Mẹnu lẹ Wẹ Yin Kẹntọ Jiwheyẹwhe Tọn?

Kẹntọ-gán Jiwheyẹwhe tọn wẹ Satani Lẹgba. E yin nudida gbigbọnọ de he ṣiatẹ sọta Jehovah. Satani zindonukọn nado hoavùn hẹ Jiwheyẹwhe bo fọ́n nuhahun daho dote na gbẹtọvi lẹ. Mẹylankan wẹ Satani yin. Lalonọ po mẹhutọ de po wẹ e yin.—Johanu 8:44.

Nudida gbigbọnọ devo lẹ kọnawudopọ hẹ Satani to atẹṣiṣi etọn sọta Jiwheyẹwhe mẹ. Biblu ylọ yé dọ aovi lẹ. Taidi Satani, aovi lẹ lọsu yin kẹntọ gbẹtọvi lẹ tọn. Yé nọ yiwanna nado gbleawuna gbẹtọ lẹ. (Matiu 9:32, 33; 12:22) Jehovah na và Satani po aovi etọn lẹ po sudo kakadoi. Ojlẹ gli poun de wẹ pò na yé nado fọ́n nuhahun dote na gbẹtọvi lẹ.—Osọhia 12:12.

Eyin hiẹ jlo na yin họntọn Jiwheyẹwhe tọn, hiẹ ma dona wà nuhe Satani jlo dọ hiẹ ni wà gba. Satani po aovi lẹ po gbẹwanna Jehovah. Kẹntọ Jiwheyẹwhe tọn wẹ yé yin, podọ yé jlo nado hẹn hiẹ lọsu zun kẹntọ Jiwheyẹwhe tọn. Hiẹ dona basi nudide homẹ mẹhe tọn hiẹ jlo na hẹn hùn tọn—Satani kavi Jehovah. Eyin hiẹ jlo ogbẹ̀ madopodo, hiẹ dona basi dide nado wà ojlo Jiwheyẹwhe tọn. Satani tindo ayiha oklọ tọn po aliho susu lẹ po nado klọ gbẹtọ lẹ. Ewọ ko klọ mẹsusu.—Osọhia 12:9.