Weta 19
To Amagẹdọni Godo, Aigba Paladisi Tọn De
1. (a) Nukun tẹwẹ gbẹtọ susu do to Amagẹdọni pọn? (b) Etẹwẹ Biblu dọ dogbọn dali etọn?
“AMAGẸDỌNI” yin hogbe obudonamẹ de na omẹ susu. Nukọntọ aihọn tọn lẹ nọ saba dlẹnalọ dohlan ẹn di yinyọnbasi Wẹkẹ Whan III tọn de. Ṣigba, Biblu dọho Amagẹdọni tọn di otẹn lọ na awhan dódó tọn de he yin funfun gbọn Jiwheyẹwhe dali. (Osọhia 16:14, 16) Awhan Jiwheyẹwhe tọn ehe na jla aliho do na aihọn yọyọ dódó tọn de.
2. (a) Mẹnu lẹ wẹ na yin vivasudo to Amagẹdọni mẹ? (b) Enẹwutu walọyizan tẹlẹ wẹ mí na gbọn nuyọnẹn dali do gbẹdai?
2 Ma taidi awhan gbẹtọ tọn lẹ, ehe nọ hu mẹdagbe po mẹylankan lẹ po, Amagẹdọni na hù kiki mẹylankan lẹ kẹdẹ. (Psalm 92:7) Jehovah Jiwheyẹwhe wẹ na yin Whẹdatọ lọ, podọ e nasọ dè mẹdepope sẹ he gbọn jlodido dali do gbẹ́ nado setonuna osẹ́n dodo etọn lẹ. To egbehe gbẹtọ susu ma mọ nudepope he ylan to ogalilọ, ahannumu, lalodido po mẹhihodu po mẹ gba. Ṣigba na Jiwheyẹwhe tọn, onu helẹ jẹagọ. Enẹwutu to Amagẹdọni e ma na whlẹn enẹnọ he gbẹ pò to ye basi lẹ gba. (1 Kọlintinu lẹ 6:9, 10; Osọhia 21:8) Yinyọn osẹ́n Jiwheyẹwhe tọn lẹ do whẹho helẹ ji, nujọnu wẹ e yin dọ gbẹtọ lẹ he sọgan to onu ylankan mọnkọtọn lẹ basi nado diọ aliho yetọn lẹ.
3. (a) Dohlan etẹ wẹ Jesu jlẹ vivọnu aihọn ehe tọn do? (b) Etẹwẹ na jọ do Satani po aovi etọn lẹ po go? (c) Mọpẹpẹ di wefọ lẹ he tin to weda bọdego helẹ mẹ, ninọmẹ wunmẹ tẹlẹ wẹ na yin nuduvivi etọn to paladisi aigba tọn ji?
3 To Amagẹdọni godo ada aihọn ylankan ehe tọn depope ma na pò to aimẹ gba. Gbẹtọ nẹlẹ kẹdẹ he to Jiwheyẹwhe sẹ̀n wẹ na gbẹ pò to ogbẹ̀ nọ. (1 Johanu 2:17) Jesu Klisti yi ninọmẹ lọ jlẹdo azan Noa tọn gbe go. (Matiu 24:37-39; 2 Pita 3:5-7, 13; 2:5) To Amagẹdọni godo, ahọluduta Jiwheyẹwhe tọn wẹ na yin gandudu lọ kẹdẹ he na to gandu do aigba ji. Satani po aovi etọn lẹ po na ko yì. (Osọhia 20:1-3) Gbadopọnna, to weda he bọdego lẹ mẹ, delẹ to donanu lẹ mẹ he Biblu dohia dọ gbẹtọ tonusetọ lẹ na duvivi etọn.
GBẸTỌVI LẸPO TO JIJỌHO MẸ
“Na ye ji ovi de hlan mí, ye na ovisunnu de hlan mí; ahọludu na sọ tin to abọ etọn ji: ye na nọ ylọ oyin etọn dọ . . . Ahọvi Jijọho tọn. Ahọludu etọn po jijọho po ma na ponu.”—Isaia 9:6, 7.
“To azan etọn gbe wẹ dodonọ na tọnkun; podọ jijọho susu kaka osun ma nado tin ba. Ewọ na duahọlu ga sọn ohù de kọn jẹ ohù de kọn, podọ sọn Otọ̀ lọ kọn jẹ aigba podo lẹ.”—Psalm 72:7, 8.
AWHAN MA SỌ TIN BA
“Mí wa pọn azọ́n [Jehovah] tọn, hẹngble he e ko basi to aigba ji. E hẹn awhan gbọ kaka jẹ aigba podo.”—Psalm 46:8, 9.
OHỌ DAGBE LẸ PO AZỌN VIVINAMẸ PO NA OMẸ LẸPO PO
“Ye na gbá ohọ̀ bo sọ nọnọ ye mẹ . . . Ye ma na gbá ohọ bọ mẹdevo na nọ e mẹ; ye ma na do bọ mẹdevo na du . . . omẹ ṣie lẹ na dugbẹ azọ́n alọ yetọn mẹ tọn dẹn. Ye ma na wazọn yaya, ye ma na jivi na tukla; na ye wẹ okun donanọ Oklunọ [“Jehovah,” NW ] tọn, po ovi yetọn po ye po.”—Isaia 65:21-23.
SẸ́NHẸNGBA, DANUWIWA PO OYLANWIWA PO KO YÌ
“Na ye na san ylanwatọ lẹ sẹ . . . Na whenu pẹde, mẹylankan lẹ ma na tin ba: nugbo, hiẹ na yi sọwhiwhe do lẹn otẹn etọn pọn, e ma nasọ tin.”—Psalm 37:9, 10.
“Ṣigba mẹylankan lẹ wẹ ye na san sọn aihọn mẹ, sẹ́nmẹjẹtọ lẹpo wẹ ye na dọnsun sọn e mẹ.”—Howhinwhẹn lẹ 2:22.
AIGBA LẸPO ZUN PALADISI DE
Jesu dọmọ: “Hiẹ na nọ hẹ mi to paladisi.”—Luku 23:43.
“Dodonọ wẹ na dugu aigba tọn, bo nasọ nọnọ e mẹ kakadoi.”—Psalm 37:29.
ONU DAGBE SUSU LẸ NA MẸLẸPO NADO DU
“Oklunọ [“Jehovah,” NW ] awhanpa lẹ tọn na da nududu onu dojo tọn na akọta lẹpo, nududu vẹnhan tọn tọn to owha ji, onu dojo he gọ na ojo . . . to owha ji.”—Isaia 25:6.
“Gbado susugege na tin finẹ to aigba lọ ji; to aga osó lẹ ji e na yin nugọfla de.” “Whenẹnu wẹ aigba na hẹn jideji etọn wa; Jiwheyẹwhe, yedọ Jiwheyẹwhe mítọn lọsu, na dona mí.”—Psalm 72:16; 67:6.
4, 5. (a) Ninọmẹ tẹlẹ wẹ ma nasọ tin ba to paladisi aigba tọn ji? (b) Etẹwẹ gbẹtọ lẹ na penugo nado basi, ehe to ofi susu, ye ma sọgan basi to egbehe?
4 Na jide tọn hiẹ na jlo na nọ paladisi aigba tọn lọ ji ehe taidi jipa lọ he mẹ sunnu tintan lọ yin dida do. (Gẹnẹsisi 2:8; Luku 23:43) Sa ko lẹnnupọn dogbọn dali etọn—awhan ma sọ tin ba, sẹ́nhẹngba po danuwiwa po. Hiẹ sọgan zinzọnlin to fidepope to ojlẹ depope mẹ to okle kavi to zanmẹ ma tindo obu awugblenamẹ depope tọn. Na poun tọn mẹylankan lẹ ma na sọ tin ba.—Psalm 37:35-38.
5 Ehe zẹẹmẹdo dọ tonudọtọ afudutọ lẹ ma na sọ tin ba po ajọwatọ nukunkẹnnọ lẹ po nado gbidikọna gbẹtọ lẹ. Mọwẹ gbẹtọ lẹ ma na sọ yin mẹhe ye do agban pinpẹn takuẹ tọn na ba nado su na awhanfunnu awhan tọn lẹ. E ma nasọ jọ gbede ba bọ mẹdepope na tin ma tin nududu dagbe po ohọ awumiọnnamẹ tọn po na e ma tindo akuẹ yetọn wutu. Azọ́nmamọwà, akuẹzinzan he yiaga hugan po akuẹ nulẹ tọn he fọn bo to eji jẹ po ma na sọ tin ba. Tukla he nọ hẹn yajiji wa lẹ na whẹndo lẹ to egbehe ma na sọ tin ba. Mẹlẹpo wẹ na mọ azọn dagbe nado wà, podọ ye na penugo nado mọ bosọ duvivi sinsẹ́n azọn yetọn lẹ tọn.
6. (a) Azọn tẹwẹ Amagẹdọni luntọ́ntọ lẹ na wa? (b) Nawẹ Jiwheyẹwhe na dona azọn he yin wiwa gbọn?
6 Tintan whẹ, enẹnọ lẹ he lun Amagẹdọni tọn na tindo azọn hinhẹn aigba zun wiwe-ṣeke tọn bosọ dè gbajika whenu-nu ylankan ehe tọn lẹ sẹ. Podọ to whelọnu ye nasọ tindo lẹblanulọkẹyi lọ, to gandudu Ahọluduta lọ tọn glọ, nado pọgle aigba tọn bosọ diọ ẹ zun nọtẹn yọnwhanpẹ de nado nọ. Nawẹ enẹ na yin azọn ayajẹ tọn do sọ! Jiwheyẹwhe na dona nulẹpo he yin wiwa. Uwọ na na wunmẹ jẹhọn he sọgbe nado do jinu lẹ bosọ yìn kanlin lẹ, uwọ nasọ mọ dọ ehelẹ mọ hihọ yí sọn azọn lẹ si po nugbleawunamẹ lẹ po.
7. (a) Opagbe Jiwheyẹwhe tọn tẹwẹ na yin hinhẹndi? (b) Etẹwẹ Klistiani lẹ to nukundo mọpẹpẹ di opagbe Jiwheyẹwhe tọn?
7 Opagbe Mẹdatọ owanyinanọ lọ tọn ehe, dile e yin nina gbọn psalmkantọ Biblu tọn lọ gblamẹ do, na yin hinhẹndi: “Hiẹ kẹ alọ towe, bo sọ hẹnnupekọna ojlo nutẹgbẹ lẹpo tọn.” (Psalm 145:16) Mọwẹ, ojlo sọgbe he yin gbẹtọ obudisi-Jiwheyẹwhe tọ́ lẹpo tọn wẹ na mọ pekọna yi to gbesisọ mẹ. Mí ma tlẹ sọgan dọ lehe ogbẹ̀ninọ na yin onujiawu do sọ to paladisi mẹ to aigba ji. To hodidọ etọn mẹ dogbọn tito Jiwheyẹwhe tọn dali na didona gbẹtọ lẹ, apọsteli Pita wlanwe dọ: “Di opagbe [Jiwheyẹwhe tọn], míwlẹ to nukundo olọn yọyọ lẹ po aigba yọyọ de po, ofi he dodo nọnọ.”—2 Pita 3:13; Isaia 65:17; 66:22.
8. (a) Naegbọn mí ma do to olọn jọ olọn yọyọ lẹ din? (b) Etẹwẹ “olọn yọyọ lẹ”?
8 Etẹwẹ “olọn yọyọ” helẹ yin? Ye ma yin olọn jọ olọn yọyọ devo lẹ gba. Jiwheyẹwhe ko basi olọn jọ olọn he tin lẹ sọgbe to pipe mẹ, bọ ye sọ to gigo hẹnwa na ẹn. (Psalm 8:3; 19:1, 2) “Olọn yọyọ lẹ” lọ nọte na gandudu yọyọ de do aigba ji. “Olọn lẹ” todin yin gandudu lẹ he yin bibasi gbọn gbẹtọ dali. To Amagẹdọni mẹ ehelẹ na juwayi. (2 Pita 3:7) “Olọn yọyọ lẹ” he na yitẹn to ye si na yin gandudu Jiwheyẹwhe tọn olọn mẹ tọn. Ahọlu etọn na yin Jesu Klisti. Ṣigba hodotọ etọn 144 000 nugbonọ lẹ na duahọlu po e po di apadewhe “olọn yọyọ lẹ” tọn.—Osọhia 5:9, 10; 14:1, 3.
9. (a) Etẹwẹ “aigba yọyọ” lọ? (b) Etẹwẹ yin aigba lọ he na yin vivasudo?
9 Etẹ, to whelọnu lo, wẹ yin “aigba yọyọ” lọ? E ma yin planẹti yọyọ de wẹ gba. Jiwheyẹwhe ko basi planẹti Aigba ehe sọgbe na gbẹtọ nido nọ e ji, podọ ojlo etọn wẹ e yin dọ e ni nọte kakadoi. (Psalm 104:5) “Aigba yọyọ” lọ dlẹnalọ dohlan bẹplidopọ kavi ogbẹ́ gbẹtọ lẹ tọn yọyọ de. Biblu nọ saba zan hogbe lọ “aigba” to aliho mọnkọtọn mẹ. Di dohia, e dọ dọ: “Aigba lẹpo [zẹẹmẹdo, gbẹtọ lẹ] sọ yin ogbe doponọ.” (Gẹnẹsisi 11:1, NW ) “Aigba” lọ he na yin vivasudo wẹ yin gbẹtọ lọ lẹ he ko yi yede do basi apadewhe whenu-nu ylankan ehelẹ tọn. (2 Pita 3:7) “Aigba yọyọ” lọ he na nọ otẹn yetọn mẹ na yin devizọnwatọ nugbo Jiwheyẹwhe tọn lẹ he ko klan yede dovo na aihọn ehe he gọna gbẹtọ ylankan lẹ.—Johanu 17:14; 1 Johanu 2:17.
10. (a) Etẹ lẹ wẹ ye to bibẹplidopọ todin, podọ do etẹ mẹ? (b) Mọpẹpẹ di wefọ lẹ to weda bọdego helẹ mẹ, etẹwẹ na yin wiwà to paladisi aigba tọn ji he gandudu gbẹtọvi lẹ tọn ma ko penugo nado basi?
10 To alọnu din gbẹtọ lẹ sọn akọ lẹpo mẹ po akọta lẹpo po he na nọpọ do yin apadewhe “aigba yọyọ” lọ tọn wẹ yè to bibẹpli do agun Klistiani tọn mẹ. Pọninọ po jijọho po he tin to ṣẹnṣẹn yetọn po yin pọndohlan pẹvi de poun hetọn na hẹn gbẹ̀ninọ to paladisi aigba tọn ji to Amagẹdọni godo yin onuvivi mọnkọtọn de. Na nugbo tọn, ahọluduta Jiwheyẹwhe tọn na hẹnwa tintin mẹ nuhe gandudu gbẹtọ tọn depope ma tlẹ tindo nukundido nado basi. Sa ko lẹnnupọn do vude lẹ ji to donanu mọnkọtọn lẹ mẹ to weda bọdego helẹ mẹ.
MẸMẸSUNNU-YINYIN OWANYINANỌ DE HE YIN GBẸTỌVI LẸPO TỌN
“Jiwheyẹwhe ma yin mẹnukuntahopọntọ gba: ṣigba to akọta lẹpo mẹ, mẹhe dibu si i, bo wazọn dodo wẹ ye kẹalọyi to e de.”—Owalọ lẹ 10:34, 35.
“Do ayi e go! gbẹtọ susugege, he mẹdepope ma sọgan hia, sọn akọta lẹpo mẹ, sọn ohẹnnu lẹpo mẹ, sọn gbẹtọ lẹpo mẹ . . . Huvẹ ma na hu ye ba, mọ ovẹ ma na hu ye ba.”—Osọhia 7:9, 16.
JIJỌHO TO GBẸTỌ PO KANLIN LẸ PO ṢẸNṢẸN
“Ohla ga na nọ nọhẹ lẹngbọvu dopọ, kinnikinni ovu na mlọnai hẹ gbọgbọẹvu dopọ; oyinvu po kinnikinni po, po kanlin yinyin po na nọnọ pọ; yọpọvu na sọ hẹn ye dan pe.”—Isaia 11:6; Isaia 65:25.
AWUTU MA SỌ TIN BA, YỌNHOPIPO KAVI OKU
“Whenẹnu wẹ nukun nukuntọnnọ lẹ tọn na hun, otó tókunọ lẹ tọn na sọ hun. Whenẹnu wẹ potẹn na lọn di agbanlin, odẹ unbọpẹn tọn na sọ jihan.”—Isaia 35:5, 6.
“Jiwheyẹwhe lọsu nasọ nọhẹ ye. E nasọ sunsun dasin lẹpo sẹ sọn nukun yetọn mẹ; oku ma nasọ tin ba, kavi awubla, kavi avi, mọ awufiẹsa ma na tin ba: na onu tintan lẹ ko juwayi.”—Osọhia 21:3, 4.
OṢIỌ LẸ YIN HINHẸN GỌWA OGBẸ̀ MẸ
“Na ojlẹ lọ ja, to ehe mẹ omẹ he tin to yọdo oflin tọn mẹ lẹpo na se ogbe etọn, bo na tọ́njẹgbonu.”—Johanu 5:28, 29.
“Ohù hẹn oṣiọ he tin to ye mẹ lẹ jẹage. . . . Oku po kutomẹ [“olọnzomẹ,” NW ] po sọ hẹn oṣiọ he tin to ye mẹ lẹ jẹage.”—Osọhia 20:13.
11. Etẹwẹ nọ saba basi husudo na paladisi wunmẹ he gbẹtọ lẹ nọ basi todin?
11 Nawẹ e na yin onu dagbe humọ do sọ ehe paladisi enẹ to ahọluduta Jiwheyẹwhe tọn glọ na hẹnwa hugan nudepope he whenu-nu hoho ehe sọgan hẹnwa! Nugbo, gbẹtọ delẹ to egbehe ko yi fie yé nọnọ̀ do basi fie tin taidi paladisi de. Ṣigba gbẹtọ he nọ nọpọ to ofi nẹlẹ mẹ sọgan yin goyitọ po ṣejannabinọ po, bo tlẹ sọgan gbẹwanna ode awetọ yetọn. Podọ eyin e sọ ya, ye nọ jẹ awutu, poyọnho bo sọ nọ ku. Ṣigba, to Amagẹdọni godo, paladisi aigba ji tọn na tindo to e mẹ hugan ohọ̀ yọnwhanpẹ lẹ kẹdẹ, jipa lẹ po gbọjẹtẹn lẹ po.
12, 13. (a) Ninọmẹ jijọho tọn tẹlẹ wẹ na tin to Amagẹdọni godo? (b) Etẹwẹ yin nuhe jẹ nado hẹn ninọmẹ helẹ wa tintin mẹ?
12 Lẹnnupọn dogbọn dali etọn. Gbẹtọ sọn ohẹnnu lẹpo tọn po akọta lẹ tọn po na plọn nado nọ nọpọ di whẹndo dopo nọvisunnu lẹ po nọviyọnnu lẹ po tọn. Ye na yiwanna ode awetọ yetọn nugbo nugbo. Mẹdepope ma na yin ṣejannabinọ kavi he matindo homẹdagbe. Mẹde ma na gbẹwanna gbẹtọ devo na akọ etọn, wunmẹ agbasa tọn, kavi na fie e sọn wutu gba. Walọ mẹhẹngble tọn ma na sọ tin ba. Mẹlẹpo to aigba ji na yin họntọn nugbo de po kọmẹnu dagbe mẹnọzo tọn po. Na nugbo tọn, e na yin paladisi to aliho gbigbọmẹ tọn de mẹ. Be hiẹ na jlo nado nọ paladisi ehe mẹ to “olọn yọyọ lẹ” glọ?
13 To egbehe gbẹtọ lẹ nọ dọho susu dogbọn pọninọ to jijọho mẹ dali, bọ ye tlẹ sọ ze tito “Plidopọ Akọta Lẹ Tọn” de dote. Ṣogan gbẹtọ lẹ po akọta lẹ po yin kinklan to yede mẹ hugan ojlẹ devo depope tọn pọn. Etẹwẹ yin nuhudo lọ? E jẹ dọ ahun gbẹtọ lẹ tọn ni diọ. Ṣigba numayọnbasi de wẹ e yin na gandudu aihọn he tọn lẹ nado sọgan basi azọn jiawu mọnkọtọn. Ṣigba, owẹn Biblu tọn dogbọn owanyi Jiwheyẹwhe tọn dali to bibasi i.
14. Etẹwẹ to jijọ todin he dohia dọ ninọmẹ paladisi tọn helẹ na yin hinhẹndi?
14 To nupinplọn dogbọn whenu-nu yọyọ dodo tọn dali, ahun gbẹtọ susu lẹ tọn lẹ yin mẹhe yè sisẹ nado yiwanna Jiwheyẹwhe. Podọ na mọtọn wutu ye wa jẹ nuyiwa ji to aliho owanyinanọ tọn de mẹ dohlan mẹdevo lẹ, yedọ dile Jiwheyẹwhe basi do. (1 Johanu 4:9-11, 20) Ehe zẹẹmẹdo diọdo daho de to gbẹzan yetọn tọn lẹ mẹ. Susu he ko yin goyitọ lẹ po wangbẹnamẹtọ lẹ dai, di kanlin ylankan lẹ, ko gbọnmọ dali do yin whiwhẹnọ po jijọhonọ po. Taidi lẹngbọ tonusetọ lẹ, ye yin bibẹpli do lẹngbọpa Klistiani tọn mẹ.
15. (a) Bẹplidopọ Klistiani tọn awe tẹwẹ tin? (b) Mẹnu lẹ wẹ na yin omẹ tintan lẹ he na yin “aigba yọyọ” lọ?
15 Na nuhugan owhe 1 900 lẹ wẹ bẹplidopọ “lẹngbọpa pẹvi” he yin 144 000 Klistiani lẹ tọn tin te he na duahọlu po Klisti po. Kiki vude to ehelẹ mẹ wẹ po to aigba ji; susu to ye mẹ wẹ ko to gandu po Klisti po to olọn mẹ. (Luku 12:32; Osọhia 20:6) Ṣigba to ohodọ dogbọn Klistiani devo lẹ dali, Jesu dọmọ: “Yẹn sọ tindo lẹngbọ devo he ma yin apo [“lẹngbọpa pẹvi” lọ tọn] he mẹ tọn; ye wẹ yẹn ma sọgan nọ ma hẹn wa ga, ye na sọ se ogbe ṣie; apo dopo wẹ e na yin, lẹngbọhọtọ dopo.” (Johanu 10:16) “Gbẹtọ susugege” he yin “lẹngbọ devo” helẹ tọn wẹ ye to bibẹpli todin. Ye wẹ na yin omẹ tintan lẹ to “aigba yọyọ” lọ mẹ. Jehovah na họ́ ye gbọn “nukunbibia daho lọ” mẹ to vivọnu whenu-nu ylankan ehe tọn nado to ogbẹ̀ nọ zọnmi biọ aigba paladisi tọn lọ ji.—Osọhia 7:9, 10, 13-15.
16. Azọ́n jiawu tẹwẹ na hẹn pọninọ po kanlin lẹ po yin nuvivinamẹ de?
16 To Amagẹdọni godo azọn jiawu devo na sọ yidogọ ninọmẹ paladisi lọ tọn. Kanlin lẹ taidi kinnikinni lẹ, opọ lẹ, ohla lẹ po beali lẹ po, he sọgan yin owunu todin, na tin to jijọho mẹ. Nawẹ e na yin onudagbe do sọ to whelọnu nado zinzọnlin gbọn atin lẹ gblamẹ bọ kinnikinni de na wa gọna we na whenu pẹẹde to dudlu lọ mẹ, kavi vlavo to godo etọn gbọn beali daho de dali! Gbede pọn ba wẹ mẹdepope nado wa to obudi na onu gbẹte devo.
17, 18. (a) Ninọmẹ he nọ hẹnmẹ blawu tẹwẹ ma na sọ tin ba to aigba paladisi tọn lọ mẹ? (b) Naegbọn mí do sọgan tin to jide mẹ dọ agbasalilo pipe na yin nuduvivi etọn gbọn mẹlẹpo dali?
17 Ṣogan na mahopọnna lehe owhé lẹ po jipa lẹ po sọgan yọnwhanpẹ sọ, lehe gbẹtọ lẹ sọgan yin homẹdagbenọ po owanyinanọ po do sọ, kavi lehe kanlin lẹ sọgan yin họntọn do sọ, eyin mí nọ jẹazọ̀n, bo nọ poyọnho bo sọ nọ ku, awubla na gbẹ tin janwẹ. Ṣigba mẹnu wẹ sọgan hẹn agbasalilo pipe wa na mẹlẹpo? Gandudu gbẹtọ tọn lẹ ko gboawupo nado sunsun azọ̀n he nọ wọ agbasa namẹ (cancer), ahunzọn lẹ po awutu devo lẹ po sẹ. Ṣogan eyin ye tlẹ sọgan wà mọ janwẹ, doto lẹ yigbe dọ ehe ma sọgan hẹn gbẹtọ lẹ dote sọn yọnhopipo mẹ gba. Mí na gbẹ nọ poyọnho janwẹ. Eyin e ya nukun mítọn lẹ na jẹ numọ ji flifli, agbọ na pe ohú mítọn lẹ, ayu mítọn na jẹ wiwlo ji bọ e na sọ gbẹdo azọ́nwanu agbasa mítọn tọn lẹ. Oku na bọdego. E blawu!
18 To Amagẹdọni godo, to paladisi aigba tọn lọ mẹ, azọn jiawu daho de gbọn Jiwheyẹwhe dali na diọ enẹ lẹpo, na Biblu dopagbe dọ: “Finẹnu lẹ ma to na dọmọ, yẹn to azọnjẹ.” (Isaia 33:24) To whenue Jesu Klisti tin to aigba ji e do huhlọn etọn hia nado hẹn azọn wunmẹ lẹpo gbọ po manọna lẹ po, ehe nọ wa sọn ylando he mi dugu etọn sọn Adam de. (Malku 2:1-12; Matiu 15:30, 31) Yọnhopipo na yin hinhẹndote to gandudu Ahọluduta lọ glọ. Yọnhonọ lẹ na tlẹ sọ lẹzun jọja. Mọwẹ, ‘agbasalan mẹde tọn na yin jẹẹmẹ hu ovu whenu etọn tọn.’ (Job 33:25) Nawẹ e na yin onuvivi de sọ to whelọnu nado fọn to afọnnu dopodopo bosọ mọdọ a tin to wunmẹ agbasalilo he pọntehu osọ tọn!
19. Kẹntọ godo tọn tẹwẹ na yin hinhẹnzun ovọ, podọ gbọnna?
19 Na jide tọn mẹdepope ma na tin he to agbasalilo jọja tọn de mẹ to paladisi aigba tọn ji mẹ ma na jlo na ku gbede gba. Podọ mẹdepope ma na tindo nuhudo nado oku gba! Mimọ alemọyi avọsinsan ofligọ lọ tọn lẹ yi to godomẹ na wa zẹẹmẹdo nunina daho Jiwheyẹwhe tọn lọ he yin “ogbẹ̀ madopodo to Klisti Jesu Oklunọ mítọn mẹ” sin vividudu. (Lomunu lẹ 6:23) Dile na Biblu dọ do, Klisti “dona duahọlu kaka e nado zin kẹntọ lẹpo dai to afọ etọn glọ. Kẹntọ he ye na sudo gbọn godo wẹ oku.”—1 Kọlintinu lẹ 15:25, 26; Isaia 25:8.
20. Mẹnu, gbọnvona gbẹtọ lẹ he tin to ogbẹ̀ todin lẹ, wẹ na wa duvivi paladisi aigba lọ tọn, podọ nawẹ enẹ na yọnbasi gbọn?
20 Yedọ gbẹtọ he ko ku todin lẹ na duvivi paladisi aigba ji tọn lọ tọn. Ye na gọwa ogbẹ̀ mẹ! Enẹwutu, to ojlẹ lọ mẹ, kakati nido yin nulila oku tọn lẹ, finẹ wẹ linlin ayajẹ tọn lẹ na tin te dogbọn mẹhe ko yin finfọnsọnku lẹ dali. Nawẹ e na yin onujiawu do sọ nado dokuavọ na otọ́ he ko ku lẹ, onọ lẹ, ovi lẹ po omẹ yiwanna devo lẹ po sọn yọdo mẹ! Ohọ fie ye nọ sa ṣiọnuwiwa sin nulẹ te ma na tin ba, tẹpa lẹ kavi zannu yọwhé tọn lẹ po ma na pò to ai ba nado hẹn whanpẹyinyọnẹn paladisi aigba tọn lọ gble.
21. (a) Mẹnu lẹ wẹ na gọalọ nado mọdọ osẹ́n po nuplọnmẹ “olọn yọyọ lẹ” po tọn yin hihodo? (b) Nawẹ mí sọgan dohia gbọn dọ mí to jijlo “olọn yọyọ lẹ” po “aigba yọyọ” lọ po nugbo nugbo?
21 Mẹnu wẹ na dugan kavi yin anademẹtọ na nuwiwa lẹ to aigba paladisi tọn lọ mẹ? Osẹ́n lẹpo po nuplọnmẹ lẹ po na wa sọn “olọn yọyọ lọ” mẹ aga. Ṣigba to aigba ji finẹ wẹ sunnusi nugbonọ lẹ na tin te he na yin didè nado mọdọ osẹ́n helẹ po nuplọnmẹ lọ lẹ po yin nuhe yè to hihodo. Do gbẹtọ helẹ yin nukunmọnu lẹ na ahọludu olọn tọn wutu to aliho titengbe de mẹ, Biblu ylọ ye dọ “ahọvi lẹ.” (Isaia 32:1, 2; Psalm 45:16) Yedọ to agun Klistiani tọn mẹ to egbehe sunnusi lẹ yin didè gbọn gbigbọ wiwe Jiwheyẹwhe tọn dali nado penukundo bosọ deanana nuyiwa etọn lẹ. (Owalọ lẹ 20:28) To Amagẹdọni godo mí sọgan tin to jide mẹ dọ Klisti na mọdọ sunnusi he jẹ lẹ yin didè nado yin nukunnumọnu gandudu Ahọluduta lọ tọn lẹ, na to whenẹnu alọ etọn na tin talala to whẹho aigba ji tọn lẹ mẹ. Nawẹ hiẹ sọgan dohia gbọn dọ hiẹ yi awuvivi do to tenọpọn “olọn yọyọ” Jiwheyẹwhe tọn lẹ po “aigba yọyọ” po? Gbọn bibasi nuhe go a pe lẹpo nado hẹn dewe sọgbe hẹ nubiọtomẹsi lọ lẹ na gbẹ̀ninọ to whenu-nu yọyọ dodowiwa tọn lọ mẹ dali wẹ.—2 Pita 3:14.