Fihe Mí Sọgan Mọ Homẹmiọnnamẹ Te

BE HIẸ ko tindo numimọ awubla po ṣokẹdẹ-ninọ tọn po pọ́n ya?⁠— Be a ko kanse dewe pọ́n eyin mẹdepope tlẹ yiwanna we ya?⁠— Ovi delẹ ko wàmọ. Ṣigba Jiwheyẹwhe dopagbe dọmọ: ‘Yẹn ma na wọnji gowe gba.’ (Isaia 49:15) Be enẹ ma yin homẹmiọnnamẹnu de ya?⁠— Mọwẹ, na nugbo tọn, Jehovah Jiwheyẹwhe yiwanna mí taun!

Biblu-kantọ dopo wlan dọmọ: “Whenuena otọ́ ṣie po onọ̀ ṣie po gbẹ́ mi dai, whenẹnu wẹ OKLUNỌ na dealọ yí mi.” (Psalm 27:10) Hogbe ehelẹ sọgan yin homẹmiọnnamẹ titengbe de na mí, kavi e mayin mọwẹ?⁠— Mọwẹ, Jehovah dọna mí dọmọ: ‘A dibu blo; na yẹn tin po hiẹ po . . . Yẹn na gọalọna we.’—Isaia 41:10.

Ṣigba Jehovah nọ jo Satani do to whedelẹnu nado fọ́n nuhahun lẹ dote na mí. Jehovah tlẹ nọ jo Satani do nado whlé devizọnwatọ Etọn lẹ pọ́n. Lẹgba sayana Jesu to ojlẹ de mẹ wayi sọmọ bọ Jesu dawhá hlan Jehovah dọmọ: ‘Jiwheyẹwhe ṣie, Jiwheyẹwhe ṣie, etẹwutu hiẹ gbẹ́ mi dai?’ (Matiu 27:46) Dile etlẹ yindọ Jesu to yaji, e gbẹ́ yọnẹn dọ Jehovah yiwanna emi. (Johanu 10:17) Ṣigba Jesu lọsu sọ yọnẹn ga dọ Jiwheyẹwhe nọ na dotẹnmẹ Satani nado whlé devizọnwatọ Etọn lẹ pọ́n bo tlẹ nọ sayana yé. To weta devo mẹ, mí na basi zẹẹmẹ nuhewutu Jiwheyẹwhe nọ na dotẹnmẹ Satani nado wàmọ tọn.

Whenue mí tin to ovu, mí nọ yawu dibu to whedelẹnu. Di apajlẹ, be hiẹ ko bu pọ́n ya?⁠— Be obu ma di we?⁠— Ovi susu wẹ nọ dibu. Mẹplọntọ Daho lọ pìntàn mọnkọtọn de to gbèdopo. Ṣigba to otàn lọ mẹ, e mayin ovi de wẹ bu gba. Lẹngbọ de wẹ.

Hiẹ lọsu taidi lẹngbọ de to aliho delẹ mẹ. Etẹwutu mí do dọmọ? Na lẹngbọ ma nọ klo kavi dohuhlọn sọmọ gba. Podọ mẹde wẹ dona nọ penukundo yé go bo basi hihọ́na yé. Mẹhe nọ penukundo lẹngbọ lẹ go nọ yin yiylọdọ lẹngbọhọtọ.

To otàn Jesu tọn mẹ, e dọho lẹngbọhọtọ de tọn he tindo lẹngbọ kanweko. Ṣigba dopo to lẹngbọ etọn lẹ mẹ bu. Vlavo lẹngbọ lọ sọgan ko jlo nado yì pọ́n nuhe tin to adà awetọ osó lọ tọn ji. Ṣigba to madẹnmẹ, lẹngbọ lọ danbú sọn hagbẹ etọn lẹ mẹ. Be a sọgan yí nukun homẹ tọn do pọ́n numọtolanmẹ lẹngbọ lọ tọn to whenuena e pọ́n adusi po amiyọn po bo ma mọ hagbẹ etọn depope to yakẹ ya?—

Etẹwẹ lẹngbọhọtọ lọ na basi to whenuena e doayi e go dọ dopo to lẹngbọ etọn lẹ mẹ ko bu? Be e na dọ dọ nude ma dù mi, owhẹ̀ lẹngbọ lọ tọn wẹ bo ma na dín in mọ wẹ ya? Kavi e na jo lẹngbọ 99 he pò lẹ do fihe tindo hihọ́ de bo na yì dín dopo he bu lọ pọ́n? Be lẹngbọ dopo gee na zọ́n bọ e na jẹ tukla sọmọ wẹ ya?⁠— Eyin hiẹ wẹ yin lẹngbọ he bu lọ, be a na jlo dọ lẹngbọhọtọ lọ ni dín we mọ ya?⁠—

Lẹngbọhọtọ lọ yiwanna lẹngbọ etọn lẹpo taun, gọna dehe tlẹ bu ga. Enẹwutu e jẹ dehe bu lọ dín ji. Pọ́n lehe homẹ lẹngbọ he danbú lọ tọn na hùn sọ to whenuena e mọ lẹngbọhọtọ lọ ja! Podọ Jesu dọ dọ lẹngbọhọtọ lọ jaya dọ emi mọ lẹngbọ emitọn. E jaya do dopo lọ ji hú lẹngbọ 99 he ma bu lọ lẹ. Eyọn, mẹnu wẹ taidi lẹngbọhọtọ he Jesu pìntàn etọn ehe? Mẹnu wẹ nọ penukundo mí go dile lẹngbọhọtọ enẹ basi na lẹngbọ etọn lẹ do?⁠— Jesu dọ dọ Otọ́ emitọn he to olọn mẹ wẹ nọ wàmọ. Otọ́ etọn wẹ Jehovah.

Jehovah Jiwheyẹwhe wẹ yin Lẹngbọhọtọ Daho omẹ etọn lẹ tọn. E yiwanna mẹhe nọ sẹ̀n ẹn lẹpo, gọna jọja lẹ taidi hiẹ nkọtọn. E ma nọ jlo dọ depope to mí mẹ ni yin awugblena kavi yin vivasudo gba. Na jide tọn, homẹmiọnnamẹnu de wẹ e yin nado yọnẹn dọ Jiwheyẹwhe nọ penukundo mí go taun!—Matiu 18:12-14.

Be hiẹ yise to Jehovah Jiwheyẹwhe mẹ nugbonugbo?⁠— Be hiẹ nọ pọ́n ẹn di omẹ nujọnu tọn de ya?⁠— Nugbo wẹ dọ mí ma sọgan mọ Jehovah gba. Na Gbigbọ wẹ ewọ. E tindo agbasa he ma sọgan yin mimọ po nukun mítọn lẹ po. Ṣigba e yin omẹ nujọnu tọn de, podọ e sọgan mọ mí. E nọ yọ́n whenue mí tindo nuhudo alọgọ tọn. Podọ mí sọgan dọho hẹ ẹ to odẹ̀ mẹ, kẹdẹdile mí nọ dọho hẹ gbẹtọ to aigba ji do. Jehovah jlo dọ mí ni nọ dọho hẹ emi to odẹ̀ mẹ.

Enẹwutu eyin a to awubla kavi tin to hiẹ ṣokẹdẹ, etẹwẹ a dona wà?⁠— Dọho hẹ Jehovah. Dọnsẹpọ ẹ, ewọ nasọ miọnhomẹna we bosọ gọalọna we. Flindọ Jehovah yiwanna we, etlẹ yin to whenuena hiẹ lẹndọ a to dewe ṣokẹdẹ. Gbọ mí ni ze Biblu mítọn. Hùn Psalm 23, bẹsọn wefọ 1 mí hia dọmọ: “[Jehovah] wẹ lẹngbọhọtọ ṣie; yẹn ma na gbọ̀agba. E hẹn mi mlọnai to danji fie amamú kikọ́ te; e sọ plan mi yì agbàdo osin awumiọn tọn mẹ.”

Doayi nuhe psalm-kantọ lọ yidogọ to wefọ 4tọ mẹ go dọmọ: “Eyin yẹn tlẹ to zọnlinzin gbọn agbàdo zinvlu gọ́ngọ́n tọn ṣẹnṣẹn, yẹn ma obu na di na oylan de: na hiẹ tin to dè e; aglọ towe po opò towe po, yé homẹmiọnna mi.” Mọwẹ gbẹtọ lẹ nọ gboadọ do eyin yé tindo Jehovah di Jiwheyẹwhe yetọn. Yé nọ mọ homẹmiọnnamẹ yí to whenuena yé tin to nuhahun mẹ. Be mọwẹ e te na hiẹ lọsu ya?⁠—

Dile lẹngbọhọtọ owanyinọ de nọ penukundo lẹngbọpa etọn go do, mọwẹ Jehovah nọ penukundo omẹ etọn lẹ go do. E nọ do aliho he sọgbe hia yé, bọ yé nọ yí ayajẹ do zinzọnlin to e ji. Eyin nuhahun lẹ tlẹ lẹdo yé pé, yé ma dona dibu. Lẹngbọhọtọ de nọ yí aglọpò kavi opò etọn zan nado basi hihọ́na lẹngbọ lẹ sọn alọ kanlin he sọgan gbleawuna yé lẹ tọn mẹ. Biblu dọ lehe jọja lẹngbọhọtọ Davidi basi hihọ́na lẹngbọ etọn lẹ sọn alọ kinnikinni po beali po tọn mẹ do. (1 Samuẹli 17:34-36) Podọ omẹ Jiwheyẹwhe tọn lẹ yọnẹn dọ Jehovah na basi hihọ́na yé ga. Yé sọgan gboadọ na Jiwheyẹwhe tin po yé po wutu.

Jehovah yiwanna lẹngbọ etọn lẹ taun, bo nọ penukundo yé go po awuvẹmẹ po. Biblu dọmọ: ‘Ewọ na deanana lẹngbọ etọn titi lẹ di lẹngbọhọtọ de. E nasọ yí awà etọn do bẹ lẹngbọvu lẹ pli. Bo nasọ wà dẹẹdẹ do gọalọna lẹngbọvu lẹ.’—Isaia 40:11.

Be enẹ ma hẹn we jaya nado yọnẹn dọ omẹ mọnkọtọn wẹ Jehovah yin ya?⁠— Be hiẹ jlo nado yin dopo to lẹngbọ etọn lẹ mẹ ya?⁠— Lẹngbọ lẹ nọ dotoaina ogbè lẹngbọhọtọ yetọn tọn. Yé nọ dọnsẹpọ ẹ. Enẹwutu, be hiẹ nọ dotoaina Jehovah ya?⁠— Be hiẹ nọ dọnsẹpọ ẹ ya?⁠— Eyin mọwẹ, be a ma dona dibu. Jehovah na tin hẹ we.