Nawẹ N’Gán Lẹzun Kunnudetọ Jehovah Tọn Gbọn?

To Matiu 28:19, 20 mẹ, Jesu slẹ afọdide he dona yin zize nado lẹzun dopo to Kunnudetọ Jehovah tọn lẹ mẹ. Wefọ enẹlẹ dọ nuhe mẹde dona wà nado lẹzun devi Klisti tọn, ehe bẹ hodidọ kavi kunnudide gando Jehovah go hẹn.

Afọdide 1: Plọn nuhe to Biblu mẹ lẹ. Jesu na anademẹ hodotọ etọn lẹ nado nọ “hẹn gbẹtọ lẹ . . . zun devi lẹ . . . bo nọ plọn yé.” (Matiu 28:19, 20) To paa mẹ, hogbe lọ he yin lilẹdo “devi” zẹẹmẹdo “nuplọntọ.” Biblu, titengbe nuplọnmẹ Jesu Klisti tọn he to e mẹ lẹ, bẹ nudọnamẹ he a tindo nuhudo etọn nado tindo ayajẹ nujọnu tọn to gbẹ̀mẹ lẹ hẹn. (2 Timoti 3:16, 17) Homẹ mítọn na hùn nado plọn we nuhe to Biblu mẹ lẹ gbọn tito plọnmẹ Biblu vọnu tọn mítọn dali.​—Matiu 10:7, 8; 1 Tẹsalonikanu lẹ 2:13.

Afọdide 2tọ: Wanu sọgbe hẹ nuhe a plọn lẹ. Jesu dọ dọ mẹhe plọnnu lẹ sọ dona nọ ‘payi nuhe emi ko degbe etọn lẹpo go.’ (Matiu 28:20) Ehe zẹẹmẹdo dọ Biblu pinplọn bẹ nususu hẹn hú tito nupinplọn tọn de poun​—e sọgan biọ dọ a ni basi vọjlado ayidego tọn lẹ to nulẹnpọn po walọ towe lẹ po mẹ. (Owalọ lẹ 10:42; Efesunu lẹ 4:22-29; Heblu lẹ 10:24, 25) Mẹhe nọ payi gbedide Jesu tọn go lẹ nọ yin whinwhàn nado basi nudide mẹdetiti tọn nado hodo e bo nọ klan gbẹzan yetọn do wiwe na Jehovah Jiwheyẹwhe.​—Matiu 16:24.

Afọdide 3tọ: Yí baptẹm (Matiu 28:19) Biblu yí baptẹm jlẹdo okú go. (Yijlẹdo Lomunu lẹ 6:2-4 go.) Afọdide ehe zize nọ dohia dọ yè kú na nuhe dù ogbẹ̀ hoho mẹtọn bo bẹ ogbẹ̀ yọyọ de jẹeji. Enẹwutu, baptẹm yíyí towe yin dohia gbangba tọn dọ a ko ze afọdide awe tintan he go Jesu donù lẹ bo to bibiọ dọ Jiwheyẹwhe ni na we ayihadawhẹnamẹnu wiwe de.​—Heblu lẹ 9:14; 1 Pita 3:21.

Dọho hẹ mẹho agun tọn lẹ. Yé na dọhodopọ hẹ we nado hẹn diun dọ a yọ́n nuhe afọdide enẹ zẹẹmẹdo, dọ a nọ yí nuhe a plọn lẹ do yizan mẹ, podọ a ko desọn ojlo mẹ bo klan dewe do wiwe na Jiwheyẹwhe.​—Owalọ lẹ 20:28; 1 Pita 5:1-3.

Mọwẹ. Mí nọ plọn ovi mítọn lẹ whẹ́n “to mẹplọnlọ po tudohomẹnamẹ Jehovah tọn po mẹ,” kẹdẹdile Biblu degbe etọn do. (Efesunu lẹ 6:4) Etomọṣo, dile yé to whinwhẹ́n, yé dona basi nudide mẹdetiti tọn nado plọn Biblu, kẹalọyi nuhe e plọnmẹ lẹ bosọ yí yé do yizan mẹ whẹpo do pegan na baptẹm. (Lomunu lẹ 12:2) To popolẹpo mẹ, mẹdopodopo wẹ dona basi nudide na ede gando sinsẹ̀n-bibasi go.​—Lomunu lẹ 14:12; Galatianu lẹ 6:5.