Naegbọn A Dona Yí Baptẹm?

 1, 2. Etẹwẹ nọ saba jọ whenue mẹlẹ yí baptẹm, podọ etẹwẹ a dona gbadopọnna?

BE A ko mọ pipli mẹhe jlo na yí baptẹm lẹ tọn de pọ́n ya? A doayi nujikudo yetọn go whenue yé to gblọndo na na kanbiọ awe he yin kinkanse yé jẹnukọnna baptẹm yetọn lẹ. A mọdọ homẹ hagbẹ whẹndo tọn po họntọn yetọn lẹ po tọn hùn taun do yé go. Whenue baptẹm-yitọ lọ lẹ tọ́n sọn osin mẹ, a sè bọ mẹlẹ jẹ pẹ́hò ji bosọ mọ ayajẹ he sọawuhia to nukunta baptẹm-yitọ lọ lẹ tọn. To madozẹnzẹn mẹ, gbẹtọ fọtọ́n susu lẹ wẹ nọ ze afọdide enẹ to sẹmẹsẹmẹ bo nọ basi klandowiwe bosọ nọ yí baptẹm nado lẹzun Kunnudetọ Jehovah Jiwheyẹwhe tọn lẹ.

² Bọ hiẹ lo? Eyin a to nulẹnpọn do baptẹm yíyí ji, be omẹ vonọtaun de wẹ a yin to aihọn ylankan ehe mẹ, na a “to Jehovah dín” wutu. (Salm. 14:1, 2) Hosọ ehe gando gowe, vlavo a yin jọja kavi mẹho. Amọ́, míwu mẹhe ko yí baptẹm lẹ lọsu nọ jlo na hẹn gbemima mítọn nado sẹ̀n Jehovah kakadoi sinyẹn deji. Enẹwutu, gbọ mí ni gbadopọnna atọ̀n to whẹwhinwhẹ́n susu he wutu mí nọ sẹ̀n Jehovah lẹ mẹ.

 3. Naegbọn devizọnwatọ Jehovah tọn lẹ do nọ yiwanna nugbo po dodowiwa po? (Salmu lẹ 119:128, 163)

³ Jehovah degbena omẹ etọn lẹ nado “yiwanna nugbo.” (Zek. 8:19) Jesu dotuhomẹna hodotọ etọn lẹ nado doafọna dodowiwa. (Mat. 5:6) Ehe zẹẹmẹdo dọ yé dona tindo ojlo sinsinyẹn nado wà nuhe sọgbe bo yọ́n bosọ wé to nukun Jiwheyẹwhe tọn mẹ. Be a yiwanna nugbo po dodowiwa po ya? Mí kudeji dọ a yiwanna. A nọ gbẹwanna lalo po nuhe ma sọgbe bosọ ylan lẹpo po. (Hia Salmu lẹ 119:128, 163.) Mẹhe nọ dolalo to apajlẹ Satani he to gandu do aihọn ehe ji tọn hodo. (Joh. 8:44; 12:31) Dopo to yanwle Satani tọn lẹ mẹ wẹ nado kọnmasin do oyín wiwe Jehovah Jiwheyẹwhe tọn go. Sọn atẹṣiṣi Edẹni mẹ tọn whenu gbọ́n wẹ Satani ko to lalo lẹ hẹn gbayipe gando oyín Jiwheyẹwhe mítọn tọn go. E do Jehovah hia taidi Gandutọ ṣejannabinọ podọ nugbomadọtọ de he nọ tẹ̀ nudagbe lẹ gbẹtọvi lẹ. (Jen. 3:1, 4, 5) Lalo he Satani do dokọna Jehovah lẹ gbẹ́ to nuyiwado ayiha po ahun gbẹtọ lẹ tọn po ji to aliho ylankan mẹ. Whenue gbẹtọ lẹ basi dide ma nado “yiwanna nugbo,” Satani gán sisẹ́ yé nado doalọ to mawadodo po walọyizan ylankan wunmẹ lẹpo po mẹ.—Lom. 1:25-31.

 4. Nawẹ Jehovah dohia dọ emi yin “Jiwheyẹwhe nugbo tọn” gbọn? (Sọ pọ́n yẹdide lọ.)

⁴ Jehovah yin “Jiwheyẹwhe nugbo tọn,” podọ e nọ yí alọtútlú do plọn nugbo lọ mẹhe yiwanna ẹn lẹ. (Salm. 31:5) Gbọnmọ dali, e nọ gọalọna yé bọ yé nọ yin tuntundote sọn lalo Satani tọn lẹ si. Jehovah sọ nọ plọn devizọnwatọ etọn lẹ nado nọ dọ nugbo bosọ nọ wà dodo. Ehe nọ zọ́n bọ yé nọ do sisi mẹdetiti tọn jẹ obá de mẹ bosọ nọ do jijọho ahun mẹ tọn. (Howh. 13:5, 6) Be Jehovah ko wàmọ na we dile a to Biblu plọn ya? A ko plọn dọ aliho Jehovah tọn lẹ wẹ yin dagbe hugan na gbẹtọvi lẹpo, podọ na hiẹ lọsu ga. (Salm. 77:13) Enẹwutu, a jlo na nọgodona dodowiwa Jiwheyẹwhe tọn. (Mat. 6:33) A jlo na yiavùnlọna nugbo, bosọ gọalọ nado dohia dọ lalo wẹ yin owhẹ̀ he yin sisà dokọna Jehovah Jiwheyẹwhe mítọn. Nawẹ a gán wàmọ gbọn?

 5. Nawẹ a gán nọgodona nugbo po dodowiwa po gbọn?

⁵ A gán de aliho gbẹninọ tọn de nado dọ na nugbo tọn dọ: “N’gbẹ́ lalo Satani tọn lẹ dai, podọ n’tẹdo nugbo lọ go gligli. N’jlo dọ Jehovah wẹ ni yin Nupojipetọ ṣie, podọ n’jlo na wà nuhe ewọ dọ dọ e sọgbe.” Nawẹ a gán ze teninọ mọnkọ de gbọn? Dọnsẹpọ Jehovah to odẹ̀ mẹ bo klan dewe do wiwe na ẹn bosọ do klandowiwe towe hia to gbangba gbọn baptẹm yíyí dali. Owanyi tintindo na nugbo po dodowiwa po yin mẹwhinwhàn dagbe de he ji nudide lọ nado yí baptẹm dona sinai do.

 6. Sọgbe hẹ Salmu lẹ 45:4, whẹwhinwhẹ́n tẹlẹ wẹ a tindo nado yiwanna Jesu Klisti?

⁶ Naegbọn a do yiwanna Jesu Klisti? Doayi whẹwhinwhẹ́n dagbe delẹ go to Salmu lẹ 45:4 mẹ. (Hia.) Jesu yiwanna nugbo, whiwhẹ po dodowiwa po. Eyin a yiwanna nugbo po dodowiwa po, e sọgbe dọ a ni yiwanna Jesu Klisti. Lẹnnupọndo lehe Jesu yí adọgbigbo do yiavùnlọna nuhe yin nugbo bosọ sọgbe do ji. (Joh. 18:37) Amọ́, nawẹ Jesu dohia dọ emi yiwanna whiwhẹ gbọn?

 7. Etẹwẹ yinuwado ji we gando whiwhẹ Jesu tọn go?

⁷ Apajlẹ he Jesu zedai dohia dọ e yiwanna whiwhẹ. Di dohia, e nọ ze gigo lẹpo na Otọ́ etọn, e ma yin na edetiti gbede. (Malku 10:17, 18; Joh. 5:19) Numọtolanmẹ tẹwẹ a nọ do gando whiwhẹ mọnkọ go? Be e ma nọ whàn we nado yiwanna Visunnu Jiwheyẹwhe tọn bo lẹzun hodotọ etọn ya? E họnwun dọ mọwẹ wẹ yin gblọndo lọ. Naegbọn Jesu do yin whiwhẹnọ? Na e yiwanna Otọ́ etọn he yin whiwhẹnọ bosọ nọ hodo apajlẹ etọn wutu wẹ. (Salm. 18:35; Heb. 1:3) Be a ma yin whinwhàn nado yiwanna Jesu, yèdọ mẹhe nọ do jẹhẹnu Jehovah tọn lẹ hia to aliho pipé mẹ ya?

 8. Naegbọn mí do yiwanna Jesu taidi Ahọlu mítọn?

⁸ Mí yiwanna Jesu taidi Ahọlu mítọn na ewọ wẹ yin Gandutọ dagbe hugan lọ wutu. Jehovah lọsu wẹ plọnazọ́n Visunnu etọn bo de e nado dugán. (Isa. 50:4, 5) Sọ lẹnnupọndo owanyi mẹde-yido-sanvọ́ tọn he Jesu dohia ji. (Joh. 13:1) Taidi Ahọlu towe, Jesu jẹna owanyi towe to gigọ́ mẹ. E dọ dọ mẹhe yiwanna emi nugbonugbo lẹ, enẹ wẹ mẹhe e ylọdọ họntọn etọn lẹ nọ do owanyi yetọn hia gbọn tonusisena gbedide etọn lẹ dali. (Joh. 14:15; 15:14, 15) Gbégbò nankọ die nado jihọntọn hẹ Visunnu Jehovah tọn!

 9. Aliho tẹlẹ mẹ wẹ baptẹm Klistiani lẹ tọn taidi baptẹm Klisti tọn te?

⁹ Dopo to gbedide Jesu tọn lẹ mẹ biọ dọ hodotọ etọn lẹ ni yí baptẹm. (Mat. 28:19, 20) Ewọ lọsu ze apajlẹ lọ dai. Baptẹm etọn gbọnvona hodotọ etọn lẹ tọn to aliho delẹ mẹ. (Pọ́n apotin lọ “Lehe Baptẹm Jesu Tọn Gbọnvona Baptẹm Hodotọ Etọn lẹ Tọn Do.”) Amọ́ yé di yede to aliho devo lẹ mẹ. Whenue Jesu yí baptẹm, e ze ede jo nado wà ojlo Otọ́ etọn tọn. (Heb. 10:7) Mọdopolọ, hodotọ Klisti tọn lẹ nọ yí baptẹm taidi dohia gbangba tọn de dọ yé ko klan yede do wiwe na Jehovah Jiwheyẹwhe. Todin, gbẹzan yetọn nọ sinai do ojlo etọn wiwà ji, e ma yin yetọn titi. Enẹwutu, yé nọ hodo apajlẹ Ogán yetọn tọn.

10. Whẹwhinwhẹ́n tẹlẹ wutu wẹ a do yiwanna Jesu, podọ etẹwẹ owanyi enẹ dona whàn we nado wà?

¹⁰ A kẹalọyi Jesu taidi Visunnu detọ́n dopo akàn Jehovah tọn, podọ taidi Ahọlu he Jiwheyẹwhe de nado dugán do mí ji. A nọ mọ Jesu di whiwhẹnọ de he nọ hodo apajlẹ Otọ́ etọn tọn to aliho pipé mẹ. A plọn dọ e na núdùdù mẹhe huvẹ to hùhù lẹ, miọnhomẹna mẹhe gbọjọ lẹ bo tlẹ hẹnazọ̀ngbọna mẹhe to azọ̀njẹ lẹ. (Mat. 14:14-21) A ko mọ lehe e nọ deanana agun etọn do to egbehe. (Mat. 23:10) Podọ, a yọnẹn dọ taidi Ahọlu Ahọluduta Jiwheyẹwhe tọn, e nasọ wà humọ taun to sọgodo. Nawẹ a gán dohia dọ emi yiwanna ẹn gbọn? A na wàmọ eyin a nọ hodo apajlẹ etọn. (Joh. 14:21) A gán jẹ apajlẹ etọn hodo ji eyin a klan gbẹzan towe do wiwe na Jehovah bo yí baptẹm.

11. Etẹwẹ yin whẹwhinwhẹ́n titengbe he wutu a dona yí baptẹm?

¹¹ Etẹwẹ yin whẹwhinwhẹ́n titengbe hugan lọ nado yí baptẹm? Jesu de gbedide Jiwheyẹwhe tọn he klohugan lọ hia whenue e dọmọ: “Hiẹ dona yí ahun towe lẹpo, alindọn towe lẹpo, ayiha towe lẹpo, podọ huhlọn towe lẹpo do yiwanna Jehovah Jiwheyẹwhe towe.” (Malku 12:30) Be hogbe ehelẹ basi zẹẹmẹ owanyi he a tindo na Jiwheyẹwhe tọn ya?

12. Naegbọn a do yiwanna Jehovah? (Sọ pọ́n yẹdide lọ.)

¹² Whẹwhinwhẹ́n susu wẹ mí tindo nado yiwanna Jehovah. Di apajlẹ, a ko wá mọnukunnujẹemẹ dọ ewọ wẹ “asisa ogbẹ̀ tọn” podọ dọ ewọ wẹ nọ namẹ “nunina dagbe lẹpo gọna nunina pipé lẹpo.” (Salm. 36:9; Jak. 1:17) Jiwheyẹwhe alọtlútọ podọ owanyinọ mítọn dè wẹ nudagbe he a nọ duvivi etọn lẹpo nọ wá sọn.

13. Etẹwẹ zọ́n bọ ofligọ lọ do yin nunina dagbedagbe de?

¹³ Ofligọ lọ yin nunina dagbedagbe de he Jehovah na mí. Naegbọn mí gán dọ mọ? Lẹnnupọndo kanṣiṣa he tin to Jehovah po Visunnu etọn po ṣẹnṣẹn ji. Jesu dọmọ: “Otọ́ yiwanna mi” podọ “yẹn yiwanna Otọ́.” (Joh. 10:17; 14:31) Kanṣiṣa he to ṣẹnṣẹn yetọn wá sinyẹn taun dile yé topọ na owhe liva susu lẹ. (Howh. 8:22, 23, 30) Todin, lẹnnupọndo lehe e dona ko vẹawuna Jiwheyẹwhe do ji nado dike Visunnu etọn ni jiya bo kú. Jehovah yiwanna gbẹtọvi lẹ kakajẹ hiẹ lọsu ji sọmọ bọ e desọn ojlo mẹ bo yí Visunnu yiwanna etọn do sanvọ́ nado sọgan hùn dotẹnmẹ dote na we podọ na mẹdevo lẹ nado nọgbẹ̀ kakadoi. (Joh. 3:16; Gal. 2:20) Whẹwhinwhẹ́n he klo humọ devo de ma gán sọ tin nado yiwanna Jiwheyẹwhe.

14. Yanwle dagbe hugan tẹwẹ a gán doafọna to gbẹ̀mẹ?

¹⁴ Owanyi he a tindo na Jehovah siso deji dile a to nuplọn dogọ gando ewọ go. Ayihaawe ma tin dọ a jlo na dọnsẹpọ ewọ dogọ todin, podọ kakadoi. E ka gán pà we. E gbọn homẹdagbe dali na we tuli nado hẹn homẹ emitọn hùn. (Howh. 23:15, 16) A gán wàmọ e ma yin to hodidọ kẹdẹ mẹ gba, amọ́ to walọ mẹ ga. Aliho he mẹ a nọ zan gbẹzan towe te wẹ na dohia dọ a yiwanna Jehovah nugbonugbo. (1 Joh. 5:3) Yanwle dagbe hugan he a gán doafọna to gbẹzan towe mẹ niyẹn.

15. Nawẹ a gán dohia dọ emi yiwanna Jehovah gbọn?

¹⁵ Nawẹ a gán dohia dọ emi yiwanna Jehovah gbọn? Jẹnukọn whẹ́, hodẹ̀ vonọtaun de he mẹ a na klan dewe do wiwe na Jiwheyẹwhe nugbo dopo kẹdẹ lọ te. (Salm. 40:8) Enẹgodo, basi dohia gbangba tọn klandowiwe enẹ tọn gbọn baptẹm yíyí dali. Dile mí dọ do wayi to hosọ ehe mẹ, ojlẹ ayajẹ podọ ayidego tọn de wẹ enẹ na yin to gbẹzan towe mẹ. A na bẹ gbẹzan yọyọ de jẹeji, e ma yin nado nọgbẹ̀ na dewe amọ́ na Jehovah. (Lom. 14:8; 1 Pita 4:1, 2) Ehe gán taidi afọdide titengbe de, mọ wẹ e ka sọ yin. Amọ́, e nọ hùn dotẹnmẹ dote nado zan gbẹzan dagbe hugan lọ. Gbọnna?

16. Dile Salmu lẹ 41:12 dọ do, nawẹ Jehovah na suahọ mẹhe ze gbẹzan yetọn jo nado sẹ̀n ẹn lẹ gbọn?

¹⁶ Jehovah wẹ yin alọtlútọ daho hugan lọ. Mahopọnna nudepope he a na ẹn, dehe hugan mọ tlala wẹ e na do suahọ we to whelẹponu. (Malku 10:29, 30) E na na we gbẹzan dagbe hugan lọ, pekọ po kọdetọn dagbe po etlẹ yin todin to aihọn ylankan ehe mẹ. Podọ, bẹjẹeji de poun wẹ enẹ yin. Gbejizọnlin he bẹjẹeji po baptẹm towe po ma dona wá opodo. A gán to Otọ́ owanyinọ towe sẹ̀n kakadoi. Owanyi he to hiẹ po Otọ́ towe po ṣẹnṣẹn na to sinsinyẹn deji zọnmii, podọ na nugbo tọn, a na nọgbẹ̀ kakadoi taidi ewọ.—Hia Salmu lẹ 41:12.

17. Etẹwẹ a gán na Jehovah bọ ewọ ma ko tindo?

¹⁷ Whenue a ze afọdide lọ lẹ nado basi klandowiwe bo yí baptẹm, a tindo lẹblanulọkẹyi lọ nado na nuhe họakuẹ nugbonugbo de Otọ́ towe. E ko na we onú dagbe lẹpo, yèdọ ojlẹ ayajẹ tọn he a ko duvivi etọn pọ́n lẹpo. Nado do pinpẹn-nutọn-yinyọnẹn hia, a gán na Mẹhe tindo olọn po aigba po nude he e ma ko tindo, enẹ wẹ sinsẹ̀nzọn mẹdezejo tọn towe he a na wà po nugbonọ-yinyin po. (Jobu 1:8; 41:11; Howh. 27:11) Be aliho dagbe hugan de sọ tin he mẹ a gán ko zan gbẹzan towe te ya? Matin ayihaawe, owanyi he a do na Jehovah yin whẹwhinhẹ́n dagbe hugan lọ nado yí baptẹm.

18. Kanbiọ tẹlẹ wẹ a gán kanse dewe?

¹⁸ Todin, etẹwẹ na yin gblọndo towe eyin yè kanse we dọ, Be a na yí baptẹm ya? Hiẹ ṣo wẹ gán na gblọndo lọ. Amọ́, e gán wà dagbe eyin a kanse dewe dọ, ‘Naegbọn n’do to gbàndọn?’ (Owalọ 8:36) Flin whẹwhinwhẹ́n atọ̀n he mí gbadopọnna lẹ. Tintan, a yiwanna nugbo po dodowiwa po. Kanse dewe dọ, ‘Be n’jlo na mọ azán lọ he gbè mẹlẹpo na nọ dọ nugbo bosọ nọ wà nuhe sọgbe ya?’ Awetọ, a yiwanna Jesu Klisti. Kanse dewe dọ, ‘Be n’jlo dọ Visunnu Jiwheyẹwhe tọn ni yin Ahọlu ṣie, podọ be n’jlo na hodo apajlẹ etọn ya?’ Atọ̀ntọ, hú popolẹpo, a yiwanna Jehovah. Kanse dewe dọ, ‘Be n’jlo na hẹn homẹ Jehovah tọn hùn gbọn sinsẹ̀n ẹn taidi Jiwheyẹwhe ṣie dali ya?’ Eyin gblọndo towe na kanbiọ enẹlẹ yin mọwẹ, naegbọn a ma nado yí baptẹm? Naegbọn a do to gbàndọn?—Owalọ 16:33.

19. Naegbọn a ma dona whleawu nado yí baptẹm? Na apajlẹ. (Johanu 4:34)

¹⁹ Eyin a to awuwhle nado yí baptẹm, lẹnnupọndo apajlẹ he Jesu na de ji. (Hia Johanu 4:34.) Doayi e go dọ Jesu yí ojlo Otọ́ etọn tọn wiwà jlẹdo núdùdù go. Etẹwutu? Núdùdù nọ wà dagbe na mí. Jesu yọnẹn dọ nuhe Jehovah biọ to mí si nado wà lẹpo wẹ yin na dagbe mítọn. Jehovah ma jlo dọ mí ni wà nudepope he na dekọtọn do awugble mẹ na mí. Be Jehovah jlo dọ a ni yí baptẹm ya? Gbau. (Owalọ 2:38) Enẹwutu, a gán kudeji dọ tonusisena gbedide lọ nado yí baptẹm na hẹn ale wá na we. Eyin a ma na whleawu nado dù núdùdù dagbe hugan de, naegbọn a na do whleawu nado yí baptẹm?

20. Etẹwẹ mí na gbadopọnna to hosọ he bọdego mẹ?

²⁰ Naegbọn a do to gbàndọn? Mẹsusu gán gblọn dọ, “N’ma ko wleawufo.” Nugbo lọ wẹ yindọ nudide lọ nado klan dewe do wiwe na Jehovah bo yí baptẹm wẹ yin nudide titengbe hugan he a na basi to gbẹ̀mẹ. Enẹwutu, na nugbo tọn e nọ biọ whenu, nulinlẹnpọn po sọwhiwhe po gọna vivẹnudido vẹkuvẹku nado wleawufo. Amọ́, eyin a do ojlo nugbonugbo nado ze afọdide enẹ, etẹwẹ a gán wà todin nado wleawudaina dewe? Mí na gbadopọnna gblọndo kanbiọ enẹ tọn to hosọ he bọdego mẹ.