Nugbo lọ Gando Jiwheyẹwhe po Klisti po Go

Nawẹ Jiwheyẹwhe Nọ Yin? Ewọ lọsu dọmọ: “Yẹn wẹ Jehovah. Yinkọ ṣie niyẹn.” (Isaia 42:8) Yinkọ Jiwheyẹwhe tọn sọawuhia nudi whla 7 000 to Biblu mẹ. Amọ́, e blawu dọ lẹdogbedevomẹtọ susu wẹ yí tẹnmẹ-yinkọ taidi “Oklunọ” do diọtẹnna yinkọ etọn to Biblu mẹ. Jiwheyẹwhe jlo dọ a ni yin họntọn etọn, enẹwutu e jlo dọ a ni “nọ dawhá ylọ oyín etọn.”—Salmu lẹ 105:1.

Tẹnmẹ-Yinkọ Jehovah Tọn Lẹ. To Biblu mẹ, tẹnmẹ-yinkọ voovo taidi “Jiwheyẹwhe,” “Ganhunupotọ,” “Mẹdatọ,” “Otọ́,” “Oklunọ,” podọ “Nupojipetọ” wẹ yin yiyizan na Jehovah. Odẹ̀ susu wẹ to Biblu mẹ, to ehe mẹ tẹnmẹ-yinkọ de he do sisi hia nọ yin yiyizan te to pọmẹ hẹ yinkọ etọn titi, Jehovah.—Daniẹli 9:4.

Be Yè Gán Mọ Ẹn Ya? Gbigbọ wẹ Jiwheyẹwhe bọ nukun ma gán mọ ẹn. (Johanu 4:24) Biblu dọ tlọlọ dọ “mẹdepope ma ko mọ Jiwheyẹwhe pọ́n.” (Johanu 1:18) Biblu dohia dọ e do numọtolanmẹ. Walọ mítọn gán hẹn ẹn blawu, kavi “hẹn homẹhun in.”—Howhinwhẹn lẹ 11:20; Salmu lẹ 78:40, 41.

Nugopipe Etọn Lẹ. Jiwheyẹwhe ma nọ homẹnukuntapọn mahopọnna akọ̀ po nuhe mẹde yin po. (Owalọ lẹ 10:34, 35) Humọ, e yin “lẹblanunọ podọ awuvẹmẹtọ, mẹhe nọ whleawu nado gblehomẹ bosọ gọ́ na owanyi nugbo po nugbo po.” (Eksọdusi 34:6, 7) Amọ́, nugopipe Jiwheyẹwhe tọn ẹnẹ delẹ wẹ tọ́nta.

Huhlọn. Na e yin “Jiwheyẹwhe Ganhunupotọ lọ” wutu, e tindo huhlọn madodogbó bo nọ hẹn opagbe etọn lẹpo di.—Jenẹsisi 17:1.

Nuyọnẹn. Nuyọnẹn Jiwheyẹwhe tọn yiaga hú mẹdepope tọn. Abajọ Biblu do dọ dọ ewọ wẹ “nuyọnẹntọ dopo lọ.”—Lomunu lẹ 16:27.

Whẹdida Dodo. Jiwheyẹwhe nọ wà nuhe sọgbe to whepoponu. “Pipé” wẹ nuyiwa etọn lẹ bọ ewọ “ma nọ dawhẹ agọ̀ gbede.”—Deutelonomi 32:4.

Owanyi. Biblu dọ dọ “Jiwheyẹwhe wẹ owanyi.” (1 Johanu 4:8) Jiwheyẹwhe ma nọ do owanyi hia poun gba, ewọ lọsu wẹ owanyi. Nuyiwa etọn lẹpo wẹ nọ do owanyi hia bo nọ hẹn ale wá na mí.

Mí Gán Jihọntọn hẹ Ewọ. Jiwheyẹwhe wẹ Otọ́ owanyinọ olọn mẹ tọn mítọn. (Matiu 6:9) Eyin mí tindo yise to ewọ mẹ, mí gán yin họntọn etọn. (Salmu lẹ 25:14) Jiwheyẹwhe tlẹ jlo dọ mí ni nọ hodẹ̀ hlan ẹn bo nọ ‘to magbọjẹ mítọn lẹpo bẹ dlan ewọ ji, na e to mítọn hòpọn kavi dọ wutu.’—1 Pita 5:7; Jakọbu 4:8.

Jesu Ma Yin Jiwheyẹwhe. Jesu gbọnvo taun, na ewọ kẹdẹ wẹ Jiwheyẹwhe dá tlọlọ. Enẹ wẹ zọ́n bọ Biblu ylọ ẹ dọ Visunnu Jiwheyẹwhe tọn. (Johanu 1:14) To whenue Jehovah dá Jesu godo, e yí viplọnji etọn ehe zan taidi “azọ́nwatọgan de” nado dá nulẹpo po mẹhe pò lẹpo po.—Howhinwhẹn lẹ 8:30, 31; Kolosinu lẹ 1:15, 16.

Jesu Klisti ma dọ gbede dọ emi yin Jiwheyẹwhe. Kakatimọ, e dọmọ: “Yẹn yin afọzedaitọ de sọn [Jiwheyẹwhe] dè . . ., podọ Ewọ wẹ do mi hlan.” (Johanu 7:29) To whenue Jesu to hodọ hẹ dopo to devi etọn lẹ mẹ, e ylọ Jehovah dọ “Otọ́ ṣie po Otọ́ mìtọn po” podọ “Jiwheyẹwhe ṣie po Jiwheyẹwhe mìtọn po.” (Johanu 20:17) To okú Jesu tọn godo, Jehovah fọ́n ẹn nado nọgbẹ̀ to olọn mẹ bo ze e do adusilọ Etọn mẹ bosọ na ẹn aṣẹpipa daho.—Matiu 28:18; Owalọ lẹ 2:32, 33.

Jesu Klisti Gán Gọalọna We Nado Yin Họntọn Jiwheyẹwhe Tọn

Jesu wá aigba ji nado plọnnu mí gando Otọ́ etọn go. Jehovah lọsu dọ gando Jesu go dọmọ: “Ehe wẹ Visunnu ṣie, mẹyiwanna lọ. Mì nọ dotoaina ẹn.” (Malku 9:7) Jesu yọ́n Jiwheyẹwhe hú mẹdevo depope. E dọmọ: “Mẹde ma yọ́n mẹhe Otọ́ lọ yin adavo Visunnu lọ po mẹdepope he Visunnu lọ jlo nado de e hia po.”—Luku 10:22.

Jesu nọ do nugopipe Jiwheyẹwhe tọn lẹ hia to gigọ́ mẹ. Jesu do nugopipe Otọ́ etọn tọn lẹ hia to gigọ́ mẹ sọmọ bo gán dọmọ: “Mẹdepope he mọ mi ko mọ Otọ́ ga.” (Johanu 14:9) Na Jesu nọ do owanyi Otọ́ etọn tọn nkọ hia to ohó po walọ po mẹ wutu, e gọalọna mẹsusu nado jihọntọn hẹ Jiwheyẹwhe. E dọmọ: “Yẹn wẹ aliho lọ, nugbo lọ po ogbẹ̀ po. Mẹdepope ma nọ wá Otọ́ dè adavo gbọn yẹn gblamẹ.” (Johanu 14:6) E sọ dọmọ: “Sinsẹ̀n-basitọ nugbo lẹ na nọ sẹ̀n Otọ́ to gbigbọ mẹ podọ to nugbo mẹ, na nugbo tọn, omẹ mọnkọtọn lẹ dín wẹ Otọ́ te nado nọ basi sinsẹ̀n hlan ẹn.” (Johanu 4:23) Etẹ nkọ! Jehovah to gbẹtọ hiẹ nkọ he jlo na yọ́n nugbo lọ gando ewọ go lẹ dín.