Lehe Mì Sọgan Yọ́n Mẹhe Mì Na Setonuna Gbọn

E NỌ vẹawu to whedelẹnu nado yọ́n mẹhe mí dona setonuna. Otọ́ kavi onọ̀ towe sọgan dọna we nado basi nude. Ṣigba mẹplọntọ towe to wehọmẹ kavi ponọ de sọgan sọ dọna we nado wà nudevo. Eyin enẹ wá jọ, mẹnu wẹ hiẹ na setonuna?⁠—

To Weta 7tọ owe ehe tọn mẹ, mí hia Efesunu lẹ 6:1-3 to Biblu mẹ. E dọ to finẹ dọ ovi lẹ dona setonuna mẹjitọ yetọn lẹ. ‘Mì setonuna mẹjitọ mìtọn lẹ to Oklunọ mẹ,’ wẹ wefọ lọ dọ. Be a yọ́n nuhe hogbe lọ “to Oklunọ mẹ” zẹẹmẹdo ya?⁠— Mẹjitọ he nọ yinuwa to Oklunọ mẹ lẹ nọ plọn ovi yetọn lẹ nado setonuna osẹ́n Jiwheyẹwhe tọn lẹ.

Ṣigba mẹhe ko whẹ́n mẹho delẹ ma tindo yise to Jehovah mẹ. Enẹwutu, eyin dopo to yé mẹ dọna mí dọ nude ma ylan to e mẹ nado finwépọ́n to mẹtẹnpọn wehọmẹ tọn de mẹ kavi nado ze nude sọn nusatẹn de bo ma suahọ etọn, etẹwẹ mí na wà? Be e na sọgbe na ovi de nado finwépọ́n kavi fìnnú wẹ ya?⁠—

Flindọ, Ahọlu Nẹbukadnẹzali degbè to gbèdopo dọ mẹlẹpo ni litaina boṣiọ sika tọn he emi zedai lọ. Ṣigba Ṣadlaki, Mẹṣaki, po Abẹdi-nẹgo po ma litaina boṣiọ lọ gba. Be a yọ́n nuhe zọ́n bọ yé wàmọ?⁠— Na Biblu ko dọ dọ Jehovah dopokẹdẹ wẹ gbẹtọ dona sẹ̀n wutu.⁠—Eksọdusi 20:3; Matiu 4:10.

To okú Jesu tọn godo, apọsteli etọn lẹ yin hinhẹnwa whẹdatẹn Ju lẹ tọn to Tòhódọtọ Ju lẹ tọn nukọn. Kaifa heyin Yẹwhenọ Daho lọ dọ to finẹ dọmọ: “Míwlẹ ma ko kọ́ na mì susu dọ, mì sọ hà plọnmẹ to oyín [Jesu tọn] mẹ ba blo? Pọ́n, mìwlẹ yí nuplọnmẹ mìtọn do gọ́ Jelusalẹm.” Etẹwutu wẹ apọsteli lẹ ma setonuna Tòhódọtọ Ju lẹ tọn?⁠— Pita na gblọndo Kaifa do ota apọsteli lẹpo tọn mẹ dọmọ: “Míwlẹ ma hà nọ ma setonuna Jiwheyẹwhe hú gbẹtọ.”⁠—Owalọ lẹ 5:27-29.

To ojlẹ enẹ mẹ, sinsẹ̀ngán Ju lẹ tọn tindo aṣẹpipa taun. Ṣigba, gandudu Lomu tọn glọ wẹ otò yetọn tin te. Mẹhe dugán to Lomu to whenẹnu nọ yin yiylọdọ Sesali. Dile etlẹ yindọ Ju lẹ ma jlo dọ Sesali ni dugán do yé ji sọ, gandudu Lomu tọn basi onú dagbe susu na yé. Mọdopolọ, gandudu egbezangbe tọn lẹ nọ basi onú dagbe susu na tòvi yetọn lẹ. Be a yọ́n delẹ to onú dagbe he yé nọ basi na mí lẹ mẹ ya?⁠—

Togán lẹ nọ basi aliho he ji mí nọ gbọ̀n lẹ. Yé nọ suahọ na ponọ lẹ po miyọ́n-ṣitọ lẹ po nado basi hihọ́na mí. Yé sọ nọ gbá wehọmẹ lẹ na jọja lẹ bosọ nọ wleawuna nukunpedomẹgo agbasalilo tọn na yọnhonọ lẹ to fidelẹ. E nọ biọ akuẹ to togán lẹ si nado basi onú ehelẹ. Be a yọ́n fie togán lẹ nọ mọ akuẹ sọn ya?⁠— Sọn gbẹtọ lẹ dè wẹ. Akuẹ he gbẹtọ lẹ nọ sú na togán lẹ nọ yin yiylọdọ takuẹ.

To whenuena Mẹplọntọ Daho lọ to aigba ji, Ju susu ma nọ jlo na sú takuẹ yetọn lẹ hlan gandudu Lomu tọn. Enẹwutu to gbèdopo, yẹwhenọ lẹ dọna sunnu delẹ nado yì kàn kanbiọ de biọ Jesu nado tẹnpọn bo dọ̀n ẹn do nuhahun mẹ. Kanbiọ he yé kanbiọ ẹ wẹ yindọ, ‘Be e jẹ na mí nado nọ na takuẹ hlan Sesali kavi lala?’ Kanbiọ yẹdoklọmẹ tọn de wẹ ehe yin. Eyin Jesu gblọn dọ, ‘Mọwẹ, mì dona sú takuẹ lẹ,’ susu Ju lẹ tọn ma na yiwanna nuhe e dọ. Mọdopolọ, Jesu ma sọgan dọ, ‘Lala, mì ma dona sú takuẹ lẹ gba.’ Na e ma sọgbe nado dọmọ.

Enẹwutu, etẹwẹ Jesu wà? E dọna yé dọmọ: ‘Mì do akuẹ dopo hia mi.’ To whenuena yé yí ì wá na ẹn, Jesu kanbiọ yé dọmọ: ‘Yẹdide po oyín mẹnu tọn po wẹ tin to e ji?’ Gbẹtọ lẹ gblọn dọ: “Sesali tọn.” Enẹwutu Jesu dọmọ: “Mì yí nuhe yin Sesali tọn lẹ hlan Sesali, bosọ yí nuhe yin Jiwheyẹwhe tọn lẹ hlan Jiwheyẹwhe.”⁠—Luku 20:19-26.

Mẹdepope ma sọgan mọhodọ do gblọndo enẹ go gba. Eyin Sesali nọ wà onú lẹ na gbẹtọ lẹ, be e sọgbe nado yí akuẹ he Sesali ko basi do suahọ nuhe e wà lẹ tọn. Gbọnmọ dali, Jesu dohia dọ e sọgbe nado nọ sú takuẹ lẹ hlan togán lẹ na dagbe he yé to wiwà na mí.

Nugbo wẹ dọ, a ma ko whẹ́n mẹho sọmọ nado sú takuẹ gba. Ṣigba nude tin he a dona na togán lẹ. Be a yọ́n nulọ ya?⁠— Enẹwẹ tonusisena osẹ́n ahọlu lẹ tọn. Biblu dọmọ: ‘Mì setonuna aṣẹpipa daho lẹ.’ Aṣẹpipa ehelẹ yin mẹhe dugán lẹ. Enẹwutu Jiwheyẹwhe wẹ dọna mí dọ mí dona setonuna osẹ́n ahọlu tọn lẹ.⁠—Lomunu lẹ 13:1, 2.

Di apajlẹ, osẹ́n de sọgan gbẹ́ dọ wema kavi ogbó ma dona yin zizedlan aliho ji. Be hiẹ dona setonuna osẹ́n enẹ ya?⁠— Mọwẹ, Jiwheyẹwhe jlo dọ a ni setonuna ehe. Be a dona setonuna ponọ lẹ ga wẹ ya?⁠— Ahọlu wẹ nọ suahọ na ponọ lẹ nado basi hihọ́na gbẹtọ lẹ. Enẹwutu eyin mí setonuna yé, ahọlu wẹ mí to tonusena.

Enẹwutu, eyin a jlo na dasá aliho de bọ ponọ de dọna we dọ “Nọte!” etẹwẹ a dona wà?⁠— Eyin mẹdevo lẹ tlẹ gbẹ́ bo họ̀nwezun dasá aliho lọ, be hiẹ lọsu dona wàmọ wẹ ya?⁠— Lala, a dona nọte, eyin etlẹ yindọ hiẹ dopokẹdẹ wẹ pò. Jiwheyẹwhe dọ dọ a dona setonu.

Vlavo tukla de fọndote to lẹdo mìtọn mẹ, bọ ponọ de dọmọ: “Mì nọ̀ ohọ̀ mìtọn mẹ. Mì ma tọnjẹgbonu blo.” Ṣigba a sọgan to awhágbe lẹ sè hlan gbonu bọ a ma yọ́n nuhe to jijọ taun. Be a na tọnjẹgbonu nado yì pọnnu wẹ ya?⁠— Be ehe na yin tonusisena ‘aṣẹpipa daho lẹ’ ya?⁠—

To otò susu lẹ mẹ, togán lẹ sọ nọ gbá wehọmẹ lẹ, bo nọ suahọ na mẹplọntọ lẹ. Enẹwutu be a lẹndọ Jiwheyẹwhe jlo dọ hiẹ ni setonuna mẹplọntọ lẹ wẹ ya?⁠— Lẹnnupọndeji whẹ́. Ahọlu nọ suahọ na mẹplọntọ lẹ nado plọnmẹ, dile e nọ suahọ na ponọ lẹ nado basi hihọ́na gbẹtọ lẹ do. Enẹwutu tonusisena ponọ de kavi mẹplọntọ de zẹẹmẹdo tonusisena togán lẹ.

Ṣigba eyin mẹplọntọ de biọ dọ hiẹ ni basi ohia sinsẹ̀n-bibasi tọn hlan yẹdide de, etẹwẹ a na wà? Etẹwẹ a na wà to ninọmẹ enẹ mẹ?⁠— Heblunu atọ̀n lọ lẹ ma litaina boṣiọ lọ, etlẹ yin to whenuena Ahọlu Nẹbukadnẹzali lọsu dọna yé nado wàmọ. Be a flin nuhewutu yé gbẹ́ nado wàmọ ya?⁠— Na yé ma jlo na vẹtoli na Jiwheyẹwhe wutu.

Dawe whenuho-kàntọ de heyin Will Durant wlan dogbọn Klistiani owhe kanweko tintan tọn lẹ dali dọ, ‘tonusise [kavi, nugbonọ-yinyin] mlẹnmlẹn yetọn ma nọ yin hlan Sesali gba.’ Ṣigba nọ yin hlan Jehovah! Enẹwutu flindọ Jiwheyẹwhe wẹ dona tin to otẹn tintan mẹ to gbẹzan mítọn mẹ.

Mí nọ setonuna gandudu lẹ na Jiwheyẹwhe wẹ jlo dọ mí ni wàmọ. Ṣigba eyin yé biọ to mí si nado wà nuhe Jiwheyẹwhe ko gbẹ́ dọ mí ma dona wà, etẹwẹ mí dona dọ?⁠— Mí dona dọ nuhe apọsteli lẹ dọna yẹwhenọ daho lọ dọmọ: “Míwlẹ ma hà nọ ma setonuna Jiwheyẹwhe hú gbẹtọ.”⁠—Owalọ lẹ 5:29.