Be Gbẹninọ Na Azán Dopodopo Poun Wẹ Dona Duahunmẹna We Ya?
“YẸN ma nọ lẹnnupọndo sọgodo ji gbede. E nọ yawu wá gbau.” Lẹnunnuyọnẹntọ nukundeji Albert Einstein wẹ dọ ohó he nọ saba yin yiyizan to paa mẹ ehelẹ. Numọtolanmẹ dopolọ wẹ mẹsusu tindo. “Naegbọn mí na do hanú gando sọgodo go?” wẹ yé sọgan dọ. Kavi hiẹ sọgan ko sè nuhe gbẹtọ lẹ nọ dọ taidi: “Saa to gbẹzan towe zan poun.” “Dọ egbé tọn bo jo sọ̀ tọn do.”
Na nugbo tọn, pọndohlan he mẹsusu tindo enẹ ma yin nuyọyọ gba. “Dù bo nù bosọ to ogbẹ̀ towe dù. Nuhe pò lẹ ma yin nujọnu.” Ehe wẹ yin aṣagbe hodotọ Épicure hohowhenu tọn lẹ tọn. Mẹhe nọgbẹ̀ to ojlẹ dopolọ mẹ hẹ apọsteli Paulu delẹ tindo pọndohlan dopolọ. “Mì gbọ mí ni to dùdù bo to nùnù, na osọ wẹ mí na kú” wẹ pọndohlan yetọn. (1 Kọlintinu lẹ 15:32) Yé yise dọ gbẹzan ojlẹ gli tọn ehe kẹdẹ wẹ mí tindo, enẹwutu yé nọ nọgodona linlẹn lọ dọ mí dona zan ẹn to gigọ́ mẹ.
Na livi susu gbẹtọ lẹ tọn to egbehe, gbẹzan ehe zinzan to gigọ́ mẹ ma zẹẹmẹdo afọdidona gbẹ̀fẹdudu gba. Susu mẹhe to ninọmẹ sinsinyẹn mẹ lẹ tọn nọ zan gbẹzan egblemaku tọn bo nọ to kanván klinkán-klinkán nado nọgbẹ̀. Naegbọn yé nado lẹnnupọndo sọgodo, yèdọ “osọ” he taidi nuhe dózin bo masọ tindo todido depope ji?
Naegbọn Mí Dona Basi Tito Na Sọgodo?
Mẹhe ninọmẹ yetọn ma tlẹ sinyẹnawu sọmọ lẹ nọ mọ ẹn di nuvọ́ nado basi tito na sọgodo. “Etẹ sin tukla mí na jẹ?” wẹ yé sọgan kanse. Mẹdelẹ sọgan dọ dọ mẹhe nọ basi tito na sọgodo lẹ nọ wá jẹflumẹ to godo mẹ. Tọgbo Job hohowhenu tọn lọsu jẹflumẹ to whenuena e mọdọ tito etọn lẹ “gbà,” bo hẹn nuhe dona ko hẹn sọgodo ayajẹnọ wá na ewọ po whẹndo etọn po gble.—Job 17:11; Yẹwhehodọtọ 9:11.
Ohó milomilo-kàntọ Écosse tọn Robert Burns yí ninọmẹ sinsinyẹn mítọn jlẹdo gbéjaka pẹvide tọn go ehe Burns yí glepọnu etọn do hẹn adọ́ etọn gble to mayọnẹnmẹ. Gbéjaka lọ họ̀n to whenuena e mọdọ adọ́ etọn ko yin hinhẹngble. Ohó milomilo-kàntọ lọ dọmọ: ‘Mọwẹ, lehe mí nọ saba mọdọ huhlọn mítọn ma sọtẹ́n to nujijọ he zẹ̀ huhlọn mítọn go tlala lẹ nukọn do sọ sọmọ bọ tito he mí tlẹ basi po sọwhiwhe po hugan lẹ nọ saba gboawupo.’
Enẹwutu be nuvọ́ wẹ e yin nado basi titona sọgodo ya? Na nugbo tọn, awugbopo nado basi tito he jẹ sọgan hẹn kọdetọn ylankan lẹ wá to whenuena jẹhọn-ahizi kavi nugbajẹmẹji jọwamọ tọn devo lẹ jọ. Di apajlẹ, e họnwun dọ mẹdepope ma na ko penugo bo doalọtena Jẹhọn-ahizi Katrina. Ṣigba, be numọhlannukọn po tito dagbe bibasi po ma na ko gọalọ taun bo de hẹngble he e hẹnwa tòdaho lọ po tòmẹnu etọn lẹ po ji pò ya?
Etẹwẹ hiẹ lẹn? Be e sọgbe hẹ lẹnpọn dagbe nado nọgbẹ̀ na azán dopodopo poun bo wọn sọgodo wẹ ya? Gbadopọnna nuhe hosọ he bọdego tindo nado dọ do whẹho ehe ji.
[Yẹdide to weda 3]
“Dù bo nù bosọ to ogbẹ̀ towe dù. Nuhe pò lẹ ma yin nujọnu”
[Yẹdide to weda 4]
Be numọhlannukọn po tito dagbe bibasi po ma na ko de hẹngble Jẹhọn-ahizi Katrina tọn lẹ pò ya?
[Asisa Yẹdide tọn]
U.S. Coast Guard Digital