Jehovah Na Basi Hihọ́na We—Gbọnna?

 1. Naegbọn Jesu do biọ dọ Jehovah ni họ́ devi emitọn lẹ?

TO OZÁN godo tọn he Jesu yizan taidi gbẹtọvi de mẹ, e to nulẹnpọn do nuhahun he devi etọn lẹ na pehẹ lẹ ji. Owanyi he Jesu do na họntọn etọn lẹ whàn ẹn nado biọ to Otọ́ etọn si dọ “ni họ́ yé, na mẹylankan lọ tọn wutu.” (Joh. 17:14, 15) E yọnẹn dọ to whenue emi na ko lẹkọyi olọn mẹ godo, Satani na zindonukọn nado to awhànfun sọta mẹdepope he jlo na sẹ̀n Jehovah. Na nugbo tọn, omẹ Jehovah tọn lẹ na do hudo hihọ́ tọn.

 2. Naegbọn mí gán kudeji dọ Jehovah na sè odẹ̀ mítọn lẹ?

² Jehovah na gblọndo odẹ̀ he Jesu hò tọn, na E yiwanna Visunnu Etọn wutu. Eyin mí wà nue go mí pé nado hẹn homẹ Jehovah tọn hùn, e na yiwanna mílọsu, podọ e na sè odẹ̀ he mí nọ hò nado biọ alọgọ po hihọ́ po lẹ. Taidi Tatọ́ whẹndo tọn mẹtọnhopọntọ de, Jehovah na zindonukọn nado yí owanyi do to nukunpedo ovi etọn lẹ go. Ehe gando yinkọ etọn go tlọlọ!

 3. Naegbọn mí do hudo hihọ́-basinamẹ Jehovah tọn to egbehe?

³ Mí do hudo hihọ́-basinamẹ Jehovah tọn hugan gbede pọ́n. Satani ko yin yinyan sọn olọn mẹ, ‘bo to homẹgble daho ji.’ (Osọ. 12:12) E o kàn ayiha nado hẹn nukundiọsọmẹtọ mítọn delẹ kudeji dọ ‘sinsẹ̀nzọn wiwe basi hlan Jiwheyẹwhe’ wẹ yé te. (Joh. 16:2) Mẹdevo lẹ he ma do yise to Jiwheyẹwhe mẹ nọ dohomẹkẹn mí, na mí gbọnvona mẹhe to aihọn lọ mẹ lẹ wutu. Depope he whẹho lọ yin, mí gán deji. Etẹwutu? Na Ohó Jiwheyẹwhe tọn dọmọ: “Nugbonọ wẹ Oklunọ, podọ e na hẹn mì lodo bo nasọ basi hihọ́na mì sọn mẹylankan lọ si.” (2 Tẹs. 3:3) Nawẹ Jehovah nọ bayi hihọ́na mí gbọn? Mì gbọ mí ni dọhodo aliho awe delẹ ji.

 4. Sọgbe hẹ Efesunu lẹ 6:13-17, etẹwẹ Jehovah wleawu etọn nado bayi hihọ́na mí?

⁴ Jehovah ko wleawu gbaja de tọn na mí he gán bayi hihọ́na mí sọta mẹgbeyinyan Satani tọn lẹ. (Hia Efesunu lẹ 6:13-17.) Gbaja gbigbọmẹ tọn ehe dohuhlọn bosọ nọ wazọ́n ganji! Amọ́, e na bayi hihọ́na mí kiki eyin mí do adà gbaja lọ tọn lẹ dopodopo bo masọ de yé sẹ̀ sọn ogo. Etẹwẹ adà etọn dopodopo nọtena? Mì gbọ mí ni pọ́n.

 5. Etẹwẹ gbànnú nugbo tọn yin, podọ naegbọn mí dona blá ẹ?

⁵ Gbànnú nugbo tọn lọ nọtena nugbo he to Ohó Jiwheyẹwhe tọn Biblu mẹ lẹ. Naegbọn mí dona blá gbànnú ehe? Na Satani wẹ “otọ́ lalo tọn” wutu. (Joh. 8:44) E ko yí owhe fọtọ́n susu lẹ do dolalo, podọ e ko klọ “aigba fininọ lẹpo”! (Osọ. 12:9) Amọ́, nugbo he to Biblu mẹ lẹ nọ bayi hihọ́na mí ma nado yin yẹdoklọ. Nawẹ mí nọ blá gbànnú yẹhiadonu tọn ehe gbọn? Mí nọ wà ehe eyin mí plọn nugbo lọ gando Jehovah go bo nọ basi sinsẹ̀n hlan ẹn “to gbigbọ mẹ podọ to nugbo mẹ,” bosọ nọ yinuwa po nugbonọ-yinyin po to nulẹpo mẹ.—Joh. 4:24; Efe. 4:25; Heb. 13:18.

 6. Etẹwẹ tùnudo dodowiwa tọn yin, podọ naegbọn mí dona ze e do?

⁶ Tùnudo dodowiwa tọn nọtena nujinọtedo dodo Jehovah tọn lẹ. Naegbọn mí dona ze tùnudo ehe do? Kẹdẹdile tùnudo nọ bayi hihọ́na ahun awhànfuntọ de tọn do, tùnudo dodowiwa tọn nọ bayi hihọ́na ahun yẹhiadonu tọn mítọn kavi gbẹtọ-yinyin homẹ tọn mítọn ma nado yin hinhẹnflu po nuyiwadomẹji aihọn ehe tọn lẹ po. (Howh. 4:23) Jehovah nọ donukun dọ mí ni yiwanna emi bosọ sẹ̀n emi po ahun mítọn lẹpo po. (Mat. 22:36, 37) Enẹwutu, Satani nọ tẹnpọn nado má ahun mítọn bo nọ sisẹ́ mí nado yiwanna nue aihọn nọ zedonukọnnamẹ lẹ, yèdọ nuhe Jehovah gbẹwanna lẹ. (Jak. 4:4; 1 Joh. 2:15, 16) Podọ, eyin enẹ ma wazọ́n, e na tẹnpọn nado gbidikọna mí, na mí nido gbẹkọ nujinọtedo Jehovah tọn lẹ go.

 7. Nawẹ mí nọ ze tùnudo dodowiwa tọn do gbọn?

⁷ Mí nọ ze tùnudo dodowiwa tọn do eyin mí kẹalọyi nujinọtedo Jehovah tọn lẹ gando dagbe po oylan po go bo nọ nọgbẹ̀ sọgbe hẹ yé. (Salm. 97:10) Mẹdelẹ gán lẹndọ nujinọtedo Jehovah tọn lẹ nọ glọnalina mẹdekannujẹ mítọn. Amọ́, eyin mí doalọtena nunọwhinnusẹ́n Biblu tọn lẹ yíyí do yizan mẹ to gbẹzan mítọn mẹ, mí na taidi awhànfuntọ de he de tùnudo etọn to awhàngbenu na e lẹndọ e pẹ̀n gbau wutu. Lehe enẹ na yin nulunu do sọ! Na mẹhe yiwanna Jehovah lẹ, gbedide etọn lẹ “ma pẹnagbànmẹ,” amọ́ yé nọ whlẹn ogbẹ̀ gán wẹ.—1 Joh. 5:3.

 8. Etẹwẹ e zẹẹmẹdo nado doafọpa na afọ mítọn lẹ to awuwiwle mẹ nado lá wẹndagbe lọ?

⁸ Paulu sọ dotuhomẹna mí nado nọ doafọpa na afọ mítọn lẹ to awuwiwle mẹ nado lá wẹndagbe jijọho tọn. To hogbe devo mẹ, mí dona to gbesisọ mẹ whepoponu nado lá wẹndagbe Ahọluduta lọ tọn. To whenue mí má owẹ̀n Biblu tọn hẹ mẹdevo lẹ, yise mílọsu tọn nọ yin hinhẹn lodo. Tulinamẹnu taun wẹ e yin nado mọ lehe omẹ Jehovah tọn lẹ lẹdo aihọn pé nọ dín dotẹnmẹ lẹ nado lá wẹndagbe lọ whenue yé to azọ́nmẹ, to wehọmẹ, to aigba-denamẹ ajọwiwa tọn lẹ ji, podọ whenue yé to yẹwhehodọ sọn whédegbè jẹ whédegbè, whenue yé yì nuhọ̀ gbé, yì dla hẹnnumẹ mayisenọ lẹ pọ́n kavi to hodọ hẹ mẹyinyọnẹn yetọn he yé dukosọna lẹ, podọ etlẹ yin whenue yé yin ginglọndo whégbè na ojlẹ de. Eyin mí joawuna obu, mí na taidi awhànfuntọ de he de afọpa etọn lẹ to awhàngbenu; e na bọawu taun dọ ni gbleawu sọn afọ. Taidi kọdetọn de, alọ na yawu jẹ e go, podọ e ma na penugo bo hodo anademẹ awhàngán etọn tọn lẹ.

 9. Naegbọn mí dona hẹn awọ̀yinu daho yise tọn lọ?

⁹ Awọ̀yinu daho yise tọn lọ nọtena yise he mí tindo to Jehovah mẹ. Mí yise dọ e na hẹn opagbe etọn lẹpo di. Yise enẹ na gọalọna mí nado “ṣimiyọ́n ogá miyọ́nnọ mẹylankan lọ tọn lẹpo.” Naegbọn mí dona hẹn awọ̀yinu daho ehe? Na e nọ bayi hihọ́na mí, na nuplọnmẹ atẹṣitọ lẹ tọn nikaa yinuwado mí ji kavi na homọdọdomẹgo mẹṣankotọ lẹ tọn nikaa hẹn mí gbọjọ. Matin yise, mí ma na penugo bo nọtegli whenue mẹdevo lẹ gbidikọna mí nado gbẹkọ nujinọtedo Jehovah tọn lẹ go. To alọ devo mẹ, whedepopenu he mí yiavùnlọna yise mítọn to azọ́nmẹ kavi to wehọmẹ, awọ̀yinu mítọn wẹ mí to hinhẹn niyẹn. (1 Pita 3:15) Whedepopenu he mí gbẹ́ azọ́n he akuẹ etọn tli bo na ka yinuwado aṣa sinsẹ̀n-bibasi tọn mítọn lẹ ji de dai, awọ̀yinu mítọn hẹn wẹ mí te niyẹn. (Heb. 13:5, 6) Podọ, whedepopenu he mí sẹ̀n Jehovah mahopọnna nukundiọsọmẹ, awọ̀yinu mítọn wẹ to hihọ́-basina mí.—1 Tẹs. 2:2.

10. Etẹwẹ ogangbakun whlẹngán tọn yin, podọ naegbọn mí dona ṣinyọ́n ẹn?

¹⁰ Ogangbakun whlẹngán tọn wẹ todido he Jehovah nọ na mí—enẹ wẹ todido lọ dọ e na whlẹn mí sọn okú si bo suahọ mẹhe nọ wà ojlo etọn lẹpo. (1 Tẹs. 5:8; 1 Tim. 4:10; Titu 1:1, 2) Kẹdẹdile ogangbakun de nọ bayi hihọ́na ota awhànfuntọ de tọn do, todido whlẹngán tọn nọ bayi hihọ́na nugopipe nulẹnpọn tọn mítọn. Gbọnna? Todido enẹ nọ zọ́n bọ mí nọ ze ayiha do opagbe Jiwheyẹwhe tọn lẹ ji, podọ e nọ gọalọna mí nado wleawuna pọndohlan dagbe gando nuhahun mítọn lẹ go. Nawẹ mí nọ ṣinyọ́n ogangbakun ehe gbọn? Mí nọ wà ehe eyin nulẹnpọn mítọn lẹ nọ sọgbe hẹ linlẹn Jiwheyẹwhe tọn lẹ to whepoponu. Di apajlẹ, mí ma nọ ze todido mítọn sinai do adọkun he ma tindo jidide lẹ ji, amọ́ do Jiwheyẹwhe ji.—Salm. 26:2; 104:34; 1 Tim. 6:17.

11. Etẹwẹ ohí gbigbọ tọn yin, podọ naegbọn mí dona nọ yí i zan?

¹¹ Ohí gbigbọ tọn lọ wẹ Ohó Jiwheyẹwhe tọn Biblu. Ohí ehe dohuhlọn nado hùngona lalo wunmẹ depope bo tún mẹlẹ dote sọn kanlinmọgbenu sinsẹ̀n-nuplọnmẹ lalo po walọyizan ylankan lẹpo po tọn si. (2 Kọl. 10:4, 5; 2 Tim. 3:16, 17; Heb. 4:12) Mí nọ plọn nado yí ohí ehe zan ganji to oplọn mẹdetiti tọn whenu, podọ gbọn azọ́nplọnmẹ he titobasinanu Jiwheyẹwhe tọn nọ na mí lẹ gblamẹ. (2 Tim. 2:15) Gbọnvona gbaja ehe, Jehovah sọ nọ basi hihọ́na mí to aliho huhlọnnọ devo mẹ. Aliho tẹwẹ?

12. Onú devo tẹ sin hudo wẹ mí do, podọ etẹwutu?

¹² Awhànfuntọ numimọnọ de nọ yọnẹn dọ emi ma gán gbawhàn awhànpa daho de tọn emide ṣo; e do hudo awhànfuntọ hatọ etọn lẹ tọn. Mọdopolọ, mí ma gán gbawhàn Satani po omẹ etọn lẹ po tọn míde ṣo; mí do hudo alọgọ mẹmẹsunnu po mẹmẹyọnnu mítọn lẹ po tọn. Jehovah ko na mí “pipli mẹmẹsunnu lẹ tọn” lẹdo aihọn pé de he to gbesisọ mẹ nado gọalọna mí.—1 Pita 2:17.

13. Sọgbe hẹ Heblu lẹ 10:24, 25, ale tẹlẹ wẹ opli lẹ yìyì nọ hẹnwa na mí?

¹³ Dopo to aliho he mẹ mí nọ mọ alọgọ yí te lẹ mẹ wẹ gbọn opli mítọn lẹ yìyì dali. (Hia Heblu lẹ 10:24, 25.) Eyin mí gbọjọ, dile e nọ yindo na mímẹpo to whedelẹnu, opli lẹ gán jlọ mí dote. Gblọndo he wá sọn ahun mẹ he mẹmẹsunnu po mẹmẹyọnnu lẹ po nọ na lẹ, nọ na mí tuli. Hodidọ sinai do Biblu ji lẹ gọna nuzedonukọnnamẹ lẹ nọ hẹn gbemima mítọn nado sẹ̀n Jehovah lodo. Podọ, hodọdopọ mẹjlọdote tọn mítọn lẹ jẹnukọnna opli lẹ podọ to vivọnu yetọn nọ na mí tuli. (1 Tẹs. 5:14) Humọ, opli lẹ nọ hùn dotẹnmẹ dote na mí nado mọ ayajẹ he nọ wá sọn alọgigọna mẹdevo lẹ mẹ. (Owalọ 20:35; Lom. 1:11, 12) Opli mítọn lẹ sọ nọ gọalọna mí to aliho devo lẹ mẹ ga. Yé nọ gọalọna mí nado hẹn nugopipe yẹwhehodidọ po mẹpinplọn tọn mítọn po pọnte. Di apajlẹ, mí nọ plọn nado yí Azọ́nwanu Mẹpinplọn tọn mítọn lẹ zan po kọdetọn dagbe po. Enẹwutu, nọ wleawu ganji na opli agun tọn lẹ. To opli lẹ whenu, nọ dotoai po sọwhiwhe po. To opli lẹ godo, nọ yí azọ́nplọnmẹ he a mọyi lẹ do yizan mẹ. Gbọnmọ dali, a na lẹzun “awhànfuntọ Klisti Jesu tọn dagbe de.”—2 Tim. 2:3.

14. Alọgọ devo tẹwẹ mí sọ tindo?

¹⁴ Mí sọ do godonọnamẹ angẹli huhlọnnọ madosọha lẹ tọn. Yí nukun homẹ tọn do pọ́n nue angẹli dopo poun gán wà! (Isa. 37:36) Din, lẹnnupọndo nue awhànpa huhlọnnọ angẹli lẹ tọn de gán penugo bo wà ji. Gbẹtọ kavi aovi depope ma gán jlẹ́te hẹ awhànpa huhlọnnọ Jehovah tọn. Mẹlẹ nọ saba dọ dọ eyin Jehovah tin hẹ mí, huhlọn mítọn na hú kẹntọ lẹ tọn janwẹ, mahopọnna sọha yetọn. (Whẹ. 6:16) Lee enẹ yin nugbo do sọ! Nọ hẹn onú enẹlẹ do ayiha mẹ whenue azọ́nwatọgbẹ́, klasigbẹ́ kavi hẹnnumẹ mayisenọ de dọ kavi wà nude he hẹn we jẹflumẹ. Flindọ, a ma to awhàn ehe fùn dewe ṣo. Anademẹ Jehovah tọn hodo wẹ a te, enẹwutu e to godona we.

15. Sọgbe hẹ Isaia 54:15, 17, naegbọn mẹde ma gán penugo gbede nado bọnùdo na omẹ Jiwheyẹwhe tọn lẹ?

¹⁵ Aihọn he Satani to anadena lọ do whẹwhinwhẹ́n susu nado gbẹwanna mí. Mí nọ nọ̀ kada mlẹnmlẹn na whẹho tonudidọ tọn, podọ mí ma nọ doalọ to awhàn mẹ. Mí nọ lá oyín Jiwheyẹwhe tọn bo nọ dohia dọ Ahọluduta etọn wẹ todido dopo gee lọ na jijọho, podọ mí nọ tẹdo nujinọtedo dodo tọn etọn lẹ go. Mí nọ dohia dọ lalonọ hèelú, podọ hlọnhutọ wẹ ogán aihọn lọ tọn yin. (Joh. 8:44) Podọ, mí nọ lá dọ vasudo aihọn Satani tọn ko sẹpọ pete. Etomọṣo, Satani po omẹ etọn lẹ po ma gán bọnùdo na mí gbede. To alọ devo mẹ, mí na zindonukọn nado to Jehovah pà, bosọ nọ yí dotẹnmẹ he mí tindo lẹpo zan nado wàmọ! Mahopọnna lehe Satani dohuhlọn sọ, e ma penugo bo glọnalina owẹ̀n Ahọluduta lọ tọn nado jẹ gbẹtọ lẹ dè lẹdo aihọn pé. Eyin hihọ́-basinamẹ Jehovah tọn dẹ́n, enẹ ma gán yọnbayi.—Hia Isaia 54:15, 17.

16. Nawẹ Jehovah na whlẹn omẹ etọn lẹ to nukunbibia daho lọ whenu gbọn?

¹⁶ Etẹwẹ na jọ to madẹnmẹ? To nukunbibia daho lọ whenu, Jehovah na whlẹn mí to aliho ayidego tọn awe mẹ. Tintan, e na whlẹn devizọnwatọ nugbonọ etọn lẹ to whenue e na hẹn ahọlu aigba ji tọn lẹ nado và Babilọni Daho lọ, yèdọ bẹplidopọ sinsẹ̀n lalo lẹpo tọn sudo. (Osọ. 17:16-18; 18:2, 4) Enẹgodo, e na whlẹn omẹ etọn lẹ to whenue e na và pipotọ aihọn Satani tọn sudo to Amagẹdọni.—Osọ. 7:9, 10; 16:14, 16.

17. Ale tẹwẹ mí nọ mọyi eyin mí gbọṣi adà Jehovah tọn mẹ?

¹⁷ Eyin mí gbọṣi adà Jehovah tọn mẹ, Satani ma gán hẹn awugble tẹgbẹ tọn de wá mí ji. Na nugbo tọn, ewọ wẹ na yin vivasudo kakadoi. (Lom. 16:20) Enẹwutu, ze gbaja lọ blebu do—bo ma de e sẹ̀ sọn ogo blo! Ma tẹnpọn nado funawhàn lọ dewe ṣo blo. Nọ nọgodona mẹmẹsunnu po mẹmẹyọnnu towe lẹ po. Podọ, nọ hodo anademẹ Jehovah tọn lẹ. Eyin a wàmọ, a gán kudeji dọ Otọ́ olọn mẹ tọn towe na na we huhlọn bosọ bayi hihọ́na we.—Isa. 41:10.