“Mì Tindo Nuhudo Akọndonanu Tọn”

TO WHENUE Anitaa yí baptẹm bo lẹzun dopo to Kunnudetọ Jehovah tọn lẹ mẹ godo, asu etọn jẹ nukundiọsọ ẹ ji sinsinyẹn. Anita dọmọ: “E nọ glọnalina mi ma nado nọ yì opli lẹ bo tlẹ dosẹ́n na mi ma nado nọ ylọ oyín Jiwheyẹwhe tọn. Eyin n’ylọ yinkọ Jehovah tọn poun, asu ṣie nọ jẹ homẹgble ji.”

Avùnnukundiọsọmẹ sinsinyẹn devo he Anita pehẹ wẹ lehe e na plọnnu ovi etọn awe lẹ gando Jehovah go do. E dọmọ: “N’yin alọhẹndotena to owhé ṣie titi gbè ma nado sẹ̀n Jehovah. N’ma gán nọ voawu do plọnnu hẹ ovi ṣie lẹ, podọ n’ma tlẹ sọgan nọ plan yé yì opli lẹ.”

Dile numimọ Anita tọn dohia do, nukundiọsọmẹ hagbẹ whẹndo tọn lẹ tọn sọgan yin whlepọn sinsinyẹn de na tenọgligo-hinhẹn Klistiani de tọn. Mọdopolọ, tenọgli Klistiani de tọn nọ yin whiwhlepọn gbọn nuhahun azọ̀n jẹmagbọ tọn lẹ dali, kavi to whenue ovi etọn kavi alọwlemẹ etọn kú, kavi to whenue hagbẹ whẹndo tọn vivẹ́ de jo Jehovah do. Etomọṣo, etẹwẹ sọgan gọalọna Klistiani de nado hẹn nugbonọ-yinyin etọn na Jehovah go gligli?

To whenue a pannukọn whlepọn mọnkọtọn lẹ, etẹwẹ a na wà? Apọsteli Paulu dọmọ: “Mì tindo nuhudo akọndonanu tọn.” (Heb. 10:36) Ṣigba, etẹwẹ sọgan gọalọna we nado doakọnnanu?

Aliho titengbe dopo he mẹ mí sọgan mọ huhlọn he mí tindo nuhudo etọn yí te nado doakọnna whlepọn lẹ wẹ nado nọ hodẹ̀ bo nọ dejido Jiwheyẹwhe go. Lẹnnupọndo apajlẹ ehe ji. To lundi whèjai dopo, adán de gbò whẹndo Ana tọn. Asu etọn he po e po ko nọpọ́ na owhe 30 wẹ kú to ajiji mẹ. Ana dọmọ: “E yì azọ́nmẹ bo ma lẹkọwa whégbè gbede ba, podọ owhe 52 poun wẹ e tindo.”

Nawẹ Ana pehẹ ninọmẹ ehe gbọn? E gọ̀ agbasazọ́n etọn bẹ, podọ azọ́n lọ gọalọna ẹn, na e nọ biọ dọ ni na ayidonugo lẹpo nuhe wà e te, etomọṣo ehe ma de awufiẹsa etọn sẹ̀. E basi zẹẹmẹ dọmọ: “N’dọ nue to ahun ji na mi lẹpo na Jehovah bo vẹ̀ ẹ dọ ni gọalọna mi nado duto awufiẹsa sinsinyẹn mẹyiwanna ṣie he n’hẹnbu tọn ji.” Be Jehovah na gblọndo odẹ̀ etọn lẹ tọn ya? E kudeji dọ Jehovah wàmọ. E dọmọ: “Jijọho he Jiwheyẹwhe kẹdẹ sọgan namẹ miọnhomẹna alindọn ṣie bosọ gọalọna mi nado lẹnnupọn bo yinuwa to aliho he sọgbe mẹ. N’kudeji dọ Jehovah na hẹn asu ṣie gọwá ogbẹ̀ to fọnsọnku whenu.”—Flp. 4:6, 7.

“Mẹhe nọ sè odẹ̀” ko dopà dọ emi na na devizọnwatọ emitọn lẹ nudepope he yé na tindo nuhudo etọn nado hẹn nugbonọ-yinyin yetọn go gligli. (Ps. 65:2) Be a ma kọngbedopọ dọ jidenamẹ ehe hẹn yise mẹtọn lodo taun ya? Be ehe ma gọalọna we nado mọ nuhewutu hiẹ lọsu sọgan doakọnnanu ya?

Jehovah nọ jlọ omẹ etọn lẹ dote gbọn agun Klistiani tọn gblamẹ. Di apajlẹ, to whenue agun Tẹsalonika tọn pehẹ homẹkẹn sinsinyẹn, Paulu dotuhomẹna Klistiani he to finẹ lẹ nado “nọ to homẹmiọnna ode awetọ bo nọ to ode awetọ hẹn lodo, kẹdẹdile [yé ko] to wiwà do na taun tọn.” (1 Tẹs. 2:14; 5:11) Klistiani he to Tẹsalonika lẹ penugo nado luntọ́n sọn whlepọn he ze yise yetọn do owù mẹ enẹ mẹ, na yé yí owanyi do dọnsẹpọ yede bosọ gọalọna ode awetọ wutu. Kandai lehe yé doakọnnanu do tọn nọ gọalọna mí nado plọnnu sọn apajlẹ dagbe yetọn mẹ to egbehe, podọ e nọ do nuhe sọgan gọalọna mí nado doakọnnanu hia.

Awuwiwlena haṣinṣan pẹkipẹki họntọnjiji tọn de hẹ hagbẹ agun lọ tọn lẹ, sọgan gọalọna mí nado nọ tindo mahẹ to “nuhe nọ jlọ ode awetọ dote lẹ” wiwà mẹ. (Lom. 14:19) Ehe yin nujọnu taun titengbe to ojlẹ ayimajai tọn lẹ mẹ. Paulu lọsu pehẹ nukunbibia susu lẹ, podọ Jehovah na ẹn huhlọn nado doakọnnanu. To whedelẹnu, Jiwheyẹwhe nọ na tuli Paulu taun gbọn yisenọ hatọ lẹ gblamẹ. Di apajlẹ, to whenue Paulu do nudọdomẹ hlan hagbẹ agun Kọlọsi tọn lẹ dopodopo, e dọ gando yé go dọmọ: “Omẹ ehe lọ lẹ wẹ ko lẹzun alọgọ mẹhẹnlodo tọn de na mi.” (Kọl. 4:10, 11) Na nugbo tọn, owanyi sisosiso yetọn na Paulu whàn yé nado miọnhomẹna ẹn bo hẹn ẹn lodo to whenue e tindo nuhudo etọn. E yọnbasi ganji dọ hiẹ lọsu na ko mọ tulinamẹ po mẹjlọdote dopolọ po yí sọn hagbẹ agun towe tọn lẹ dè.

Jiwheyẹwhe wleawu asisa mẹjlọdote tọn devo na mí to agun Klistiani tọn mẹ, enẹ wẹ mẹho agun tọn lẹ. Sunnu he whèwhín to gbigbọ-liho ehelẹ sọgan “taidi otẹn whiwhla tọn sọn jẹhọn nù, bẹtẹn sọn yujẹhọn nù; di otọ̀ osin tọn to ofi húhú, di oyẹ̀ awinyan daho tọn to aigba húhú ji.” (Isa. 32:2) Jide homẹmiọnnamẹ tọn nankọ die! Be a ko mọaleyi sọn awuwledainanu owanyinọ ehe mẹ pọ́n ya? Tulinamẹ po mẹjlọdote mẹho lẹ tọn po sọgan gọalọna we nado doakọnnanu.

Nugbo wẹ dọ mẹho lẹ ma nọ wà azọ́njiawu. Gbẹtọvi mapenọ wẹ yé yin, bo “tindo awugbopo lẹ taidi [mílọsu].” (Owalọ 14:15) Etomọṣo, ovẹvivẹ yetọn lẹ do ota mítọn mẹ sọgan hẹn ale susu wá. (Jak. 5:14, 15) To Italie, mẹmẹsunnu de he to awukuzọ̀n jẹ bo ko doakọnna awufiẹsa sinsinyẹn na owhe susu dọmọ: “Owanyi mẹmẹsunnu lẹ tọn, awuvẹmẹ sisosiso yetọn po dlapọn he yé nọ basi wá dè e whẹwhẹ lẹ po gọalọna mi nado doakọnnanu.” Be e ma na jlo hiẹ lọsu nado mọaleyi to gigọ́ mẹ sọn awuwledainanu owanyinọ Jehovah tọn ehe mẹ ya?

Ṣigba, onú devo lẹ gbẹ́ pò he mí sọgan wà nado doakọnnanu. Dopo wẹ nado zindonukọn to nuwiwa gbigbọmẹ tọn lẹ mẹ. Lẹnnupọndo apajlẹ John tọn ji, mẹhe tindo owhe 39 bo to azọ̀n kansẹẹ tọn sinsinyẹn de jẹ. E yigbe dọmọ: “N’mọdọ e ma yin yẹn wẹ dona to azọ̀n ehe jẹ, na jọja de wẹ n’yin wutu.” To ojlẹ lọ mẹ, owhe atọ̀n poun wẹ visunnu John tọn tindo. John dọmọ: “Ehe dohia dọ, asi ṣie wẹ na penukundo ovi mítọn pẹvi go bosọ dona penukundo yẹnlọsu go ga, bo gọalọna mi na ma do nọ yì dope dotowhé tọn ṣie lẹpo do gànmẹ.” Amasin sinsinyẹn he John nọ zan lẹ nọ ze oslú na ẹn bosọ nọ zọ́n bọ onú nọ ṣikọna ẹn zẹjlẹgo. Podọ e ma ko fó do finẹ. Otọ́ John tọn lọsu bẹ azọ̀n he nọ hùmẹ de bọ e biọ dọ whẹndo lọ ni penukundo e go.

Nawẹ John po whẹndo etọn po pehẹ ninọmẹ sinsinyẹn ehe gbọn? E na linlin dọmọ: “Mahopọnna dọ onú nọ ṣikọna mi, n’nọ hẹn ẹn diun dọ whẹndo mítọn ma doalọtena nuwiwa gbigbọmẹ tọn lẹ. Mí nọ yì opli lẹpo, nọ tindo mahẹ to lizọnyizọn lọ mẹ to sẹmẹsẹmẹ, bosọ nọ basi sinsẹ̀n-bibasi whẹndo tọn mítọn to gbesisọ mẹ, etlẹ yin to whenue e vẹawu nado wàmọ.” Na nugbo tọn, John mọdọ onú titengbe he nọ gọalọnamẹ nado doakọnna avùnnukundiọsọmẹ depope wẹ nado hẹn gbigbọnọ-yinyin mẹtọn go. Ayinamẹ tẹwẹ ewọ tindo nado na mẹhe to pipehẹ ninọmẹ whlepọn tọn lẹ? E dọmọ: “To whenue awufiẹsa tintan whenu tọn lọ ko juwayi godo, nuhe nọ gọalọnamẹ nado duto linlẹn flumẹjijẹ tọn lẹ ji wẹ huhlọn po owanyi Jehovah tọn po. Jehovah sọgan na huhlọn hiẹ lọsu, dile e na mi do.”

Po godonọnamẹ Jiwheyẹwhe tọn po, ayihaawe ma tin dọ mí sọgan doakọnna whlepọn kavi ninọmẹ sinsinyẹn he mí sọgan pehẹ todin kavi to sọgodo lẹ. Mì gbọ mí ni nọ dohia Jehovah to odẹ̀ mítọn lẹ mẹ dọ mí dejido ewọ go, bo tindo haṣinṣan pẹkipẹki hẹ hagbẹ agun mítọn tọn lẹ, bo mọaleyi sọn mẹjlọdote mẹho agun tọn lẹ tọn mẹ, bosọ zindonukọn to nuwiwa gbigbọmẹ tọn lẹ mẹ. Eyin mí wà ehe lẹpo, nuyiwa mítọn na sọgbe hẹ nuhe Paulu dọ dọmọ: “Mì tindo nuhudo akọndonanu tọn.”