Ogbẹ̀ to Aihọn Yọyọ Jijọho Tọn de Mẹ

Whenuena hiẹ pọn yẹdide he tin to alọnuwe ehe ji lọ, numọtolanmẹ tẹlẹ wẹ hiẹ tindo? Be ahun towe ma tindo ojlo sinsinyẹn na jijọho, ayajẹ, po blẹomẹninọ he yin mimọ to finẹ po? Na nugbo tọn mọwẹ. Ṣigba be odlọ de poun wẹ e yin, kavi nulinlẹn ayiha mẹ tọn de poun, nado yise dọ ninọmẹ ehlẹ na wá tin to aigba ji gbede ya?

Vlavo gbẹtọ susu lẹ sọgan lẹn mọ. Nujijọ nugbo egbe tọn lẹ yin awhan, osẹ́nmẹjijẹ, huvẹ, azọ̀n, yọnhopipo—nado donù kleun de go poun. Etomọṣo whẹwhinwhẹn tin na todido. To sọgodo pọndohlan, Biblu dọ dọ “di opagbe [Jiwheyẹwhe tọn], míwlẹ to nukundo olọn yọyọ lẹ po aigba yọyọ de po, ofi he dódó nọnọ̀.”—2 Pita 3:13; Isaia 65:17.

“Olọn yọyọ lẹ” po “aigba yọyọ” po ehelẹ sọgbe hẹ Biblu, ma yin olọn agbasanu tọn yọyọ lẹ kavi aigba lọsu yọyọ de gba. Aigba po olọn agbasanu tọn lẹ po ko yin bibasi to pipe mẹ, podọ Biblu dohia dọ ye na tin to aimẹ kakadoi. (Psalm 89:36, 37; 104:5) “Aigba yọyọ” lọ na yin ogbẹ́ dódó tọn gbẹtọ he to gbẹ̀nọ to aigba ji lẹ tọn de, podọ “olọn yọyọ lẹ” na yin ahọluduta pipe olọn mẹ tọn de, kavi gandudu, he na dugan do ogbẹ́ gbẹtọ aigba ji tọn ehe ji. Ṣigba be e sọgbe hẹ lẹnpọn dagbe nado yise dọ “aigba yọyọ de,” kavi aihọn yọyọ gigonọ de na yọnbasi?

Eyọn, lẹnnupọn do nugbo lọ ji dọ ninọmẹ mọnkọtọn lẹ ko yin apadewhe lẹndai dowhenu tọn Jiwheyẹwhe tọn na aigba ehe. Ewọ dotẹn na gbẹtọ asu po asi po tintan lọ do Paladisi aigba ji tọn he yin Edẹni tọn mẹ bo na ye azọndenamẹ jiawu de: “Mì yin sinsẹ́nnọ, bo sudeji, bo sọ gọ aigba ji, bo dugan do e ji.” (Gẹnẹsisi 1:28) Mọwẹ, lẹndai Jiwheyẹwhe tọn wẹ ko yin dọ ye ni tindo ovi lẹ podọ to nukọnmẹ nado hẹn Paladisi yetọn gbayipe to aigba lọ pete ji. Dile etlẹ yindọ ye wá basi nudide to godomẹ nado vẹtoli na Jiwheyẹwhe, bo gbọn mọ dali do dohia dọ ye ma jẹ nado nọgbẹ̀ kakadoi, lẹndai dowhenu tọn Jiwheyẹwhe tọn ma ko diọ gba. Podọ e dona yin hinhẹndi to aihọn yọyọ de mẹ!—Isaia 55:11.

Na nugbo tọn, whenuena hiẹ hodẹ̀ Oklunọ tọn lọ, kavi Otọ́ Mítọn lọ, bo to bibiọ dọ Ahọluduta Jiwheyẹwhe tọn ni wá, hiẹ to dẹ̀ho na gandudu etọn olọn mẹ tọn ni de danuwiwà sẹ sọn aigba ji bo dugan do aihọn yọyọ ehe ji. (Matiu 6:9) Podọ mí sọgan tindo jidide dọ Jiwheyẹwhe na na gblọndo na odẹ̀ enẹ, whenuena Oho etọn dopagbe dọ: “Dodonọ wẹ na dugu aigba tọn, bo na sọ nọ nọ̀ e mẹ kakadoi.”—Psalm 37:29.

Ogbẹ̀ to Aihọn Yọyọ Jiwheyẹwhe Tọn mẹ

Ahọluduta Jiwheyẹwhe tọn na hẹn alemọyi aigba ji tọn lẹ wá zẹjlẹgo, bo to onu dagbe he Jiwheyẹwhe ko lẹndai sọn dowhenu na omẹ etọn lẹ nado duvivi yetọn to aigba ji lẹpo wàdotana. Wangbẹnamẹ lẹ po linlẹn agọ vẹdomẹ lẹ po ma na sọ tin to aimẹ ba, podọ to nukọnmẹ to aigba ji mẹlẹpo na yin họntọn hlan ode awetọ. To Biblu mẹ, Jiwheyẹwhe dopagbe dọ ewọ na ‘hẹn awhan gbọ kaka jẹ aigba podo.’ “Akọta ma to na ze ohi do akọta ji ba, mọ ye ma to na plọn awhanfunfun ba.”—Psalm 46:9; Isaia 2:4.

Aigba lọ pete to nukọnmẹ na yin hinhẹnzun ninọmẹ paladisi he taidi jipa nkọ tọn de. Biblu dọmọ: “Zungbo po aigba he to atò po na jaya na ye; ozùn na jaya, bo sọ gbàsẹ́ di vovo lii. . . . Na osin na vi sọn zùngbo mẹ jẹgbonu, po asisa po to ozùn mẹ. Aigba húhú na lẹzun tandò, aigba nugblanọ na zun otọ̀ sisa.”—Isaia 35:1, 6, 7.

Whẹwhinwhẹn lẹpo na tin nado yin ayajẹnọ to Paladisi aigba ji tọn lọ mẹ. Gbẹtọ lẹ ma na sọ tin to huvẹ na whedomẹ nududu tọn gbede ba. “Aigba [lọsu] na hẹn jideji etọn wá,” wẹ Biblu dọ. (Psalm 67:6; 72:16) Mẹlẹpo na duvivi sinsẹ́n tuklajẹ yetọn titi tọn lẹ, dile na Mẹdatọ mítọn dopagbe do: “Ye na do vẹngle, bo sọ du sinsẹ́n yetọn. . . . Ye ma na do bọ mẹdevo na du.”—Isaia 65:21, 22.

To aihọn yọyọ Jiwheyẹwhe tọn mẹ, gbẹtọ ma na sọ finyọ́n yede do ohọnu ohọgbigba daho lẹ tọn mẹ gbede ba kavi do ohọ he ma sọgbe hẹ lẹnpọn dagbe bo ma yọn lẹ mẹ, na Jiwheyẹwhe ko basi lẹndai dọ: “Yé na gbá ohọ, bo sọ nọ nọ̀ ye mẹ . . . Yé ma na gbá ohọ bọ mẹdevo na nọ̀ e mẹ.” Biblu sọ dopagbe dọmọ: “Ye ma na wàzọn yaya.” (Isaia 65:21-23) Nalete gbẹtọ lẹ na tindo azọ́n sinsẹ́nnọ, pekọnọ. Ogbẹ̀ ma na ṣiapọmẹ gba.

To nukọnmẹ, Ahọluduta Jiwheyẹwhe tọn na tlẹ jla haṣinṣan jijọho tọn lẹ do he ko tin to jipa Edẹni tọn mẹ to kanlin lẹ ṣẹnṣẹn, podọ to kanlin lẹ po gbẹtọ lẹ po ṣẹnṣẹn. Biblu dọmọ: “Ohla ga na nọ nọ̀hẹ lẹngbọvu dopọ, kinnikinni ovu na mlọnai hẹ gbọgbọẹvu; oyinvu po kinnikinni po, po kanlin yìnyìn po na nọ nọ̀pọ́; yọpọvu na sọ hẹn ye dan pe.”—Isaia 11:6-9; Hosea 2:18.

Saa lẹnnupọn, to Paladisi aigba ji tọn lọ mẹ azọ̀n lẹpo po awukuzọ̀n lẹpo po ga na yin hinhẹngbọ! Oho Jiwheyẹwhe tọn hẹn mí tin to jidemẹ dọ: “Finẹnu lẹ ma to na dọmọ: ‘yẹn to azọ̀njẹ.’ ” (Isaia 33:24) “[Jiwheyẹwhe] na sọ súnsún dasin lẹpo sẹ sọn nukun yetọn mẹ; oku ma nasọ tin ba, kavi awubla, kavi avi, mọ awufiẹsa ma na tin ba: na onu tintan lẹ ko juwayì.”—Osọhia 21:4.

Lehe E Yọnbasi Na We Do

Na nugbo tọn ahun towe dona yin whinwhan gbọn opagbe Jiwheyẹwhe tọn lẹ na nuhe du ogbẹ̀ to aihọn yọyọ dódó tọn etọn mẹ. Podọ whenuena mẹdelẹ na sọgan lẹn dọ hẹndi dona mọnkọtọn lẹ tọn ko yọn gbahu hugan nado yin nugbo, ye ma yin nuhe yọn gbahu nado wá sọn alọ Mẹdatọ mítọn owanyinọ lọ tọn mẹ gba.—Psalm 145:16; Mika 4:4.

Na nugbo tọn, nubiọtomẹsi lẹ tin nado jẹ ye kọn eyin dọ mí na nọgbẹ̀ kakadoi to Paladisi he ja lọ mẹ to aigba ji. Jesu do dòdonu tọn lọ hia, to whenue e dọ to odẹ̀ mẹ hlan Jiwheyẹwhe dọmọ: “Ehe wẹ ogbẹ̀ madopodo, dọ ye ni yọn hiẹ ṣokẹdẹ Jiwheyẹwhe nugbo, podọ ewọ mẹhe hiẹ dohlan, yedọ Jesu Klisti.”—Johanu 17:3.

Enẹwutu eyin mí jlo nugbonugbo nado nọgbẹ̀ to aihọn yọyọ Jiwheyẹwhe tọn mẹ, mí dona plọn ojlo Jiwheyẹwhe tọn whẹ podọ to enẹgodo wà ẹ. Na nugbo wẹ e yin dọ: “aihọn [ehe] sọ to juju jei po wantuntun etọn po: ṣigba ewọ he to ojlo Jiwheyẹwhe tọn wà wẹ na nọte kakadoi,” nado duvivi dona lẹ tọn he na yin kinkọndomẹji dogbọn Mẹdatọ owanyinọ mítọn lọ dali kakadoi.—1 Johanu 2:17.

Adavo devo de yin didohia, owefọ Biblu tọn lẹpo wá sọn Biblu Wiwe Lọ Gun-Alada mẹ.