Fie Wẹ Hùnwhẹ Halloween Tọn Wá Sọn?

Biblu ma donù Halloween go, yèdọ hùnwhẹ de he mẹsusu nọ dù to 31 octobre to whemẹwhemẹ. Amọ́, otàn Halloween tọn po aṣa hoho he mẹ e wá sọn lẹ po jẹagọdo nuplọnmẹ Biblu tọn lẹ.

To hosọ ehe mẹ

• Otàn Halloween tọn po aṣa he mẹ e wá sọn lẹ po

• Be aṣa kosi tọn he mẹ Halloween wá sọn lẹ dona nọ duahunmẹna mí wẹ ya?

• Naegbọn e do nọ yin yiylọdọ Halloween?

• Samhain: E gán yin didọ dọ, Halloween wá sọn “hùnwhẹ kosi tọn hoho he Celtes lẹ nọ dù to owhe 2 000 linlán die wayi” ehe mẹ. “Celtes lẹ yise dọ mẹkúkú lẹ nọ to sadi gbọn mẹhe togbẹ̀ lẹ ṣẹnṣẹn to ojlẹ ehe mẹ. To Samhain whenu, mẹhe togbẹ̀ lẹ gán dla mẹkúkú lẹ pọ́n.” (The World Book Encyclopedia)—Pọ́n “Naegbọn E Do Nọ Yin Yiylọdọ Halloween?”

• Nusisọ́ Halloween tọn lẹ, nuvivi lẹ, aovinuwiwa kavi aṣẹtúndomẹ: Sọgbe hẹ owe dodinnanu tọn de, Celtes delẹ nọ sọnú di mẹkúkú lẹ, na gbigbọ he to yìyì pé lẹ “nido lẹndọ yé yin dopo to yé mẹ” bosọ jo yé do. Mẹdevo lẹ nọ na nuvivi lẹ gbigbọ lẹ nado fahomẹ na yé.a

  

  To Europe hohowhenu tọn, sinsẹ̀ngán Katoliki tọn lẹ kẹalọyi aṣa kosi tọn lẹ bosọ biọ to sinsẹ̀nvi yetọn lẹ si nado nọ sọnú to aliho de mẹ bo nọ to yìyì gbọn whégbè whégbè nado biọ nunina flinflin lẹ.

• Kuvitọ lẹ, obló lẹ, kaleta wunmẹ delẹ, azétọ lẹ, po nubode lẹ po: Na ojlẹ dindẹn, onú enẹlẹ nọ saba nọ do kanṣiṣa hẹ gbigbọ aovi tọn lẹ. Owe lọ Halloween Trivia, dlẹnalọdo yé taidi “nudazi gbigbọmẹ tọn lẹ” bo dọ dọ, nudida mọnkọ lẹ nọ “tindo kanṣiṣa pẹkipẹki hẹ okú, mẹkúkú lẹ kavi obu okú tọn.”

• Miyọ́ngbán Halloween tọn lẹ: Sọgbe hẹ owe de, to Grande-Bretagne hohowhenu tọn, gbẹtọ lẹ “nọ yì sọn họndekọn jẹ họndekọn bo nọ biọ núdùdù nado hodẹ̀ na mẹkúkú lẹ,” podọ yé nọ hẹn “miyọ́ngbán Halloween tọn lẹ he nọ yin kùnkùn do wẹli yovo tọn wunmẹ de mẹ bọ vẹla he to e mẹ lẹ nọ nọtena alindọn he yin ginglọndo lẹwezomẹ lẹ.” (Halloween—From Pagan Ritual to Party Night) Owe devo lẹ dọ dọ, miyọ́ngbán lọ lẹ nọ yin yiyizan nado yàn gbigbọ ylankan lẹ. To owhe 1800 lẹ gblamẹ to Agewaji Amelika tọn, opẹ̀ lẹ wẹ nọ yin yiyizan do wẹli yovo tọn lọ lẹ tẹnmẹ, na yé tin gbọn kámẹ-gòmẹ bọ e sọ bọawu nado kùn e mẹ wutu.

Mọwẹ. Dile etlẹ yindọ mẹdelẹ nọ mọdọ nude ma ylan to e mẹ nado dù hùnwhẹ Halloween tọn, aṣa he nọ zọnpọ hẹ ẹ lẹ jẹagọdo nuplọnmẹ Biblu tọn lẹ tlọlọ. Halloween sinai do nuyise lalo gando mẹkúkú lẹ gọna gbigbọ mayinukundomọ lẹ kavi aovi lẹ go ji.

Doayi lehe wefọ he bọdego ehelẹ do nuhe Jiwheyẹwhe nọ lẹn gando nuyise he nọ zọnpọ hẹ Halloween lẹ go hia do:

• ‘Mẹdepope ma dona yin mimọ to mì mẹ he nọ kannubiọ sọn afinyọnnọ de kavi sọn oṣiọ lẹ dè.’—Deutelonomi 18:10-12.

  Zẹẹmẹ: Jiwheyẹwhe ma nọ kẹalọyi dọ mẹde ni dovivẹnu nado dọhodopọ hẹ mẹkúkú lẹ kavi tlẹ basi taidi dọ e to tintẹnpọn nado dọho hẹ yé.

• “Oṣiọ lẹ ma yọ́n nudepope.”—Yẹwhehodọtọ 9:5.

  Zẹẹmẹ: Na oṣiọ lẹ ma yọ́n nude wutu, yé ma gán dọhodopọ hẹ mẹhe togbẹ̀ lẹ.

• ‘Mì ma lẹzun mimátọ lẹ hẹ aovi lẹ blo. Mì ma sọgan to nùnù to kọfo Jehovah tọn mẹ podọ to kọfo aovi lẹ tọn mẹ.’—1 Kọlintinu lẹ 10:20, 21.

  Zẹẹmẹ: Mẹhe jlo na hẹn homẹ Jiwheyẹwhe tọn hùn lẹ dona gbẹ́ núwadopọ hẹ aovi wunmẹ lẹpo dai.

• ‘Mì nọte gligli sọta ayiha wintinwintin Lẹgba tọn lẹ; na ahididi he mí tindo yin sọta huhlọn gbigbọ ylankan tọn lẹ.’—Efesunu lẹ 6:11, 12.

  Zẹẹmẹ: Klistiani lẹ dona diọnukunsọ gbigbọ ylankan lẹ, bo ma nọ basi taidi dọ yé to hùnwhẹ lẹ dù dopọ hẹ yé.