Atọ̀họ̀-Nuhihọ́ lọ Tọn to Glẹnsigbe He Bọawu de Mẹ
HOMẸHUN mí nado lá na mì dọ bẹsọn zinjẹgbonu Atọ̀họ̀-Nuhihọ́ lọ Tọn oplọn tọn ehe ji, mí nasọ nọ zín in tọ́n to Glẹnsigbe he bọawu de mẹ to sunmẹsunmẹ. Mí na tẹ́n ehe pọ́n na owhe dopo nado yọnẹn eyin e na wazọ́n. E na nọ bẹ hosọ oplọn tọn lẹ hẹn, podọ eyin tẹnmẹ pò to e mẹ, hosọ devo lẹ nasọ nọ yin awuwlena do e mẹ dogọ. Mí deji dọ ehe na súdo nuhudo gbigbọmẹ tọn tangan de tọn na susu Kunnudetọ Jehovah tọn lẹ tọn. Etẹwutu?
Glẹnsigbe wẹ yin ogbè he mẹmẹsunnu mítọn he tin to Fidji, Ghana, Kenya, Libéria, Lopo Salomon tọn ji, Nigéria po Papouasie-Nouvelle-Guinée po lẹ nọ do to paa mẹ. Dile etlẹ yindọ mẹmẹsunnu mítọn he tin to otò enẹlẹ mẹ lẹ nọ do ogbè kavi akọgbè devo lẹ, Glẹnsigbe wẹ yé nọ saba do to hodidọ egbesọegbesọ tọn lẹ mẹ to opli agun tọn lẹ ji podọ to kunnudegbe. Ṣigba, Glẹnsigbe he yé nọ do bọawu taun hugan dehe tin to owe mítọn lẹ mẹ. Podọ Kunnudetọ Jehovah tọn delẹ sọ sẹtẹn yì otò devo lẹ mẹ, fie yé to dandannu glọ nado do Glẹnsigbe te dile etlẹ yindọ yé ma sè ogbè lọ sọmọ. Humọ, to lẹdo he mẹ yé te, agun depope ma nọ deanana opli lẹ do ogbè yetọn mẹ.
Hosọ he mí nọ gbadopọnna to sẹmẹsẹmẹ to Oplọn Atọ̀họ̀-Nuhihọ́ lọ Tọn whenu lẹ wẹ yin aliho tangan he mẹ mí nọ mọ núdùdù gbigbọmẹ tọn yí te to ojlẹ sisọ mẹ. Enẹwutu, nado gọalọna mẹlẹpo nado duvivi hosọ Atọ̀họ̀-Nuhihọ́ lọ Tọn ganji, Glẹnsigbe he na yin awuwlena do zinjẹgbonu ehe mẹ na bọawu taun. Apà etọn na gbọnvo. Hóvila lẹ, hukan lẹ, kanbiọ dogbapọn tọn lẹ po yẹdide he na yin awuwlena do e mẹ lẹ po ma na nọ gbọnvona dehe tin to zinjẹgbonu oplọn tọn hoho lọ mẹ lẹ. Gbọnmọ dali, mahopọnna zinjẹgbonu he mẹde de nado yizan, e sọgan tindo mahẹ to Oplọn Atọ̀họ̀-Nuhihọ́ lọ Tọn mẹ. Nado do vogbingbọn Glẹnsigbe he tin to zinjẹgbonu awe lọ lẹ mẹ hia, pọ́n apajlẹ etọn to odò dile e sọawuhia to hosọ oplọn tọn tintan Glẹnsigbe tọn mẹ do to hukan 2tọ zinjẹgbonu ehe tọn mẹ.
Todido mítọn wẹ yindọ zinjẹgbonu yọyọ ehe na na gblọndo odẹ̀ he mẹsusu nọ hò hlan Jehovah tọn dọmọ: “Na nuyọnẹn mi, na yẹn nido plọn gbedide towe lẹ.” (Ps. 119:73) Mí deji dọ mẹhe ma sè Glẹnsigbe sọmọ lẹ kakajẹ yọpọvu he nọ do Glẹnsigbe lẹ ji, na penugo nado nọ wleawuna Oplọn Atọ̀họ̀-Nuhihọ́ lọ Tọn ganji to sẹmẹsẹmẹ. Mí dopẹ́ dọ na Jehovah yiwanna “pipli mẹmẹsunnu lẹ tọn pete” wutu, e to “afanumẹ nugbonọ podọ nuyọnẹntọ lọ” yizan nado nọ wleawu núdùdù gbigbọmẹ tọn na mí to ojlẹ sisọ mẹ.—1 Pita 2:17; Mat. 24:45.
Hagbẹ Anademẹtọ Kunnudetọ Jehovah tọn lẹ tọn