Ogbè Voovo Yíyí Do Dọho—Be Jiwheyẹwhe Dè Wẹ E Wá Sọn Ya? — WESẸDOTẸN INTẸNẸT JI TỌN Watchtower Tọn

Ogbè Voovo Yíyí Do Dọho—Be Jiwheyẹwhe Dè Wẹ E Wá Sọn Ya?

“N’MA nọ mọnukunnujẹemẹ paali,” wẹ Devon dọ. “To sẹmẹsẹmẹ, mẹsusu nọ dọ dọ emi nọ mọ gbigbọ wiwe yí to ṣọṣi ṣie mẹ bo nọ yí ogbè voovo do dọho to azọ́njiawu-liho. Delẹ to yé mẹ nọ zan gbẹzan fẹnnuwiwa tọn. Ṣigba, n’nọ tẹnpọn nado nọgbẹ̀ sọgbe hẹ nujinọtedo Biblu tọn lẹ. Etomọṣo, dile n’tlẹ nọ hodẹ̀ sinsinyẹn nado biọ gbigbọ wiwe, n’ma mọ nunina ehe yí pọ́n gbede. Naegbọn e do yinmọ?”

Mọdopolọ, Gabriel nọ yì ṣọṣi de fie gbẹtọ lẹ nọ dọ dọ emi nọ mọ gbigbọ wiwe yí bo nọ dọhodo ogbè voovo mẹ te. E basi zẹẹmẹ dọmọ: “Nuhe nọ paṣa mi wẹ yindọ to whenue n’to dẹ̀ho, mẹdevo lẹ nọ to hodọdo ogbè he yẹn po yewlẹ po ma mọnukunnujẹemẹ de mẹ po awhá po, podọ enẹ nọ zọ́n bọ n’ma sọgan zindonukọn to odẹ̀ ṣie mẹ ba. Nado dọ hójọhó, mẹdepope ma nọ mọaleyi sọn hodidọ ehe mẹ. Be e ma jẹ dọ nunina gbigbọ Jiwheyẹwhe tọn ni gbẹ́ wà dagbe de namẹ ya?”

Numimọ Devon po Gabriel po tọn fọ́n kanbiọ mẹhẹnlẹnnupọn tọn de dote—enẹ wẹ yindọ, be ogbè voovo yíyí do dọho dile ṣọṣi delẹ nọ wà do to egbehe wá sọn Jiwheyẹwhe dè nugbonugbo ya? Nado na gblọndo kanbiọ enẹ tọn, e na yọ́n nado gbadopọnna nunina ogbè tọn he Klistiani owhe kanweko tintan whenu tọn lẹ yí do dọho to azọ́njiawu-liho.

Yé “Jẹ Ogbè Voovo Yí Do Dọho Ji”

Biblu dọho gando sunnu po yọnnu delẹ po go he gbigbọ wiwe na huhlọn nado do ogbè voovo he yé ma ko plọn dai lẹ. Ehe jọ whla tintan to Pẹntikọsti owhe 33 W.M., yèdọ osẹ kleun delẹ to okú Jesu Klisti tọn godo. To gbenẹgbe to Jelusalẹm, nudi devi Jesu tọn 120 “gọ́ na gbigbọ wiwe bo jẹ ogbè voovo yí do dọho ji.” “Awú sọ ji [jonọ he wá sọn otò devo mẹ lẹ], na omẹ dopodopo sè bọ yé to hodọ do ogbè etọn titi mẹ.”—Owalọ lẹ 1:15; 2:1-6.

Biblu donù hodotọ Jesu tọn dowhenu tọn devo lẹ go he tindo nugopipe vonọtaun ehe. Di apajlẹ, na gbigbọ wiwe na huhlọn apọsteli Paulu wutu, e penugo nado dọhodo ogbè susu mẹ to azọ́njiawu-liho. (Owalọ lẹ 19:6; 1 Kọlintinu lẹ 12:10, 28; 14:18) Ṣigba, e sọgbe hẹ lẹnpọn dagbe dọ nunina depope he gbigbọ wiwe Jiwheyẹwhe tọn wleawuna ni wà dagbe de na gbẹtọ lẹ. To whelọnu lo, adà tẹwẹ ogbè voovo yíyí do dọho yiwà to ojlẹ Biblu tọn lẹ mẹ?

Ogbè Voovo Yíyí Do Dọho Yin Ohia Godonọnamẹ Jiwheyẹwhe Tọn

To whenue Paulu to wekanhlan Klistiani he tin to tòdaho Kọlinti tọn mẹ lẹ, ehe delẹ to yé mẹ na ko tindo nugopipe ogbè voovo yíyí do dọho tọn, e basi zẹẹmẹ dọ “ogbè devo lẹ yin ohia de. . . na mayisenọ lẹ.” (1 Kọlintinu lẹ 14:22) Enẹwutu, nugopipe azọ́njiawu tọn devo lẹ po ogbè voovo yíyí do dọho po yin ohia de na gbẹtọ lẹ dọ Jiwheyẹwhe kẹalọyi agun Klistiani tọn he ṣẹṣẹ yin didoai lọ bosọ to godonọna ẹn. Nunina azọ́njiawu tọn lẹ taidi alidohiamẹnu de he na deanana nugbo-dintọ lẹ nado dín fie mẹdide Jiwheyẹwhe tọn lẹ te mọ.

E jẹna ayidego dọ Biblu ma dọ dọ Jesu kavi depope to yẹwhegán Klistiani dowhenu tọn lẹ mẹ gbọn azọ́njiawu dali do ogbè voovo he yé ma ko plọn dai lẹ gba. Enẹwutu, ayihaawe ma tin dọ nunina ogbè voovo tọn he devi Jesu tọn lẹ mọyi sọ tindo yanwle devo lẹ ga.

Ogbè Voovo Yíyí Do Dọho Yin Azọ́nwanu de Nado Hẹn Wẹndagbe lọ Gbayipe

To bẹjẹeji lizọnyizọn Jesu tọn, e deanana devi etọn lẹ nado dọyẹwheho wẹndagbe Ahọluduta Jiwheyẹwhe tọn na Ju lẹ kẹdẹ. (Matiu 10:6; 15:24) Taidi kọdetọn de, devi lẹ ma nọ saba dọyẹwheho zẹ̀ dogbó lẹdo he mẹ Ju lẹ nọ nọ̀ tọn go. Ṣigba e ma dẹn bọ enẹ diọ.

Ojlẹ kleun de to fọnsọnku Jesu tọn godo to owhe 33 W.M., e degbena hodotọ etọn lẹ nado “hẹn gbẹtọ lẹ sọn akọta lẹpo mẹ zun devi.” E sọ dọna hodotọ etọn lẹ dọ yé na yin kunnudetọ emitọn “kaka yì awà he dẹn hugan aigba tọn lẹ ji.” (Matiu 28:19; Owalọ lẹ 1:8) Eyin wẹndagbe lọ na gbayipe jẹ obá mọnkọtọn mẹ, be e na biọ dọ gbọnvona Heblugbe, yé ni yí ogbè susu devo lẹ zan.

Ṣigba, susu to devi owhe kanweko tintan whenu tọn enẹlẹ mẹ “ma sewé bosọ yin omẹ tata.” (Owalọ lẹ 4:13) To whelọnu lo, nawẹ yé na wagbọn do dọyẹwheho yì aigba he dẹn lẹ ji fie ogbè susu he yé sọgan nọma ko sè pọ́n lẹ nọ yin dido te whẹpo yè nido dọ dọ yé ni do ogbè lọ lẹ? To azọ́njiawu-liho, gbigbọ wiwe gọalọna delẹ to yẹwhehodọtọ zohunhunnọ enẹlẹ mẹ nado dọyẹwheho po dẹ́didi po do ogbè he yé ma ko nọ do dai lẹ mẹ.

Gbọnmọ dali, nunina ogbè voovo tọn lọ yí adà tangan awe wà. Tintan, e yin kunnudenu de dọ Jiwheyẹwhe to godonọna omẹ etọn lẹ. Awetọ, e yin azọ́nwanu dagbe de he gọalọna Klistiani owhe kanweko tintan tọn lẹ nado hẹn azọ́ndenamẹ yetọn nado dọyẹwheho na gbẹtọ lẹ do ogbè he yé nọ do mẹ di. Be susu ṣọṣi he nọ yí ogbè voovo do dọho to egbehe lẹ tọn nọ wà onú ehelẹ dotana ya?

Be Ogbè Voovo Yíyí Do Dọho Egbezangbe Tọn Yin Ohia Godonọnamẹ Jiwheyẹwhe Tọn Ya?

Fie wẹ hiẹ na ze ohia de do na e nido hẹn ale wá na mẹsusu to lẹdo towe mẹ? Ohọ̀ pẹvi de mẹ wẹ ya? Paali! Kandai nuhe jọ to azán Pẹntikọsti tọn gbè tọn dohia dọ “gbẹtọgun” he juwa jei de mọ ohia de, yèdọ ogbè voovo he devi lẹ yí do to hodọ to azọ́njiawu-liho. Taidi kọdetọn de, “nudi alindọn foo-fọtọ́n wẹ yin yiyidogọ” agun Klistiani tọn to gbenẹgbe! (Owalọ lẹ 2:5, 6, 41) Eyin mẹhe nọ dọ dọ emi nọ yí ogbè voovo do dọho to egbehe lẹ nọ wàmọ to ṣọṣi yetọn lẹ kẹdẹ mẹ, nawẹ susugege mayisenọ lẹ tọn na wagbọn do mọ ohia lọ?

Ohó Jiwheyẹwhe tọn donù galilọ po “azọ́n agbasalan tọn” devo lẹ po go taidi nuhe nọ glọnalina nuyiwadomẹji gbigbọ wiwe tọn bo yidogọ dọ “mẹhe nọ wà onú mọnkọtọn lẹ ma na dugu ahọluduta Jiwheyẹwhe tọn.” (Galatianu lẹ 5:17-21) Eyin a mọ bọ mẹhe nọ doalọ to walọ he ma sọgbe lẹ mẹ yí ogbè voovo do to hodọ, a sọgan kanse dewe to tẹndo dopolọ mẹ dọ, ‘Be e ma jẹagọ kavi tlẹ hẹnmẹ buali dọ gbigbọ wiwe Jiwheyẹwhe tọn ni kọ̀n do mẹhe yí walọ he Ohó Jiwheyẹwhe tọn jẹagọdo do dó aṣa lẹ ji ya?’ Enẹ na taidi alidohiamẹnu de he hẹn mọto lẹ buali.

Be Ogbè Voovo Yíyí Do Dọho Egbezangbe Tọn Yin Azọ́nwanu de Nado Hẹn Wẹndagbe lọ Gbayipe Ya?

Adà devo tẹlẹ wẹ nunina ogbè tọn lẹ yiwà to owhe kanweko tintan whenu? Be ṣọṣi he dọ dọ emi nọ yí ogbè voovo do dọho to egbehe lẹ nọ wàmọ po yanwle lọ po nado lá wẹndagbe na gbẹtọ lẹ do ogbè he yé nọ do mẹ ya? Flindọ otò susu mẹ wẹ gbẹtọgun he wá Jelusalẹm to azán Pẹntikọsti owhe 33 W.M. lẹ wá sọn, podọ yé mọnukunnujẹ ogbè he devi lẹ do to azọ́njiawu-liho mẹ hezeheze. Ṣigba, mẹhe nọ yí ogbè voovo do dọho to egbehe lẹ nọ saba wàmọ do ogbè he mẹdepope ma mọnukunnujẹ de mẹ.

E họnwun dọ ogbè voovo yíyí do dọho egbezangbe tọn lẹ gbọnvo pete na nunina gbigbọ wiwe tọn he hodotọ dowhenu Jesu tọn lẹ mọyi. Nado dọ hójọhó, kandai dejidego depope ma tin ehe dọho gando mẹdepope go dọ e mọ godonọnamẹ gbigbọ wiwe tọn dopolọ yí sọn whenue gbọ́n apọsteli lẹ ko kú vọ̀. Ehe ma yin nubajonọmẹ de na mẹhe jẹakọ hẹ Biblu lẹ gba. Gando nunina azọ́njiawu tọn kakajẹ ogbè voovo yíyí do dọho go ji, apọsteli Paulu he yin gbigbọdo lọ dọmọ: “Yé na doalọte.” (1 Kọlintinu lẹ 13:8) To whelọnu lo, nawẹ mẹde sọgan yọ́n mẹhe tindo godonọnamẹ gbigbọ wiwe tọn to egbehe lẹ gbọn?

Mẹnu lẹ Wẹ Nọ Dohia Dọ Emi Tindo Godonọnamẹ Gbigbọ Wiwe Tọn?

Jesu yọnẹn ganji dọ nunina ogbè tọn na doalọte ojlẹ kleun de to didoai agun Klistiani tọn godo. Ojlẹ kleun de jẹnukọnna okú Jesu tọn, e donù nuhe na dohiagona hodotọ nugbo etọn lẹ kakadoi go. E dọmọ: “Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin, eyin mì tindo owanyi to mìdelẹ ṣẹnṣẹn.” (Johanu 13:35) Na nugbo tọn, wefọ dopolọ he mẹ Ohó Jiwheyẹwhe tọn dọ te dọ nunina ogbè tọn lẹ na wá doalọte sọ dọ dọ: “Owanyi ma nọ gboawupo gbede.”—1 Kọlintinu lẹ 13:8.

Owanyi wẹ yin nùdego tintan to adà “sinsẹ́n” gbigbọ wiwe Jiwheyẹwhe tọn ṣinẹnẹ lẹ mẹ. (Galatianu lẹ 5:22, 23) Enẹwutu, mẹhe nọ mọ gbigbọ wiwe Jiwheyẹwhe tọn yí bosọ nọ tindo godonọnamẹ etọn nugbonugbo lẹ nọ do owanyi nujọnu tọn hia ode awetọ. Humọ, adà atọ̀ntọ sinsẹ́n gbigbọ lọ tọn wẹ jijọho. Enẹwutu, mẹhe nọ mọ gbigbọ wiwe yí to egbehe lẹ nọ tẹnpọn nado nọ jijọho mẹ hẹ mẹlẹpo bo nọ dovivẹnu vẹkuvẹku nado nọavùnte sọta nuvẹun, akọ̀ ṣinṣinyan, po danuwiwa po.

Mọdopolọ, flin dọdai Jesu tọn he tin to Owalọ lẹ 1:8 mẹ. E dọ dọdai dọ devi emitọn lẹ na mọ huhlọn yí nado dekunnuna emi “kaka yì awà he dẹn hugan aigba tọn lẹ ji.” Jesu sọ dohia dọ azọ́n ehe na zindonukọn “kakajẹ opodo aihọn tọn.” (Matiu 28:20, Biblu Wiwe Lọ—Gun Alada) Enẹwutu, azọ́n yẹwhehodidọ lẹdo aihọn pé tọn ehe na zindonukọn nado to hiadogona mẹhe ji gbigbọ wiwe nọ yinuwado nugbonugbo lẹ.

Etẹwẹ hiẹ lẹn? Pipli tẹwẹ a mọdọ gbigbọ wiwe nọ nọgodona to egbehe? Mẹnu lẹ wẹ nọ do sinsẹ́n gbigbọ tọn, titengbe owanyi po jijọho po, hia sọmọ bọ yé nọ jiya to alọ tohọluduta lẹ tọn mẹ na yé nọ gbẹ́ lẹdo aihọn pé ma nado funawhàn? (Isaia 2:4) Mẹnu lẹ wẹ nọ dovivẹnu vẹkuvẹku nado dapana azọ́n agbasalan tọn lẹ taidi galilọ, bo tlẹ nọ de mẹhe yí walọ mọnkọtọn lẹ do dó aṣa bo ma lẹnvọjọ lẹ sẹ̀ sọn yede ṣẹnṣẹn? (1 Kọlintinu lẹ 5:11-13) Mẹnu lẹ wẹ to wẹndagbe lá lẹdo aihọn pé dọ Ahọluduta Jiwheyẹwhe tọn wẹ todido dopo akàn lọ na gbẹtọvi lẹ?—Matiu 24:14.

Mẹhe nọ zín linlinwe ehe jẹgbonu lẹ ma nọ whleawu nado dọ dọ nuyiwa Kunnudetọ Jehovah tọn lẹ tọn wẹ sọgbe hẹ nuhe Biblu dọ gando mẹhe tindo godonọnamẹ gbigbọ wiwe tọn lẹ go. Naegbọn a ma na jẹakọ hẹ yé ganji nado mọ na dewe dọ yewlẹ wẹ tindo godonọnamẹ Jiwheyẹwhe tọn nugbonugbo?