Sinsẹ̀n-Bibasi Whẹndo Tọn Yin Nujọnu Na Whlẹngán!

YÍ NUKUN homẹ tọn do pọ́n lehe “awhàn azán daho Jiwheyẹwhe Ganhunupo tọn lọ” na dobu do sọ! (Osọhia 16:14) Po hogbe yẹhiadonu tọn he whànmẹ lẹ po, yẹwhegán Mika wlan dọmọ: “Osó lẹ na yin kinkọ̀n . . . , podọ agbàdo lẹ nasọ yin zizẹ, di oda to miyọ́n nukọn, di osin lẹ he yè kọ̀n sọn otẹn sọkọdò de mẹ jẹte.” (Mika 1:4) Nugbajẹmẹji tẹwẹ enẹ na hẹnwa mẹhe ma nọ sẹ̀n Jehovah lẹ ji? Ohó Jiwheyẹwhe tọn dọmọ: “Alántọṣiọ OKLUNỌ tọn lẹ na tin to azán nẹ gbè sọn opodo de aigba lọ tọn yèdọ jẹ opodo awetọ aigba lọ tọn.”—Jẹl. 25:33.

Po avase enẹlẹ po to ayiha mẹ, tatọ́ whẹndo tọn—he susu yetọn yin mẹjitọ godoponọ lẹ—na wà dagbe nado kanse yede gando ovi yetọn he ko whẹ́n bo sọgan lẹnnupọn lẹ go dọmọ: ‘Be yé na lùn nujijọ he sẹhundaga ehe tọ́n ya?’ Biblu na mí jide dọ yé na wàmọ eyin yé wà nuhe go yé pé lẹpo sọgbe hẹ owhe yetọn nado tindo haṣinṣan he lodo de hẹ Jehovah.—Mat. 24:21.

Nuhewutu E Yin Nujọnu Nado De Whenu Dovo Na Sinsẹ̀n-Bibasi Whẹndo Tọn

Taidi mẹjitọ de, hẹn ẹn diun dọ a nọ wà nuhe go a pé lẹpo nado plọn ovi towe lẹ “to hihò po hokọnamẹ [Jehovah] tọn po mẹ.” (Efe. 6:4) Biblu pinplọn hẹ ovi towe lẹ yin nujọnu taun. Mí jlo dọ ovi mítọn lẹ ni taidi Klistiani Filippi tọn lẹ he Paulu pà na yé setonuna Jehovah sọn ojlo mẹ wá wutu. E wlan dọmọ: “Mẹyiwanna ṣie emi, dile mìwlẹ ko setonu to whepoponu e ma yin whenu yẹn tin to mì dè kẹdẹ, ṣigba humọ dinvie whenu yẹn ma tin to mì dè, mì nọ wazọ́n whlẹngán mìtọn tọn jẹgbonu to osi po sisọsisọ po mẹ.”—Flp. 2:12.

Be ovi towe lẹ nọ setonuna osẹ́n Jehovah tọn lẹ eyin a ma tin to yé dè ya? Be yé nọ wàmọ to wehọmẹ ya? Nawẹ a sọgan gọalọna ovi towe lẹ nado tindo nujikudo dọ osẹ́n Jehovah tọn lẹ gọ́ na nuyọnẹn, bọ eyin a ma tlẹ tin to yé dè, osẹ́n ehelẹ na nọ deanana yé gbọn?

Sinsẹ̀n-bibasi whẹndo tọn sọgan yí adà titengbe de wà nado hẹn yise ovi towe tọn lodo to whẹho ehe mẹ. Enẹwutu, gbọ mí ni dọhodo onú titengbe atọ̀n ji, he na gọalọna we nado hẹn Biblu pinplọn whẹndo tọn towe tindo kọdetọn dagbe.

Mì Nọ Wà Ẹ to Gbesisọ Mẹ

Biblu dohia dọ ovi gbigbọmẹ tọn Jiwheyẹwhe tọn lẹ nọ yin yiylọ wá nukọn etọn to ojlẹ dide delẹ mẹ. (Job 1:6) Nọ wà nudopolọ hẹ ovi towe lẹ. De azán po whenu tangan de po dovo na sinsẹ̀n-bibasi whẹndo tọn towe, bo tẹdego. Humọ, de ojlẹ devo de, vlavo eyin e wá jọ bọ ninọmẹ he mì ma donukun de wá sọawuhia.

Dile osun lẹ to yìyì, mì tẹnpọn ma nado dike Biblu pinplọn whẹndo tọn mìtọn ni súnadu. Flindọ ovi towe lẹ wẹ Biblu plọntọ towe tintan. Ṣigba, Satani na jlo nado yangbé yetọn. (1 Pita 5:8) Eyin mì nọ pọ́n televiziọn kavi nọ wà nuhe ma yin nujọnu sọmọ devo lẹ to whèjai enẹ kakati nido yin sinsẹ̀n-bibasi whẹndo tọn, be Satani ko gbawhàn dopo niyẹn.—Efe. 5:15, 16; 6:12; Flp. 1:10.

Dike Nudọnamẹ lọ lẹ Ni Sọgbe hẹ Whẹndo Towe

Sinsẹ̀n-bibasi whẹndo tọn ma dona taidi nupinplọn wehọmẹ tọn poun. Tẹnpọn nado hẹn ẹn sọgbe hẹ nuhudo whẹndo towe tọn. Gbọnna? To whedelẹnu, nọ de hosọ he gando nuhe ovi towe lẹ sọgan pehẹ to azán kavi osẹ kleun de godo lẹ go bo dọhodo yé ji. Di apajlẹ, be e ma na yọ́n nado nọ basi zepọn nuzedonukọnnamẹ kunnudegbe tọn lẹ hẹ ovi towe lẹ to oplọn lọ whenu ya? Jọja lẹ nọ mọ awuvivi to nuhe má yé ganji lẹ wiwà mẹ. Zepọn nuzedonukọnnamẹ lẹ tọn bibasi hẹ ovi towe lẹ, gọna nulinlẹnpọn do aliho he mẹ yé sọgan duto aliglọnnamẹnu lẹ ji te hẹ yé, na gọalọna yé nado voawu dile yé to mahẹ tindo to adà voovo azọ́n yẹwhehodidọ lọ tọn mẹ.—2 Tim. 2:15.

Hiẹ sọgan sọ basi zepọn nuhe na gọalọna ovi towe lẹ nado duto kọgbidinamẹ hagbẹ tọn ji lẹ tọn hẹ yé. Tẹnpọn nado dike hodọdopọ lọ ni na dotẹnmẹ ovi towe lẹ nado na gblọndo he sọn ahun yetọn mẹ wá. Ehe sọgan biọ dọ a ni kanhose ovi towe lẹ gando avùnnukundiọsọmẹ he yé nọ pehẹ lẹ go, fie yé nọ pehẹ yé te, nuhe na jọ eyin yé jogbe, podọ nuhe na jọ eyin yé duto avùnnukundiọsọmẹ lọ lẹ ji. Be e ma na yọ́n nado nọ basi zepọn nuhe yé na wà to whenue yé pehẹ avùnnukundiọsọmẹnu lẹ sọn ojlẹ de mẹ jẹ devo mẹ tọn hẹ yé ya?

Sinsẹ̀n-bibasi whẹndo tọn nọ hùn dotẹnmẹ dotena mẹjitọ lẹ nado zinnudo ale he yanwle gbigbọmẹ tọn lẹ zizedonukọnna mẹde nọ hẹnwa ji. Nulinlẹnpọndo otàn gbẹzan mẹmẹsunnu nugbonọ he tin to linlinnamẹwe mítọn mẹ lẹ tọn ji, na hẹn we penugo nado gọalọna ovi towe lẹ nado mọnukunnujẹemẹ dọ mẹdezizejo na sinsẹ̀nzọn Jehovah tọn wẹ nọ hẹn ale wá hugan. Do ojlo sinsẹ̀nzọn gbehosọnalitọ tọn, nado sẹ̀n to Bẹtẹli, nado yì Wehọmẹ Azọ́nplọnmẹ Devizọnwiwa tọn, kavi nado doafọna adà sinsẹ̀nzọn whenu-gigọ́ tọn devo lẹ tọn do ahun mẹ na ovi towe lẹ.

Avase de die: Mẹjitọ he tlẹ tindo linlẹn dagbe delẹ nọ ze ayidonugo yetọn lẹ do nuhe yé jlo dọ ovi yetọn lẹ ni lẹzun ji sọmọ bọ yé ma nọ pà ovi yetọn lẹ na nuhe yé ko to wiwà to alọnu lẹ. Na nugbo tọn, e na yọ́n dọ a ni na tuli ovi towe lẹ nado ze yanwle sinsẹ̀nzọn Bẹtẹli tọn po azọ́n mẹdehlan tọn po donukọnna yede. Ṣigba dile a to mọwà, họ́ dewe ma nado yí nuhe a jlo dọ yé ni lẹzun lẹ do hẹn apọṣi yé sọmọ bọ ovi towe lẹ na gblehomẹ. (Kọl. 3:21) Nọ flin to whepoponu dọ ahun ovi towe lẹ titi tọn wẹ yé dona yí do yiwanna Jehovah—e ma yin ahun towe. (Mat. 22:37) Enẹwutu, nọ pà ovi towe lẹ na dagbe he yé to wiwà lẹ to whedepopenu he dotẹnmẹ lọ hundote, bo nọavunte sọta ojlo lọ nado nọ ze ayiha towe do nuhe yé ma to wiwà lẹ ji. Gọalọna ovi towe lẹ nado yọ́n pinpẹn nuhe Jehovah nọ wà lẹpo tọn. Enẹgodo, dike ahun ovi towe lẹ tọn ni whàn yé nado do pinpẹn-nutọn-yinyọnẹn hia na dagbewà Jehovah tọn.

Hẹn Ẹn Zun Awuvivinu

Onú titengbe atọ̀ntọ he na zọ́n bọ sinsẹ̀n-bibasi whẹndo tọn na tindo kọdetọn dagbe wẹ nado hẹn ẹn zun awuvivinu. Nawẹ a sọgan wà ehe gbọn? Vlavo to whedelẹnu, mì sọgan dotó nupinpọn-do-plọnnu kavi pọ́n video titobasinanu lọ tọn de bo dọhodeji. Kavi mì sọgan hia weta Biblu tọn delẹ dopọ, gbọn otàn mẹhe tọn hia mì te to Biblu mẹ lẹ tọn dopodopo didena hagbẹ whẹndo lọ tọn dopodopo dali.

Hosọ delẹ tin to Atọ̀họ̀-Nuhihọ́ Lọ Tọn po Réveillez-vous! po mẹ he yin dodonu dagbe he ji hodọdopọ whẹndo tọn sọgan sinai do. Di apajlẹ, hiẹ sọgan yí hosọ lọ “Que répondriez-vous?” (Nawẹ Hiẹ Na Na Gblọndo Gbọn?) he nọ sọawuhia to weda 31tọ Réveillez-vous! tọn ji zan. Atọ̀họ̀-Nuhihọ́ Lọ Tọn zinjẹgbonu gbonutọ lẹ tọn lẹpo nọ bẹ hosọ dodinnanu tọn lọ “Na Jọja Mítọn lẹ” hẹn. Hosọ lọ, “Plọn Ovi Towe lẹ” he yin awuwlena na jọja lẹ, nọ diọtẹnna hosọ lọ “Na Jọja Mítọn lẹ” sọn ojlẹ de mẹ jẹ devo mẹ.

Hosọ lọ “Les jeunes s’interrogent” (Kanbiọ He Jọja lẹ Nọ Kanse) he nọ sọawuhia to Réveillez-vous! mẹ na yọ́n-na-yizan na mẹjitọ he tindo jọja aflanmẹ lẹ taun. Gbọnvona enẹ, mì ma dona yí nukun pẹvi do pọ́n apotin lọ “Questions de réflexion” (Nuhe ji Hiẹ Na Lẹnnupọndo lẹ) he nọ sọawuhia to linlinnamẹwe lọ mẹ. Mì sọgan nọ yí apotin enẹ zan to hodọdopọ whẹndo tọn whenu.

Ṣigba, payi ma nado nọ gbidikọna yé po kanbiọ lẹ po to oplọn whẹndo tọn whenu. Di apajlẹ, ayinamẹ ko yin nina mẹjitọ lẹ nado dike ovi yetọn lẹ ni tindo owe kandai tọn de, he mẹ yé sọgan kàn linlẹn po numọtolanmẹ mẹdetiti tọn yetọn lẹ po do gando nuhe ji mì dọhodo to whẹndo mẹ go, podọ lehe yé sọgan yí nuhe ji mì dọhodo lọ lẹ do yizan mẹ gbọn. Ṣigba to ojlẹ dopolọ mẹ, ma tẹnpọn nado hẹn yé gánnugánnu nado hia nuhe yé ko kàn do owe kandai tọn yetọn lẹ mẹ daga blo. Eyin a ma nọ wàmọ, enẹ na na tuli ovi towe lẹ nado yí nugbonọ-yinyin do kàn linlẹn po numọtolanmẹ yetọn lẹ po do owe kandai tọn yetọn mẹ. A dike ovi towe lẹ tindo numọtolanmẹ lọ dọ a to ṣiṣọ́ yé blo. To nukọn mẹ, yé sọgan dọ nuhe yé ko kàn lẹ na we po awuvivo po.

Eyin a nọ hẹn ẹn diun dọ sinsẹ̀n-bibasi whẹndo tọn towe nọ yin bibasi to gbesisọ mẹ, bọ nudọnamẹ lọ lẹ sọgbe hẹ whẹndo towe, podọ a hẹn ẹn zun awuvivinu, Jehovah na dona vivẹnudido towe lẹ. Ojlẹ vonọtaun ehe to whẹndo mẹ na gọalọna we nado hẹn mẹyiwanna towe lẹ lodo to gbigbọ-liho.

[Apotin to weda 31]

Dike Ni Fọnjlodotenamẹ

“Eyin yẹn po asu ṣie po to nuplọn hẹ viyọnnu mítọn lẹ, mí nọ gbadopọnna nuhe ji opli agun tọn lẹ sinai do, podọ mí nọ biọ to viyọnnu mítọn lẹ si nado basi bladopọ nuhe yé plọn lẹ tọn. To whedelẹnu, mí nọ basi wadohia nujijọ Biblu tọn delẹ tọn kavi nọ basi zepọn nuzedonukọnnamẹ kunnudegbe tọn lẹ tọn. Mí nọ dike nudọnamẹ lọ lẹ ni sọgbe hẹ owhe yetọn, bo nọ hẹn yé zun awuvivinu, mẹjlọdote tọn, bosọ nọ fọnjlodotenamẹ.”—J.M., États-Unis.

“Nado gọalọna visunnu Biblu plọntọ ṣie tọn nado yọ́n lehe e nọ vẹawu nado yí owe-hihá zan do to hohowhenu, mí zín owe Isaia tọn tọ́n [to ọdinatẹẹ ji] bo de sọha weta po wefọ lẹ po tọn sẹ̀ sọn e mẹ. Mí tlẹ́ tónu owe lọ lẹ tọn dopọ bo hásá ẹ do opò go. Enẹgodo, ovi lọ tẹnpọn nado wà nuhe Jesu wà to sinagọgu mẹ to Nazalẹti. Kandai Luku 4:16-21 dohia dọ whenue Jesu ‘hùn owe [kavi owe-hihá Isaia tọn] lọ, e mọ’ fie dín e te lọ. (Isa. 61:1, 2) Ṣigba, whenue ovi lọ tẹnpọn nado wà nudopolọ, e mọdọ e vẹawu nado yọ́n fie Isaia weta 61tọ te to owe-hihá gaa he ma tindo sọha weta po wefọ po tọn enẹ mẹ. Nugopipe Jesu tọn nado yí owe-hihá lẹ zan hẹn awuji ovi lọ sọmọ bọ e dọ dọ: ‘Etẹ! Jesu sinyẹn taun mọ!’”—Y.T., Japon.

[Yẹdide to weda 30]

Zepọn bibasi sọgan gọalọna ovi towe lẹ nado duto kọgbidinamẹ hagbẹ tọn ji

[Yẹdide to weda 31]

Tẹnpọn nado hẹn sinsẹ̀n-bibasi whẹndo tọn zun awuvivinu