“Ehe Wẹ Nuhe Owanyi Jiwheyẹwhe Tọn Zẹẹmẹdo”

1, 2. Etẹwẹ whàn we nado yiwanna Jehovah Jiwheyẹwhe?

BE HIẸ yiwanna Jiwheyẹwhe ya? Eyin a ko klan gbẹzan towe do wiwe na Jehovah Jiwheyẹwhe, hiẹ na yigbe dọ mọwẹ po nujikudo po—podọ e sọgbe domọ! Jọwamọnu wẹ e yin nado yiwanna Jehovah. Na nugbo tọn, owanyi he Jiwheyẹwhe dohia mí wẹ whàn mí nado yiwanna ẹn. Biblu dọmọ: “Mí yiwanna ẹn, na ewọ [Jehovah] whẹwhẹ wẹ yiwanna mí wutu.”—1 Johanu 4:19.

² Jehovah ko ze afọdide tintan lọ nado do owanyi etọn hia mí. E wleawu aigba whanpẹnọ de tọn na mí. E nọ penukundo nuhudo agbasa tọn mítọn lẹ go. (Matiu 5:43-48) Na taun tọn, e nọ penukundo nuhudo gbigbọmẹ tọn mítọn lẹ go. E na mí Ohó etọn, Biblu. Humọ, e dotuhomẹna mí nado nọ hodẹ̀ hlan ẹn po jide po dọ ewọ na dotoai bo nasọ na mí gbigbọ wiwe etọn nado gọalọna mí. (Psalm 65:2; Luku 11:13) Hú popolẹpo, e do Ovi vivẹ hugan etọn hlan nado fli mí gọ̀ na mí nido sọgan yin tuntundote sọn ylando po okú po si. Owanyi daho nankọ die he Jehovah dohia mí!—Johanu 3:16; Lomunu lẹ 5:8.

 3. (a) Etẹwẹ yin bibiọ to mí si nado gbọṣi owanyi Jiwheyẹwhe tọn mẹ? (b) Kanbiọ titengbe tẹwẹ mí dona gbadopọnna, podọ fie wẹ mí na mọ gblọndo lọ te?

³ Jehovah jlo dọ mí ni duvivi owanyi etọn tọn kakadoi. Ṣigba vlavo mí na wàmọ kavi lala, e pò to mílọsu si. Ohó Jiwheyẹwhe tọn dotuhomẹna mí dọmọ: “Mì hẹn mìde do owanyi Jiwheyẹwhe tọn mẹ . . . to todido mẹ na ogbẹ̀ madopodo.” (Juda 21, NW ) Hogbe lọ “mì hẹn mìde” dohia dọ nado gbọṣi owanyi Jiwheyẹwhe tọn mẹ, mí dona yí nude wà. Mí dona yinuwa sọgbe hẹ owanyi he e dohia mí to aliho tangan delẹ mẹ. Enẹwutu, kanbiọ titengbe he mí dona gbadopọnna die, ‘Nawẹ n’sọgan dohia Jiwheyẹwhe gbọn dọ n’yiwanna ẹn?’ Gblọndo lọ tin to ohó gbọdo apọsteli Johanu tọn lẹ mẹ dọmọ: “Ehe wẹ nuhe owanyi Jiwheyẹwhe tọn zẹẹmẹdo, dọ, mí ni yìn gbedide etọn lẹ; ṣogan gbedide etọn lẹ ma pẹnagbanmẹ.” (1 Johanu 5:3, NW ) Mí dona gbadopọnna zẹẹmẹ hogbe ehelẹ tọn po sọwhiwhe po, na mí jlo na dohia Jiwheyẹwhe mítọn dọ mí yiwanna ẹn sisosiso.

 4, 5. Basi zẹẹmẹ lehe owanyi na Jehovah jẹ awuwle ji to ahun towe mẹ do tọn.

⁴ “Owanyi Jiwheyẹwhe tọn”—etẹwẹ apọsteli Johanu tindo to ayiha mẹ to whenuena e wlan hogbe ehelẹ? E to alọdlẹndo numọtolanmẹ sisosiso he dopodopo mítọn tindo na Jiwheyẹwhe. Be hiẹ gbẹ́ flin whenue owanyi na Jehovah jẹ awuwle ji to ahun towe mẹ ya?

⁵ Yì agbọji bo lẹnnupọndo whenue a plọn nugbo lọ gando Jehovah po lẹndai etọn lẹ po go ji to tintan whenu bọ a jẹ yise dohia ji. Hiẹ wá mọnukunnujẹemẹ dọ dile etlẹ yindọ hiẹ yin jiji taidi ylandonọ he dẹn tlala do Jiwheyẹwhe, Jehovah hùn dotẹnmẹ lọ dotena we gbọn Klisti gblamẹ nado jẹ pipé he Adam hẹnbu lọ kọ̀n bo dugu ogbẹ̀ madopodo tọn. (Matiu 20:28; Lomunu lẹ 5:12, 18) Hiẹ wá yọ́n lehe avọ́sinsan he Jehovah basi klo sọ nado do Ovi vivẹ hugan etọn hlan nado kú do ota towe mẹ. Hiẹ yin whinwhàn sọn ahun mẹ bọ a jẹ wanyina Jiwheyẹwhe he do owanyi daho mọnkọtọn hia we ji.—1 Johanu 4:9, 10.

 6. Nawẹ owanyi nujọnu tọn nọ yin didohia gbọn, podọ etẹwẹ owanyi na Jiwheyẹwhe whàn we nado wà?

⁶ Ṣigba bẹjẹeji de poun wẹ numọtolanmẹ owanyi nujọnu tọn na Jehovah enẹ yin. Owanyi ma yin numọtolanmẹ de tintindo poun; mọjanwẹ e ma yin nùmẹ-yozò de poun do niyẹn. Owanyi nujọnu tọn tintindo na Jiwheyẹwhe bẹ nususu hẹn hugan didọ poun dọ, “N’yiwanna Jehovah.” Taidi yise, owanyi nujọnu tọn nọ yin didohia gbọn nuhe e whàn mí nado wà lẹ dali. (Jakobu 2:26) Na taun tọn, mí nọ do owanyi hia gbọn wiwà nuhe na hẹn homẹhun mẹhe mí yiwanna lọ dali. Enẹwutu, to whenuena owanyi na Jehovah doadọ̀do to ahun towe mẹ, hiẹ yin whinwhàn nado zan gbẹzan he na hẹn homẹhun Otọ́ towe olọn mẹ tọn. Be Kunnudetọ he ko yí baptẹm de wẹ a yin ya? Eyin mọ wẹ, owanyi sisosiso ehe po mẹdezejo towe po hẹn we nado basi nudide titengbe hugan lọ to gbẹzan towe mẹ. Hiẹ klan dewe do wiwe na Jehovah nado wà ojlo etọn, bọ a sọ do klandowiwe towe hia gbọn baptẹm dali. (Lomunu lẹ 14:7, 8) Gbẹninọ sọgbe hẹ klandowiwe he mí basi na Jehovah ehe bẹ nuhe apọsteli Johanu dọ bọdego lẹ hẹn.

 7. Etẹwẹ yin delẹ to gbedide Jiwheyẹwhe tọn lẹ mẹ, podọ etẹwẹ gbedide ehelẹ yìnyìn bẹhẹn?

⁷ Johanu basi zẹẹmẹ nuhe owanyi Jiwheyẹwhe tọn zẹẹmẹdo tọn dọmọ: “Mí ni yìn gbedide etọn lẹ.” Etẹwẹ gbedide Jiwheyẹwhe tọn lẹ yin? Jehovah na mí gbedide tangan delẹ to Ohó etọn, Biblu mẹ. Di apajlẹ, e jẹagọdo walọ delẹ taidi ahànnumu, galilọ, boṣiọ-sinsẹ̀n, ajojijẹ, po lalodido po. (1 Kọlintinu lẹ 5:11; 6:18; 10:14; Efesunu lẹ 4:28; Kọlọsinu lẹ 3:9) Gbedide Jiwheyẹwhe tọn lẹ yìnyìn bẹ gbẹninọ sọgbe hẹ nujinọtedo walọ dagbe tọn he yin didohia hezeheze to Biblu mẹ lẹ hẹn.

 8, 9. Nawẹ mí sọgan yọ́n nuhe nọ hẹn homẹhun Jehovah gbọn etlẹ yin to ninọmẹ he mẹ Biblu ma dosẹ́n de tlọlọ te? Na apajlẹ.

⁸ Ṣigba, nado hẹn homẹhun Jehovah, mí dona wà nususu hugan tonusisena osẹ́n he yin nina tlọlọ lẹ poun. Jehovah ma dosẹ́n hẹngogo tọn lẹ nado deanana adà gbẹzan egbesọegbesọ tọn mítọn lẹpo gba. Enẹwutu, to nuyiwa egbesọegbesọ tọn mítọn lẹ mẹ, mí sọgan pehẹ ninọmẹ susu he Biblu ma dosẹ́n de tlọlọ gando yé go. To whẹho mọnkọtọn lẹ mẹ, nawẹ mí sọgan yọ́n nuhe na hẹn homẹhun Jehovah gbọn? Biblu do pọndohlan Jiwheyẹwhe tọn lẹ hia hezeheze. Dile mí to Biblu plọn, mí mọ nuhe Jehovah yiwanna bosọ gbẹwanna lẹ. (Psalm 97:10; Howhinwhẹn lẹ 6:16-19) Mí wá mọnukunnujẹ pọndohlan po nuyiwa he nọ hẹn homẹ hùn in lẹ po mẹ. Dile mí plọnnu gando jẹhẹnu po aliho Jehovah tọn lẹ po go sọ, mọ wẹ mí na penugo dogọ nado dike pọndohlan etọn ni deanana nudide mítọn lẹ do bo yinuwado walọ mítọn lẹ ji. Gbọnmọ dali, etlẹ yin to ninọmẹ he mẹ Biblu ma dosẹ́n de tlọlọ te, mí nọ saba tunwun “nuhe ojlo [Jehovah] tọn yin” go.—Efesunu lẹ 5:17.

⁹ Di apajlẹ, Biblu ma dosẹ́n tlọlọ dọ mí ma dona pọ́n sinimọto kavi tito-to-whinnu televiziọn ji tọn lẹ he nọ do danuwiwa mẹhẹnjọsi tọn kavi fẹnnuwiwa zanhẹmẹ tọn hia. Ṣigba be nugbo wẹ dọ mí do nuhudo osẹ́n de tọn tlọlọ sọta onú mọnkọtọn lẹ pinpọn ya? Mí yọ́n nukun he Jehovah nọ yí do pọ́n whẹho ehelẹ. Ohó etọn dọna mí hezeheze dọmọ: ‘Mẹhe yiwanna danuwiwa ayiha Jehovah tọn gbẹwanna.’ (Psalm 11:5) Ohó etọn sọ dọmọ: “Galọtọ po ayọdetọ lẹ po wẹ Jiwheyẹwhe na dawhẹna.” (Heblu lẹ 13:4) Gbọn nulinlẹnpọndo ohó gbọdo enẹlẹ ji dali, mí sọgan tunwun nuhe ojlo Jehovah tọn yin go hezeheze. Enẹwutu mí nọ de ma nado pọ́n yẹdide he nọ do walọ gblezọn he Jiwheyẹwhe mítọn gbẹwanna lẹ hia. Mí yọnẹn dọ homẹ Jehovah tọn nọ hùn eyin mí dapana walọ gblezọn he aihọn ehe nọ tẹnpọn nado zedonukọnna mí taidi ayidedai dagbe.a

10, 11. Naegbọn mí de nado setonuna Jehovah, podọ obá tẹ mẹ wẹ mí nọ setonuna ẹn jẹ?

¹⁰ Whẹwhinwhẹ́n tangan tẹ wutu wẹ mí nọ yìn gbedide Jiwheyẹwhe tọn lẹ? Naegbọn mí nọ jlo nado yinuwa egbesọegbesọ sọgbe hẹ nuhe mí yọnẹn dọ e yin pọndohlan Jiwheyẹwhe tọn? Mí ma nọ wàmọ na mí ma jlo na jiya poun wutu kavi na mí ma jlo na tindo numimọ vẹadi he mẹhe gbẹkọ ojlo Jiwheyẹwhe tọn go lẹ tindo. (Galatianu lẹ 6:7) Kakatimọ, mí nọ pọ́n tonusisena Jehovah hlan taidi dotẹnmẹ hundote dagbe de nado do owanyi he mí tindo na ẹn hia. Kẹdẹdile ovi de nọ tin to jejeji nado mọ nukundagbe otọ́ etọn tọn do, mọ wẹ mí nọ jlo nado mọ nukundagbe Jehovah tọn do niyẹn. (Psalm 5:12) Otọ́ mítọn wẹ bọ mí sọ yiwanna ẹn. Onú devo de ma nọ hẹn ayajẹ daho kavi pekọ sisosiso wá na mí hugan yinyọnẹn dọ mí to gbẹnọ to aliho de mẹ nado “mọ nukundagbe to OKLUNỌ dè.”—Howhinwhẹn lẹ 12:2.

¹¹ Enẹwutu, mí ma nọ whleawu nado setonu; mọjanwẹ mí ma nọ de nuhe mẹ mí na setonu te kavi ninọmẹ he mẹ mí na wàmọ te do niyẹn.b Mí ma nọ ṣinyankẹ́nna gbedide lẹ bo nọ setonu kiki to whenuena ninọmẹ lẹ bọawu kavi to whenuena mọwiwà ma na hẹn nuhahun susu kavi depope wá. Kakatimọ, mí nọ yin “tonusetọ sọn [ahun] mẹ.” (Lomunu lẹ 6:17) Mí nọ tindo numọtolanmẹ dopolọ hẹ psalm-kàntọ he wlan dọmọ: “Yẹn na na homẹhunhun dee to gbedide towe lẹ mẹ, he yẹn ko yiwanna.” (Psalm 119:47) Mọwẹ, homẹ mítọn nọ hùn nado setonuna Jehovah. Mí yọnẹn dọ e jẹna bosọ biọ tonusise mlẹnmlẹn to mí si. (Deutelonomi 12:32) Mí jlo dọ Jehovah ni dọ nuhe Ohó etọn dọ gando Noa go do mílọsu go. Biblu dọ gando tọgbo nugbonọ he do owanyi hia Jiwheyẹwhe gbọn tonusisena ẹn na owhe susu dali enẹ go dọmọ: “Mọ wẹ Noa sọ basi; kẹdẹdi enẹ he Jiwheyẹwhe ko degbena ẹn lẹpo. Mọ [pẹpẹ] wẹ e basi do.”—Gẹnẹsisi 6:22.

12. Whetẹnu wẹ tonusise mítọn nọ hẹn homẹhun Jehovah?

¹² Etẹwẹ nọ yin numọtolanmẹ Jehovah tọn to whenue mí setonu sọn ojlo mẹ wá? Ohó etọn dọ dọ mí nọ gbọnmọ dali ‘hẹn homẹ etọn hùn.’ (Howhinwhẹn lẹ 27:11) Be tonusise mítọn nọ hẹn homẹhun Oklunọ Nupojipetọ wẹkẹ lọ tọn nugbonugbo ya? Gbau—podọ na whẹwhinwhẹ́n dagbe! Jehovah dá mí taidi nudida he tindo mẹdekannujẹ lẹ. Ehe zẹẹmẹdo dọ mí tindo mẹdekannujẹ nado basi nudide; mí sọgan de nado setonuna Jiwheyẹwhe, kavi de nado vẹtolina ẹn. (Deutelonomi 30:15, 16, 19, 20) Eyin mí desọn ojlo mẹ nado setonuna Jehovah bọ owanyi sisosiso he mí tindo na Jiwheyẹwhe wẹ whàn mí nado basi nudide enẹ, mí nọ hẹn homẹhun Otọ́ olọn mẹ tọn mítọn bosọ nọ hẹn ayajẹ daho wá na ẹn. (Howhinwhẹn lẹ 11:20) Podọ aliho gbẹzan tọn he yọ́n hugan wẹ mí de.

13, 14. Naegbọn mí sọgan dọ dọ ‘gbedide Jiwheyẹwhe tọn lẹ ma pẹnagbanmẹ?’ Na apajlẹ.

¹³ Apọsteli Johanu dọ nuhe vọ́ jidenamẹ gando nubiọtomẹsi Jehovah tọn lẹ go na mí dọmọ: “Gbedide etọn lẹ ma pẹnagbanmẹ.” Lẹdogbedevomẹ Biblu tọn devo dọ ẹ dole: “Gbedide etọn lẹ ma nọ gbidikọna mí gba.” (New English Translation) Nubiọtomẹsi Jehovah tọn lẹ ma yin hẹngogo tọn kavi kọgbidinamẹnu gba. Osẹ́n etọn lẹ ma zẹ̀ nugopipe gbẹtọvi mapenọ lẹ tọn go nado yìn.

¹⁴ Mí sọgan yí apajlẹ ehe do basi zẹẹmẹ etọn. Họntọn vivẹ de biọ dọ hiẹ ni gọalọna emi nado sẹtẹn yì ohọ̀ devo mẹ. Agbàn susu wẹ dona yin tẹnsẹna. Delẹ to yé mẹ fua taun na mẹdopo nado ze po awubibọ po, ṣigba devo lẹ pẹ̀n bo na biọ dọ omẹ awe ni ze yé. Họntọn towe de agbàn he e jlo dọ a ni ze lẹ. Be e na biọ to asi we nado ze agbàn pinpẹ̀n he e yọnẹn dọ a ma sọgan ze lẹ wẹ ya? Lala. E ma na jlo dọ hiẹ ni gbleawu gbọn tintẹnpọn nado ze yé hiẹ ṣo dali. Mọdopolọ, Jiwheyẹwhe owanyinọ podọ homẹdagbenọ mítọn ma nọ biọ to mí si nado yìn gbedide he sinyẹn hugan lẹ. (Deutelonomi 30:11-14) E ma na biọ to mí si nado ze agbàn pinpẹn mọnkọtọn gbede. Jehovah yọ́n dogbó mítọn lẹ, na “ewọ yọ́n didá mítọn; e sọ flindọ kọ́gudu wẹ mí.”—Psalm 103:14.

15. Naegbọn mí sọgan deji dọ gbedide Jehovah tọn lẹ tin na ale mítọn?

¹⁵ Gbedide Jehovah tọn lẹ ma pẹnagbanmẹ paali; yé tin na ale mítọn. (Isaia 48:17) Enẹwutu, Mose dọna Islaelivi hohowhenu tọn lẹ dọmọ: ‘OKLUNỌ lọ sọ na aṣẹ mí nado nọ basi aṣẹdai he lẹpo, nado nọ dibusi OKLUNỌ lọ Jiwheyẹwhe mítọn, na dagbe mítọn to whepoponu, na e nido hla mí do ogbẹ̀ kẹdẹdi azán he gbè tọn.’ (Deutelonomi 6:24) Mílọsu sọgan deji dọ Jehovah na mí osẹ́n etọn lẹ na e tindo ojlo to dagbemẹninọ kakadoi tọn mítọn mẹ. Na nugbo tọn, e na vẹawu dọ Jehovah ni biọ nuhe na ze dagbemẹninọ mítọn do owù mẹ to mí si. Jehovah yin Jiwheyẹwhe de he tindo nuyọnẹn he yiaga hugan. (Lomunu lẹ 11:33) Enẹwutu, e yọ́n nuhe na hẹn ale wá na mí hugan lẹ. Jehovah sọ yin apajlẹ pipé owanyi tọn. (1 Johanu 4:8) Owanyi, he yin jẹhẹnu etọn tintan, nọ yinuwado nuhe e nọ dọ bo nọ wà lẹpo ji. Jẹhẹnu ehe ji wẹ gbedide he e na mí lẹpo sinai do.

16. Mahopọnna nuyiwadomẹji aihọn gblezọn ehe tọn gọna ayilinlẹn agbasa mape tọn mítọn, naegbọn mí sọgan yin tonusetọ to whepoponu?

¹⁶ Ehe ma zẹẹmẹdo dọ tonusisena Jiwheyẹwhe bọawu gba. Mí dona hoavùn sọta nuyiwadomẹji aihọn he gblezọn ehe tọn, he “mlọnai to mẹylankan lọ mẹ.” (1 Johanu 5:19) Mí sọ dona diahi hẹ agbasa mape mítọn, he nọ sisẹ́ mí nado gbà osẹ́n Jiwheyẹwhe tọn lẹ. (Lomunu lẹ 7:21-25) Ṣigba owanyi he mí tindo na Jiwheyẹwhe sọgan gọalọna mí nado gbawhàn. Jehovah nọ dona mẹhe jlo na do owanyi he yé tindo na ẹn hia gbọn tonusise yetọn dali lẹ. E nọ na gbigbọ wiwe etọn “hlan mẹhe setonuna ẹn” taidi ogán lẹ. (Owalọ lẹ 5:32) Gbigbọ enẹ nọ de sinsẹ́n dagbe tọ́n to mí mẹ—enẹ wẹ jẹhẹnu họakuẹ lẹ he na gọalọna mí nado yin tonusetọ to whepoponu.—Galatianu lẹ 5:22, 23.

17, 18. (a) Etẹwẹ mí na gbadopọnna to owe ehe mẹ, podọ dile mí to mọwà, etẹwẹ mí dona hẹn do ayiha mẹ? (b) Etẹwẹ mí na gbadopọnna to weta he bọdego mẹ?

¹⁷ To owe ehe mẹ, mí na gbadopọnna nunọwhinnusẹ́n po nujinọtedo walọ dagbe tọn Jehovah tọn lẹ po gọna nususu devo he nọ do ojlo etọn hia lẹ. Dile mí to ehe wà, mí dona hẹn onú tangan delẹ do ayiha mẹ. Mì gbọ mí ni flindọ Jehovah ma hẹn mí gánnugánnu nado setonuna osẹ́n etọn lẹ po nunọwhinnusẹ́n etọn lẹ po gba; e nọ jlo tonusise he wá sọn ahun mẹ. Mí ni ma wọn gbede blo dọ Jehovah to bibiọ to mí si nado zan gbẹzan he na hẹn dona susugege wá na mí todin podọ he na dekọtọn do ogbẹ̀ madopodo mẹ to sọgodo. Podọ mì gbọ mí ni flin nuhe tonusise ahundopo tọn mítọn yin—yèdọ dotẹnmẹ hundote họakuẹ de nado dohia Jehovah dọ mí yiwanna ẹn sisosiso.

¹⁸ Jehovah ko gbọn owanyi dali na mí ayihadawhẹnamẹnu nado sọgan yọ́n dagbe gbọnvona oylan. Ṣigba nado yin anademẹ dejidego de, ayihadawhẹnamẹnu mítọn dona yin pinplọn, dile weta he bọdego na dohia do.