Naegbọn yè do hù mẹsusu dopọ ji? Etẹwutu Jiwheyẹwhe ma do doalọtena aṣa enẹ?

Mẹhe mẹvivẹ́ de ko kudo to aliho he ylan taun mẹ lẹ wẹ nọ saba kàn kanbiọ ehelẹ sè, bọ gbọnvona dọ yé nọ jlo na mọ gblọndo na kanbiọ yetọn lẹ, yé sọ nọ dín na mọ homẹmiọnnamẹ yí. Mẹdevo lẹ mọdọ aṣa mẹsusu hùhù dopọ ji tọn wẹ yin nuyiwa kanyinylan tọn gbẹtọvi tọn he sẹhundaga hugan, podọ ehe nọ hẹn ẹn vẹawuna yé nado yí Jiwheyẹwhe sè.

Lalo: E ylan nado nọ kanse dọ: “Etẹwutu Jiwheyẹwhe do dike bọ yè hù mẹsusu dopọ ji.”

Nugbo lọ: Mẹdelẹ he tindo yise nujọnu tọn ko kanse pọ́n nuhewutu Jiwheyẹwhe do dike bọ nuylankan lẹ to jijọ. Di apajlẹ, yẹwhegán Habakuku kanse Jiwheyẹwhe dọmọ: “Naegbọn vasudo po danuwiwa po do tin to nukọnna mi? Podọ naegbọn jlẹdidọ po avùnhiho po do gbayipe?” (Habakuku 1:3) Jiwheyẹwhe ma gblewhẹdo Habakuku, kakatimọ e biọ dọ nuhe e kanse lẹ ni yin kinkandai do Biblu mẹ, na míwlẹ nido mọ hia to egbé.

Lalo: Jiwheyẹwhe ma nọ kiya eyin gbẹtọ lẹ to yaji.

Nugbo lọ: Jiwheyẹwhe gbẹwanna kanyinylan po awufiẹsa he e nọ hẹnwa lẹ po. (Howhinwhẹn lẹ 6:16-19) To ojlẹ Noa tọn mẹ, ‘e doadi na Jiwheyẹwhe to ahun etọn mẹ’ dọ danuwiwa gbayipe to aigba lọ ji. (Jenẹsisi 6:5, 6) Ayihaawe ma tin dọ homẹ nọ gble Jiwheyẹwhe taun ga nado mọdọ mẹsusu yin hùhù dopọ ji.—Malaki 3:6.

Lalo: Yasanamẹ sọn Jiwheyẹwhe dè wẹ e yin dọ Ju susu yin hùhù dopọ ji.

Nugbo lọ: Jiwheyẹwhe wẹ dike nugbo bọ Lomunu lẹ và Jelusalẹm sudo to owhe kanweko tintan whenu. (Matiu 23:37–24:2) Ṣigba, sọn whenẹnu gbọ́n jẹ egbehe, Jiwheyẹwhe masọ de akọ̀ tangan de dovo bo nọ do nukundagbe hia kavi sayana to aliho vonọtaun mẹ ba. To nukun Jiwheyẹwhe tọn mẹ, “vogbingbọn de ma tin to Ju po Glẹkinu po ṣẹnṣẹn.”—Lomunu lẹ 10:12.

Lalo: Eyin Jiwheyẹwhe owanyinọ podọ ganhunupotọ de tin dai wẹ, e ma na ko dike mẹsusu ni yin hùhù dopọ ji.

Nugbo lọ: E họnwun dọ Jiwheyẹwhe ma nọ hẹn yajiji wá mẹde ji gbede, amọ́ to whedelẹnu e nọ na dotẹnmẹ onú mọnkọ lẹ nado jọ na ojlẹ de.—Jakọbu 1:13; 5:11.

Jiwheyẹwhe dike bọ mẹsusu yin hùhù dopọ ji, na whẹwhinwhẹ́n dopolọ he wutu e jotẹnna yajiji gbẹtọvi tọn wutu, enẹ wẹ nado didẹ adọ̀n he to ote sọn ojlẹ dindẹn die de. Biblu dohia hezeheze dọ Lẹgba wẹ to anadena aihọn lọ to alọnu din, bọ e ma yin Jiwheyẹwhe. (Luku 4:1, 2, 6; Johanu 12:31) Nugbo dodonu tọn Biblu tọn awe delẹ sọgan gọalọ nado basi zẹẹmẹ nuhewutu Jiwheyẹwhe do dike bọ mẹsusu yin hùhù dopọ ji tọn.

1. Jiwheyẹwhe na gbẹtọvi lẹ mẹdekannujẹ lọ nado nọ basi nudide lẹ na yede. Jiwheyẹwhe dọna gbẹtọvi tintan lẹ, yèdọ Adam po Evi po, nuhe e to nukundo sọn yé si, amọ́ e ma hẹn yé gánnugánnu nado wà nuhe ewọ jlo. Yé desọn ojlo mẹ nado nọ basi dide nuhe yin dagbe po oylan po tọn na yede, podọ nudide ylankan yetọn—gọna nudide mọnkọ devo he gbẹtọ lẹ bayi to owhe susu gblamẹ wayi lẹ—ko hẹn kọdetọn vẹadi lẹ wá na gbẹtọvi lẹ. (Jenẹsisi 2:17; 3:6; Lomunu lẹ 5:12) Ehe sọgbe hẹ nuhe owe lọ Statement of Principles of Conservative Judaism dọ dọmọ: “Ayihaawe ma tin dọ mẹdekannujẹ nudide bibasi tọn mítọn ṣiṣizan wẹ hẹn suhugan yajiji he to aihọn lọ mẹ lẹ tọn wá.” Kakati nado gọ̀ jlọjẹ mẹdekannujẹ nudide bibasi tọn enẹ yí sọn gbẹtọvi lẹ si, Jiwheyẹwhe na yé whenu na yé ni penukundo whẹho yetọn lẹ go na yede, matin alọgọ etọn na ojlẹ de.

2. Jiwheyẹwhe do huhlọn nado vọ́ nuhe nuyiwa mẹsusu hùhù dopọ ji tọn ko hẹngble lẹpo jlado, podọ e jlo na wàmọ. Jiwheyẹwhe dopà nado vọ́ gbẹtọ livi susu he ko kú lẹ hẹngọwá ogbẹ̀, kakajẹ mẹhe ko yin hùhù dopọ ji lẹ ji. E nasọ hẹn ẹn diun dọ mẹhe jugbọn ninọmẹ ylankan mọnkọ lẹ mẹ bọ nujijọ enẹlẹ finflin gbẹ́ nọ wá dotukla lẹ ma nasọ nọ tindo numọtolanmẹ awufẹsa tọn depope ba. (Isaia 65:17; Owalọ lẹ 24:15) Mí sọgan sọalọakọ́n dọ Jiwheyẹwhe na hẹn opagbe ehelẹ di dandan, na e yiwanna gbẹtọvi lẹ jẹ mọdò wutu.—Johanu 3:16.

Susu mẹhe ko jiya yasanamẹ kavi mẹhuhu dopọ ji tọn lẹ gọna mẹhe ko jugbọn ninọmẹ mọnkọ mẹ lẹ sọgan wleawuna yise dolido bosọ duvivi ogbẹ̀ nujọnu tọn de, eyin yé mọnukunnujẹ nuhewutu Jiwheyẹwhe nọ na dotẹnmẹ nuylankan lẹ nado jọ gọna lehe ewọ to tito basi nado vọ́ nuhe enẹ ko hẹngble lẹpo jlado do mẹ.