Be Yọnnu Yẹwhehodọtọ lẹ Tin to Kunnudetọ Jehovah Tọn lẹ mẹ Wẹ Ya?

Mọwẹ. Kunnudetọ Jehovah tọn lẹpo, ehe bẹ yọnnu livi susu lẹ hẹn wẹ yin lizọnyizọnwatọ kavi yẹwhehodọtọ. Dile Biblu ko dọdai do, “yọnnusi he to owẹ̀n lọ lá lẹ wẹ agun daho de.”—Psalm 68:11.

Yọnnu Kunnudetọ Jehovah tọn lẹ nọ hodo apajlẹ yọnnu he yin nùdego to Biblu mẹ lẹ tọn. (Howhinwhẹn lẹ 31:10-31) Mahopọnna dọ yé ma nọ wà azọ́n anadenanutọ tọn to agun lẹ mẹ, yé nọ dọyẹwheho taun. Yé sọ nọ plọn nunọwhinnusẹ́n Biblu tọn lẹ ovi yetọn lẹ. (Howhinwhẹn lẹ 1:8) Gbọn hodidọ po walọ yetọn lẹ po gblamẹ, yọnnu Kunnudetọ lẹ nọ dovivẹnu nado yinuwado mẹdevo lẹ ji to aliho dagbe mẹ.—Titu 2:3-5.