesu tọn, lẹblanu Jehovah tọn, mape he mí dugu etọn, po kandai sinsẹ̀nzọn nugbonọ mítọn tọn po ji. Nukunnumimọjẹ ojọmiọn kavi nukundagbe majẹhẹ Jehovah tọn mẹ na whàn mí nado dín jona po jidide lọ po dọ ewọ na jona mí.—Efesunu lẹ 1:7.
17. Etẹwẹ mí dona wà eyin mí ko waylando bo tindo nuhudo alọgọ gbigbọmẹ tọn?
17 Etẹwẹ eyin mí ko waylando ṣigba bo ma sọgan hodẹ̀ na ylando lọ ko hẹn mí zun madogánnọ to gbigbọ-liho? Devi Jakobu wlanwe gando ehe go dọmọ: “Mì gbọ [omẹ mọnkọtọn] ni ylọ mẹho agun tọn lẹ, na yé ni hodẹ̀ do e ji, bo kọ̀n amisisa do ota na ẹn to oyín [Jehovah] tọn mẹ: podọ odẹ̀ yise tọn na whlẹn azọ̀ntọ gán, [Jehovah] nasọ ze e tite; eyin e ko sọ waylan de, yè na jona ẹn.”—Jakobu 5:14, 15.
18. Naegbọn mí ma sọgan dọ dọ ylanwatọ he tlẹ yin didesẹ sọn agun mẹ de ko waylando he ma sọgan yin jijona de dandan?
18 Eyin ylanwatọ de ma tlẹ lẹnvọjọ todin bo yin didesẹ sọn agun mẹ, enẹ ma dohia dọ e ko waylando he ma sọgan yin jijona dandan gba. Paulu wlanwe gando mẹyiamisisadode he yin didesẹ sọn agun mẹ to Kọlinti de go dọmọ: “Oyà he mẹsusu sà hẹ omẹ mọnkọtọn he ko sù na ẹn. Mọ dọ ehe jẹagọ e jẹ mì ni jona ẹn, bo miọnhomẹna ẹn, na ayiha omẹ mọnkọtọn tọn nikaa tlọ gbọn awubla glanglan dali.” (2 Kọlintinu lẹ 2:6-8; 1 Kọlintinu lẹ 5:1-5) Ṣigba, na ylanwatọ lẹ nido jla haṣinṣan yetọn hẹ Jehovah do, yé dona kẹalọyi alọgọ gbigbọmẹ tọn sinai do Biblu ji mẹho Klistiani lẹ tọn bo do kunnudenu lẹnvọjọ nugbo tọn hia. Yé dona ‘de sinsẹ́n he jẹna lẹnvọjọ lẹ tọ́n.’—Luku 3:8.
19. Etẹwẹ sọgan gọalọna mí nado gbọṣi dolilo mẹ “to yise mẹ”?
19 Etẹwẹ sọgan hẹn mí tindo numọtolanmẹ lọ dọ mí ko waylando do gbigbọ wiwe? Ehe sọgan jọ eyin ylanwiwa lọ to ahunmẹduna mí zẹjlẹgo kavi eyin mí to azọ̀njẹ. To whẹho mọnkọtọn mẹ, odẹ̀ po gbọjẹ susu dogọ po sọgan gọalọ. Onú titengbe wẹ e yin ma nado dike Satani ni hẹn mí gbọjọ bọ mí na doalọtena Jiwheyẹwhe sinsẹ̀n. To whenuena e yindọ Jehovah ma nọ jaya to okú mẹylankan tọn mẹ, ayihaawe ma tin dọ e ma nọ hùnhomẹ eyin depope to devizọnwatọ etọn lẹ mẹ danbú. Enẹwutu eyin mí lẹndọ mí ko waylando do gbigbọ wiwe, mí dona zindonukọn nado nọ plọn Ohó Jiwheyẹwhe tọn, he bẹ adà homẹmiọnnamẹ tọn taidi Psalm lẹ hẹn. Mí dona zindonukọn nado nọ yì opli agun tọn lẹ bo nọ tindo mahẹ to azọ́n yẹwhehodidọ Ahọluduta lọ tọn mẹ. Mọwiwà na gọalọna mí nado “zìn [kavi lodo] to yise mẹ” bo duto obu lọ ji dọ mí ko waylando he ma sọgan yin jijona.—Titu 2:2.
20. Etẹwẹ sọgan gọalọna mẹde nado mọdọ ewọ ma ko waylando do gbigbọ wiwe?
20 Mẹhe nọ dibu dọ yé ko waylando do gbigbọ wiwe lẹ sọgan kanse yede dọmọ: ‘Be yẹn ko zannu do gbigbọ wiwe go wẹ? Be n’ko lẹnvọjọ sọn ylando ṣie mẹ nugbonugbo ya? Be n’tindo yise to jonamẹ Jiwheyẹwhe tọn mẹ ya? Be atẹṣitọ he ma lẹnvọjọ he ko gbẹ́ hinhọ́n gbigbọmẹ tọn dai wẹ n’yin ya?’ E yọnbasi taun dọ omẹ mọnkọtọn lẹ na mọdọ yé ma ko zannu do gbigbọ wiwe Jiwheyẹwhe tọn go, kavi lẹzun atẹṣitọ. Yé ko lẹnvọjọ bo tindo yise dolido to jonamẹ Jehovah tọn mẹ. Gbọnmọ dali, yé ma ko waylando do gbigbọ wiwe Jehovah tọn gba.
21. Kanbiọ tẹlẹ wẹ na yin dogbapọnna to hosọ he bọdego mẹ?
21 Kọgbọ nankọtọn die nado mọdọ mí ma ko waylando do gbigbọ wiwe! Nalete, kanbiọ delẹ gando whẹho ehe go bo na yin dogbapọnna to hosọ he bọdego mẹ. Di dohia, mí sọgan kanse míde dọ: ‘Be gbigbọ wiwe Jiwheyẹwhe tọn to anadena mi nugbonugbo ya? Be sinsẹ́n etọn nọ sọawuhia to gbẹzan ṣie mẹ ya?’
Etẹwẹ Yin Gblọndo Towe?
• Naegbọn mí sọgan dọ dọ e yọnbasi nado waylando do gbigbọ wiwe?
• Etẹwẹ e zẹẹmẹdo nado lẹnvọjọ?
• Mẹnu lẹ wẹ waylando do gbigbọ wiwe to whenuena Jesu tin to aigba ji?
• Nawẹ mẹde sọgan duto magbọjẹ lọ ji dọ e ko waylando he ma sọgan yin jijona gbọn?
[Yẹdide to weda 17]
Mẹhe dọ dọ Jesu wà azọ́njiawu po huhlọn Satani tọn po lẹ waylando do gbigbọ wiwe Jiwheyẹwhe tọn
[Yẹdide to weda 18]
Dile etlẹ yindọ Pita mọ́n Jesu, e ma waylando he ma sọgan yin jijona gba