Mì Nọ Dọ Nuhe ‘Yọ́n bo Jlọmẹdote Lẹ’

1-3. (a) Etẹwẹ dopo to nunina he Jehovah na mí lẹ mẹ, podọ nawẹ e sọgan yin ṣiṣizan gbọn? (b) Nado gbọṣi owanyi Jiwheyẹwhe tọn mẹ, nawẹ mí dona nọ yí nunina hodidọ tọn zan gbọn?

EYIN hiẹ na nunina mẹvivẹ de, etẹwẹ na yin numọtolanmẹ towe eyin e desọn ojlo mẹ bo zan ẹn do apà mẹ? Mí ni dọ dọ a na ẹn zokẹkẹ de bọ a wá mọ to godo mẹ dọ e zan ẹn do apà mẹ bo tlẹ yí ì do gbleawuna mẹdevo lẹ. Be e ma na vẹna we ya?

² Nugopipe lọ nado dọho hezeheze yin nunina de sọn Jehovah dè, yèdọ Dowatọ “nunina dagbedagbe po nunina he sọgbe lẹpo po” tọn. (Jakobu 1:17) Nunina he kanlin lẹ ma tindo ehe, nọ hẹn mí penugo nado do linlẹn kavi numọtolanmẹ mítọn hia mẹdevo lẹ. Nalete, nunina hodidọ tọn sọgan yin ṣiṣizan kẹdẹdile zokẹkẹ sọgan yin zinzan do apà mẹ do. Lehe e na nọ vẹna Jehovah do sọ eyin odẹ́ yin ṣiṣizan bo hẹn apọ̀ po awufiẹsa po wá na mẹdevo lẹ!

³ Nado gbọṣi owanyi Jiwheyẹwhe tọn mẹ, mí dona zan nunina hodidọ tọn dile Dowatọ etọn jlo do. Jehovah do hogbe he e yiwanna lẹ hia hezeheze. Ohó etọn dọmọ: “Mì dike hogbe gbigble de tọ́n sọn onù mìtọn mẹ blo, ṣigba ehe yọ́n [bo jlọmẹdote], dile onú te do, na e nido wazọ́n ojọmiọn tọn hlan mẹhe sè lẹ.” (Efesunu lẹ 4:29) Mì gbọ mí ni gbadopọnna nuhewutu mí dona nọ pọ́n ohó do dọ, hogbe he mí dona dapana lẹ, podọ lehe mí sọgan dọ ohó he ‘yọ́n bo jlọmẹdote lẹ’ do.

 4, 5. Nawẹ howhinwhẹn Biblu tọn delẹ basi zẹẹmẹ lehe hogbe he mí nọ yizan lẹ dohuhlọn do tọn gbọn?

⁴ Whẹwhinwhẹ́n titengbe dopo he wutu mí dona nọ pọ́n ohó do dọ wẹ yindọ ohó dohuhlọn. Howhinwhẹn lẹ 15:4 dọmọ: “[Dẹẹdẹ wiwà odẹ́ tọn] wẹ atin ogbẹ̀ tọn: lẹgọ-lẹgọ to e mẹ wẹ gbigble ayiha tọn.”a Kẹdẹdile osin nọ wà dagbe na atin he yọ́ do, mọ wẹ hogbe dẹẹdẹ odẹ́ tọn sọgan miọnhomẹna sisètọ lẹ do niyẹn. To vogbingbọn mẹ, hogbe lẹgọ-lẹgọ odẹ́ oklọ tọn sọgan hẹn mẹdevo lẹ gbọjọ. Na nugbo tọn, nuhe mí nọ dọ lẹ sọgan gbleawunamẹ kavi hẹnmẹ jẹgangan.—Howhinwhẹn lẹ 18:21.

⁵ Howhinwhẹn devo basi zẹẹmẹ lehe hogbe he mí nọ yizan lẹ dohuhlọn do tọn hezeheze dọmọ: “Omẹ delẹ tin bo nọ yawu dọho di sisọ́ ohí de tọn.” (Howhinwhẹn lẹ 12:18) Ohó lẹnpọn matindo tọn he yin didọ vaun sọgan hẹn awugble sisosiso wá to numọtolanmẹ-liho bo hẹn họntọnjiji gble. Be ohó didá he taidi ohí lẹ ko sọ́ ahun towe pọ́n ya? Howhinwhẹn dopolọ dotuhomẹnamẹ dọmọ: “Odẹ́ nuyọnẹntọ lẹ tọn, wẹ núgángán.” Ohó lẹnpọn dagbe tọn he mẹhe nọ do nuyọnẹn Jiwheyẹwhe tọn hia de dọ sọgan hẹn ahun he blawu jẹgangan bo jla haṣinṣan lẹ do. Be hiẹ sọgan flin whenue ohó dagbe he nọ hẹnmẹ jẹgangan de yin didọna we ya? (Howhinwhẹn lẹ 16:24) Na mí yọnẹn dọ nuhe mí dọ sọgan yinuwado mẹdevo lẹ ji wutu, ayihaawe ma tin dọ mí na jlo nado yí hogbe mítọn lẹ zan nado hẹn mẹdevo lẹ jẹgangan kakati nado gbleawuna yé.

 6. Naegbọn e do nọ biọ vivẹnudido nujọnu tọn nado dava odẹ́ mítọn?

⁶ Mahopọnna vivẹnudido mítọn lẹpo, mí ma sọgan dava odẹ́ mítọn mlẹnmlẹn gba. Ehe do whẹwhinwhẹ́n awetọ he wutu mí dona nọ pọ́n ohó do dọ hia, enẹ wẹ yindọ: Ylando po mape po nọ sisẹ́ mí nado ṣì odẹ́ mítọn zan. Ahun mẹ wẹ nuhe mí nọ dọ lẹ nọ wá sọn, podọ “ayilinlẹn [ahun] gbẹtọ tọn mẹ tọn oylan wẹ.” (Gẹnẹsisi 8:21; Luku 6:45) Enẹwutu, e na biọ vivẹnudido nujọnu tọn nado dava odẹ́ mítọn. (Jakobu 3:2-4) Dile etlẹ yindọ mí ma sọgan dava odẹ́ mítọn mlẹnmlẹn, mí sọgan to vivẹnudo zọnmii nado basi diọdo lẹ to aliho he mẹ mí nọ yí ì zan te mẹ. Kẹdẹdile agbọ́ ma dona pé tọ̀lìntọ́ he to tọ̀lẹ pànta agbówhẹn do, mọ wẹ mí dona to vivẹnudo zọnmii nado nọavunte sọta ayilinlẹn ylankan mítọn nado ṣí odẹ́ zan.

 7, 8. Obá tẹ mẹ wẹ mí na dogbena Jehovah jẹ gando nuhe mí nọ dọ lẹ go?

⁷ Whẹwhinwhẹ́n atọ̀ntọ he wutu mí dona nọ pọ́n ohó do dọ wẹ yindọ mí na dogbè nuhe mí dọ lẹ tọn na Jehovah. Gbọnvona dọ aliho he mẹ mí nọ yí odẹ́ mítọn zan te nọ yinuwado haṣinṣan mítọn hẹ mẹdevo lẹ ji, e sọ nọ gando haṣinṣan mítọn hẹ Jehovah go ga. Jakobu 1:26 dọmọ: “Eyin omẹ depope lẹn to ede mẹ dọ emi nọ basi sinsẹ̀n to aliho he sọgbe mẹ ṣogan bo ma nọ dogànnuna odẹ́ etọn, ṣigba nọ to ahun edetiti tọn klọ zọnmii, ovọ́ wẹ wunmẹ sinsẹ̀n-bibasi omẹ ehe tọn.” (NW ) Dile mí mọ to weta he wayi mẹ do, hodidọ mítọn tindo kanṣiṣa pẹkipẹki hẹ sinsẹ̀n-bibasi mítọn. Eyin mí ma dava odẹ́ mítọn bo nọ yawu yí hogbe awugblenamẹ tọn he vẹadi lẹ zan, azọ́n Klistiani tọn he wà mí te lẹpo sọgan lẹzun ovọ́ to nukun Jiwheyẹwhe tọn mẹ. Be e ma yin whẹho sinsinyẹn wẹ enẹ yin ya?—Jakobu 3:8-10.

⁸ E họnwun dọ mí tindo whẹwhinwhẹ́n dolido lẹ nado nọ họ́ míde ma nado ṣì nunina hodidọ tọn mítọn zan. Whẹpo mí nido gbadopọnna hodidọ wunmẹ he nọ jlọmẹdote lẹ, mì gbọ mí ni dọhodo hogbe he Klistiani nugbo de dona dapana mlẹnmlẹn lẹ ji whẹ́.

 9, 10. (a) Hogbe wunmẹ tẹlẹ wẹ nọ yin yiyizan taun to aihọn egbehe tọn mẹ? (b) Naegbọn mí dona dapana hogbe gbigble lẹ? (Sọ pọ́n nudọnamẹ odò tọn ga.)

⁹ Hogbe gbigble lẹ. Mẹzunzun, hofusa didọ, gọna hogbe gbigble wunmẹ devo lẹ nọ yin yiyizan taun to aihọn egbehe tọn mẹ. Mẹsusu nọ yí aṣagbe lẹ zan nado zinnudo nuhe dọ yé te ji kavi eyin yé ba hogbe pò. Aihundatọ lẹ nọ saba yí hogbe agbàagba, gblewa tọn lẹ zan nado do nukiko na gbẹtọ lẹ. Ṣigba, hogbe gbigble lẹ ma yin nukiko-hó gba. Nudi owhe 2 000 die wayi, apọsteli Paulu na ayinamẹ agun Kọlọsi tọn to gbọdo glọ nado dapana “hogblo” kavi hogbe gbigble lẹ. (Kọlọsinu lẹ 3:8) Paulu dọna agun Efesu tọn dọ ‘aslan-agbàagba’ lẹ tin to nuhe “yè [ma dona] ylọ oyín etọn to” Klistiani nugbo lẹ ṣẹnṣẹn paali lẹ mẹ.—Efesunu lẹ 5:3, 4.

¹⁰ Jehovah gbẹwanna hogbe gbigble lẹ. Numọtolanmẹ dopolọ wẹ mẹhe yiwanna Jehovah lẹ tindo gando whẹho lọ go. Na nugbo tọn, owanyi he mí tindo na Jehovah nọ whàn mí nado dapana hogbe gbigble lẹ. To whenuena Paulu to “azọ́n agbasalan tọn lẹ” slẹ, e donù “mawé” go, ehe sọgan bẹ hodidọ he kudiho lẹ hẹn. (Galatianu lẹ 5:19-21) Whẹho sinsinyẹn wẹ ehe yin. Mẹde sọgan yin didesẹ sọn agun mẹ eyin mahopọnna ayinamẹ he yin nina ẹn pludopludo, e gbọn lẹnvọjọ matindo dali yí hogbe gblewa tọn, mẹdèpo tọn, po dehe gblezọn taun lẹ po do do aṣa.b

11, 12. (a) Whetẹnu wẹ hodidọ gando mẹdevo lẹ go nọ lẹzun mẹnudidọ ylankan? (b) Naegbọn sinsẹ̀n-basitọ Jehovah tọn lẹ dona dapana hodidọ mẹhẹngble tọn lẹ?

¹¹ Mẹnudidọ ylankan, mẹhẹngble. Gbẹtọ lẹ tindo ayilinlẹn lọ nado nọ dọho gando mẹdevo lẹ po nuyiwa yetọn lẹ po go. Be e ylan nado nọ dọho gando mẹdevo lẹ go wẹ ya? Lala, eyin hodidọ lọ jlọmẹdote bo bẹ nudọnamẹ dagbe he sọgan gọalọnamẹ lẹ hẹn, taidi hodidọ gando mẹhe ṣẹṣẹ yí baptẹm kavi mẹhe tindo nuhudo tulinamẹ tọn go. Klistiani owhe kanweko tintan tọn lẹ tindo ojlo nujọnu tọn to dagbemẹninọ ode awetọ tọn mẹ bosọ má nudọnamẹ he jẹ lẹ gando yisenọ hatọ lẹ go. (Efesunu lẹ 6:21, 22; Kọlọsinu lẹ 4:8, 9) Ṣigba, hodidọ gando mẹdevo lẹ go sọgan lẹzun mẹnudidọ ylankan eyin nudọnamẹ lọ lẹ yin tasọdona kavi eyin e de aṣli lẹ hia. Dehe tlẹ sọ ylan hugan wẹ yindọ hodidọ mọnkọtọn sọgan lẹzun mẹhẹngble tọn he ma nọ jlọmẹdote gbede. Mẹhẹngble yin “whẹsadokọnamẹ lalo . . . he nọ hẹn yinkọ dagbe mẹdevo tọn gble bo hẹn ẹn kudiho.” Di apajlẹ, Falesi lẹ sawhẹ ylankan dokọna Jesu bo hẹn yinkọ dagbe etọn gble to vivẹnudido mẹ nado de yẹyi sọn e go. (Matiu 9:32-34; 12:22-24) Mẹhẹngble nọ saba hẹn avùn wá.—Howhinwhẹn lẹ 26:20.

¹² Jehovah ma nọ yí nukun vlẹkẹsẹ do pọ́n mẹhe nọ yí nunina hodidọ tọn zan nado hẹn mẹdevo lẹ gble kavi nado hẹn kinklan wá. E gbẹwanna mẹhe nọ dà “avùn . . . dai to mẹmẹsunnu lẹ ṣẹnṣẹn.” (Howhinwhẹn lẹ 6:16-19) Hogbe Glẹkigbe tọn he yin lilẹdo “mẹhẹngble” wẹ di·aʹbo·los, he sọ yin yiyizan taidi tẹnmẹ-yinkọ Satani tọn. Ewọ wẹ “Lẹgba,” yèdọ mẹhe hẹn Jiwheyẹwhe gble to aliho ylankan mẹ. (Osọhia 12:9, 10) Na jide tọn, mí dona dapana hogbe depope he sọgan hẹn mí nado wá tin taidi Lẹgba yiyizan. Hodidọ mẹhẹngble tọn he nọ fọ́n azọ́n agbasalan tọn lẹ taidi ‘avùn’ po ‘kinklan’ po dote ma yin alọkẹyi to agun lọ mẹ gba. (Galatianu lẹ 5:19-21) Enẹwutu, whẹpo do vọ́ nuhe a sè gando mẹdevo go dọ, kanse dewe dọ: ‘Be nugbo wẹ ya? Be onú dagbe wẹ e na yin nado vọ́ ehe dọ ya? Be dandan wẹ e yin nado jlá nudọnamẹ ehe pé ya?’—1 Pita 4:15.

13, 14. (a) Nawẹ ohó ylankan sọgan yinuwado mẹdevo lẹ ji gbọn? (b) Etẹwẹ mẹvivlẹ yin, podọ naegbọn mẹvlẹtọ de do tin to owù mẹ?

¹³ Ohó ylankan. Dile e ko yin didọ do wayi, hogbe lẹ sọgan gbleawunamẹ. Nugbo wẹ dọ na mí yin mapenọ wutu, mímẹpo wẹ nọ dọ nuhe nọ wá vẹna mí to godo mẹ to whedelẹnu. Ṣigba, Biblu na avase sọta ohó wunmẹ he ma dona yin didọ gbede to whédo Klistiani de tọn mẹ kavi to agun mẹ. Paulu dotuhomẹna Klistiani lẹ dọmọ: “Mì gbọ adi lẹpo, homẹfiọ, homẹgble, nutlọ, po ohó ylankan po, yè ni de e sọn mì dè.” (Efesunu lẹ 4:31) Lẹdogbedevomẹ devo lẹ lilẹ́ “ohó ylankan” do “ohó dakandakan,” “hogbe whánsọmẹ tọn lẹ,” po “hogbe mẹzunzun tọn lẹ” po. Ohó ylankan—he bẹ yinkọ mẹdèpo tọn lẹ yíyí do ylọmẹ gọna homọdọdomẹgo whẹwhẹ po fifiẹ po hẹn—sọgan de yẹyi sọn mẹdevo lẹ go bo hẹn yé tindo numọtolanmẹ nuvọ́nọ-yinyin tọn. Ohó ylankan nọ yawu yinuwado ahun dagbe yọpọvu lẹ tọn ji zẹjlẹgo.—Kọlọsinu lẹ 3:21.

¹⁴ Biblu yí hogbe sinsinyẹn lẹ zan nado jẹagọdo mẹvivlẹ—yèdọ aṣa lọ nado nọ ṣá na mẹdevo lẹ po hogbe ylankan kavi mẹzunzun tọn he demẹpò lẹ po. Mẹhe hẹn ẹn zun aṣa nado nọ yí hogbe mọnkọtọn lẹ zan to ede zedo owù mẹ, na mẹvlẹtọ de sọgan yin didesẹ sọn agun mẹ eyin e gboawupo nado hodo ayinamẹ he yin nina ẹn pludopludo nado diọ. Eyin e ma diọ jijọ etọn, dona Ahọluduta tọn lẹ sọ sọgan gbọ e go. (1 Kọlintinu lẹ 5:11-13; 6:9, 10) Enẹwutu, e họnwun dọ mí ma sọgan gbọṣi owanyi Jiwheyẹwhe tọn mẹ eyin mí hẹn ẹn zun aṣa nado nọ yí hogbe ylankan, lalo, he ma dọnmẹdogo lẹ zan. Hogbe mọnkọtọn lẹ nọ hẹnmẹ gbọjọ.

15. Hodidọ alọpa tẹwẹ ‘yọ́n bo jlọmẹdote?’

¹⁵ Nawẹ mí sọgan yí nunina hodidọ tọn zan dile Dowatọ etọn jlo do gbọn? Flindọ Ohó Jiwheyẹwhe tọn dotuhomẹna mí nado nọ dọ ‘nuhe yọ́n bo jlọmẹdote lẹ.’ (Efesunu lẹ 4:29) Homẹ Jehovah tọn nọ hùn eyin mí yí hogbe he nọ jlọ mẹdevo lẹ dote bo nọ na tuli yé bosọ nọ hẹn yé lodo lẹ zan. E nọ biọ nulẹnpọn po sọwhiwhe po nado yí hogbe mọnkọtọn lẹ zan. Biblu ma wleawuna anademẹ tangan he dona yin hihodo lẹ gba; mọjanwẹ e ma basi todohukanji ‘hogbe dagbe’ he yin alọkẹyi lẹ tọn do niyẹn. (Titu 2:8) Nado dọ nuhe ‘yọ́n bo jlọmẹdote lẹ,’ mí dona hẹn onú titengbe atọ̀n he nọ dohiagona hodidọ mẹjlọdote tọn lẹ do ayiha mẹ: E nọ yin ohó dagbe, nọ yin nugbo, bo nọ dọnmẹdogo. Po ehelẹ po to ayiha mẹ, mì gbọ mí ni gbadopọnna apajlẹ tangan delẹ gando hodidọ he nọ jlọmẹdote lẹ go.—Pọ́n apotin lọ “Be Hodidọ Ṣie Nọ Jlọmẹdote Ya?”

16, 17. (a) Naegbọn mí dona nọ pà mẹdevo lẹ? (b) Dotẹnmẹ hundote tẹlẹ wẹ mí tindo nado nọ pà mẹdevo lẹ to agun mẹ podọ to whẹndo mẹ?

¹⁶ Mẹpipa ahundopo tọn. Jehovah po Jesu po yọnẹn dọ onú titengbe wẹ e yin nado nọ yí hogbe mẹpipa tọn po pinpẹn-nutọn-yinyọnẹn tọn lẹ po zan. (Matiu 3:17; 25:19-23; Johanu 1:47) Taidi Klistiani lẹ, mílọsu dona nọ pà mẹdevo lẹ po ahundopo po. Etẹwutu? “Ohó dopo to ojlẹ etọn mẹ, nawẹ e jẹ do”! wẹ Howhinwhẹn lẹ 15:23 dọ. Kanse dewe dọ: ‘Etẹwẹ nọ yin numọtolanmẹ ṣie to whenuena mẹde pà mi po ahundopo po? Be e ma nọ hẹn homẹ ṣie hùn bo nọ na mi tuli ya?’ Mọwẹ, mẹpipa ahundopo tọn nọ hẹn we yọnẹn dọ mẹde to ayido gowe, dọ mẹde to towe hòpọn, podọ dọ vivẹnudido towe yin nujọnu taun. Hodidọ jide-vọ́namẹ tọn mọnkọtọn nọ yidogọna jidide towe bo nọ whàn we nado dovivẹnu susu dogọ to nukọn mẹ. To whenuena e yindọ a nọ yọ́n pinpẹn etọn eyin mẹde pà we, be e ma jẹ dọ hiẹ lọsu ni wà nuhe go a pé lẹpo nado nọ pà mẹdevo lẹ ya?—Matiu 7:12.

¹⁷ Plọn dewe nado nọ dín jẹhẹnu dagbe mẹdevo lẹ tọn, enẹgodo nọ pà yé. To agun lọ mẹ, a sọgan sè hodidọ he yin nina ganji de to opli ji, kavi doayi jọja he to vivẹnudo nado jẹ yanwle gbigbọmẹ tọn lẹ kọ̀n, kavi mẹhomẹ he nọ wá opli lẹ po nugbonọ-yinyin po mahopọnna yọnhowhe etọn de go. Hogbe mẹpipa ahundopo tọn de sọgan yinuwado ahun omẹ mọnkọtọn lẹ tọn ji bo hẹn yé lodo to gbigbọ-liho. To whẹndo mẹ, asu po asi po lẹ dona nọ pà yede po ahundopo po bo nọ do pinpẹn-nutọn-yinyọnẹn hia yede. (Howhinwhẹn lẹ 31:10, 28) Na taun tọn, ovi lẹ nọ wà dagbe eyin yé mọdọ mẹjitọ lẹ doayi yé go bo yọ́n pinpẹn yetọn. Mẹpipa po hogbe pinpẹn-nutọn-yinyọnẹn tọn lẹ po nọ miọnhomẹna ovi de kẹdẹdile owhè po osin po nọ hẹn atin de dogbẹ̀ do. Mẹjitọ lẹ emi, mì nọ dín dotẹnmẹ hundote lẹ nado pà ovi mìtọn lẹ na jẹhẹnu dagbe po vivẹnudido yetọn lẹ po. Pipà mọnkọtọn sọgan yidogọna adọgbigbo po jidide ovi mìtọn lẹ tọn po bo whàn yé nado dovivẹnu susu dogọ nado wà nuhe sọgbe.

18, 19. Naegbọn mí dona wà nuhe go mí pé lẹpo nado miọnhomẹna yisenọ hatọ lẹ, podọ nawẹ mí sọgan wà ehe gbọn?

¹⁸ Homẹmiọnnamẹ. Jehovah nọ hò “oyanọ” po “agbátọnọ” lẹ po tọn pọ́n. (Psalm 72:13) Ohó etọn dotuhomẹna mí nado nọ “nọpọ́ do miọnhomẹna” mínọzo bo nọ “miọnhomẹna ayi mawhiwhẹnọ lẹ.” (1 Tẹsalonikanu lẹ 5:11, 14) Mí sọgan deji dọ Jiwheyẹwhe nọ doayi vivẹnudido mítọn nado miọnhomẹna yisenọ hatọ he tin to awubla mẹ lẹ go podọ ehe nọ hùnhomẹ na ẹn.

¹⁹ Ṣigba, etẹwẹ hiẹ sọgan dọ nado jlọ Klistiani hatọ he gbọjọ kavi he apọṣi de dote? Ma lẹndọ hiẹ dona didẹ nuhahun lọ wẹ blo. To whẹho susu mẹ, hogbe he dọnmẹdogo lẹ wẹ nọ saba gọalọ hugan. Na jide mẹhe apọṣi lọ dọ hiẹ to etọn hòpọn. Biọ to mẹhe gbọjọ lọ si nado hodẹ̀ daga hẹ ẹ; hiẹ sọgan vẹ̀ Jehovah nado gọalọna mẹlọ nado mọdọ mẹdevo lẹ po Jiwheyẹwhe po yiwanna ẹn taun. (Jakobu 5:14, 15) Vọ́ jide na ẹn dọ mí tindo nuhudo etọn podọ mẹhe pò lẹ yọ́n pinpẹn etọn taidi hagbẹ agun lọ tọn. (1 Kọlintinu lẹ 12:12-26) Hia wefọ Biblu tọn he na tulimẹ de nado hẹn ẹn deji dọ Jehovah nọ hò etọn pọ́n nugbonugbo. (Psalm 34:18; Matiu 10:29-31) Matin ayihaawe, whenu susu yiyizan nado má “ohó dagbe” hẹ mẹhe jẹflumẹ lọ podọ ohó lọ didọ sọn ahun mẹ wá na gọalọna ẹn nado mọdọ yè yiwanna emi bosọ yọ́n pinpẹn emitọn.—Howhinwhẹn lẹ 12:25.

20, 21. Etẹlẹ wẹ nọ hẹn ayinamẹ wazọ́n?

²⁰ Ayinamẹ he wazọ́n lẹ. Taidi gbẹtọvi mapenọ lẹ, mímẹpo wẹ tindo nuhudo ayinamẹ tọn sọn ojlẹ de mẹ jẹ devo mẹ. Biblu na tuli mí dọmọ: “Tuntoai [na ayinamẹ], na a nisọ yí oplọn, na hiẹ nido yọnnuin to opodo towe.” (Howhinwhẹn lẹ 19:20) E ma yin mẹho agun tọn lẹ kẹdẹ wẹ sọgan na ayinamẹ mẹdevo lẹ. Mẹjitọ lẹ nọ na ayinamẹ ovi lẹ. (Efesunu lẹ 6:4) E sọgan biọ dọ mẹmẹyọnnu he whèwhín lẹ ni na ayinamẹ yọnnu jọja lẹ. (Titu 2:3-5) Owanyi he mí tindo na mẹdevo lẹ nọ whàn mí nado na ayinamẹ he sọgan yin alọkẹyi matin nuhlundọ. Etẹwẹ sọgan gọalọna mí nado na ayinamẹ mọnkọtọn? Mì gbọ mí ni gbadopọnna onú atọ̀n he nọ hẹn ayinamẹ wazọ́n ganji: nuyiwa po mẹwhinwhàn ayinamẹtọ lọ tọn po, nuhe ji ayinamẹ lọ yin zize sinai do, podọ aliho he mẹ ayinamẹ lọ yin nina te.

²¹ Whẹpo ayinamẹ mẹde tọn nido wazọ́n ganji, e dona kanse ede dọ, ‘Ninọmẹ tẹlẹ glọ wẹ n’nọ kẹalọyi ayinamẹ te po awubibọ po?’ Eyin a yọnẹn dọ mẹhe to ayinamẹ na we lọ to towe hòpọn bo ma to hodọ na e tin to adi ji wutu bo masọ tindo mẹwhinwhàn agọ̀, e nọ bọawu hugan nado kẹalọyi ayinamẹ lọ. Enẹwutu eyin a to ayinamẹ na mẹdevo lẹ, be onú dopolọ ma dona yin nugbo gando nuyiwa po mẹwhinwhàn towe po go ya? Ayinamẹ he wazọ́n ganji sọ nọ yin zize sinai do Ohó Jiwheyẹwhe tọn ji. (2 Timoti 3:16) Vlavo mí yihodọ sọn Biblu mẹ tlọlọ kavi lala, mí dona nọ ze ayinamẹ he mí na lẹpo sinai do Owe-wiwe ji. Gbọnmọ dali, mẹho lẹ nọ tin to aṣeji ma nado zín pọndohlan yetọn titi do mẹdevo lẹ ji; mọjanwẹ yé ma nọ sọtadona Owe-wiwe bo nọ basi zẹẹmẹ do e ji taidi dọ Biblu nọ nọgodona pọndohlan mẹdetiti tọn delẹ wẹ nkọ. Ayinamẹ sọ nọ wazọ́n ganji eyin e yin nina to aliho he sọgbe mẹ. Ayinamẹ homẹdagbe tọn he yọ́nsè nọ bọawu taun nado kẹalọyi bosọ nọ doyẹyigona mẹhe to ayinamẹ yí lọ.—Kọlọsinu lẹ 4:6.

22. Etẹwẹ hiẹ magbe nado yí nunina hodidọ tọn towe do wà?

²² Na jide tọn, hodidọ yin nunina de sọn Jiwheyẹwhe dè. Owanyi he mí tindo na Jehovah dona whàn mí nado yí nunina ehe zan ganji, e ma yin nado ṣì i zan. Mì gbọ mí ni flindọ hogbe he mí nọ yizan na mẹdevo lẹ dohuhlọn—yèdọ huhlọn nado jlọmẹdote kavi nado hẹnmẹ gbọjọ. Enẹwutu, mì gbọ mí ni dovivẹnu nado yí nunina ehe zan dile Dowatọ etọn jlo do—enẹ wẹ nado ‘jlọmẹdote.’ Gbọnmọ dali, hodidọ mítọn na yin dona de na mẹhe lẹdo mí lẹ bo nasọ gọalọna mí nado gbọṣi owanyi Jiwheyẹwhe tọn mẹ.