Nuhe Jesu Plọn Mí

Gando Sinsẹ̀n-Bibasi Nugbo Go

Be Jiwheyẹwhe nọ kẹalọyi sinsẹ̀n-bibasi wunmẹ lẹpo ya?

▪ Onú mẹhe sinsẹ̀n lalo ko klọ lẹ tọn nọ blawuna Jesu. E na avase “gando yẹwhegán lalo lẹ go he nọ wá . . . to avọ̀ lẹngbọ tọn mẹ, ṣigba ohla nuwledutọ lẹ wẹ yé to homẹ.” (Matiu 7:15) Be a ma doayi e go dọ mẹdelẹ nọ yí sinsẹ̀n zan nado wà nuylankan lẹ ya?

Jesu hodẹ̀ na Jiwheyẹwhe dọmọ: “Ohó towe wẹ nugbo.” (Johanu 17:17) Enẹwutu, Jiwheyẹwhe ma nọ kẹalọyi sinsẹ̀n-bibasi he ma nọ hodo nugbo Biblu tọn lẹ. Abajọ Jesu yí hogbe Jiwheyẹwhe tọn he tin to Isaia 29:13 mẹ lẹ zan na sinsẹ̀ngán yẹnuwatọ lẹ dọmọ: “Ovọ́ mẹ wẹ yé to sinsẹ̀n-basi hlan mi te, na gbedide gbẹtọ tọn lẹ wẹ yé nọ plọnmẹ taidi nuplọnmẹ lẹ.”—Matiu 15:9.

Be sinsẹ̀n nugbo de tin ya?

▪ Whenuena Jesu dọho po yọnnu Samalianu he yin kiklọ gbọn sinsẹ̀n lalo dali de po, e dọna yọnnu lọ dọmọ: “Mìwlẹ to nuhe mì ma yọnẹn sẹ̀n . . . Sinsẹ̀n-basitọ nugbo lẹ na nọ sẹ̀n Otọ́ to gbigbọ mẹ podọ to nugbo mẹ, na nugbo tọn, omẹ mọnkọtọn lẹ dín wẹ Otọ́ te nado nọ basi sinsẹ̀n hlan ẹn.” (Johanu 4:22, 23) E họnwun dọ hiẹ sọgan mọ sinsẹ̀n nugbo lọ.

Jesu dọmọ: “Yẹn ma nọ wà nudepope sọn ojlo ṣie mẹ; ṣigba yẹn to onú ehelẹ dọ kẹdẹdile Otọ́ lọ plọn mi do.” Enẹwutu Jesu yọnẹn dọ sinsẹ̀n he emi zedai wẹ yin sinsẹ̀n nugbo dopo akàn lọ. (Johanu 8:28) Abajọ e dọmọ: “Yẹn wẹ aliho lọ, nugbo lọ po ogbẹ̀ po. Mẹdepope ma nọ wá Otọ́ dè adavo gbọn yẹn gblamẹ.” (Johanu 14:6) Whenuena e yindọ aliho dopolọ mẹ wẹ sinsẹ̀n-basitọ nugbo lẹ nọ dọnsẹpọ Otọ́ lọ te, yé dona yin kinkọndopọ to sinsẹ̀n nugbo dopo mẹ.

Nawẹ hiẹ sọgan yọ́n sinsẹ̀n-basitọ nugbo lẹ gbọn?

▪ Mẹhe nọ hodo Jesu Klisti lẹ wẹ nọ yin yiylọdọ Klistiani. Lẹnnupọndo onú ẹnẹ he Jesu wà bọ hodotọ etọn lẹ lọsu dona wà ji.

 1. Jesu Klisti hodẹ̀ na Jehovah dọmọ: “Yẹn ko sọ hẹn oyín towe zun yinyọnẹn.” (Johanu 17:26) Klistiani nugbo lẹ gbẹ́ to mọwà to egbehe.

 2. Jesu dọyẹwheho gando Ahọluduta Jehovah tọn go bo do devi etọn lẹ hlan sọn whédegbè jẹ whédegbè nado wà nudopolọ. E dọmọ: “Tòdaho kavi gbétatò depope he mẹ mì biọ, mì dín mẹhe jẹ to finẹ mọ.” To nukọn mẹ, e dọna hodotọ etọn lẹ dọmọ: “Enẹwutu, mì yì bo hẹn gbẹtọ lẹ sọn akọta lẹpo mẹ zun devi lẹ.” (Matiu 10:7, 11; 28:19) Hiẹ sọgan yọ́n Klistiani nugbo lẹ to egbehe po awubibọ po na yé gbẹ́ to azọ́n dopolọ wà.

 3. Jesu gbẹ́ ma nado doalọ to tonudidọ mẹ. Enẹwutu, e dọ gando hodotọ etọn lẹ go dọmọ: “Yé ma yin apadewhe aihọn lọ tọn . . . kẹdẹdile yẹn ma yin apadewhe aihọn tọn do.” (Johanu 17:14) Gbẹtọ lẹ dona yọ́n sinsẹ̀n-basitọ nugbo lẹ taidi mẹhe ma nọ doalọ to tonudidọ mẹ.

 4. Jesu nọ do owanyi mẹde-yido-sanvọ́ tọn hia mẹdevo lẹ. E dọmọ: “Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin, eyin mì tindo owanyi to mìdelẹ ṣẹnṣẹn.” (Johanu 13:35) Klistiani nugbo lẹ nọ hò ode awetọ tọn pọ́n bo ma nọ doalọ to awhànfunfun mẹ.

Nawẹ sinsẹ̀n-bibasi nugbo sọgan hẹn ale wá na we gbọn?

▪ Nado basi sinsẹ̀n nugbo, hiẹ dona yọ́n Jehovah ganji whẹ́. Oyọnẹn Jiwheyẹwhe tọn na gọalọna we nado duvivi gbẹzan dagbe hugan de tọn bọ hiẹ nasọ tindo owanyi sisosiso na Jiwheyẹwhe. Jehovah dopagbe ogbẹ̀ mavọmavọ tọn na mẹhe yiwanna ẹn lẹ. Abajọ Jesu do dọmọ: “Ehe wẹ ogbẹ̀ madopodo, dọ yé ni to vivẹnudo zọnmii nado yọ́n hiẹ Jiwheyẹwhe nugbo dopo kẹdẹ lọ.”—Johanu 17:3.

Nado mọ nudọnamẹ dogọ, pọ́n weta 15tọ owe ehe tọn, Etẹwẹ Biblu Plọn Mí Taun? he Kunnudetọ Jehovah tọn lẹ zinjẹgbonu.

[Yẹdide to weda 20]

“Mì họ́ mìde gando yẹwhegán lalo lẹ go he nọ wá mì dè to avọ̀ lẹngbọ tọn mẹ, ṣigba ohla nuwledutọ lẹ wẹ yé to homẹ.” —Matiu 7:15