Be Islaẹli Wẹ Amagẹdọni Na Bẹjẹeji sọn Ya?—Etẹ Biblu Dọ?

Biblu ma basi zẹẹmẹ Amagẹdọni tọn taidi awhàn de he na yin fùnfùn to awà aigba tọn de ji poun gba, amọ́ awhàn de wẹ he na yin fùnfùn lẹdo aihọn pé to gandudu gbẹtọvi tọn lẹpo po Jiwheyẹwhe po ṣẹnṣẹn.

“Ohó he yin gbigbọdo gbọn aovi lẹ dali. . . tọ́nyi ahọlu aigba fininọ lẹpo tọn lẹ dè, nado bẹ yé pli dopọ na awhàn azán daho Jiwheyẹwhe Ganhunupotọ lọ tọn. . . . Yé sọ bẹ yé pli dopọ do fihe nọ yin yiylọ to Heblugbe mẹ dọ Amagẹdọni.”—Osọhia 16:14, 16.

Hogbe lọ “Amagẹdọni” wá sọn hogbe Heblugbe tọn lọ Har Meghid·dohnʹ mẹ, ehe zẹẹmẹdo “Osó Mẹgido tọn.” Mẹgido yin tòdaho dopo to lẹdo Islaẹli hohowhenu tọn mẹ. Na whẹwhinwhẹ́n enẹ wutu, mẹdelẹ yise dọ Amagẹdọni na bẹjẹeji sọn Islaẹli. Amọ́, lẹdo Mẹgido kavi lẹdo devo depope to Ṣẹnṣẹn Whèzẹtẹn tọn ma klo sọmọ nado hẹn “ahọlu aigba fininọ lẹpo tọn lẹ” po awhanpa yetọn lẹ po.

Owe Osọhia tọn yin kinkan gbọn “Ohia lẹ,” kavi hogbe yẹhiadonu tọn lẹ yiyizan dali. (Osọhia 1:1) Amagẹdọni ma to alọdlẹndo awhàn he na wá aimẹ to nọtẹn jọnun de, amọ́ e to alọdlẹndo ninọmẹ lẹdo aihọn pé tọn de he whenu akọta lẹ na bẹ yede pli dopọ sọta gandudu Jiwheyẹwhe tọn.—Osọhia 19:11-16, 19-21.