Aliho He mẹ E Jẹ Dọ Mí Ni Sẹ̀n Jiwheyẹwhe Te

 1. Mẹnu wẹ dona dọ aliho he mẹ mí dona sẹ̀n Jiwheyẹwhe te na mí?

SUHUGAN sinsẹ̀n lẹ tọn wẹ nọ sọalọkọ́n dọ emi nọ plọnmẹ nugbo lọ gando Jiwheyẹwhe go. Ṣigba enẹ ma yọnbasi, na nuhe yé nọ plọnmẹ gando omẹ nankọ he Jiwheyẹwhe yin po lehe mí dona sẹ̀n ẹn do po go nọ gbọnvo taun sọn sinsẹ̀n de mẹ jẹ devo mẹ. Nawẹ mí sọgan yọ́n aliho he mẹ e jẹ dọ mí ni sẹ̀n Jiwheyẹwhe te gbọn? Jehovah kẹdẹ wẹ gán dọ aliho he mẹ mí dona sẹ̀n ẹn te na mí.

 2. Nawẹ a gán yọ́n aliho he mẹ e jẹ dọ a ni sẹ̀n Jiwheyẹwhe te gbọn?

² Jehovah ko na mí Biblu, na mí nido sọgan yọ́n aliho he mẹ e jẹ dọ mí ni nọ sẹ̀n ẹn te. Enẹwutu plọn Biblu, Jehovah nasọ gọalọna we nado mọaleyi sọn nuplọnmẹ etọn lẹ mẹ, na e nọ hò towe pọ́n taun wutu.—Isaia 48:17.

 3. Etẹwẹ Jiwheyẹwhe jlo dọ mí ni wà?

³ Mẹdelẹ nọ dọ dọ sinsẹ̀n lẹpo wẹ Jiwheyẹwhe kẹalọyi, ṣigba e ma yin nuhe Jesu plọn mí niyẹn. E dọmọ: “E ma yin mẹlẹpo he to didọna mi dọ, ‘Oklunọ, Oklunọ,’ wẹ na biọ Ahọluduta olọn tọn mẹ gba, adavo ewọ he to ojlo Otọ́ ṣie he tin to olọn mẹ tọn wà kẹdẹ.” Enẹwutu, nujọnu wẹ e yin dọ mí ni yọ́n ojlo Jiwheyẹwhe tọn bo nọ wà ẹ. Whẹho sinsinyẹn de wẹ ehe yin, na Jesu yí mẹhe ma nọ setonuna Jiwheyẹwhe lẹ jlẹdo danuwatọ kavi “mẹhe nọ wazọ́n sẹ́nhẹngba tọn lẹ” go.—Matiu 7:21-23.

 4. Etẹwẹ Jesu dọ gando ojlo Jiwheyẹwhe tọn wiwà go?

⁴ Jesu na avase dọ eyin mí jlo na wà ojlo Jiwheyẹwhe tọn, mí na pehẹ nuhahun lẹ. E dọmọ: “Mì gbọn họntonu bibó lọ nù biọ e mẹ, na gbigblo wẹ họntonu lọ podọ gblagada wẹ aliho lọ he nọ planmẹ yì vasudo, mẹsusu wẹ sọ to gbingbọn e nù biọ e mẹ; to whenuena e yindọ bibó wẹ họntonu lọ podọ jinján wẹ aliho lọ he nọ planmẹ yì ogbẹ̀ mẹ, omẹ vude wẹ sọ to dindin in mọ.” (Matiu 7:13, 14) Aliho jinján lọ, kavi aliho he mẹ e jẹ dọ mí ni sẹ̀n Jiwheyẹwhe te, nọ planmẹ yì ogbẹ̀ madopodo. Aliho gblagada lọ, kavi aliho sinsẹ̀n-bibasi tọn he ma sọgbe lọ, nọ planmẹ yì okú. Amọ́, Jehovah ma jlo dọ mẹdepope ni kú. E na dotẹnmẹ mẹlẹpo nado plọnnu gando ewọ go.—2 Pita 3:9.

 5. Nawẹ a sọgan yọ́n mẹhe to Jiwheyẹwhe sẹ̀n to aliho he sọgbe mẹ lẹ gbọn?

⁵ Jesu dọ dọ mí gán yọ́n mẹhe to Jiwheyẹwhe sẹ̀n to aliho he sọgbe mẹ lẹ. Mí gán yọ́n yé eyin mí gbeje nuyise po nuyiwa yetọn lẹ po pọ́n. E dọmọ: “Gbọn sinsẹ́n yetọn lẹ dali wẹ mì na yọ́n yé.” E sọ yidogọ dọ: “Atin dagbe lẹpo nọ de sinsẹ́n dagbe tọ́n.” (Matiu 7:16, 17) Ehe ma zẹẹmẹdo dọ mẹhe to Jiwheyẹwhe sẹ̀n lẹ yin mẹpipe. Ṣigba, yé nọ dovivẹnu nado wà nuhe sọgbe to whelẹponu. Todin, mí na gbadopọnna nuhe na gọalọna mí nado yọ́n mẹhe to Jiwheyẹwhe sẹ̀n to aliho he sọgbe mẹ lẹ.

6, 7. Naegbọn sinsẹ̀n-bibasi nugbo nọ sinai do Biblu ji? Etẹwẹ apajlẹ Jesu tọn plọn mí?

⁶ Sinsẹ̀n-bibasi mítọn dona sinai do Biblu ji. Biblu dọmọ: “Owe-wiwe lẹpo wẹ yin gbigbọdo sọn Jiwheyẹwhe dè bo yin alenu na mẹpinplọn, na wọhẹmẹ, na nulẹ hinhẹn sọgbe, na mẹplọnlọdidomẹgo to dodowiwa mẹ, na omẹ Jiwheyẹwhe tọn nido sọgan pegan to gigọ́ mẹ bo yin hinhẹn sọgbe mlẹnmlẹn na azọ́n dagbe lẹpo.” (2 Timoti 3:16, 17) Apọsteli Paulu kanwehlan Klistiani lẹ dọmọ: “To whenue mì kẹalọyi ohó Jiwheyẹwhe tọn he mì sè sọn mí dè, mì kẹalọyi i, e ma yin taidi ohó gbẹtọ tọn gba, ṣigba kẹdẹdile e te do nugbonugbo, yèdọ taidi ohó Jiwheyẹwhe tọn.” (1 Tẹsalonikanu lẹ 2:13) Sinsẹ̀n-bibasi nugbo nọ sinai do Ohó Jiwheyẹwhe tọn, yèdọ Biblu kẹdẹ ji. E ma nọ sinai do linlẹn po aṣa gbẹtọvi tọn lẹ po, kavi nudevo depope ji.

⁷ Nuhe Jesu plọnmẹ lẹpo wẹ sinai do Ohó Jiwheyẹwhe tọn ji. (Hia Johanu 17:17.) E nọ saba yihodọ sọn Owe-wiwe lẹ mẹ. (Matiu 4:4, 7, 10) Sinsẹ̀n-basitọ nugbo Jiwheyẹwhe tọn lẹ nọ hodo apajlẹ Jesu tọn bo nọ ze nuplọnmẹ yetọn lẹpo sinai do Biblu ji.

 8. Etẹwẹ Jesu plọn mí gando Jehovah sinsẹ̀n go?

⁸ Jehovah kẹdẹ wẹ mí dona nọ sẹ̀n. Salmu lẹ 83:18 dọmọ: “Hiẹ, mẹhe oyín towe nọ yin Jehovah, hiẹ dopo kẹdẹ wẹ yin Gigogán to aigba lẹpo ji.” Jesu jlo dọ gbẹtọ lẹ ni yọ́n mẹhe Jiwheyẹwhe nugbo lọ yin taun, enẹwutu e plọn oyín Jiwheyẹwhe tọn mẹlẹ. (Hia Johanu 17:6.) Jesu dọmọ: “Jehovah Jiwheyẹwhe towe wẹ hiẹ dona nọ sẹ̀n, podọ ewọ kẹdẹ wẹ hiẹ dona nọ wà sinsẹ̀nzọn wiwe hlan.” (Matiu 4:10) Enẹwutu, taidi sinsẹ̀n-basitọ Jiwheyẹwhe tọn lẹ, mí nọ hodo apajlẹ Jesu tọn. Jehovah kẹdẹ wẹ mí nọ sẹ̀n, podọ mí nọ yí oyín etọn zan bo nọ plọnnu mẹdevo lẹ gando oyín Jiwheyẹwhe tọn po nuhe ewọ na wà na mí lẹ po go.

9, 10. Nawẹ mí nọ do owanyi hia ode awetọ gbọn?

⁹ Mí dona tindo owanyi nujọnu tọn na gbẹtọ lẹ. Jesu plọn devi etọn lẹ dọ yé ni nọ yiwanna ode awetọ. (Hia Johanu 13:35.) Nujọnu lọ ma yin fie mí wá sọn, aṣa mítọn, kavi vlavo mí yin adọkunnọ kavi wamọnọ. Owanyi he mí tindo na ode awetọ dona kọ̀n mí dopọ taidi mẹmẹsunnu po mẹmẹyọnnu lẹ po. (Kolosinu lẹ 3:14) Enẹwutu, mí ma nọ yì awhàn bo masọ nọ hùmẹ. Biblu dọmọ: “Lehe ovi Jiwheyẹwhe tọn lẹ po ovi Lẹgba tọn lẹ po nọ yin didohia gbọn die: Mẹdepope he ma hẹn dodowiwa zun aṣa ma wá sọn Jiwheyẹwhe dè, mọkẹdẹ wẹ e yin na mẹhe ma yiwanna mẹmẹsunnu etọn.” E sọ yidogọ dọ: “Mí dona yiwanna ode awetọ; e ma yin taidi Kaini, mẹhe wá sọn mẹylankan lọ dè bo hù nọvisunnu etọn.”—1 Johanu 3:10-12; 4:20, 21.

¹⁰ Mí nọ yí whenu, huhlọn po nutindo agbasa tọn mítọn lẹ po zan nado gọalọ bo na tuli ode awetọ. (Heblu lẹ 10:24, 25) Mí “nọ wà nuhe yin dagbe hlan mẹlẹpo.”—Galatianu lẹ 6:10.

11. Naegbọn mí do nọ kẹalọyi Jesu taidi aliho he planmẹ yì Jiwheyẹwhe dè lọ?

¹¹ Mí dona setonuna Jesu, na ewọ wẹ aliho he planmẹ yì Jiwheyẹwhe dè lọ. Biblu dọmọ: “Whlẹngán ma tin to mẹdevo de mẹ, na oyín devo de ma to olọn glọ he ko yin nina gbẹtọ gbọn ehe dali mí sọgan yin whinwhlẹngán.” (Owalọ lẹ 4:12) To Weta 5tọ owe ehe tọn mẹ, mí plọn dọ Jehovah do Jesu hlan nado ze ogbẹ̀ etọn jo taidi ofligọ de do gbẹtọvi tonusetọ lẹ tamẹ. (Matiu 20:28) Jehovah ko de Jesu nado dugán do aigba ji taidi Ahọlu. Enẹwutu wẹ Biblu do dọna mí dọ mí dona nọ setonuna Jesu eyin mí jlo na nọgbẹ̀ kakadoi.—Hia Johanu 3:36.

12. Etẹwutu mí ma nọ doalọ to tonudidọ mẹ?

¹² Mí ma dona nọ doalọ to tonudidọ mẹ. Jesu ma tindo mahẹ to tonudidọ mẹ. To whenue e sọawuhia to owhẹ̀ nukọn, e dọna gandutọ Lomu tọn lọ Pilati dọmọ: “Ahọluduta ṣie ma yin apadewhe aihọn ehe tọn.” (Hia Johanu 18:36.) Taidi Jesu, mí nọ yin nugbonọ na Ahọluduta olọn mẹ tọn Jiwheyẹwhe tọn, podọ na whẹwhinwhẹ́n enẹ wutu, mí ma nọ doalọ to tonudidọ mẹ mahopọnna fidepope he mí nọ nọ̀. Ṣigba, Biblu degbena mí nado nọ setonuna “aṣẹpipa daho lẹ,” enẹ wẹ gandudu lẹ. (Lomunu lẹ 13:1) Mí nọ setonuna osẹ́n otò he mẹ mí te tọn lẹ. Amọ́, eyin osẹ́n de jẹagọdo osẹ́n Jiwheyẹwhe tọn lẹ, mí nọ hodo apajlẹ apọsteli lẹ tọn, mẹhe dọmọ: “Míwlẹ dona setonuna Jiwheyẹwhe taidi ogán kakati nido yin gbẹtọ lẹ.”—Owalọ lẹ 5:29; Malku 12:17.

13. Wẹndagbe tẹwẹ mí nọ lá gando Ahọluduta Jiwheyẹwhe tọn go?

¹³ Mí yise dọ Ahọluduta Jiwheyẹwhe tọn kẹdẹ wẹ na didẹ nuhahun aihọn tọn lẹ. Jesu dọ dọ “yẹwheho wẹndagbe Ahọluduta lọ tọn” na yin didọ lẹdo aihọn pé. (Hia Matiu 24:14.) Gandudu gbẹtọvi tọn depope ma gán wà nuhe Ahọluduta Jiwheyẹwhe tọn na wà na mí. (Salmu lẹ 146:3) Jesu plọn mí nado nọ hodẹ̀ do Ahọluduta Jiwheyẹwhe tọn tamẹ dọmọ: “Na Ahọluduta towe ni wá. Na ojlo towe ni yin wiwà, kẹdẹdi to olọn mẹ, mọdopolọ to aigba ji.” (Matiu 6:10) Biblu dọna mí dọ Ahọluduta Jiwheyẹwhe tọn na và gandudu gbẹtọvi tọn lẹpo sudo bọ “ewọ kẹdẹ wẹ na nọte kakadoi.”—Daniẹli 2:44.

14. Mẹnu lẹ wẹ a lẹndọ yé to Jiwheyẹwhe sẹ̀n to aliho he jẹ lọ mẹ?

¹⁴ Todin he a ko gbadopọnna nuagokun ehelẹ, kanse dewe dọ: ‘Mẹnu lẹ wẹ nọ ze nuplọnmẹ yetọn lẹ sinai do Biblu ji? Mẹnu lẹ wẹ nọ plọn oyín Jiwheyẹwhe tọn mẹdevo lẹ? Mẹnu lẹ wẹ nọ do owanyi nujọnu tọn hia ode awetọ bo yise dọ Jiwheyẹwhe wẹ do Jesu hlan nado whlẹn mí? Mẹnu lẹ wẹ ma nọ doalọ to tonudidọ mẹ? Mẹnu lẹ wẹ nọ lá pé dọ Ahọluduta Jiwheyẹwhe tọn kẹdẹ wẹ gán didẹ nuhahun mítọn lẹ?’ Kunnudetọ Jehovah tọn lẹ kẹdẹ wẹ.—Isaia 43:10-12.

15. Etẹwẹ mí dona wà eyin mí jlo dọ Jiwheyẹwhe ni kẹalọyi sinsẹ̀n-bibasi mítọn?

¹⁵ E ma ko pé nado yise poun dọ Jiwheyẹwhe tin. Aovi lẹ lọsu tlẹ yise dọ Jiwheyẹwhe tin, ṣigba yé ma nọ setonuna ẹn. (Jakọbu 2:19) Eyin mí jlo dọ Jiwheyẹwhe ni kẹalọyi sinsẹ̀n-bibasi mítọn, mí ma dona yise poun dọ ewọ tin, mí sọ dona nọ wà nuhe e dọ lẹ.

16. Naegbọn mí dona gbẹ́ sinsẹ̀n lalo dai?

¹⁶ Na Jiwheyẹwhe nido kẹalọyi sinsẹ̀n-bibasi mítọn, mí dona gbẹ́ sinsẹ̀n lalo dai. Yẹwhegán Isaia wlan dọmọ: “Mì tọ́n sọn ṣẹnṣẹn etọn, mì hẹn mìde do wiweji.” (Isaia 52:11; 2 Kọlintinu lẹ 6:17) Enẹwutu, mí dona gbẹ́ nudepope he tindo kanṣiṣa hẹ sinsẹ̀n lalo dai.

17, 18. Etẹwẹ nọ yin yiylọdọ “Babilọni Daho lọ,” podọ etẹwutu e do yin onú niyaniya tọn nado gbẹ́ ẹ dai?

¹⁷ Etẹwẹ nọ yin sinsẹ̀n lalo? Eyin sinsẹ̀n de nọ plọnmẹ nado sẹ̀n Jiwheyẹwhe to aliho he jẹagọdo nuhe Ohó etọn dọ mẹ, be sinsẹ̀n lalo wẹ. Biblu ylọ sinsẹ̀n lalo lẹpo to pọmẹ dọ “Babilọni Daho lọ.” (Osọhia 17:5) Etẹwutu? To Singigọ he wá aimẹ to azán Noa tọn gbè godo, sinsẹ̀n-nuplọnmẹ agọ̀ susu jẹ gbigbayipe ji to tòdaho Babilọni tọn mẹ. Nuplọnmẹ agọ̀ enẹlẹ wá gbàpe gbọn aigba blebu ji. Di apajlẹ, omẹ Babilọni tọn lẹ nọ sẹ̀n yẹwhe atọ̀n-topọ lẹ. To egbehe lọsu, sinsẹ̀n susu nọ plọnmẹ dọ Atọ̀n-to-Dopomẹ wẹ Jiwheyẹwhe yin, amọ́ Biblu dohia hezeheze dọ Jiwheyẹwhe nugbo dopo gee wẹ tin, yèdọ Jehovah, bọ Jesu yin Visunnu etọn. (Johanu 17:3) Omẹ Babilọni tọn lẹ sọ yise dọ nude nọ tọ́n sọn gbẹtọ mẹ bo nọ zindonukọn nado to gbẹnọ to okú godo, podọ adà he nọ tọ́n enẹ sọgan jiya to zòmẹ. Lalo wẹ nuplọnmẹ enẹ.—Pọ́n Nudọnamẹ Dogọ 14tọ, 17tọ po 18tọ po.

¹⁸ Jiwheyẹwhe ko dọ dọdai dọ sinsẹ̀n lalo lẹpo na yin vivasudo to madẹnmẹ. (Osọhia 18:8) Be a mọ nuhewutu e do yin onú niyaniya tọn nado tọ́n sọn sinsẹ̀n lalo mẹ ya? Jehovah Jiwheyẹwhe jlo dọ a ni yawu wàmọ whẹpo whenu nido fẹ́.—Osọhia 18:4.

19. Eyin a de nado sẹ̀n Jehovah, nawẹ e na penukundo gowe gbọn?

¹⁹ Eyin a magbe nado tọ́n sọn sinsẹ̀n lalo mẹ bo sẹ̀n Jehovah, họntọn kavi hẹnnumẹ towe delẹ sọgan nọma mọnukunnujẹ nudide towe mẹ, podọ yé tlẹ sọgan hẹn nulẹ vẹawuna we. Amọ́, Jehovah ma na jo we do. A na lẹzun apadewhe whẹndo lẹdo aihọn pé de tọn he bẹ gbẹtọ livi susu he yiwanna ode awetọ nugbonugbo lẹ hẹn, podọ a na tindo todido nado nọgbẹ̀ kakadoi to aihọn yọyọ Jiwheyẹwhe tọn mẹ. (Malku 10:28-30) Vlavo delẹ to họntọn gọna hẹnnumẹ towe he diọnukunsọ nudide towe nado sẹ̀n Jehovah lẹ mẹ sọgan wá de nado plọn Biblu to godo mẹ.

20. Naegbọn e do yin nujọnu dọ mí ni nọ sẹ̀n Jiwheyẹwhe to aliho he jẹ lọ mẹ?

²⁰ To madẹnmẹ din, Jiwheyẹwhe na de kanyinylan lẹpo sẹ̀ bọ Ahọluduta etọn na dugán do aigba ji. (2 Pita 3:9, 13) Ojlẹ awuvivi tọn de wẹ enẹ na yin! Mẹlẹpo wẹ na nọ sẹ̀n Jehovah to aliho he ewọ jlo mẹ. Enẹwutu, nujọnu wẹ e yin dọ a ni yinuwa todin nado nọ sẹ̀n Jiwheyẹwhe to aliho he jẹ lọ mẹ.