Atọ̀họ̀-Nuhihọ́ lọ Tọn He Bọawu lọ Naegbọn E Do Yin Didetọn?
NA OWHE susu, gbẹtọ voovo lẹ lẹdo aihọn pé wẹ yọ́n pinpẹn nudọnamẹ sinai do Biblu ji he nọ yin awuwlena do Atọ̀họ̀-Nuhihọ́ lọ Tọn mẹ lẹ tọn bosọ mọaleyi sọn yé mẹ. To juillet 2011, diọdo de wá aimẹ: Vọkan tintan zinjẹgbonu oplọn tọn he bọawu de yin didetọn to Glẹnsigbe mẹ. Zẹẹmẹ yin bibasi to zinjẹgbonu tintan enẹ mẹ dọmọ: “Mí na tẹ́n ehe pọ́n na owhe dopo nado yọnẹn eyin e na wazọ́n.” Linlẹn lọ wẹ yindọ eyin tito enẹ tindo kọdetọn dagbe, zinjẹgbonu lọ didetọn na zindonukọn.
Todin, po homẹhunhun po wẹ mí jlo na lá na mì dọ mí ko basi dide nado zindonukọn to zinjẹgbonu he bọawu lọ didetọn mẹ. Humọ, zinjẹgbonu he bọawu lọ nasọ nọ yin didetọn to Flansegbe, Portugal-gbè, po Espagne-gbè po mẹ ga.
NUHEWUTU MẸSUSU YIWANNA ZINJẸGBONU ENẸ
To Pacifique du Sud, mẹsusu na linlin gando zinjẹgbonu he bọawu lọ go dọmọ: “Todin, mẹmẹsunnu lẹ nọ mọnukunnujẹ Atọ̀họ̀-Nuhihọ́ lọ Tọn mẹ to gigọ́ mẹ.” Linlin devo dọmọ: “To dai, mẹmẹsunnu lẹ nọ zan whenu susu nado dín zẹẹmẹ hogbe lẹ tọn, ṣigba todin yé nọ zan whenu enẹ nado gbadopọnna wefọ he yin dide lọ lẹ po kanṣiṣa he yé tindo hẹ hosọ lọ po.”
To États-Unis, mẹmẹyọnnu de he yì wehọmẹ alavọ tọn basi zẹẹmẹ dọmọ: “Na owhe 18, n’nọ dọho bosọ nọ kanwe to aliho de mẹ bọ mẹhe sewé taun lẹ kẹdẹ wẹ nọ mọnukunnujẹemẹ. Enẹ zọ́n bọ e nọ vẹawuna mẹsusu nado mọnukunnujẹ nuhe dọ n’te lẹ mẹ. N’wá doayi e go dọ n’dona tẹnpọn nado nọ basi zẹẹmẹ nulẹ tọn to aliho he bọawu taun de mẹ.” Zinjẹgbonu Atọ̀họ̀-Nuhihọ́ lọ Tọn he bọawu lọ gọalọna ẹn nado lẹzun Biblu plọnmẹtọ dagbe de. E basi zẹẹmẹ dọmọ: “Atọ̀họ̀-Nuhihọ́ lọ Tọn he bọawu lọ hẹn ale susu wá na mi. Lehe nulẹ nọ yin hinhẹn bọawu do to zinjẹgbonu enẹ mẹ gọalọna mi taun nado nọ plọnnumẹ to aliho he bọawu mẹ.”
To Angleterre, mẹmẹyọnnu de he yí baptẹm to 1972 wlan gando zinjẹgbonu Atọ̀họ̀-Nuhihọ́ lọ Tọn he bọawu lọ go dọmọ: “To whenue n’to zinjẹgbonu tintan lọ hia, e taidi dọ Jehovah sin apá na mi bo to zinjẹgbonu lọ hia do otó mẹ na mi wẹ nkọ.”
To Bẹtẹli États-Unis tọn, mẹmẹyọnnu de he ko yí baptẹm sọn owhe 40 linlán die basi zẹẹmẹ dọ zinjẹgbonu he bọawu lọ ko gọalọna emi nado tindo nukunnumọjẹnumẹ he siso dogọ to whedelẹnu. Di apajlẹ, to apotin he nọ yin awuwlena nado basi zẹẹmẹ hogbe he vẹawu delẹ tọn to zinjẹgbonu enẹ mẹ, hodidọ lọ ‘aslọ kunnudetọ lẹ tọn’ he tin to Heblu lẹ 12:1 mẹ bo sọawuhia to zinjẹgbonu 15 septembre 2011 tọn mẹ yin zẹẹmẹ basina dole: “Yé sù sọmọ bọ yè ma sọgan hia yé.” Mẹmẹyọnnu lọ dọmọ: “Zẹẹmẹ enẹ zọ́n bọ wefọ lọ sọ họnwun na mi dogọ.” E yidogọ dọ, to Oplọn Atọ̀họ̀-Nuhihọ́ lọ Tọn whenu, “eyin yọpọvu de tlẹ hia gblọndo etọn lẹ sọn zinjẹgbonu he bọawu lọ mẹ tlọlọ, mẹplidopọ lẹ nọ duvivi gblọndo etọn lẹ tọn taun, na hogbe lọ lẹ nọ bọawu hugan dehe tin to zinjẹgbonu Atọ̀họ̀-Nuhihọ́ lọ Tọn hoho lọ tọn mẹ lẹ wutu.”
Mẹmẹyọnnu devo he to devizọnwa to Bẹtẹli wlan dọmọ: “N’nọ to jejeji nado sè gblọndo yọpọvu he tin to agun ṣie mẹ lẹ tọn. Zinjẹgbonu oplọn tọn he bọawu lọ nọ gọalọna yé nado na gblọndo po nujikudo po. Gblọndo yetọn lẹ ko yin asisa tulinamẹ tọn de na mi.”
Mẹmẹyọnnu de he yí baptẹm to 1984 do pinpẹn-nutọn-yinyọnẹn etọn hia na zinjẹgbonu he bọawu lọ dole: “N’mọdọ yẹn wẹ e yin kinkan na tlọlọ. E nọ bọawuna mi taun nado mọnukunnujẹ nuhe hia n’te mẹ. Todin, n’masọ nọ dibu nado na gblọndo to Oplọn Atọ̀họ̀-Nuhihọ́ lọ Tọn whenu ba.”
AZỌ́NWANU HỌAKUẸ DE NA MẸJITỌ LẸ
Onọ̀ de he tindo visunnu owhe ṣinawe mẹvi de dọmọ: “To dai, eyin mí to awuwlena Oplọn Atọ̀họ̀-Nuhihọ́ lọ Tọn, n’dona basi zẹẹmẹ hogbe susu lẹ tọn na ovi ṣie; podọ ehe nọ zọ́n bọ awuwiwle lọ nọ yì whenu susu bosọ nọ hẹn apọṣi mí.” Ṣigba, nawẹ zinjẹgbonu he bọawu lọ gọalọna yé gbọn? Onọ̀ lọ wlan dọmọ: “Homẹ ṣie nọ hùn tlala nado mọdọ e nọ bọawuna ovi ṣie todin nado hia hukan lọ lẹ bosọ mọnukunnujẹ yé mẹ nugbo. Na e ma nọ vẹawuna ẹn nado mọnukunnujẹ hogbe he nọ yin yiyizan lẹ mẹ wutu, e nọ duvivi oplọn lọ tọn taun. Todin, e ma tlẹ nọ nọtepọn mi whẹpo do nọ jẹ awuwlena gblọndo etọn lẹ ji, podọ ayidonugo etọn lẹpo nọ tin to nuhe plọn e te ji.”
Onọ̀ de he tindo viyọnnu owhe ṣinẹnẹ mẹvi de wlan dọmọ: “To dai, mí nọ gọalọna ẹn nado wleawuna gblọndo he e na na to opli ji lẹ. Ṣigba todin, ewọ lọsu wẹ nọ wleawuna gblọndo etọn lẹ. E masọ nọ vẹawuna ẹn nado mọnukunnujẹ oplọn lọ mẹ ba. Enẹwutu, e nọ duvivi Oplọn Atọ̀họ̀-Nuhihọ́ lọ Tọn taun.”
NUHE YỌPỌVU LẸ LẸN GANDO ZINJẸGBONU ENẸ GO
Yọpọvu susu nọ mọdọ yewlẹ wẹ zinjẹgbonu Atọ̀họ̀-Nuhihọ́ lọ Tọn he bọawu lọ yin awuwlena. Rebecca he tindo owhe 12 dọmọ: “Mì jaale bo zindonukọn nado to zinjẹgbonu ehe detọ́n. N’yiwanna adà zinjẹgbonu lọ tọn he yin ‘Zẹẹmẹ Hogbe Delẹ Tọn’ taun. Adà enẹ nọ yidogọna nukunnumọjẹnumẹ yọpọvu lẹ tọn.”
Numọtolanmẹ Rebecca tọn nkọ wẹ Nicolette he tindo owhe ṣinawe lọsu tindo. E dọmọ: “To dai, e nọ vẹawuna mi nado mọnukunnujẹ Oplọn Atọ̀họ̀-Nuhihọ́ lọ Tọn mẹ. Ṣigba todin, n’nọ na gblọndo na dee to opli lẹ ji bosọ nọ na gblọndo susu hugan dai.” Emma he tindo owhe ṣinẹnẹ wlan dọmọ: “Zinjẹgbonu ehe gọalọna yẹn po nọvisunnu ṣie he tindo owhe ṣidopo po taun. Todin, mí nọ mọnukunnujẹ oplọn lọ mẹ taun hugan dai! Mì wanu susu!”
E họnwun dọ zinjẹgbonu Atọ̀họ̀-Nuhihọ́ lọ Tọn he bọawu lọ to ale hẹnwana mẹsusu. Na nugbo tọn, e to pekọ hẹnwana nuhudo gbigbọmẹ tọn mẹsusu tọn bo nasọ zindonukọn nado to yinyin didetọn to pọmẹ hẹ zinjẹgbonu oplọn tọn hoho lọ he ko yin azọ́nwanu họakuẹ de sọn 1879 gbọ́n.
[Nudọnamẹ tangan lẹ to weda 30]
“To dai, mẹmẹsunnu lẹ nọ zan whenu susu nado dín zẹẹmẹ hogbe lẹ tọn, ṣigba todin yé nọ zan whenu enẹ nado gbadopọnna wefọ he yin dide lọ lẹ po kanṣiṣa he yé tindo hẹ hosọ lọ po”
[Nudọnamẹ tangan lẹ to weda 31]
“Homẹ ṣie nọ hùn tlala nado mọdọ e nọ bọawuna ovi ṣie todin nado hia hukan lọ lẹ bosọ mọnukunnujẹ yé mẹ nugbo”